《喂啲字有聲嘅》陳心遙
《信報》2017年9月6日《視線所及》專欄
「落街冇錢買麵包，借錢又怕老婆鬧。」大概六十後嘅朋友睇到會自動跟住唱。
「無言踎喺街邊凝望雨勢急也亂，似個瘋漢四處偷看食飯擰轉面。」七十後嘅應該唔會覺得陌生。
「姣婆掉眼淚，是叔公不瞅佢，佢阿娘話佢衰女，最怕二伯公知道，又話要打佢。」八十後又會否琅琅上口？
「條女很清楚收兵好過嫁人，真的身份不過女神。」會唔會有九十後唔識得唱。
到咗人人上網嘅現在，要分嘅唔係年紀，係上網習慣。農曆七月，你會唔會都識得唱：「盂蘭節氣魄更壯，盂蘭盛會心中不必驚慌。」好多年輕人呢幾日都唱得出嘅歌，其實係1976年羅文演唱嘅作品。
可能你覺得，上面嗰啲改詞已經傳誦多年，識得唱又幾出奇呢。咁呀？做個測試好冇？
「人人含住一鑊泡，兩手抐實西瓜刀，人人全日依嘩鬼叫，赤膊上陣，喉住個煲。」你會唔會已經跟住唱咗一次？我啱啱亂寫，保證係全新嘅改詞嚟。
所以當有人話，網上惡搞都可能犯法嘅時候，我個心離一離，係咪講得出口嘅人唔了解粵語歌文化，定係根本就係針對講粵語嘅人呢？神州大地以至全世界，大概只有呢度啲人咁鍾意改詞，而且改咗幾十年都未厭。唔使伴奏、唔使樂譜，只係寫啲字出嚟就會有人識得跟住唱，因為粵語一字一音而且暗藏音階。
問題來了，如果唔使錄音錄影唱出嚟，寫出嚟都有問題，咁改幾多先算唔OK？一句算唔算已經好唔莊重呢？做過測試，我只說一句：「荷里活有間大酒店……」咁你會唔會自動識得駁落去，咁樣我哋係咪已經係共犯？
到時點樣蒐證呢？首先要確認疑犯識得原曲。要測試人唔識就容易啫，點測試人其實係識扮唔識呢？用測謊機？定係法官用心證就可以，我話你冇理由唔識嘅⋯⋯
跟住，點先知疑犯喺討論區寫嘅其實係歌詞呢？係咪啱字數就叫改咗？定係十粒音入面七隻字啱音就鋤得入呢？咁我哋呢啲填詞人要唔要日日喺法庭幫手做控方證人去指證罪犯呢？
贊成要尊重；同埋贊成要去立法捉啲唔尊重嘅人去罰款坐監係兩回事嚟。就好似尊師重道，大大話話都講咗幾千年，亦都冇人反對，但除咗老師做好本分，春風化雨，仲可以點保證同學仔返學放學都對老師心懷敬意呢？幽默，係化解仇恨對立嘅良方。俾人拎出嚟講下笑，無傷大雅，反而更會令人敬重。唔知幾時，佢哋先學識呢個道理呢？
#喂啲字有聲嘅 #幾許瘋語 #姣婆掉眼淚 ＃收兵好過嫁人 #義勇軍進行曲 #國歌法 #惡搞歌詞 #信報 #陳心遙
伯公伯婆歌詞 在 客家委員會Hakka Affairs Council - 到底豬肉和楊桃是什麼關係 ... 的推薦與評價
很多鄉親朋友都聽過客家童謠「伯公伯婆」，裡面有一段歌詞是這樣子唱：「豬肉料像楊桃...」。 相信很多人從小唱到大，都還是不知道到底為什麼，豬肉會像楊桃， ... ... <看更多>