有兩單教育界新聞好想講一講：
第一單係德信校長突然停職一事。由於德信學校之前年年有搞六四集會，所以有好多黃絲好自然就會走去聯想呢個一定係政治迫害：但我當日就一如以往，查咗一啲基本資料後，就好小心咁保持距離避免炒車：
首先，呢位郭超群曾經獲頒教聯會嘅優秀教師獎（國情教育組）：教聯會簡單黎講就係土共搞嘅教協，郭校長竟然可以獲得當中嘅「國民教育組」殊榮：就算咁樣唔代表郭校長係藍，至少都係兩邊都撈得開。
然後德信學校嘅六四集會聽講響郭校長上任之前已舉行，郭校長最多只係延續呢種傳統；反而佢佢任內同時又有舉辦國家安全日、全民國家安全教育日、國家憲法日。
講咁多，並唔係要質疑郭校長嘅政治立場，而係至少佢係響處理政治問題上，並唔係一面倒偏向「黃絲」，所以我係好難相信如果要政治迫害的話，會搵佢黎祭旗。相反藍屍話佢係「黑暴」校長，亦都係完全唔查清楚佢背景之下嘅尻噏。
至於今次郭校長被控貪污案涉及將校內試卷洩漏比補習社，好多人都覺得匪夷所思：因為小學考試試卷其實價值有限，作為小學校長高薪厚祿，亦毋須要同補習社串通──講真，一間蚊型補習社，又可以比多幾多賄賂你？
但係單案係咪冤枉係一件事，係咪因為郭校長搞六四周會被老屈又係另一回事。首先今年德信學校已停辦六四週會（先唔好講政治壓力啦，而家武肺搞到學校一鑊粥，邊得閒搞呢啲嘢），其次校董會要迫走校長係有一萬種方法，最簡單唔同佢續約就得；搞到要同廉署夾計老屈佢實在太誇張，而且就算係老屈都未必一定同政治有關。
所以我都幾相信呢單嘢係政治迫害嘅人應該係炒車。希望唔會變成另一單林子健事件啦
延伸閱讀：究竟有幾多教師會移民？／香港教師唔聽話所以要輸入大陸教師？有無天真咗啲？
https://www.patreon.com/posts/52459091
優秀教師獎 在 優秀教師選舉 的推薦與評價
1. 香港賽區晉級賽現金獎勵- 金獎港幣5000元；銀獎2000元；銅獎1000元 · 2. 專業星級評審- 英皇娛樂藝人泳兒Vincy、英皇娛樂首席市場及推廣總 · 3. 由北京電視台提供音樂大師 ... ... <看更多>