《內堂月結》
又黎到內堂既月結,先講成績,其實只係打個和,又輸俾恆指。但如果你有份入市(尤其係高追左科技股但係又唔識止蝕)既話,你應該知道:打和已經係執返身彩,輸得金既其實係大有人在。既然無賺咩大錢,重溫月中既部署都無乜意義,反而想同大家分享下心情。
今個月,我既心情起伏好大,上半個月都好唔開心、好掙扎。大家都知道:我自農曆新年前(年三十晚都仲出文)已經同大家講個市升得好假,從指數到騰訊(700)微盟(2013)港交所(388)都响成交同資金流,仲有RSI方面好背馳,我真係追唔落手;仲有既就係契媽股移卡(9923)眾安(6060)好醫生(1833)咁大隻既野都可以一日升幾成,我直頭覺得個世界係癲左!
但係作為操盤手、領軍人既我好難受,我明知道追唔過,但係唔追既話我跑輸,仲要係一度較大市跑輸10%!我覺得咁樣好醜,好對唔住內堂既人,我更加怕既係到月底佢地會俾人笑,笑佢地响牛市跟著個唔識贏既傻仔!到最後,我當然係無追。我相信做人做事,始終要有自己既宗旨。我唯有不斷捐窿捐喇,透過一些比較投機既資源股黎同大家博,想辦法响月底前衝一浸。
因為孳息,因為陳茂波,個市响月底前終於都急回。雖然講出黎好似好冷血,但我真心覺得「本應如此!」我既心情好左好多,並唔係因為我同大市既距離收返窄,而係因為當我見到市上有幾多既人日日俾人切一忽忽肉,日日血流成河,但係內堂既粉絲我保得住!我曾經感到羞恥,但係當刻既我好感恩。我唔覺得自己好叻,但我會因為我一直叫大家要理性而覺得我幫到人!
從孳息不斷上揚,美國既納指同香港既科指都出現轉弱既情況,我可以預計得到三月個市都唔會係點好。艱難既日子仲有排挨,但係我會撐住,因為响我既背後,仲有成千幾人睇我頭。至於真係坐左新經濟股既朋友,我只想贈你地一句:持盈保泰,最緊要留得青山在。
💪🏽
#內堂 #領軍 #WhatsApp群組
內堂whatsapp群組 在 香港股評人譚朗蔚 Facebook 的最佳解答
《內堂月結》
今個月既成績一般,叫做唔洗輸,跑輸大市。幾隻計左數既功臣有港視(1137)賺12%,移卡(9923)賺18%,中金(3908)賺5%,海豐(1308)賺16%等等;至於止蝕既就有東風(489)輸2%,龍工(3339)輸2%。
同大家分享一下心路歷程:恒指本來有3000點既升幅,我都一路咁追。曾經响最高峰既時候,恆指升10%,組合升8%。高位我有減貨架,套現左四袋cash,只係留低既股份唔生性,移卡又早走左,否則一定會賺多少少。
不過,我既字典入面無早知既。對應一個咁急既跌市,首先一定唔可以自亂陣腳。唯有同自己講:唔好將戰線局限响月尾,否則只會做多錯多。好好利用套現出黎既四袋cash,一路跌一路吸,期待下個月做個好既成績俾內堂。
💪🏽
#內堂 #WhatsApp群組 #模擬倉
內堂whatsapp群組 在 香港股評人譚朗蔚 Facebook 的最讚貼文
《內堂月結》
今個月要講既野唔多,因為我後十日都收爐喇,放軟晒手腳,可幸既係我打破左過往逢放假個市必冧,返黎都要執屎既宿命。終於都打破左,簡直係還得神落!全個月既組合表現得微利,跑輸俾個市,但係基於我讓半臂,我相信下星期一復工,就會乜都返晒黎!
總結今個月既代表作係九毛九(9922)賺一成,雖然留耐少少會賺多多,但係我從來唔講「早知」既。目前領軍既個股,我隻隻都咁有信心。總結全年,組合賺超過三成,遠遠跑贏左恒指。其實仲可以進步架,因為年底好多野都起動。出年啦,出年一定會更好!
💪🏽
#內堂 #領軍 #WhatsApp群組