［自由無價：幾億港紙嘅逃亡大計］原本想寫都唔得閒。2008年年尾就有馬多夫，經濟學人話，完全係為當年一眾大鑊嘢劃上完美嘅句號，實在諗唔到有乜更適合去埋尾。2019年尾就有Carlos Ghosn
有關Ghosn棄保潛逃嘅細節，媒體都報足成個星期，大家應該睇過。勁過孟晚舟，護照都畀人沒收晒居然都出到境，仲應該冇國家級力量幫佢（當然有人幫，佢有錢，之後會提）。
而佢應該唔係偷渡，係坐私人飛機！護照都冇點上到機？原來根本冇佢出境紀錄。一係用假護照，但而家主流講法話運樂器咁塞咗佢入個箱度。
樂器唔使過安檢？咁就問返關西機場嘅人啦。呢個位就關鍵。聽聞幫Ghosn嘅人睬晒線，睇咗十幾廿個機場（你睇人地幾專業），最後係揀中關西機場走，就係貪佢啲友夠求其（或者易買通？）。所以結果Ghosn係在東京品川坐山陽新幹線去新大阪，之後經關西機場走嘅。
諗諗下，其實就算佢用假護照都幾難出到境，畢竟Ghosn在日本其實好Q出名，樣又易認。當年成功拯救日產後，日本人當佢神咁拜，長期上晒日本啲雜誌漫畫之類，好難大搖大擺咁走。但坐火車就可以蒙面或者戴黑超之類。
另外其實諗下，呢壇大計，都使好多錢。三百萬港紙機票事少，另外仲有成添人幫佢做嘢，又好可能要買通某啲人，畀安家費。仲有凈係保釋費都成億港紙！破咗日本紀錄。你諗下，香港好似史上最勁都只係充公幾千萬保釋金，郭炳X嗰時都只係一兩千萬。
所以我估話用兩億，都應該低估。點都係洗咗幾億。唔係唔計保釋金下話。
你會話，佢有錢冇所謂。真係？我估都好肉痛。Ghosn雖則傳奇，但都不過係傳奇CEO，高級打工仔，同真富豪（例如郭炳X）仲好有距離。Ghosn有幾錢身家唔知，之前見出面估話10億港紙，咁都話多數低估，你咪當可能二三十億。但唔會係去到百億港紙身家嗰啲級數。
咁，都真係成份身家冇咗10%咁滯，甚至更多。但，自由無價嘛。
又，Ghosn講咩日本司法制度不公之類，當然係多Q餘。固然日本司法畀人插咗唔少，你睇日劇睇戲都見，極高定罪率，屈到你認罪為止，又冇乜權利可言。但，真係覺得日本唔公平嘅，你總唔見Ghosn走去法國投案！
講到尾，自己會被判罪，咪不公義咯。黎巴嫰就最公義啦。
