我係一條大懶蟲（上）
我叫阿夫，係一個……靚仔。
唔好誤會，我唔係特登炫耀我嘅美貌，只不過，除咗靚仔之外，我真係冇咩太特別嘅優點。
我想做明星㗎，可惜我唔識做戲，唱歌一般，跳舞唔得，個人仲有啲懶。
後來，我做咗Model，算係充份利用咗我嘅美貌。
不過我唔係好勤力，唔係成日搵job，又唔係好努力增值自己，所以都唔係好出名。
直到有一日，之前合作過嘅一間廣告公司聯絡我，話有間大公司要開一個叫《製造花美男》嘅真人騷，搵99個男仔參賽，希望打造一個一線嘅男團。
我胡裡胡塗咁去咗Casting，胡裡胡塗咁中咗Casting，成為其中一個練習生。
成為練習生之前，佢哋要求我簽一份合約。
份合約我望咗幾眼，大概係講要配合訓練，要使用我哋嘅肖像同片段咁，都係啲基本嘢啦，我都冇詳細睇。
我諗，做練習生應該好簡單，都係學吓唱歌跳舞，學到咪學，學唔到咪算囉，我都想試吓新嘅生活。
《製造花美男》嘅訓練好快開始，訓練過程都會被拍攝。
拍攝就拍攝，拍攝唔係問題。
問題係，我哋被集體送到一個宿舍裡面，宿舍冇電腦冇wifi，連我哋嘅手機都俾製作單位沒收埋。
只有一個座機電話，畀我哋聯絡屋企人。
其他PSP、Switch啊，當然唔會有啦。
娛樂已經冇晒㗎啦，仲要一日到黑都係訓練，唱歌跳舞演戲健身……
連一日三餐都係「專業營養師指導，可以令我哋有最好嘅身型同皮膚」嘅食物，總之就好難食。
而且，我就算想同身邊嘅同學傾訴吓，佢哋都置若罔聞。
「今日教跳舞嗰個係大師嚟㗎，我哋一定要努力學啊。」
「有明星教唱歌！我每朝要早一個鐘起身練氣，終有一日，我要有佢嘅歌喉。」
「唉，尋日食多咗個蘋果，今日條腰肥咗0.2cm。」
所有人都對訓練非常滿意，嚴格要求自己，我係唯一嘅例外。
更令我崩潰嘅係，比賽中係有小組表演。
由於我嘅歌喉、舞技同態度，冇人肯同我一組。
結果要節目組出面，先將我夾硬塞入某一組裡面。
組員都好關心小組表演嘅成績，所以逼我一定要參加訓練。
我想偷懶都俾佢哋鬧，俾佢哋指指點點，好似我係害群之馬咁。
總之，個個都想出線成為男團，再做埋明星。
我都想做明星，但我唔想咁辛苦囉。
我諗住嚟影吓相，上節目講幾句，跟住可能紅咗，咁之嘛。
如果咁辛苦先做到明星，咁我寧願返屋企，做番個十八線Model仔啦。
講到尾，我就係「做明星嘅慾望」太低，唔足以令我披荊斬棘咁去做。
所以我果斷地決定，退出比賽！
但當我同工作人員講要退賽，佢哋拎出我當日簽嘅合約，指住某個條款話，退賽可以，但要交違約金。
一個我根本負擔唔起嘅數額。
合約上甚至有寫明，出席嘅訓練同拍攝少過幾多%嘅話，就當退賽，又要交違約金。
我幾乎想喊：「咁我幾時先可以走啊？」
「被淘汰咪可以走囉。」工作人員答。
因為佢呢句說話，參賽以來，我第一次研究比賽嘅規則。
研究如何被淘汰。
下集：https://bit.ly/36aGOIc
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我係一條大懶蟲
