［隆重登場］南方東英3033，全球第一隻追踨「港版納指」嘅ETF
1. 今日剛好，恒生科技指數，「港版納指」（都係呢個名好聽啲）滿月。其實係滿月多一日，是但。隻指數表現就相當好，當然你見官方講返年初至今升五成幾，跑贏正版納指。但我覺得幾時都係出世先見真章，咁由推出（上個月）到而家，「港版納指」都升7%，固然跑贏恒指同國企指數，但亦跑贏美股道指同標普指數，只係跑輸美國嘅納指，至少呢隻「港版納指」冇見光死。主要帶動嘅係京東9618，美團3690，小米1810，金山3888（炒SAAS軟件即服務喎）同比亞迪285。
2. 但唔止一次提過（https://fbook.cc/3Eec），你個指數點巴閉點日日升冇用架喎，關人鬼事？最緊要有產品，有ETF有基金有期貨有指數咁，就掂。
3. 結果真係快手，剛好一個月，就已經有埋新產品面世，都讚下各方面（包括港交所）十分有效率。
4. 今日打響頭炮嘅係南方東英嘅3033。個slogan係「科技勢頭 三三不盡」，幾好，至少記得個冧把，係成功嘅一半。十分簡單，隻嘢就係追蹤返「港版納指」，全球第一隻追蹤。
5. 對你地嚟講（拿，強調，我冇同意呀下），其中一個賣點係入場費低。應該千幾銀一手。不過我十分認真，唔會介意呢啲嘢，除非你話一手去到十幾廿萬啦。否則，一手幾錢，並不重要。唔好忘記你要畀交易費用，我當你零佣都好都要有交易費。所以係買就唔好一手咁買啦。
6. 講真，如果一兩皮嘢閒錢都冇，我勸你真係打好份工儲多啲錢先，唔好買股票。而你買一兩皮嘢，就點都平過（我指總洗費）你最大嗰幾隻每樣買一手（段估你唔會買三十隻）。應該最大五隻你買晒，都要十幾萬了。咁ETF的確做到用少啲錢而買到幾隻嘢嘅效果。
7. 另外，之前篇文咪講過領航撤出香港（https://fbook.cc/3Eee），你話香港ETF冇得做我唔同意。南方東英在香港ETF市場份額夠高，你自己望下十隻最多成交嘅ETF，佢地應該佔咗四至六隻（日日唔同啦），唔使擔心流通量問題
8. 仲有關於個「港版納指」嘅兩樣嘢想講一講（＊）。首先係快速納入機制。大家都知嚟緊仲會有啲巨型科技股上市，亦都有啲傳會由美國回流。咁你問，如果隻巨無霸上咗市，但啱啱過咗季檢，我咪等多三個月，眼白白睇住個機會冇？係唔會的，只要隻嘢上市嗰日市值高過指數頭十大，就會十個交易日後快速納入，唔使等三個月。
9. 仲有，美國嘅納指，其實從冇講過係「科技指數」，咪講過咯，星巴克同百事都係納指成份股，有幾高科技？但「港版納指」就唔止睇市值，首先要個R&D研發開支佔收入超過5%，另外仲要收入增長有10%，杜絶咗啲改個名就扮科技嘅公司。
10. 其他詳情，可以睇返新聞（https://bityl.co/3Ext）。
11. 最後，都有人問隻嘢個2%追蹤誤差Tracking Error．呢個其實都幾technical，但簡單講，個數字應該會係dynamic嘅，隨住隻嘢個規模而變。例如同樣係佢地嘅2822，最初都係寫2%，但實際係做到1.28%左右。
（＊）都係朋友話我知我先知，所以幾時都識多啲勁人。idea係好東西，錢兩個人分唔會多咗，但知識兩個人分就大家都識多咗嘢。你識咗我，我識咗佢，於是你地都知埋佢知嘅嘢，幾咁好
—————————————————————
Ivan Patreon 狼耳街華人，一個星期至少三篇，一個月一舊水唔使，兩星期已超過400人訂，仲有兩篇免費試睇：https://bit.ly/31QmYj7
巴克球正版 在 【阿鬼日常】益智玩具之神秘幾合磁力學- 巴克球BuckyBall 的推薦與評價
巴克球 是碳原子C60的俗稱，目前常指影片中的強力磁鐵珠珠類似樂高可以天馬行空的排列組合，做出各式各樣的形狀第一次玩，摸不透他的磁力方向感， ... ... <看更多>