小小豬恨嚟左好耐，終於就趁尋日嘅學校假期帶佢嚟玩返轉！(因為上次路經俾小小豬知道平日可以無時限玩，咁佢就緊係好樂意咁等啦！)
入面其實地方唔算話大，而且玩嘅種類都唔算多，不過小小豬依個Lego控一入到去就已經雙眼發光，我地係12:00左右開始入去，玩到差唔多五點先走，完全係盡情地去玩。
我個人覺得最吸引就一定係香港大街小巷嘅Lego，有齊港九新界同離島嘅特式地標，小小豬話佢最鐘意就係馬場(因為有得玩馬仔比賽)，另外灣仔地標兼地鐵佢都好鐘意(好明顯係情意結..哈哈)。另外仲會定時有日頭同夜晚嘅轉變，而且仲會有少少投影煙花效果，所以都真係好有Feel，單係依度小小豬都企定定睇左好耐，仲研究係點砌添。
有一個創意工作室係俾小朋友跟職員哥哥砌Lego，我地一入場就去拎籌，所以都叫做等一節就可以玩到，小小豬就學整左個一個三層心心。小小豬入去學砌嘅時候，我又可以休息20分鐘啦…哈哈！
仲有兩套4D 動感體驗卡通片輪流播，我地兩套都睇晒，小小豬話都唔錯，一見泡泡降落嗰一刻全場小朋友都失控添。
遊戲方面，佢有兩個大型機動遊行，槍射走魔鬼嘅古堡歷險同踩腳踏升降轉嘅魔法轉盤。其實都係啲簡單遊戲，唔算太刺激，好似比較啱細個啲嘅小朋友，不過因為人唔多，所以小小豬都唔知玩左幾次。另外仲有個超小型playhouse，見冇人小小豬入左去跑左轉。
另外仲有幾個場地俾小朋友砌Lego，有砌車嘅、砌大廈嘅，仲有自由任砌嘅，依幾個位亦都係小小豬留得最耐嘅地方，仲捉住我齊齊砌靚車(好在我都鐘意砌Lego，所以就嚟陪下佢啦！)
老實講.....其實$240一位入場費(大小同價)我都真係覺得有啲貴，而且玩嘅都真係唔算多，不過……鬼叫小小豬鐘意，咁我又一早答應會帶佢嚟，小朋友唔呃得嘛，所以貴貴地都嚟一次。
係回程嘅時候，小小豬突然好認真咁話：我今日真係玩得好滿足好開心，之後我會俾心機溫習，盡力考好個試！ (媽媽我聽到都真係老懷安慰，即刻覺得依$480好值得俾…哈哈哈)
LEGOLAND Discovery Centre Hong Kong 香港樂高探索中心
新界 playhouse 在 香港親子好去處｜新界篇｜新裝修親子playhouse ｜$100狂放電 的推薦與評價
香港親子好去處｜ 新界 篇｜新裝修親子 playhouse ｜$100狂放電｜石門親子遊樂場☸️今日全日要單拖湊小芊出面又鬼死咁熱 有冇啲又係室內又安全又有嘢飲 ... ... <看更多>