留學生活注意！日本租房子外國人可提防被騙
最近我發現我以前租屋比貴咗錢！
原來搵到良心公司可以免禮金收平好多。
今日好簡短咁同大家分享3樣喺東京租屋嘅一啲小秘密。因為搞完真人騷，有個喺東京開地產公司嘅香港人聯絡返我問我洗唔洗幫手，之後我發現原來我以前喺東京租屋比嘅初期費都比人食咗好多水。有幾樣嘢想分享返比啲準備來日本租屋嘅人知幫大家慳錢。
第一，其實有好多屋都係免禮金。
一開頭嚟日本租屋嘅人相信都知道，喺度租屋要比好貴初期費，大概會係一個租金乘3.5左右，點計呢？以呢間屋為例。11萬羊租、敷金（即係按金）11萬羊、禮金又11萬羊，夾埋啲火災保險同保證公司料金都差唔多要比4個月租錢先入住到。
一開頭我乜人都唔識喺到以為禮金係一定要比，因為係日本文化，要白白送多舊錢比屋主多謝佢比間屋我住，但原來有好多屋都係可以免咗佢，只要你遇到個良心中介幫你同屋主傾。但問題嚟啦，有時有啲中介會同你講，因為你係外國人所以要比多一個月禮金等等加錢先可以住，當然有時係屋主嘅意願，但都有機會agent叫管理公司加多個月禮金當係佢agent自己嘅佣。呢啲情況大家要注意。
第二，注意初期費用可以縮減。
因為呢位香港朋友以前比人呃過，所以當佢自己做老闆幫人搵屋嘅時候會想做返個良心中介。但問題又嚟啦，如果佢幫屋主收嘅錢係同房屋物件列表列嘅一樣，仲要無埋禮金，咁佢點賺錢呢？
其實好簡單，呢個東京有咁多屋放租，agent同地產公司唔會間間都推，而屋主嘅屋想推到出去就同你喺ig shop想賣到件衫出去一樣，要落廣告。所以如果真係同你fd過打band嘅話，即使個中介唔收你comission都可以收到廣告費食到飯，但當然正常情況下都會收comission搵食，但唔會多過一個月。而我想表達嘅點係如果大家搵屋時覺得中介報價好費，就記得要小心。我嘅建議係你可以用同一間屋問幾個中介去睇吓個初期費用係咪一樣，盡量避免比人湯多一筆。畢竟留學生嘅我都經歷過死慳死抵嘅生活，希望可以幫到大家慳得一筆得一筆。
以上有提到嘅保證公司呀災保險呀等等初期費包嘅字眼有咩唔明都可以ig問我，甚至你搵到間房想知係咪可以再平啲都可以隨時搵我幫手。喺香港報留學個陣跟中介搵埋屋我自己就非常唔建議，因為至少會比佢哋食兩浸水，要搵我朋友幫手嘅直接問我都無問題。今日嘅留學生活提醒去到呢度，希望大家可以分享比你嘅朋友等佢小心唔好好似我咁嚟到就蝕咗一筆，始終留返啲錢生活會比較好。下條片見！88
Follow ERNEST 緊貼日本狀況：
https://www.instagram.com/ernest_pch/
