自從荷蘭叻之後，土地大辯論又好似靜左落黎，但靜左落黎並唔代表無事發生。真心，我唔知道邊個幫「土地大辯論」改名，但真係改得好好，因為每隔兩三日，總會有啲奇怪學者跑出來發表各種「大便論」。早前有個環保學者，就建議將郊野公園的生態價值較低嘅地方，容許土地作有限度發展，等私人發展商有動機保育。
哦，講到尾，又係想要發展郊野公園邊陲…
首先，我唔明白點樣評定「生態價值較低嘅地方」。單單係一個大欖郊野公園已經有超過170種蝴蝶，佔全港六成半的數目；而馬鞍山郊野公園亦有很多動物，包括早幾個月先俾人當做老虎的豹貓。到底我們怎樣比較蝴蝶和豹貓價值的高低？我們憑什麼去評定物種的「價值」？更不用說，所謂的「價值」一直都在變，數十年前松露也不過是用來餵豬的「發臭的薯仔」，現在倒是一顆難求；百多年前生蠔是平民甚至貧民才會吃的東西，現在倒是中產們的寵兒。大自然裡所有的東西，都有它存在的意義和價值，今天評定為「低生態價值」的廢土，十年後可能卻是難得的瑰寶。歷史和經驗總是在狠狠地恥笑我們，用極度有限的理解能力，把「價值」定到大自然之上注定徒勞無功。
再者，就算有一套「科學的方法」去評定生態價值高低，經過南生圍高濕度超自然「燜燒」、港珠澳填海失誤污染海洋、港鐵「我地話俾你聽OK就得㗎喇」的報告後，我好難認為出到黎嘅生態報告會有幾真確地反映該地區的保育價值。唔好俾我估中，到時候大部份郊野公園邊陲的靚地皮，都會好巧合地被評為「沒有生態價值」。當交俾私人發展商「有限度發展」一塊地之後，就會自自然然有第二塊、第三塊、四塊，不過好彩，應該冇第五塊。點解？成個香港得返幾多郊野公園姐？發展多幾塊就冇晒啦！
其實，我明點解政府咁想搞郊野公園。原因好簡單，郊野公園是英國的「前朝遺物」，衛奕信徑、麥理浩徑全都是港督，對各位愛國人士來說，這些港督還真的是篤眼篤鼻。英國人最聰明的地方，是在於他們會把自己的名字刻在最平民的東西之上，現在香港人從旺角尖沙嘴這些淪陷區去登高避難，第一時間還是想到歷任港督名字的行山徑。
若果大家真的想要救郊野公園邊陲的話，其實唔係無辦法：只要將所有路變成「近平一路」、「近平二路」，保證香港高官們不會也不敢在太歲頭上動土。
#唔好搞郊野公園
#簡稱唔好搞野
#保衛郊野公園
#郊野公園不是選項
#問你怎將風采山野上放縱
#風采依然
