《有乜慘過見到隻曱甴痴住自己眼角？》
藍橘子 x 萬用上帝 X 黎特
是咁的，有一晚我同朋友食完宵夜，搭住架亡命紅Van返屋企，落車之後我喺條無人嘅街道上面行，突然間，眼角望到有個黑影喺我隔離，我立刻加快腳步，行咗一陣我又再瞄一瞄！點知個黑影都係跟到實！我驚到雞咁腳飛奔返屋企，希望可以撇甩佢。
用咗九秒九返到屋企門口，我仲係見到個黑影跟住我！我不斷叫自己冷靜落黎，鬼通常都係突然間彈出黎嚇你一跳，或者慢慢飄來飄去，好少會跑得咁快，喺我隔離嘅應該唔會係跑得好快嘅鬼掛？！
突然，我靈機一動，諗起一個笑話，故事主角同我一樣，有個白影跟住佢返屋企，點知返到屋企照鏡先知原來只係粒白飯痴住咗喺眼角。而我岩岩又食完宵夜，我諗我眼角應該係頭先碟豉椒炒蜆粒豉椒黎！呢個世界邊有咁多鬼吖！我鬆一口氣，打開門即刻行入廁所照鏡，我湊前去一睇。
平滑而流線型嘅身軀，靈活蠕動嘅觸鬚，一飛起就震撼十三億人嘅翅膀，強而有力嘅六隻腳，都徹底咁將佢出賣咗…
你老味！係隻曱甴！
呢隻不知廉恥嘅曱甴竟然由我落車就痴住我眼角，一路跟住我返屋企！！乜你以為你暱嚮度就搵你唔到咩？無用嫁！
情急之下我諗都唔諗就一野拍落去！再次睜開眼一睇…哈哈…哈哈哈，我真係笑咗出黎…
有乜慘過見到隻曱甴痴住自己眼角？就係得返半隻曱甴痴住眼角啊…
唔知係因為我打中咗佢，定係佢畀我嚇親所以走咗入我隻眼度！大佬呢隻係眼黎㗎！係靈魂之窗啊！唔係阿嬌隻眼啊！點會夠位入？所以隻曱甴只係入咗前半身，後半身仲露咗出黎，啲腳鍥而不捨咁掙扎緊…
呢個情況應該點做？我諗最佳方法應該係去醫院。但係諗深一層，我應該去睇普通醫院定係去睇獸醫？去睇急症可能都要等成幾粒鐘，但依照隻曱甴下半身掙扎嘅力度越來越弱，我諗佢好快就會焗死，我聽聞啲曱甴蜘蛛呢類昆蟲個母體一死，肚入面啲幼蟲就會爬晒出黎，咁我隻眼咪變咗佢地成班蟲嘅安樂窩？
唔得！我成廿幾歲人都仲未儲到錢買樓，我唔可以畀佢地一出世就有屋住！我一定要諗個更有效嘅方法！
喺呢個臨急關頭，終於畀我諗到條絕世好橋。聽聞Ironman都係靠佢心口舊反應爐等炸彈碎片唔好流入心臟，或者我都可以搵佢幫我裝一個落隻眼度，等啲曱甴幼蟲唔好爬入去。
由於帶住隻曱甴去機場實在太張揚，所以我打算搭順風車同埋搭船偷渡去美國，而隻曱甴我暫時用條繩輕輕力綁住佢，等佢唔好再爬入去，同埋用支飲管得閒吹啲氣入去等佢唔好焗死，我覺得自己簡直係天才。
足足花咗十幾日時間，我終於黎到美國，喺船上面無野食無水飲，我曬到黑晒不特止，仲甩晒啲頭髮得返下巴啲鬍鬚，不過唔緊要，隻眼先係最緊要，我立即起程去搵Ironman。有睇戲嘅都知道，Ironman係一個好大牌嘅有錢佬，所以我諗住學周星馳喺《賭俠》入面搵睹神學師嘅方法，旁敲側擊咁引Ironman落搭。
首先，我戴住個眼罩遮住隻曱甴，廢事一陣人地見到我以為我係痴線，然後我再成立一個組織，借勢話想組織一隊Team，吸引班英雄黎維護世界和平。估唔到班鬼佬咁有正義感，肯定係平時睇得英雄片多，我不費一分一毫就起咗成個秘密基地出黎，仲有一大班義工特務幫手，最後終於成功引到Ironman入局。
正當我想同Ironman講我左眼養緊隻曱甴之際，突然間個天出現咗個大窿，成群好似昆蟲咁嘅外星人走晒出黎，呢個時候隻曱甴後腳震咗一震，班外星人就好似發現目標咁直衝向我，唔通班外星人係隻曱甴嘅父母想黎接走佢？
正當我以為一天都光晒終於可以同隻曱甴講再見，喺呢個時候成班英雄突然間走晒出黎企喺我面前，我見勢色唔對路，亦唔想有無謂嘅流血事件發生，於是我就走埋去諗住勸交，點知個著到成個紅白藍膠袋嘅痴線佬行前一步，單手舉高隻油鑊大叫：「復仇者！集合！」
然後成班痴線佬就好似撞邪咁，幅射巨人叫叫、鎚仔佬跳跳…三兩下手勢就打走晒班外星人，頂佢地個肺真係好事多為！
唉，可能一切都係緣分，而且隻曱甴同我相處咗一段時間，內心深處都對佢產生咗感情，加上我而家係神盾局嘅局長，百務纏身，曱甴呢啲濕碎野都係第日先搞。
藍橘子專頁：http://www.facebook.com/BlueGodZi
黎特專頁：http://www.facebook.com/knight.lai.hk
