自從知道咗西營盤站延遲嘅秘密之後,我就再唔敢搭港島綫。(12)
雖然成功避開咗不明生物嘅要脅,但升降機卻自己啟動將我同賈亮帶到去更深嘅地底下面。大門一開,眼前係一個漆黑地牢,同賈亮喺列車裡面描述嘅環境大致相同。
呢一刻,有住強烈白光燈嘅升降機就好似一個安全港咁,我哋完全唔敢行出半步,彷彿一行出去就會遇到乜嘢可怕嘅事。
-----
上回連結:
http://bit.ly/1T8z1eA
-----
「喂,你有冇睇過《異形》?」賈亮突然問,佢仲係躺咗喺升降機角落。
「吓?有冇睇過又點?」
「根據你頭先嘅講法,嗰班不停大叫獵物嘅『人』又識爬、身體又黑……根本就係異形咁。話唔埋,我哋而家面對嘅就係異形……」
「但異形點會識講嘢?」我問,「最奇怪嘅係,仲要係得你聽到我聽唔到。」
「咁呢個係現實世界嘛?」賈亮態度好認真,「點都同電影有分別嘅。」
「與其諗呢啲無謂嘢,不如你認真去諗返有冇方法通返上地面喇?」我盡量保持冷靜,「既然你之前係搭升降機落嚟,咁照常理判斷,都應該係靠升降機上返去喇?」
「唔……」賈亮聽完,再度陷入深思當中。
老實講我對佢可唔可以記返已經冇咩期望,齋等落去亦都唔係辦法。再確認多次升降機裡面嘅掣冇任何反應之後,我開始認真檢查升降機嘅每個位置,睇下會唔會有任何隱藏機關……
「你估爬上去得唔得喇?」賈亮突然撐起身。
「爬上去?」我抬起頭望向升降機天花。
「打開 LIFT 頂,好彩嘅話 LIFT 糟或者會有爬梯。利用爬梯一直爬或者就可以上返去地面……」
「但係八公里……唔係,係唔止八公里……」我搖搖頭,帶有琉磺味嘅悶焗空氣再一次提醒我呢到係更深嘅位置,「就算真係有梯,我哋又夠力爬上去,但中途都好有可能會撞返嗰班『怪物』。」
「點都要試下喇。」賈亮主意已決,抽起兩邊衣袖,「可能要借一借你背脊,等我上去……」
碰!
就喺佢準備打開升降機頂蓋嘅一刻,頭頂突然傳嚟一聲悶響,整部升降機亦同時劇烈震動咗下,我同賈亮幾乎就因為咁失去平衡。都未意識到發生咩事,我哋抬返起頭,注意到有血水從升降機頂外面流入嚟……
「屌你又咩事呀?!」賈亮大喊。
「有人跌咗落嚟?抑或……」
碰!
又一下猛烈碰撞,呢下真係成個人心離一離。而且我有種感覺,嚟得第二下即係代表……
碰!
碰!
碰!碰!碰!
碰!碰!
「係咁跌,喂阿哥咁唔撚對路喎!」
「鬼唔知咩!」
雖然唔肯定跌落嚟嘅究竟係「人」定係其他生物,但到底係咩已經唔係呢刻嘅重點。因為升降機已經陷落咗將近半呎,再跌落去一定會超重,後果不堪設想……
碰!
「賈亮!我哋要返出去!」千鈞一髮間,我不得不再出一個決定。
說罷,我悠然轉身,深呼吸一口鼓起勇氣猛地跳出去升降機外,賈亮佢跟隨其後。就喺下一刻,升降機就真係超重斷纜整部墮落去,幾秒之後傳嚟一下巨響。
「屌!成件事真係越嚟越離譜……」賈亮表情相當痛苦,應該係跳出嚟嗰下撞到膝蓋,「就好似有乜嘢一直喺到引導我哋向前咁……」
「根本唔係『好似』,由我哋喺列車到醒返開始,已經係代表緊某啲嘢,發生緊某件事……」
而我哋,就係呢件事件入面嘅主角……
我緩緩行返去升降機嗰邊。從外面睇先注意到,呢個地牢兩旁其實係好窄,只係設置咗一部升降機。即係話,其餘三部升降機應該係通咗去其他位置……
如果我冇記錯,我趕入嚟嘅呢部應該就係剛才阿 Yan 仲有 Tracy 坐嗰部……
行到去升降機門前,我冒險望落糟底,嘗試搞清楚頭先到底係有乜嘢跌落嚟。但呢刻升降機嘅燈已經熄滅咗,所以糟底可以話係黑到乜嘢都見唔到。
「可惡……」
接著,我抬起頭,亦都唔見上方有燈光,咁係咪代表班『怪物』冇打開到升降機閘門?因為打開咗嘅話,上面升降機大堂應該係會有光傳入嚟先係……
但如果冇打開到,咁到底頭先跌落升降機頂,不停滲出鮮血嘅「嘢」,又係由邊到跌落嚟?
「你試下用手機電筒可能得呢。」賈亮突然喺我身後講嘢,嚇到我成個人即刻退開,「唔洗咁大反應呀,你驚我喺到推你落去咩?」
「都係以防萬一好啲。」我老實講。
賈亮反咗個白眼,拎出佢部手機打開電筒……
「都係睇唔到下面係點,太深喇,手機電筒都係唔夠勁……」講到呢到,佢照返上嚟,「而且糟都冇爬梯可以爬上去,唉屌……」
「呢度只係得一部升降機。」我道出自己嘅想法,「照計呢個地牢應該係可以通去其他地方,只要我哋搵返其他升降機,好有可能就可以上返去……」
「又或者,離班『怪物』引導我哋過去嘅目的地越嚟越近。」賈亮講。
「我明,但留喺呢到都唔會有咩進展……」
「阿弘?」
突然,有一把熟悉嘅女聲喺不遠處嘅位置傳嚟,雖然環境太黑望唔清楚,但從聲音我知道係邊個。
「阿 Yan?係咪妳?」我嘗試確認清楚。
「係……」
聞言,我開始向佢嘅方向行過去。我注意到賈亮都有跟埋嚟。
「Tracy 呢?」我再問,聲音越嚟越近了,我開始聽到阿 Yan 嘅腳步聲。
「我同佢失散咗……呢到係一個迷宮嚟……阿弘,點解你會跟埋落嚟?」
「我都係迫於無奈,」行到呢度,我注意到身邊有分叉路,但阿 Yan 唔係呢個方向,「有班……唔知係人定怪物打算獵殺我同賈亮……」
「賈亮?賈亮佢喺到?!」一聽到賈亮呢兩個字,阿 Yan 佢突然激動起嚟,腳步聲亦都停止了。
「佢喺到,妳做咩……」
「頭先打暈你,仲有捉走我哋嘅人就係佢呀!」阿Yan大聲喊。
「妳講咩話……」意識過來,我馬上擰轉身望向賈亮身上。
「你唔係信佢講嘅嘢嘛?條女呃你咋!」賈亮一臉錯愕。
我亦都係一樣,但原因並唔係因為阿 Yan 嘅指控。
而係呢刻賈亮嘅身後,出現咗一個漆黑瘦削嘅身影,俾本來已經夠高嘅賈亮足足高出兩個頭,但我睇唔清楚佢嘅樣貌,只見雙眼及出可怕嘅螢光綠色……
哧───
一下可怕嘅刺穿聲,一隻漆黑嘅手從賈亮嘅心臟位置穿出嚟,賈亮雙眼睜得好大,嘴巴微微張開,完全估計唔到呢個情況……
「獵物……血……皮……」
就喺下一瞬間,漆黑嘅主人用佢嗰雙令人感到絕望嘅雙眼望向我。
(待續)
互動時間,請投票。今次嘅選擇決定生死…
<3 (Love) - 逃走,選擇相信阿 Yan
:D (Haha) - 逃走,但選擇相信賈亮唔信阿 Yan
:o (Wow) - 嘗試面對「怪物」,睇下救唔救到賈亮
票數夠 300 繼續,夠 400 以上會加速,50 shares 以上下篇加字數。
下篇暫定星期日或一。
【上期另外兩個選擇結果:】
*走出升降機賈亮行先,主角會被「什麼」捉走
*走出升降機主角行先,賈亮會被「什麼」捉走
*留喺升降機,墮落 Dead ending
=====================
有咩都可以留言,我會盡可能覆哂佢!
(帶定頭盔先:本故事純屬虛構,如有雷同應該巧合。)
FB: 有心無默
個人ac:(歡迎 follow 或者加好友得閒傾計架~)
https://www.facebook.com/myechoofheart
IG:echoofheart
西營盤站 升降機 在 有心無默 Facebook 的最讚貼文
自從知道咗西營盤站延遲嘅秘密之後,我就再唔敢搭港島綫。(11)
若果,嗰一段「緊急呼籲」嘅內容係真,咁即係代表我正身處喺西營盤站地底以下八公里,一個叫天不應,叫地不聞嘅深淵……而離開呢到嘅唯一辦法,就係從 C 出口嘅升降機通返上地面。
但事情總係唔會咁順利。呢刻唔單止阿 Yan 同 Tracy 俾柏哥捉走咗。當我同賈亮趕到去 C 出口升降機大堂,仲發覺達叔一樣被困喺到。
-----
上回連結:
https://m.facebook.com/…/a.14489982564184…/814666598665158/…
-----
本來,我係有衝動想衝入其中一部升降機裡面,就算唔係通返上去都可能追上佢哋。但我最後都係猶疑咗。
冇錯兩個人面對柏哥可能有勝算,但冇人知道升降機開門之後我哋會面對乜嘢。魯莽行事唔單止救唔到佢哋,更可能令自己身陷危機當中。
所以,有必要先搞清楚成件事,而另一封短訊係絕有可能提到。
諗到呢度,我先搬咗兩個垃圾桶去卡住升降機門,再拎起手機望咗眼,睇落並冇收到任何短訊。其實上封我一樣係收唔到,其實好可能係威哥部手機本身嘅問題。
「喂,你收唔收到短訊?」我問賈亮。
「吓?哦……」賈亮拎起手機望咗眼,「乜都冇,可能係位置唔啱?」佢舉起手機喺大堂行嚟行去,「我呢個阿哥就係神神化化,好哋哋一個訊息唔得,係要分兩個,你話係唔係有心靠害?」
「你哋係孖生兄弟?」我問。
「哈,」賈亮冷笑一聲,「唔好話孖生,我甚至連同一個阿媽生都唔想。明明只係差嗰兩分鐘……佢就有佢嘅名成利就,而我……屌講起就心酸。」
講到呢度,佢突然瞇起雙眼訂著我身後嘅升降機。我下意識擰轉身,有一刻仲以為自己身後出現咗乜嘢,但冇,依然係空無一物。
「諗起上嚟,而家咁就講得通成件事。」賈亮說。
「成件事?」
「我嗰段醉酒經歷。」賈亮講落去,「之前我一直都諗唔通自己坐升降機去咗邊個地方。但以而家嘅情況睇,我當時九成九就係通咗落地底……」
「但你明明話一出升降機係去到地牢㗎?」
「咁代表兩種可能性。一就係呢個複製嘅站係喺之後先起好,另一種……就係我搭咗落去更加深嘅地方……」
一聽完呢句我忍唔住寒咗寒。八公里已經夠深了,再深落去究竟會去到邊度?根本連想都唔敢去想像……
「話唔埋,頭先嗰班人就係通咗落去。」賈亮假設道。
「等陣先,」我突然醒起一樣嘢,「你頭先都冇講清楚,你落咗去之後到底係點返上地面?」
「點返上去?」賈亮一臉苦惱,「咁耐之前嘅事,嗰陣仲要醉到七彩……」
「你試下諗喇!諗得返我哋就唔洗等封短訊都都得。」
聽到呢度,佢開始沉思起嚟。等耐咗,我開始檢查下呢個大堂同升降機內部,但睇落真係唔覺會有咩機關。
會唔會到頭來其實成件事都係整人遊戲?只要好正常咁搭就可以返上去,見得返達叔同其他人?
唉……如果真係咁就好了,但我知道咁係冇可能的,實在有太多事情常理解釋唔到了。
「喂。」賈亮突然開聲,有一瞬間我仲以為佢終於記得返。「你聽唔聽到有人講嘢?」
「吓?」聞言,我認真咁去聽,但完全唔覺有呢回事,「聽唔到……」
「越嚟越近……」賈亮壓低聲講,「聲音越嚟越近……」
我下意識望返去通道嗰邊,但未見有任何身影,「係咩聲?」我問。
「佢哋講緊嘢……」賈亮面色開始變青,「獵物……獵物……獵物……」
「我們需要獵物的血和皮……」
「血同……皮……?」
就喺下一刻,賈亮突然衝入去其中一部升降機裡面,將卡住門嘅桶一腳踢出去……
「你做咩!?」
「做咩,梗係走啦!」賈亮再唔理情況大嗌,「留喺到等死呀唔通?」
「但係……」
「總之我就走硬,我畀三秒時間你考慮跟唔跟埋嚟,三……」
倒數緊呢下,我再次望返去通道嗰邊。呢刻真係有兩個甚至更多嘅身影由轉角處走出嚟……向住我哋呢邊加速「前進」……
見狀,我唔敢再睇落去了,第一時間走入賈亮身處嗰部升降機裡面。一入到去,佢馬上就撳掣關門。
碰一聲悶響,一關埋門,我哋都未選擇樓層,部升降機就自己啟動了。之後再撳都唔似可以改變到升降機係上定落。
「睇你個樣,」賈亮終於放棄,躺坐喺升降機角落,「好似睇到啲嘢咁喎……」
「距離好遠所以唔清楚……」我聲音變得沙啞,心跳得好快,「但我……見到佢哋嘅身影好瘦削,全身好黑,仲有……佢哋係爬過嚟……好快咁爬過嚟……」
啊啊啊啊啊啊啊啊啊!!!!
上方突然傳嚟可怕嘅咆哮聲,但聲音嘅位置變得越嚟越遠,咁間接證明咗一樣嘢……
「我哋係落緊去……」賈亮道出咗我心中所想。
我冇再回應了,心裡面只係默默祈禱,希望接下來嘅情況唔會變得更差、希望升降機門打開之後會吸得返新鮮空氣、希望仲有機會見得返卓靈……
唔知搭咗幾耐,升降機終於停了,開門嗰下,我突然聞到一陣強烈嘅硫璜味。接著映入眼簾嘅,確實如賈亮所說係一個漆黑嘅地牢……
我哋而家應該點做好?
(待續)
互動時間,請投票。今次嘅選擇決定生死…
<3 (Love) - 走出升降機,但叫賈亮行先,自己行後
:D (Haha) - 走出升降機,自己行先,賈亮行後
:o (Wow) - 留喺升降機,檢查有冇可能上得返去
花花 (特別選擇) - 必定有角色死亡(非主角)嘅一個發展
Like - 隨便一個(盡量唔好啦~)
票數夠 300 繼續,夠 400 以上會加速,50 shares 以上下篇加字數。
下篇暫定星期三或四。
【上期另外兩個選擇結果:】
*入達叔升降機,可以遇返達叔,提前知道「秘密」
*入阿 Yan 升降機,會見到其中角色嘅屍體……
=====================
有咩都可以留言,我會盡可能覆哂佢!
(帶定頭盔先:本故事純屬虛構,如有雷同應該巧合。)
FB: 有心無默
個人ac:(歡迎 follow 或者加好友得閒傾計架~)
https://www.facebook.com/myechoofheart
IG:echoofheart
西營盤站 升降機 在 大方瘋普雷~Crazy Play~ Facebook 的精選貼文
西營盤站浮雕壁畫
首個香港車站浮雕,名為「裡裡.外外─東南西北」,是來自英國的著名浮雕藝術家Louise Soloway Chan的作品,位於般咸道C出口升降機旁一側牆壁。六幅浮雕作品描繪西營盤街道不同方位的俯瞰圖,分為夏日颱風後、中秋佳節時、秋冬行人匆匆,以及初春新年喜慶四個主題。西營盤地鐵站