【龔成問答信箱】(Q21201-Q21220)
Q21201:
你好龔Sir , 上完你堂就計一計吉利(175)既估值,麻煩睇下我做成點呀
因汽車界近來有著革命性的改變, 所以只用近5年的數據
主要競爭公司 2016-2020年PE raio
(因比亞迪完全是一間電動車公司而且市盈率太極端所以不用來比較)
以下數據按大小排
吉利(175)8.551 12.58 13.87 14.41 26.97
長城(2333)6.676 7.178 8.777 8.812 11.11
廣汽(2238) 4.22 6.802 8.584 9.454 10.19
北京汽車(1958) 6.236 7.766 8.495 9.402 12.14
(因2018年一次性PE大升,其後回復正常, 所以不用2018年改用2015年)
用你課堂教的調整,再綜合分析,推算行業平均市盈率 : 8.5815 - 10.5195
吉利(175)市值大, 業務規模比其他同業大, 值得調整,大約調整50%。經調整後吉利合理市盈率 : 12.87 - 15.78
吉利5年平均每股盈利 : (0.64 + 1.4 + 1.58 + 1 + 0.61)/5 = 1.046
大行預期2021年每股盈利為 : 0.94
因吉利積極發展電動車品牌及推出新車, 但同樣銷量亦受疫情及芯片短缺帶來一點拖累
所以先假設每股代表盈利是5年的平均數1.046
所以吉利的合理估值為 : 13.46 - 16.51
請問咁計同你計出黎既差得遠嗎? 你計出黎又係幾多呢? 謝謝
龔成老師︰
首先,北京汽車(1958)2018年市盈率大升,並唔係一些會計因素,純粹係當年不少汽車股被炒起。
因為價格大升,所以市盈率就被大幅抽高。將來都有機會出現這種情況,故你都應把這年,計算在內。
吉利(0175)本身的質素不差,擁有一定的銷售網絡及品牌,不錯的市場策略及定位。
佢早前杭州灣新工廠正式發布純電動新品牌新車「極氪(ZEEKR)001」,宣布吉利進軍高端電動車。
這些因素,都值得給予吉利較高評價。加上佢近年加大新能車部份發展,預期會令增長力增加,故市盈率可以比以往,再調升少少,大約17-22倍。
合理估計,你可再上調多D,會較為合理。
其實,你已掌握了估值的方向,你最重要在計算後,明白這計算背後的基礎,當中是考慮了那些環境情況。
有時我在估值時,會同時計幾個情境,例如好景時的EPS會怎樣,如果差的情況估值又會怎樣,去得到更立體的答案。
另外,你要多做練習,為不同企業進行估值,這樣才會更掌握當中的技巧。
------------------------------------------------
Q21202:
龔老師您好,想問下中國鐵建,長遠和短期投資可以嗎,現時pe2-3,點解佢賺到錢,又有股息,但係格價咁低?
龔成老師:
中國鐵建(1186)業務以鐵路及交通相關工程為主,包括高原鐵路、高速鐵路、高速公路、橋樑、隧道和城市軌道交通工程設計及建設。
業務地區包括中國,以及中國以外地區,工程承包業務是這企業的核心業務,例如基礎設施建設,鐵路、公路等。
這企業的發展不過不失,但增長力及賺錢能力都比過往有所減少,從一些財務數據,例如資產回報率、股本回報率、EBITDA利潤率等,都見到這企業的長期財務數據有轉弱情況,反映企業現時每個項目的賺錢能力,不及過往年代,企業質素因而下跌,而市場估值都會因此而減少。
這股的整體質素算是中等,發展力比過往有所減弱,這類股不是不可投資,但就不值得投資太多資金。
至於市盈率較低,並不一定代表吸引的。
第一,每一間企業,每一個行業,都會有其合理的市盈率,雖然數字愈低一般代表愈便宜,但在實質操作時,先要了解每個行業及企業自身的情況。
第二,當一個行業、一間企業的發展前景不及過往年代,賺錢能力減弱,市場就有可能將其合理市盈率的估值調低,投資者要小心解讀數字背後的意思。
第三,近年一帶一路的發展力,並不及之前所預期,部分國家的工程都減少了,這企業的長遠生意都會因此受影響,同時每項工程的賺錢能力都有可能因此而受壓。
第四,當投資者分析企業時,要了解生意的持續性,例如一些從事零售行業、飲食行業,只要大環境無太大變化,生意往往會持續。但若然企業從事工程,投資者就要了解生意持續性的因素,若果一個國家該類建議最大規模發展的時期已過,企業生意可持續發展能力就會轉弱。
在中國鐵路最大規模建設時期已過,以及一帶一路國家對中國興建鐵路的需求,未必及預期的情況下,這企業自然受影響。
若投資者見到這企業長期的市盈率,經常都處於很低的水平,反映市場認為這企業面對上述因素,只是值這個市盈率,因此,並不代表特別便宜(情況與內銀股一樣,長期低市盈率背後是有原因的)。
------------------------------------------------
Q21203:
你好,想問下你有冇長線投資邊隻美股或者ETF?知道你長線投資1211,覺得你好有毅力,
想問下如果我長線投資arkk / arkf好吾好呢?另外你還睇好邊隻港股可以長期持有呢?thanks
龔成老師︰
其實你只要明白,真正最好架財富增值方法,就係長線持有優質股這個道理,你都可以做得到。
美股和ETF,我自已無投資,我都係自行選股,好似比亞迪(1211)、小米(1810)等。
美股我自已無特別研究,所以這些股票比唔倒太多具體建議比你。
但初步睇佢地都有質素和潛力,但你預佢地波動性會較大,緊記投資持要控制注碼。
而港股方面,都有不少優質股,值得長線持有。若你係年青至中年人士,以下股票都適合。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、領展(0823)
潛力股︰安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)。
但你要留意翻,部份潛力股已有輕微過熱情況。只有安碩恒生科技(3067)、GX中國電車基金(2845)、 阿里(9988)、中生製藥(1177)、福壽園(1448)勉強算在合理區頂部,可分注入貨,其餘要等等。
------------------------------------------------
Q21204:
龔sir,你好👋🏻本人30歲,是全職媽咪,現持有以下組合嘅股票:
1. 01093石藥 (平均價$9.56)持有12800股
2. 2342京信通信 (平均價$2.612),持有16000股,現價跌到兩蚊,請問應唔應該再購入?
3. 941中移動(平均價:44.85 ) ,持有1500股
4. 939建行(平均價$6.41 )持有4253股
請問這些股票是否都是有質素?除了建行外,其他另外三隻都打算長渣,是
否可行?謝謝你抽空解答
龔成老師︰
你以上持股,都係有質素,全部都係可以長線持有。
但選股組合上,京信通信(2342)質素未算好高,唔建議再加注。
現時你除左石藥(1093)外,其餘幾隻增長力都唔高。若果你個人投資取態係較保守,咁都可以。否則,你就你加入多少少有增長力股票,去提升財富增長速度。
另外,有一個較大問題,係你好偏重左係石藥(1093)身上,佔組合比重很高。任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於3成,而單一企業不要高過15%。
長期你需要建立一個更平衡架組合,唔好太集中係幾隻股票。
------------------------------------------------
Q21205:
你好,龔sir 小妹今年28歲,月儲一萬左右,想係30歲前有100-130萬,有可能嗎?現時持股如下
(坐艇中)!!!
匯豐2000股@70元
騰訊100股@662元
美團300股@330元
小米400股@32.7元
安碩恒生科技600股@20.58元
21世紀教育33000股@1.38元
易鑫集團500股(新股上市抽中的)
另外有大約價值6萬港幣的美股(哈,終於系正數😅唔洗負數負到懷疑人生)和30萬左右現金!
龔sir,請問有機會達成目標嗎?有無邊d股票應增加或減持?希望你比小小意見我,多謝解答。
btw報左你股票班,因為你太神秘關係,好想揭開你的面紗!
龔成老師︰
其實你唔好太著重係股價上,帳面賺定蝕,從來都不是持有一隻股票與否的因素。
關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
假設回報10%計(連股息再投資),你每月投資$10000 + 現有資產約值65萬,2年內增值至100萬,計算上係可以。
但由於2年唔係一個長的時間,就算優質股也有機會出現波動,影響到你最終回報,你要明白有這個風險。
先講你現有持股,都有質素。
但匯控(0005)只係收息股,唔會有太高增長力,唔適合你。
易鑫集團(2858)、21世紀教育(1598)質素中等,而美團(3690)有質素,但不確定性較高,都不宜持有太多。
你現時28歲,較適合用"平穏增長股" + "潛力股"的組合。每月用5成儲蓄,去做月供,其餘先儲起,用一邊月供一邊儲蓄的策略。
現時大市只係合理水平,現金和股票最好各佔一半。餘下30萬和每月儲蓄,就等大跌市出現,才加大力度掃貨。
股票班見!
------------------------------------------------
Q21206:
Hello!請問龔sir你覺得比亞迪電子285 現價可以入嗎?其實我都有啲睇好佢,但知道佢,依家呢個價唔平,要落返去20-30蚊都幾難下!謝謝
同埋阿sir 我想問你依家手上有咩股票同平均咩價位入?
龔成老師︰
比亞迪電子(0285)質素不差的,有潛力。睇佢過往發展都正面,有技術,而前景都唔錯。
考慮到近期的增長,$40左右算係佢合理區頂部,現價略貴。要等回翻才好分注,或者可用月供去儲貨。
至於我的持貨,講其中幾隻啦,比亞迪(1211)、小米(1810)、中生(1177)。
現時比亞迪較貴,唔好考慮住,而小米同中生,算是合理區頂至略貴。相信這3隻股,都會好長線持有。
------------------------------------------------
Q21207:
龔sir,你好!本人45歲,已婚有2個子女讀中學,夫妻有穩定工作及收入共6萬元。
我上年12月在FB follow 你,除了睇完百萬富翁系列書籍,也買齊你的聖經及50系列的書,
真是獲益良多。
今年1月開始月供1萬股票,包括2800$3000, 1810$1500, 9988$1500, 66$1500, 823$1500
及1928$1000。
現手持有股票:
1手2382$175入, 1手9988$222入, 6手3067$17.15入, 1手981$24.5入, 1手2018$43入
1)有10萬資金想在跌市時再買入上述持有的股票,還是買入月供的股票,哪個會比較好?
2)以上股票分布會否太散太多?有否集中某類型?
3)2018及981仍可持有,還是賣出轉換1928或其他會比較好?
懇請龔sir指教分析,謝謝。
龔成老師︰
先多謝你支持,你可以先睇"80後百萬富翁"、"財務自由行"和"股票勝經",由淺入深,咁會較好。
1) 其實2者都可以,除了中芯(0981)較一般,唔建議加注之外。
同時間,你入市架時候,唔好太偏重新經濟股,都要加入部份舊經濟股,令組合更平衡。
2) 不算太散,但有少少偏重天係新經濟類別,會令組合波動性偏高。
3) 瑞聲科技(2018)不差的,本身有一定的規模與技術,長遠發展正面,不過,佢增長力不是好強,只能視為平穩增長類別,你可以長線持有。
中芯國際(0981)業務有增長力,但未必能稱為好優質的股。
睇翻佢過往的業務情況,雖然仍每年的生意都有增長,但盈利就有波動,反映雖然大環境的市場在增長中,但佢的成本與售價,就未必在佢掌握的範圍,最後造成盈利波動的結果。
雖然這股都有前景,但以佢面對的情況,但好難將佢定義為最優質的股票。加上之前熱炒過,股價大上大落,投資要注意風險。現貨1手可持有,但唔建議你再加注了。
------------------------------------------------
Q21208:
龔成老師你好,我今年32歲,其實我已經接觸股票超過十年,在最近開始留意你的fb才發現原來我一直都買錯哂/亂咁買,有一種一言驚醒夢中人的感覺
我已經買了股票勝經,希望重新開始真正學習如何買股票,非常感謝你無私的分享
我現時持有以下股票:
267 - 1000股 @15.48
388 - 100股 @297
745 - 12500股 @2
1733 - 60000股 @0.5
1776 - 1000股 @24.65
1816 - 5000股 @3.71
2382 - 100股 @176
6886 - 200股 @24.8
我知道大部分蟹貨應該賣出,其實我深知積存蟹貨的原因是我買股票後就好少留意股價,到想起來時先發現原來跌咗好多
加上我不知道應該幾時賣出才好,感覺過去十年的時間及金錢都浪費了。
看了老師你的分享後,我才知道月供股票,覺得頗適合我這種很少留意股價,但又想獲得合理投資回報的人,希望老師有時間的話可以對我的投資組合給予寶貴意見。
萬分感激龔成老師,謝謝!
龔成老師︰
你想先更正你一個投資想法,蟹貨與否,唔係一個重點。我地投資最重要不是睇「賺蝕」,不是睇「買入價」,而是睇質素。質素不好,增長力弱,就有可能賣出,賺緊定蝕緊,都要賣。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你今年32歲,建議你先集中做好增值部份。現有持股中,舜宇光學(2382)和港交所(0388)係合適的。
中國國家文化產業(0745)見佢過往有20合一,而且多年出現虧損,好大機會係財技股,建議你盡快沽出。
易大宗(1733),如果有睇佢的企業年報,就會見到核數師,多年來都有「保留意見」或「不表示意見」,這已經賬目「有古怪」。這類股基本上無投資價值,賣出較好。
中信股份(0267)、廣發証券(1776)、中廣核電力(1816)、HTSC華泰證券(6886)質素一般,唔建議你持有太多。
至於月供適合較初學者原因,唔係因為唔洗成日睇住個價。而係佢可以透過拉平均左個買入成本,令你減少買貴貨架風險,從而長線得到較佳回報。
月供策略上,現在你每月用5成儲蓄,去做月供,其餘先儲起,用一邊月供一邊儲蓄的策略。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
而何時賣出,基本上企業質素一直無變差,你係唔洗賣。除非個市去到好狂熱,如果你現階段無信心判斷大市平貴,你可以用"升一倍、沽一半"架策略。
先收回成本,餘下一半讓佢自行慢慢增值,咁就可以。
書本上,我建議你先睇埋我寫架"80後百萬富翁"、"財務自由行",咁會較理想。
------------------------------------------------
Q21209:
我爸爸岩岩過身
原本供緊層樓諗住比佢養老
我租左新樓 $12500
但依家舊樓就空左市值300萬左右
我諗緊賣唔賣好
層樓倍升左幾倍
岩岩我公司燉我冬菇
減左20%人工
股票我仲有
比亞迪
盈富
領展
小米
3033
全部小量
想睇下你會點睇
龔成老師︰
每個人都有自住需要,除非間屋已經明顯無乜增值潛力,咁你才考慮沽出。
否則,你可以考慮自已住,可利節省新樓租金,用來投資增值。又或者,放租比人,自己另租地方。大前題係,如果物業依然係有質素,就應留住這個物業。
你現時持有的股票,都係有增長力和質素,適合年青至中年人士。這些股票,你長線持有就可以。
若你將來會再投資恆生科技股ETF,建議你用安碩恒生科技(3067)。
相對南方恒生科技(3033),佢每年收費和追蹤誤差都較低。但由於幾隻恒生科技ETF都係初上市,追蹤誤差只能作參考。實際誤差未必一樣,你要知道這個風險。
------------------------------------------------
Q21210:
龔sir,你好,又要你幫手解答問題了,想問萬國數據值得持有嗎?我知道都有新意網,2隻長遠黎講邊個好?
新意網又持續上升,萬國數據就蝕錢,但又因為覺得中國發展潛力大
另外亦知道美股亦有呢隻股,那麼大家有什麼分別?見佢低過招股價 想入手,那麼我買美股定港股?唔清楚呢d範疇,謝謝。
龔成老師︰
我地持有邊一隻,唔好太著眼係中短期股價走勢,要用翻佢長線質素去做考量。
新意網集團(1686)主要提供數據中心、設施管理、網上應用及增值服務,系統之安裝及保養服務。
行業長遠發展正面,佢已經做到全港最大,加上行業的需求不斷增長,對佢長遠都有正面影響。佢過往生意與盈利保持增長,財務數據正面。
這股有投資價值,不過現價就唔算平,大約在合理區頂。如投資,小注分注都可。
萬國數據(9698)有質素的。
佢的業務為開發及營運數據中心,根據佢公司提供的資料,佢係全中國最大的運營商網絡中立數據中心服務提供商,市場份額約2成。
現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。
佢提供託管和管理服務,包括創新和獨特的託管雲價值主張,機房面積為266,260平方米,有一定的規模。
見佢生意有一定的增長,行業前景正面,只是現價唔算平,投資價值都有,但就唔建議太大注。跌翻10%較合理。
2者都有長線投資價值,規模上,萬國數據(9698)會佔優。但此刻值博率,會係新意網集團(1686)較高。
至於,買港股定美股,其實分別唔大。
------------------------------------------------
Q21211:
龔SIR,我想講你知,我上過你股票班,跟咗你兩年之後,認同你套方法係得!
我今年28歲,成功說服家人賣了住了20年的兩房自住物業,目的一部分資金幫老人家做收息作生活費,還了另一物業的樓貸(因自住物業作抵押)
剩下部分讓我倆兄弟(弟弟22歲)投資增長股,目標是5~10年再運用借貸買兩個物業,一個值300多萬的細價樓,一個過千萬的三房物業。
目標投入潛力股的資金約340萬港元,目標組合:舊經濟股1177, 3319, 1830, 新經濟股 2382, 0636, 2845, 9988
340萬本金的組合,若選擇投資以上的股票,應選幾多隻好呢?建議比例如何?我會留意股價睇值博率
龔成老師︰
你所講的組合,都適合用來做財富增值。
但這個組合中有主要係潛力股,佢地雖然有增長潛力,但同時波動風險都唔細,唔建議全部資金盡用在這些股票身上。
我建議你加入一些平穏增長股,同你上述架潛力股,比例上各佔一半,咁會令到個組合更平衡。
大市現處於合理水平,那340萬資金,你可以先用一半,以"分注"形式慢慢入貨。餘下一半就等大跌市機會出現,才大力度掃貨。
由於你現處於"沽空樓市"狀態,股票增長和樓市增幅未必同步。所以,假若股票升幅跑輸樓市,反而會令你日後買樓成本上升。
你可以在投資組合中,加入多少少房產類股票,去盡量平衡翻這個風險。
至於老人家收息部份,就唔好用以上股票,應以一些優質收息股為主。策略上,都係先用一半資金,分注入市,餘下就等機會。
目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)或收息基金(3110)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
(你可睇下我本《50穩健收息股》當中仲有好多)
------------------------------------------------
Q21212:
老師我想請教,其實我等緊2020居屋結果,搞珠號碼好後,本身以為冇機,但又收到信補料,之後仲收到二次急件要我補料,好似比咗個希望我。
現在有現金100 万,覺得而家係買樓時機,唔買冇機會,目標500万樓下,做9 成,其實冇咩實力。
聽講居屋5、6 月𢵧樓,如果到嗰時先知自己原來冇机先再睇返私樓巿場,會唔會太遲,我已經41,買舊樓驚做唔到長年期,500 樓下變得冇乜選擇,好心急,求意見
龔成老師:
你可以等埋居屋果邊先,我相信私樓未必會一下子上得太快,估計1年內上落都唔會太過多。
如果居屋果邊唔成功,到時就睇私樓(當然,現時你久不久睇下私樓先,都無壞的)。
要留意,你的「供款能力」是最重要的考慮因素,唔好太過勉強,如果這方面不足,就寧願調低目標樓價金額。
------------------------------------------------
Q21213:
你好龔老師 關於上次你既解答 我風險過高,除左買3067,如何可以提升組合平衡性? 現持有小米及雅迪,但不是月供
小米有1800股,雅迪4000股; 是否建議買短期股?想每個月都增加$4000以上收入,有可能嗎?
龔成老師:
恆生科指(3067)是一個組合,會比單一股票的風險度較低,當然,由於佢持股都是潛力類股票,因此本身都有一定的波動性,你要留意。
小米(1810)絕對有質素,可長線。
至於雅迪控股(1585),都有潛力,不過要留意股價升左好多。
佢主要係中國以「雅迪」品牌從事電動兩輪車(包括電動踏板車及電動自行車)的開發及銷售,亦銷售電動兩輪車用的電池、充電器及其他零部件(包括電機、車架等)。
睇翻過往財務數據,唔差的,生意的確有增長力,潛力度有。不過現價唔算平,因此唔建議持有太多。
另外,不建議你短炒,全部都要長線投資,不要著重每月賺多少,要睇長線。
------------------------------------------------
Q21214:
龔成老師本人30中,有一自住物業育有一子,供樓等家庭開支全一力負擔,每月可尚餘2-3千元。。。
而儲蓄則由老婆負責,現有100手a50,2手電能,2手中國建築,3-4萬現金。應該如何重新分配令財富有長遠的增長保障退休後的生活?
而5-6年後除去支出本人每月可有8-10k的餘額,50%作月供股票50%用作儲蓄流動資金合適嗎?而40歲才由零開始理財會否太遲?
本人明白財富增值非一朝一夕的事,但人總有貪婪的一面,會引發一些錯誤的想法,所以唔知醜咁希望龔成老師指教一下以滅絕那錯誤的想法!
另外想問問老師的投資初階班學費是多少
龔成老師,我媽媽遲下會退休,強積金大約有50萬左右,我應該以咩比例分配係收息股同平穩增長股,而到左退休年齡可以投資少少係潛力股嗎?
龔成老師:
你現時現金其實不足,以一個家庭來說,加上要供樓,如果只有$4萬現金並不足夠,最好去到$7萬-$10萬作備用現金,餘下的才投資,這會較好。
另外,A50中國可長線的,但要留意,雖然這是組合,但都不能過度集中,宜同時投資其他股,如果不懂選股,就考慮其他ETF。至於電能(0006)及中國建築(3311),質素是有的,但增長力不強,收息為主,以3X歲來說,算是較保守,因此,日後可增持一些有基本增長力的股票。
至於你自己要5-6年後除去支出本人每月可有8-10k的餘額,50%作月供股票50%用作儲蓄,最好當然盡快啟動這計劃,但如果無計,就等5年後啟動,40歲,有心都唔怕遲。
現時你每月可儲$2-3000,都可以盡力投資,月供股票都得。
當然,希望你在收入上更進一步,想想長遠增加收入方法,對你會更有用。
至於你媽,潛力股就唔太建議,如果佢真的好想,就1、2成好了。
佢你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
股票班共8堂,暫時優惠價:$8800。
------------------------------------------------
Q21215:
龔成老師你好,我40歲,睇左你FB 一段時間,另外都購買左你先前的網上課程,有得益。希望你能指導下。麻煩曬,長文
因為以前父母系股票輸左好多錢,多年前讀 U 就開始兼職賺錢供父母層樓,也一直都抗拒進入股票投資。
但幾年前開始有剩餘錢就學人抽下新股或短炒賺餐晏仔。
現時還繼續持有幾個蝕本股
3883,1916, 8511, 8313, 6886, 1932, 1227(呢個是父親的)
想問下應該蝕住放甘點?
另外上月開始月供3067, 暫時每月7000
還有1833, 6060, 386, 1786, 1299(都是2至3手)
成40歲最近我被裁,有筆20萬長期服務金。請問應該投資股票定放系供樓的高息戶口等跌市?
我同先生目前有2層樓,一層租萬5(月供5千到2016完), 一層自住(月供2萬8). 另外有150萬現金,股票40萬。我同先生月入8萬(我被裁前人工4萬), 但要供養4大長老同個女,經常性使費都大。
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
中國奧園(3883)有質素可持有。
江西銀行(1916)質素一般,增長力不強,宜減持。
ZC TECH GP(8511)無乜質素,賣出較好。
杰地集團(8313)無乜質素,賣出較好。
HTSC(質素中等),可守住先,但增長力不強。
中漆集團(1932)質素一般,增長力不強,宜減持。
國盛投資(1227)無乜質素,賣出較好。
至於你「上月開始月供3067, 暫時每月7000
還有1833, 6060, 386, 1786, 1299」
基本上無問題,只是鐵建裝備(1786)質素不太好,宜賣出。
由於你現時有一定的物業資產,反而股票部分很少,因此應增加股票比例。
你$20萬應投資股市,但你投資知識與經驗不多,暫時只建議你月供股票,以及投資平穩增長股。盈富(2800)、港鐵(0066)、領展(0823)都可以。
你可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q21216:
龔sir,有啲野想請教下你
月供基金,我應該要留意啲咩
龔成老師:
首先,要睇翻該基金的投資範疇,投資策略,因為基金有好多種的,你要了解該基金投資的資產類別,是否你睇好的,長遠向好的。
另外,過往回報是否理想,比起大市時否較好或較差。
當確認有質素後,就可以投資,月供是一個方法。如果該基金不是在交易所上市,你就要睇翻有那些條款,會否要求你最少持有幾多年。
------------------------------------------------
Q21217:
老師好!本人50歲持有股票。
公用股:0003 6823 6.51%
REITS:0823 10.96%
醫藥:1177 4.23%
潛力金融:0388 15.54%
石油:0386 1.24%
家電:6690 2%
保險:2318 7.13%
電動車:0175 1211 21.38%
內銀:0939 1398 3988 21.38%
新資訊科技:9888 1.98%
另外以下基金:已供占10.81%
2800 月供$6000
3188 月供$4000
計劃每月買一手3033
已買了一手2845
1. 以上組合是否太亂?有什麼需要加減?
2. 想每月買入一手3069 3109?有咩意見?
3. 手上還有60萬現金,等機會?
多謝
龔成老師︰
1) 都有少少,最好組合數量維持係8-10隻,咁會較理想。
持股方面,都有質素,可長線持有。但你比重上,太偏係潛力股類(1177, 0388, 0175, 1211, 9888)。
佢地雖然有增長潛力,同時風險都較高,不宜持有過多。以你50歲計,潛力股佔組合20%左右好了。
現貨可持有,但未來時間,你要加大翻平穏增長股部份,慢慢令個組合平衡翻。
平穏增長股:金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
月供方面,同樣要作出調節。而你想投資恆生科技股ETF,我建議用安碩恒生科技(3067),佢費用成本會較低。
2) 華夏恒生生科(3069)主要係追蹤恒生香港上市生物科技指數之表現。
指數包含51隻成份股,當中有「藥品」、「⽣物技術」等公司。較為人熟識的,有藥明生物(2269)、京東健康(6618)、中生(1177)等等。
隨著人口老化和人均收入增加,對優質醫藥的需求只會有增無減。此股都有質素,可作長線投資。但你預佢會較波動,最好用月供模式儲貨,並長線持有會較好。
南方科創板50(3109)都有投資價值,但成交比較少,會有機會買賣差價偏高。
但你要留意,這2隻都算係潛力型股票,以你年紀,不宜持有太多。
3) 現時大市只係合理水平,現金和股票最好各佔一半。若你持股總值已超過60萬,有手現金就最好等大跌市出現,才加大力度掃貨。
------------------------------------------------
Q21218:
你好,老師
35歲,家庭月入約6萬
每月儲到2萬
2小朋友讀緊幼稚園
持有以下,希望可以盡快儲到200萬作首期,買多層樓收租。不過,我都唔係好清楚當有200萬時,應該購樓收租,還是繼續投資股票?
農行:10萬股$3.38
建行:17000股$6.58
交行:10000股$4.9
9988 阿里:300股$463
快手:200股$402
中移動:1000股$53.8
總成本:70萬
另外可動用多50萬投資股票,請問投資方案應該係點?謝謝你
龔成老師︰
我地做財富增值,係要建立一個有不同優質資產的組合,除了股票,物業都係其中之一。
以你現時情況,由於現時資金較少,應先利用優質股去增值一筆財富,再買入物業。但同時間,必需留有一定數量的股票,作增值之用。
而這物業可以放租,用「以租養樓」架模式去運作。較詳細方法,你可以睇我本<5年買樓4步曲>。
你現時持股,主要有2大問題。首先,農行(1288)、建行(0939)、交行(3288)和中移動(0941)只係收息股,增長力好一般,不宜用來增值之用。
另外,你組合好集中係銀行股。記住,個別行業唔好佔組合3成以上,否則會有過度集中風險。
我建議你用「平穏增長股」 + 「潛力股」作組合,你可以慢慢將部份收息股,換至以下股票。
現在你每月5成儲蓄,去做月供,其餘先儲起,用一邊月供一邊儲蓄的策略。
大市現處於合理水平,那50萬資金和每月儲蓄,就等大跌市機會出現,才大力度掃貨,並長線投資。
------------------------------------------------
Q21219:
Hi 龔sir你好
我今年35歲 穩定職業
想每月供$5000落金沙、阿里、小米或比亞迪
是但兩隻可以嗎?
邊隻會前景好d?
龔成老師︰
4隻股票都係有質素,但我地做配置時候,都要考慮平貴、年紀等因素,去決定成個組合。
以你35歲計,建議你用「平穏增長股」 + 「潛力股」的組合,比例大約各一半。
現時比亞迪(1211)略貴,回到$120才可以月供。
金沙(1928)係「平穏增長股」,而另外阿里(9988)和小米(1810)係「潛力股」,你可以在當中2選1,去創建你月供組合。
現時大市只在合理區,每月儲蓄不要盡用。你要留有部份,等大跌市機會出現時,用來掃貨。
------------------------------------------------
Q21220:
龔sir,你好,我今年大約35歲,現有股票如下:
788@6000股 買入$1.16
1810@1400股 買入$24.59
1922@8000股 買入$5.1
2031@2000股 買入$16.63
3067@400股 買入$17.11
3718@12000股 買入$1.28
1)想問現有股票會唔會太多?同埋有無長遠投資價值?
2)1922,2031,3718可以長遠持有嗎?
3)想問下京東健康,阿里健康同平安好醫生嘅分別?邊個比較有投資價值?同埋長遠發展
邊個比較理想?有月供價值嗎?
謝謝
龔成老師︰
1) + 2) 數量上,唔算太多,長線維持8-10隻就可以。
持股方面,銀城生活服務(1922)上市時間唔算長,不確定性較大。而澳至尊(2031)質素只係好一般,2隻都不宜持有太多。
其餘都有質素,可長線持有。
3) 京東健康(6618)、平安好醫生(1833)和阿里健康(0241)都係有質素和潛力,業務上都非常相近。
但問題係佢地是有危有機的類別,雖然業務增長好快,但這刻仍處於燒銀紙的狀態中。估值上好困難,因為無實質的盈利數據作為基礎,市場只是估估下。
質素和值博率計,平安好醫生(1833)會較為佔優。但始終有一定不確定性,因此,低風險者未必適合投資,若投資者考慮這股,亦不能大注投資,買入後就耐心長線持有,等待這企業改變整個行業的情況。
現價算合理區頂,但好波動。你可以用月供儲貨,如直接買入,就只能小注。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
踏浪艇 買賣 在 龔成 Facebook 的最佳貼文
【龔成問答信箱】(Q18401-Q18420)
Q18401:
成哥早晨!剛剛想起一個有關印銀紙與估值的問題。近排新經濟、醫藥股升幅驚人,估值上點都係貴。
但各國今年也行量化寬鬆,印了無數咁多銀紙,所以在資產、以及優質股的估價上,平、貴價區是否要大幅上升?
如08年後,資產價格急速上升。
所以照此邏輯,舉比亞迪為例,之前$40樓下平,量寬後不看業績,也應該是$80樓下平?唔知你點睇呢?
但如果量寬同估值有關,怎樣調升這個百分比?
知道成哥你很忙,不急的,有空才覆吧,謝謝
龔成老師︰
你的想法方向正確,在全球印銀紙下,貨幣將會出現貶值。所以,這些企業收入,有機會因為咁而上升。
所以《財務自由行》都有講這概念,現金只會永遠貶值,資產則是永遠升值。
當盈利反映出這個升幅時,我地的確有機會要上調這個企業估值。
但你要明白,我地係估值時,都係要偏重翻係企業本質、長線的行業發展、財務方面狀況等等,來到做決定。如果佢的資產、盈利、生意額等,有實質上升,即是佢受印銀紙或經濟因素,帶動佢價值向上,我地就會調高。
簡單來講,印銀紙會令現金貶值,這是一定的,所以,企業在業務上的各種數字,理論上是向上的,但我地投資者,就要具體見到佢地的財務數據,有實質地上升,才能確定這企業價值向上。因為每間企業價值改變的程度不同。
暫時,穩陣計,比亞迪(1211)$80以下合理,但遲d出業績,就有可能提高,可能$100。這股有潛力,但由於現時市場放入太多「期望」因素,因此,我暫時唔敢調高估值太多,但我自己的貨暫時都未賣,因為這刻就算貴,只要將來價值提高,就慢慢變為合理。
------------------------------------------------
Q18402:
Hi sir,想問下吉利vs大行報告問題
上完堂番黎玩大行報告好迷失LOL
用你進階班比你網搵到既報告呢
1/2020-9月8. 東吴証券 佢無比目標價我,但有行業平均預測PE(2020),我用佢企業預測EPS(2020)乘係咪就有目標價? (我直乘就23.9hkd)
2/但近期黎計其實得一份用PE估值,另一份2020-7月就用DCF.佢話目標價21.3hkd
[Q1:唔同角度無得比較咁點算好? 評估完其實d data都reasonable,但感覺好虛]
然後今日花旗提高佢目標到40蚊。首先我搵唔到個full report,中英都search左。然後佢花旗提高係因為新產品增加銷量,呢d係年報都講哂(之前睇左),所以大陸大行報告都take into account左呢d effect啦。
[Q2:花旗目標價同大陸d差咁遠,但我又睇唔到佢assumption, 咁我信唔信好?]
thxthx!
龔成老師:
其實你最緊要睇翻報告的「預期數據」,是否合理,如果合理的話,推算出來的估值就有參考價值。
而你用佢比你預測EPS,乘上行業平均預測PE,可以得出一價參考價,但如果你記得我地在基礎班都講過,當我地運用行業市盈率時,其實要作出調整,因應翻企業的質素、增長力,去調整,先元可以計得出估值。
另外,DCF的敏感度好高,因此計出來的數,有時都未必能盡信,參考可以。
至於花旗報告,我地要找到佢建基D乜,去做預測,先有答案,否則不能盡信。
另外,估值差無絕對的答案,當水有主觀的成份,同時,我地並不是計到23.7還是23.8,而是大約知道$20-$25是合理(大約是),因為企業價值,只是一個概念,並無絕對答案。
所以,我地盡量以不同的角度,不同的方法,去盡力計得立體。
------------------------------------------------
Q18403:
龔sir,近排買左你既書
最主要都係學習分析股票
另外想問一下MPF
今年30歲
因為mpf一直都買開北美嗰邊嘅投資,近呢半年都增長左九萬蚊,咁嚟緊美國大選嗰邊,都聽到唔少嘅消息
因為大部份人都話10月至出年一月,通常都會跌,需要去轉做其他嘅投資組合嗎?
咁如果真係轉其他投資組合,你有建議嗎?
龔成老師:
由於強積金是超長期的投資,我地只要好簡單咁人生階段、風險承受能力去配置就得。例如年紀較輕就進取,中年就平衡分配,年長就保留,咁就得。
因此,如果你現時30歲,仍可以進取的,可以將較多資金,投資在較為進取的類別,少少在平衡組合,咁已經得。同埋,強積金唔需要經常轉來轉去的。
我由初踏出社會開始,都是100%恆指的。
所以,你唔需要因為中短期因素而賣出,你持有就得,美國無問題的。
另外,無人能估到幾市大市會跌,唔好信。
------------------------------------------------
Q18404:
老師你好,認識你及跟隨你投資學習已有一年半,想同你分享下呢段時間嘅成果
當時大學剛畢業沒有投資概念,閱讀你著作及短片後稍作投資,一直持續月供優質股現回報超過15%。加上參考了你的意見和綜合自己的分析購入了持續增長的企業,在2年間累積到700k財富,感謝你無私分享和教導!
距離目標3年內累積到一百萬不遠,到時希望投資物業或為家人添置自住物業。
現有幾個問題想請教:
1)屋企之前落錯車十年來租樓住,只用儲蓄做定期,家人希望明年以我名義入市,你認為可行嗎?(本人24歲女,freelance平均月入35k)
2)0941同1316分別用$67同$6左右買入5手坐艇到依家,應該等股價回升再放?
3)每次睇好某啲新興股都猶豫冇落手,好似小米同平安好醫生都升左3-4倍。
如物色到好企業應用咩心態或咩情況下入市?
另外1833要入係咪等股價回落$100樓下先入較好?
龔成老師:
你的投資成績理想!相信你都有努力過的,之後保持知識進步與花時間研究投資。
1)可以,但不一定是明年,可以是後年,你可以按你地的財富情況去決定,記住,「供得起」是大前題。
相信香港樓市,中短期可能下跌(但不會大跌),因為經濟弱,長遠會平穩向上,因為始終有需求。
2)中移動(0941)只是收息股,增長力不強,如果你想組合有較強增長力,就等佢反彈時轉其他。
耐世特(1316)本質中等,近年的業績有點弱,但又唔算好差。我相信佢中短期仍會面對不利的經營環境,見佢生意並無增長,盈利都是。
相信要過一段時間,先會慢慢進入正常少少的時期,要耐心少少先等到佢好轉,如果想組合增長力提高,就可以現時部分賣出,轉其他。
3)潛力股有時估值難,股價變化大,但我地可以用分注的方法,就可以減少股價風險因素。平安好醫生(1833)$100以下較好。
------------------------------------------------
Q18405:
老師,我跟丈夫43歲,兩人月薪 $6.6萬,每月開支約$3.6萬,1/3為兩初中兒子的開支。由於之前開支較大,買股票賺少少就獲利
好多時都唔知賺左去邊,增值好慢。但因不用供樓,所以一直不太擔心,但踏入中年想好好打算。因為我曾月供$2000基金10年,$24萬現值$36萬,所以非常認同老師的平均成本法。現想請教老師:
現有一間已供滿的3房套房居屋,市值綠表價$750-$800萬。
現金約$120萬。
股票現值約$32萬,包括:
友邦1800股,長實500股,港鐵1500。(全都賺緊)
另月供新地、電能各$3000,新地已供一年半,電能幾個月。另曾月供工行及中國銀行,現已停咗,現分別市值3.3萬及1萬到。
基金:宏利富達增長基金$36萬,因基金公司改變策略唔比我再月供,2018年底停左。
保險:供款佔夫婦各自約5-6% (已計在開支預算內),各自保障額約150萬。
強積金現值:丈夫有110萬,太太50萬。
問題:想利用未來10年將資產增值,即使不退休也不用計住計住。現時應如何投資及配置資產呢?
1) 居屋:因為實用率高,自住沒問題,好闊落。但就不能加按或租出。所以常想換樓或多購一物業收租。
2) 投資股票:現時股票只佔很少(市價$32萬),有$120萬現金,見現時港股跌咗,想慢慢月供股票,想問新地、電能各月供$3000,要不要換馬。
另可再用$6000(每隻$3000)買盈富、領展、恒生、中銀,邊隻好呢?港交所曾有400股,但在$300元時獲利左用作裝修,有點可惜,不過都無法。
都想買啲潛力股,我的年紀係咪唔好太多?
因為我同先生MPF都是買盈富,所以投資股票之前就沒有配置盈富。
3)在宏利的基金加保留戶口(買康健基金及恆指基金$45萬)因已停供,現放在入面感覺好難增值。但現公司mpf 供款在另一家,表現一般,所以又唔想轉走之前的錢。
由於丈夫用兩子免稅額,如沒稅務優惠,我就要交稅,想問應否係宏利每年放$6萬供TVC基金,每年度減$6萬免稅額。
4)保險有打算加大純人壽,唔知好唔好?(虛擬保險:保額$100萬每月供款約$100)
唔好意思,講到好長,非常感謝你的意見。
龔成老師:
你可以這刻,先集中股票的增長,中短期唔好加物業,到長遠,如果已儲到一定的資金,以及股票有增長,到時先考慮收租樓。
1)由於居屋的實用性高,解決了你自住的問題,因此,你唔好換樓,保持持有居屋。
如果日後有足夠資金,就買多一層私樓收租。
2)你43歲,財富仍有增值力,當然不能太進取,但你都不用太保守。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
你可做月供股票,或自行分注投資,每月$10000。
你可以考慮盈富(2800)$4000。
另外再加3隻(每隻$2000):銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:南方恒生科技ETF(3033)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
3)如果長遠增長力較弱,就轉其他。你可以比較翻這基金,過往5年、10年,與整體投資市場的回報,比較下。
4)保險好個人化的,最重要是「適當」、「足夠」,不用太多,你應為安心、足夠的數目就得。
------------------------------------------------
Q18406:
龔SIR , 你好 , 我係9月份既學生 , 首先要多謝你的課堂 , 獲益良多 , 最後一堂本來想問你一個一直睇你的書的問題 , 但課堂後太多同學搵你 , 唯有係呢到請教你~
一開始睇了你儲一百萬的過程 , 亦明白有了第一個一百萬就好易有好多個一百萬 , 但好想知呀SIR 之後的投資分配 , 因為見呀SIR 你的入市不頻密 , 咁如何於短期內搵到之後的財富???又或可參照呀SIR 邊本書的重點~謝謝~
龔成老師:
我的策略是買入並持有。
而我地的財富,你可以簡單地用「現時的股票市價」去計算,當然我地唔好只睇短期股價,而是長期。即是當股價長期向上時,我地的身家都會上升,並唔需要賣出而得到「確認的現金」。
當我找到潛力股,例如當年的六福(0590)、中人壽(2628)、港鐵(0066)等都比到我倍計回報,這些我地持有了數年先賣出,當中已帶動財富明顯向上
你可以睇《80後2百萬富翁》,有詳細講我由零去到$200萬的經歷。
記得運用課堂技巧,多睇年報,多用「企業評估表」。
------------------------------------------------
Q18407:
688,和其他内房3333, 1918跌得很低,但1109 企得很穩。688 跌破了我的止蝕位22.5, 應否繼續持有?
我打算沽清再月供或分段入。
業績未見不理想,只是没有驚喜。
龔成老師:
最重要是睇翻企業的質素,去決定持有與否,唔好只睇賺蝕數,無意思。
其實上述幾隻股票,都不是無質素的。
中國海外發展(0688)、華潤置地(1109),風險度會低少少。
而中國恒大(3333)融創中國(1918)及,負債太高,風險不少,這類股不能持有太多。
你要睇翻自己的組合,想如何進行長遠配置,以及這類行業佔你組合的比例,以及佢地的質素與風險度,去決定持股比例,唔好只睇短期股價與自己的賺蝕數。
------------------------------------------------
Q18408:
多謝老師你介紹小米比我啊~
當時我疫情前買左2018長期係低位
於是聽你介紹之後我買左隻1810係6月中,12蚊買而家已經升左一倍並且放左一半啦~
我會繼續持有,如果跌番去合理區我會重新加注。
我希望到3 4年小米升到5 60米時,我可以大大聲同大家講我12蚊買左
我記得我大學老師都教我地,話係700身上賺錢既人好多,但係賺到最後既人真係冇幾多個
所以佢都教我地長線持有股票,而佢而家已經係財務自由可以做自己想做既野而唔為錢生活。多謝曬~~~
龔成老師:
你的大學老師講得好,我之前做銀行同證券行都見到這個情況,好多人買到優質股,賺到錢,騰訊(0700)、港交所(0388)好多好多,但一般散戶就是太心急,升少少就賣賣。
我見到好多客,原本可以賺到過百萬,但就係心急賺唔到。
你已經掌握左方向,之後只要保持進行就得!
加油!
------------------------------------------------
Q18409:
你好龔sir, 先講下手上的貨:
瑞聲$53,有2手
移卡$50.8有2手
舜宇$136.6有2手
3033 $7.79 有3手
想請教下投資期間的心態:眼見手上的股票上升了一個高位無放,慢慢跌回低位,甚至低過買入價,自己會抱怨點解唔賣去獲利,或者把所得的利錢去買其他有潛力的股票上。
這現象在過去2個月不斷出現左3至四次。次次都唔開心一輪。
但想返龔sir你的說話,投資係長遠的,亦係公司的價值,我都知這些係有潛質,但好似見到有魚上釣又拋回落海咁,唔知點調節呢?謝謝你的閱讀。
龔成老師:
這種心理是投資者經常會經歷的,你要平常心面對,最好的方法就是「少D睇股價」。
另外,如果你經常有「馬後砲」的想法,你要小心,因為好多散戶都有這情況,$10買升到$15,跌翻去$11。就會覺得自己「有本事在之前$15」,會後悔自己唔在$15賣,但根本無人會知到高位,以為自己能這樣做到買賣,是好天真的想法。
如果你要進步,就唔好同其他散戶一樣,以為自己做到。投資好需要你的理性,心理因素愈少愈好。
以為自己做到與真的做到是兩回事。
我會建議你唔少D睇股價,如果真的想捕捉當中機會,就用「升一倍,放一半」。
------------------------------------------------
Q18410:
龔sir你好,follow你個page兩個月,學咗好多嘢,亦都有買你嘅書,宜家睇緊《財務自由行》,好想去到被動收入養活自己嘅境界。因此我開始思考擺脱「僱員」身份。我41歲,係公務員(最死板嘅僱員),月入6萬,太太零售業,月入平均約有2萬,有1小朋友。資產/財產如下:
- 物業1: 7.3M,剩3.5M按揭
- 物業2: 樓花,5.6M,九成按揭,2021年年中收樓,收租用。(頭兩年減去供樓成本有正現金流)
- 股票: 約40萬,50%為2800,20%為66及823,其餘1928,1211,1810。亦有778,386,2388,幾年前買入,佔少於10%,不會再增加。
- 現金約80萬
- 儲蓄保險40萬
我知道手上物業較多,之後應集中股票,現時正儲現金等入市,目標是增持1211,1928,1810及入手388。現時月供2800($4000),66及823(各$2000),另外儲現金$4000左右。
1. 如果想有每月5萬被動收入,用5%回報計算,我要有1200萬。想問以目前所擁有嘅物與投資方向,我有可能10年達到財務自由嗎?
2. 如果不能,我的投資方向是不是應該集中增持高潛力嘅優質股以加快速度?
3. 買物業2因為被發展商的優惠吸引(頭兩年不用還利息),之後轉按銀行,租金應該夠利息及雜費支出,0現金流。
如樓價升,打算出售套現(估計有80萬以上),並轉另一回報更高的資產(高於物業預期回報率7%);否則便繼續持有以租養樓(但每月儲蓄/供股力會減少)。這樣做正確嗎?
4. 如果以我現時情況計算總資料負債比率應為:3.5M+5.04M / (7.2M +5.6M+0.4M+0.8M+0.4M = 接近60%,對不對?根據《財務自由行》P.74,以41歲來説是安全的。
5. 我現在是以月現金流5萬為財務自由目標,但隨著通脹,若干年後有可能5萬元不足以維持生活,財務自由豈不是失效?
若未來5年後我有望升級,每月人工比現階級多近2萬,但從現在起必須投放更多更多時間包括每天超時工作,及承受更大更多的壓力等。
雖然工資更多,但偏離盡早財務自由(其實現時工作都已在影響我學習財務智識)。撇開工作成就/使命感,我相信投放更多時間在學習財務智識上比放在事業上更令我快達到財務自由,龔sir你同意嗎?
謝謝龔sir
龔成老師:
1)你現時的財富,太集中在物業類別,這會有風險。建議你在之後的配置裡,加強翻股票類的投資。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你這刻先集中「增值」先,我相信10年財務自由,都有可能的。
2)當然,你要投資較有增長力的股票,「潛力股」+「平穩增長股」是方向。
而置富(0778)、中石化(0386)較為收息的股,則不太適合。
3)由於買賣物業的成本較高,除非樓市到了好貴的水平,否則,你長線持有物業,作財富組合一部分,是可以的。之後你就要集中在「股票」方面的增值。
4)以你的年齡來說,仍是可以接受的。
5)所以,$5萬是基本數目,如可以的話,到時應該要再增加。
我相信你應該投放更多時間在「打工以外」,例如做生意、學投資,花時間研究股票等。
------------------------------------------------
Q18411:
成Sir 你好, 多謝你一路以來用心解答問題, 我都學到好多野
我今年28歲單身 , 人工每月$30000, 每個月會用$7000 元放入月供股票, 分別是
2800@$3000
0027@$2000
0006@$2000
月供股票現時儲咗大約$125000
另外每個月$6000元會放入定期, 年利率約3 %, 定期現儲共有約$140000, 現可隨時拎錢,停供或減少供款。
每月大約$3000 供保險, 扣除其他費用有$11000其餘會儲起來等待投資時機及備用。
另外我有以下股份
5 手 9988@$178
5 手2128@$10.2
4 手 1928 @$30.65
2 手 241@$19.86
5 手 3319@$39.9
以上5 隻股票現總值約$385000
扣除股票, 現有流動資金約$500000(連埋定期), 無其他資產
1) 我現在的月供股票中, 以我現時情況我需要更改投資組合嗎, 另外0006 很像沒什麼升值力, 我需要停供嗎?
2)我另外持有的5 隻股票中, 質素前景如何呢?可持有嗎? 而9988 同241 都係阿里系, 這個比例會太高風險嗎?
3)我現時月供股票連同其他股票佔我的總資產約50%, 比例有冇需要增加減少。 餘下的$500000可以如何再投資
4)我一年保險費佔我人工1/12, 這個比例算唔算合理
唔該!
龔成老師:
1)你的年齡,應該進取少少,你可以轉一隻,改為較有增長力的股票。
可考慮:華夏恆生科技ETF(3088)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177)。
2)都不差,但阿里健康(0241)風險度較高,唔建議持有太多。
業務上,有好大的潛力,不過,本質波動,股價上落大,消息多,市場炒作多,這類股風險都不少。最大問題是無人能正確估值,市場現時只是估估下,推將唔到佢將來的價值。
這類股只建議小注持有,唔好加注,原有貨,如果你本身目標是長線,繼續持有無問題,但你預佢股價上落大。
3)現時的大市平貴,你預持有3-5成現金是可以的。
現時大市處合理區,可以一邊投資一邊留現金,而餘下現金的運用,就是等大跌市時出手。
4)無絕對的,每個人不同。你比例可以的。
------------------------------------------------
Q18412:
龔Sir你好,本人現年40歲,工作環境不太穩定,想買新的ETF 3032,3033作儲蓄請問你有什麼睇法,投資價值如何?
現時開始很多人談論「新經濟股」,想問問如長期持有,要是投資你會選擇新的ETF還是盈富基金?
另外現在月股2800同27,但睇到27股價越來越高,是否仍建議月供?扣除開支,假設每月供款7000,有什麼建議可以給我?
期待並先謝謝你的回覆。
龔成老師:
我地投資,最重要是建立一個長期的投資組合。以你的年齡,可以有7成投資平穩增長股,如盈富(2800)、而另外3成就投資潛力股。
由於潛力股不少近期都升左好多,這刻並不是最好的投資時機,建議你以月供模式,慢慢分注入。如果你未有選股能力,投ETF是最好,你可以月供華夏恒生科技(3088)。長期月供就得。
至於盈富(2800)與銀娛(0027),兩隻仍可長期月供,唔需要太理會中短期。
盈富$3000,銀娛$2000,3088供$2000已可。如果日後有資金,就先增加盈富。
------------------------------------------------
Q18413:
你好呀龔成老師,我最近都好想好好做下理財同埋希望可以喺五年內買到樓。
所以都想研究下點樣可以增加我同我男朋友嘅資產,我同男朋友今年都25歲,我收入有15000而男朋友收入有16000
男朋友有儲蓄20萬但佢都準備讀書學費都要十萬,因為佢比較慳所以每月都可以儲1萬蚊。而我因為之前太大洗所以目前都冇積蓄但每月扣除必要開支後可以儲3000蚊。
我希望我哋都可以plan 下自己嘅資產,男朋友唔想打理所以話直接交俾我。
我暫時計劃我哋每月用8000蚊投資,6000蚊作月供股票2000蚊如果我買份5年嘅儲蓄保險IRR約5.6%你覺得如何?
定係比起儲蓄保險都係月供股票比較好呢?
如果係嘅話我暫時都係會買3000蚊盈富其他都未有諗法⋯⋯希望你可以俾啲意見,謝謝你。
龔成老師:
如果佢$20萬中,有$10萬是有用,餘下的$10萬又不算夕不如當作備用,除非大跌市,否則就唔會動用。
你利用月供及儲蓄保險可以的。儲蓄保險可以視為你財富防守性的部分,但就唔需要多,因此$2000可以。
至於月供方面,最簡單的做法是月供ETF,你可以供盈富(2800)$4000,華夏恒生科技(3088)$2000。
------------------------------------------------
Q18414:
本人34歲,現有股票價值大約$300k,現金$100k,本身月入$30k 開支如下供樓$12k,家用同日常開支$8k,淨$10k 想未來開始月供股票
我本身早2年半前已立定5年要蓄到100萬架目標,一直都有蓄錢,之前間唔中都有買下股票但都輸多嬴少,即到今年3月冇意中在fb 發現你架專頁
開始對你講架股票理財方法覺得好好,現在一直都學習中,還買了你的書優質潛力股同80後百萬富翁,希望在增加對股票知識,同埋我手持現在股票需要重新整合嗎?在此多謝你解答。
我手頭現在股票如下
788:買入價1.48~16000股
175:15.4~2000
823:59.9~500
270:11.96~2000
1211:36.6~1000
14:28~1500
未來想月供
2800:$3000
66:$2000
龔成老師:
你現時手上的持有,都是有質素的股票,你可以保持持有,長線投資。
不過,潛力股的比例就唔算多,只有比亞迪(1211)一隻。你之後可以加強翻潛力股的比例。
不過,由於你現時現金比例唔算多,因此唔需要急,可以儲下現金,等機會先。
至於現時月供,都是優質,無問題,但可以考慮加入少少潛力股。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18415:
老師,你好,追咗你page一段時間,依家終於立下決心儲錢
之前因為唔識理財亂洗錢,本身過幾年結婚但唔夠錢…
但唔係好識處理。
我依家廿六歲,月入18000,
家用:2500
供樓:3500,同屋企人夾錢係內地買,但最快都要2024年先賣得,都供咗3年
卡數:5530
依家每月可以儲到2500-3500
月供緊阿里巴巴同中電 各1000
有啲流動資金,諗緊好冇買一手領展定月供好
同埋諗緊方法可以點增加收入…本身有多一份part time
希望你有時間覆啦
謝謝
龔成老師:
第一,試下減少卡數,減少不必要的消費。
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
第二,可以找一些高時薪的兼職,增加你的收入。
第三,你現時的年齡,可以進取少少,中電(0002)只是收息股,你可以轉盈富(2800)或一些潛力股,視乎你的風險度。
你這刻儲多少現金先,等現金有一定的數量,就可以開始一手手買股票,又或再加多其他的月供。
如果你現時有一定的現金,就可以開始月供領展(0823)。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18416:
龔成老師:你好,我今年36歲,每月扣除開支及保險供款,有hk$13k -15k 可作儲蓄或投資,我手上約有hk$100萬流動現金,持有的股票只有多年前以較高位買入的
941 - 3手, 約$80買入
0303- 3 手 $110 買入
如果想用2年將hk$100 萬滾存至hk$200萬是否有可能? 應該選擇哪些股票作為一個投資組合? 謝謝
龔成老師:
現時持有的股票,增長力都不強,要上翻去差不易,你只能視佢為收息股。
如果想整體組合有更好的增長力,就轉其他較有潛力的股票。
另外,要兩年將$20萬滾存為$200萬,十分難,因為就算巴菲特,一年回報只是20%。
你要集中投資高風險股,你虧損的風險會好高,因此不建議。
如果你想有突破,可以考慮做生意,這都是一個方向。
當然,你研究投資都可,但要付出好多,要每星期研究企業,尋找市場忽視的潛力股,然後大舉投資,但這都會有一定的風險。
------------------------------------------------
Q18417:
你好龔成老師,留意左你一段時間,發覺你真係一個好有心既老師,教既野又實用。
講講我背景先,我係一個26歲出黎社會工作左一段時間既年輕人,月入$17,000-$20,000 ,自己有5萬儲蓄(層樓已經花左自己好多儲蓄)
每月開支$2400供樓& $4000 同另一半夾份供樓,$5000儲蓄投資,其餘既都係生活費雜費。
自疫情期間多出既時間,自學玩股票同窩輪,發覺窩輪本小可以利大,唔知係好彩定點,又成日比我賺到波幅差價,但聽你講解建議最好買D有平均增長既股票長楂,所以我好矛盾
係咪應該唔好玩今多輪呢? 定應該一半正股一半炒輪賺快錢呢? 我依家set左個目標比自己,每年都要有12萬儲蓄,平均每月想儲$1萬, 請問我投資方向應該邊方面著重多D先可以將財富滾大?
龔成老師:
我20年前,都是短炒者,炒輪、炒孖展,玩左幾年,輸足幾年,之後長線投資,就開始不斷賺錢。
我好後悔當時浪費左幾年去學這炒輪,我當時不斷睇書、上堂學短炒,但最後都是輸,好後悔,只怪我當時無知。
之後做銀行同證券行,見大部分輸錢的客,就是短炒的一群!玩衍生工具的!
這是我10年見到的情況,這是行內的秘密,根本大家都知佢地一定輸,但業界一定唔會講!
另外,如果你分析全球真正賺錢的投資者、經金經理,佢地都無人短炒,都是長線投資的,巴菲特更講明反對短炒。
------------------------------------------------
Q18418:
老師你好,想問一下,你接唔接受補習
我今年17歲我由細到宜家都冇咩賺錢相關知識,有聽媽咪講下。我自己大概知道,有分主動同被動收入。即係努力賺錢,儲錢然後投資。但係何謂投資?同埋點樣投資?所以如果可以,可唔可以搵你視訊上堂?
我真係對呢方面好有興趣,加上自己以後想比我出咗嚟嘅家姐犀利
因為我真係一無所知,想睇書學都唔知點開始
龔成老師:
我暫時只有【投資倍升股課程】及【倍升股進階課程】。
兩個都是股票班,只是「基礎」與「進階」,你可以報相關課程,而我除這兩個課堂外,無作其他付費教授。
「基礎班」適合初階投資者,你可以報。
或者你可以首先從書本學習,書本在三聯、商務、誠品都有得賣。由於部分書在一些書店已斷,所以若你見唔到,問下職員就得(又或向職員訂都可以)。
以下是我的12本書:
《80後百萬富翁》(第8版)
《80後2百萬富翁》(第4版)
《80後3百萬富翁》(第2版)
《財務自由行》(第6版)
《大富翁致富藍圖》(第4版)
《50優質潛力股》(第3版)
《50穩健收息股》(第3版)
《50值博倍升股》(第1版)
《股票勝經》(第3版)
《選股勝經》(第2版)
《年報勝經》(第2版)
《5年買樓4部曲》(第1版)
你入門可首先睇:
《80後百萬富翁》
《股票勝經》
《財務自由行》
之後再睇其他。
------------------------------------------------
Q18419:
你好,龔sir,我每個月月入20000左右,每個月供3000蚊2800,2000蚊1177,請問正確嗎?還可以怎樣改善理財策略?多謝
龔成老師:
可以。
你上述所供的都是有質素的股,你保持長期進行就得,如果日後有較多資金,應該先加大盈富(2800)的金額,之後就再入其他的股去進行月供。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18420:
你好 龔成老師
有1000股 823 領展 均價93
點部署好 一直都想溝貨
唔知點算好
龔成老師:
這股有質素的,現價合理,你可以加注。
最重要是,你加注後,這股佔你股票組合的比例不會過多,同時,你仍有現金剩,等你可以在之後,如果出現大跌市,有資金買入股票。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
踏浪艇 買賣 在 龔成 Facebook 的最佳貼文
【龔成問答信箱】(Q15861-Q15880)
Q15861:
龔成老師你好,我係一名投資新手,24歲,岩岩畢業,月入14K,現金26K,最近每個月有幾日會放無薪假,所以會變成12K左右,因為公司包飯,所以一個月可以儲到$10000,有開網店做生意,外面都有格仔舖,但營利唔穩定。
我係最近先開始有投資諗法,不過都有係網上做過少少功課,清楚左一啲術語,有基本概念。
睇左幾期老師既問答教室,我諗由於經驗同知識不足,應該會月供股票,但關於金額分配方面,有啲猶豫,請問老師會建議我月供幾多錢?
我應該全數供同一隻定分散金額月供呢?目前心水係2800(盈富)。如果我想3年後有80萬可行嗎?老師又有冇邊本書係特別推介新手閱讀呢?
謝謝老師抽空解答我的問題
龔成老師︰
由於你現時放無薪假,現有的資金應留來應急,不應用作投資。
到你收入穏定翻,你可以做月供股票。以你有每月可儲1萬計,你先用$5000去做月供,其餘$5000儲起,用一邊月供一邊儲蓄的策略。
月供選股方面,你可用平穏增長股盈富(2800)、金沙(1928)、恆基(0012)、中銀(2388)、港鐵(0066)、煤氣(0003)、港交所(0388)、長建(1038)、粵海(0270)、領展(0823)、深高速(0548)或潛力股︰比亞迪(1211),中生(1177)或福壽園(1448)。
但由於你無投資經驗,我建議你$5000盈富(2800)。佢係包括50間質素不錯上市公司股票的組合,有助你平衡風險。至於餘下的現金,就等你有一定投資知識,再動用去投資其他優質股。
同時間,你要去多讀投資相關書本、年報,新聞和課程。本人的【投資倍升股課程】適合初學者的,每一課後都會有指引比你,要你在一星期內找那些資料,溫那些內容,只要你跟著去完成,到你讀完整個課程後,你已能自己選股、投資、評估平貴,在投資上已掌握了一定的知識。課程時間,你可以留意我FB。
書本方面,我的《80後百萬富翁》和《財務自由行》都適合初學者。
------------------------------------------------
Q15862:
你好啊龔成老師,如果我每月拿$8000出來月供股票,我應該分散買多少間公司才為最合適?
我心目中的公司有盈富 港鐵 領展 煤氣等等,月供後我應該會長期持有,短期內都不會動用這筆資金,長遠來計我應該選那間進行投資?謝謝你
龔成老師:
如果$8000可選3間。
你可以考慮盈富(2800)$4000、領展(0823)$2000、港鐵(0066)$2000。因為盈富本身是一個組合,風險比單一股票少,所以佔組合比例宜較多。
上述都是優質股,都可以進行長期月供,只要不理會中短期股價,長線進行就得。
------------------------------------------------
Q15863:
你好 想問下 有2 手匯豐 分別72 66.5 買入 而加放左佢買恆地或金沙 會唔會好過繼續長揸
龔成老師:
要睇翻你的投資目標,匯豐(0005)是收息股,你預佢只能派息,無乜增長力,如果你最初都打算收息,可以持有。
但如果你打算增值,轉恆基(0012)、金沙(1928)的確有較高的增長能力。
所以,要睇你投資目標,而及現時組合的財富分配情況。
------------------------------------------------
Q15864:
龔成兄,如果我將8 成mpf既利息基金,現在放4 成入香港股票基金是否合適?還是要多等一下?
我知道你一直在等 串24000, 所以想詢問你一下
龔成老師︰
強積金的配置其實唔複雜,你只要按你的年齡階段,去進行分配就得,年輕時較進取,中年平穩,退休前就保守。基本上你按年齡,慢慢跟這樣比調整就得。
現時大市初步進入平宜區,你可以將5成放入恒指基金,其餘分2注慢慢換成恒指基金可以了。
記住今次調整好後,唔好再轉來轉去。只要你按上述的模式,簡單分配就得,我自己由初踏入社會開始,就100%恆指,現時都是。
------------------------------------------------
Q15865:
想問假設現價1元的股票, 真正買入的時候的價格是否會高少少。 賣出的時候又會低少少? 一直以來月供, 並沒有賣出股票。 想了解一下
龔成老師:
其實唔會的,因為你只是以市場價賣出,無論是月供或是一手手去買賣,都是以市場價。
當然,因為佢有出入價,如果當你心急想立刻買入時,就用「市場賣出價」去立刻入,這在出入價裡,是較高的一方,但都只是差少少,好少。
------------------------------------------------
Q15866:
龔成老師你好,本人今年24歲,月入約40k,扣除家用、master學費、每月開支,約可儲蓄20k。薪金預計每年平穩增長,而學位亦即將完成,所以稍後可儲蓄更多。
現每月投放10k月供2800,共持有約10手,另有供款人壽保險及投資少額外幣。
初入職場,投資知識和經驗不多,有請老師指教投資方向。有見老師鼓勵每月儲蓄月供股票及存留現金,你會怎樣建議我分配每月的20k呢?
現金部分又應否再作定期存款?有沒有其他的投資產品介紹?我知道我的年齡是資產增值的黃金時期,不想浪費時間和機會。謝謝老師。
龔成老師︰
無錯,你這個年紀正是財富增值的黃金時期,要好好把握。
"保險"係理財中防守部份,只要保障足夠就可以,唔洗買多。而定期這些現金流產品,增長力欠奉,唔適合你。
現在你每月儲到的$20K,$10K月供盈富(2800)可以繼續,其餘$10K先儲起,我地用一邊月供一邊儲蓄的策略。當大市出現一定程度的下跌,就可以動用現金去投資,在平宜價加大力度掃貨,然後長線投資。
以下優質股都適合你年紀︰
平穏增值股︰盈富(2800)、港鐵(0066)、金沙(1928)、煤氣(0003)、恆基(0012)、中銀香港(2388)、長建(1038)、粵海(0270)、領展(0823)、港交所(0388)、深高速(0548)
潛力股︰比亞迪(1211)、中生(1177)或福壽園(1448)
------------------------------------------------
Q15867:
老師,我現年33歲,有個問題想問。應該2018年9月之前上完你堂之後,我係2019年以平均價5.6入左中生製藥,到年頭11蚊走哂,因為自己都驚。
老師,我知道自己唔應該走,但始終係人性局限。其實賺1倍已經好開心,以前輸多贏少。好多謝你。現有現金40萬,月入27000
依家跌得厲害,我打算慢慢入返中生製藥。自己計過中生製藥起碼要穿返10蚊樓下先平,不過唔知咁計啱唔啱。
另外,其實自已想入多隻。因為想一兩年內有100萬做買樓結婚。所以我想依家開始慢慢入希慎。一嚟老師你推介,二嚟我計23蚊樓下就便宜。
希慎係銅鑼灣大地主,有商場商廈,d樓都重建好,只要經濟好租一定升。未知老師點睇?
龔成老師︰
我明白嬴一倍的確很吸引,但係你必需跳出這種"賺差價"的想法。你要記往我地財富增值,就係去儲優質資產,但佢慢慢幫你財富增值。
好多人會諗,而家咁貴不如放一放,回翻再買。但係唔係真係會回到你心中所想位置,無人會知。
中生(1177)係值得長線持有的優質股,回到$10以下只係重回合理區,要平係要回到6,7蚊才算。
希慎(0014)有一定的質素,可以長線投資。
佢係銅鑼灣商舖及寫字樓地區中,係其中一個最大商業大廈業主,投資組合擁有逾4百萬平方呎之樓面面積,希慎廣場、利園等,都是十分優質的商場。
佢過往出租率均多處於95%以上,商場及寫字樓很多時更處98%以上的高水平,係典型的收租股。但$23只是合理區,要平宜的話要跌多1-2成。
但注意,如果你這筆資金係用來1,2年後買樓結婚,由於你有明確目標和時間太短,我建議你最多做定期或分注買入以下較少波動的收息股會較穏當。
收息股︰港燈(2638)、香港電訊(6823)、置富(0778)、陽光(0435)
------------------------------------------------
Q15868:
龔Sir 我岩岩上左你股票班第四堂 開於市賬率既問題
我搵左幾隻股票做功課 地產你話用5年data
股
過往市賬率 (現時市賬率)
0014 0.5-0.55倍 (0.35倍)
0016 0.64-0.678倍 (0.52倍)
1972 0.57-0.61倍 (0.44倍)
2388 1.3-1.7倍 (0.96倍)
咁其實係咪即係以上嘅都係平宜區
反而
0012 0.43-0.50倍(0.52倍)
係合理區中上?
2)地產股係咪都係要睇roa roe?
3)咁請問個情況係有咁多隻便宜股應該點揀,想搵接近水桶2甚至1的話
唔該龔Sir
龔成老師︰
1)地產股我會在之後果堂講,有咩問題,唔好心急,我要時間解釋的。至於中銀香港(2388),在賬面值上,的確是處平宜的水平,但正如課堂所講,賬面值只是輔助估值,我地會同時計算業務價值。同時,都會按最近的業務情況,而略有調整。
2) 由於地產股會有"物業重估"這部份,令收入出現偏差,所以ROA和ROA會唔係咁準。所以要自行調整。
3) 股價平宜,只係講緊個買入時機。當每一隻都開始平宜架時候,我地要睇埋佢整體質素去考慮。
咁多隻地產股中,恆基(0012)會係首選,佢本身有質素,再加上佢是全港持有最多農地的發展商,長遠的價值一定會慢慢釋放,所以會係最有潛力。
------------------------------------------------
Q15869:
你好老師!!!我一直都有留意你FB同資訊,之前都有買個投票,但蝕曬同坐艇中!!!呢4-5年都無買股票了,主要係做定期同買外幣.
其實我一直都有睇個市,想問下老師:
1.如果現在買匯豐,比亞迪,港鐵邊隻好?
2.我未試過月供股票,想由下月開始月供耀才證券,合適嗎?
上述我都係長線投資,因為聽老師講收息股同3年以上先會有收成.唔知自己點部署好
其實我目標想買樓,希望老師指導,謝謝
龔成老師︰
如果你有置業目標,現在可以用股票為你創造一個增值平台,助你達成目標。
1) 匯豐(0005)以收息為主,增長力一般,唔係咁較適合。港鐵(0066)和比亞迪(1211)都有增長力,對你財富增值會較有幫助。
2) 簡單來說,月供股票就是你每月將現金,買入某一隻或多隻股票,慢慢咁樣儲貨。形式就是每月投入相同的金額,買入同一隻或多隻股票,並持續進行。
例如,每月以相同金額$10,000 買入盈富基金(2800),假設第一個月股價為$25,就能買入400股;第二個月升至$35,就能買入286 股;第三個月跌回$30,就能買入333股。
總結這三個月,投入了的資金為$30,000,累積股票為1019股,平均買入價為$29.4。
由於月供股票每月投入的金額相同,因此當股價上升時,買入的股數自然減少,而當股價下跌時,就自然會買入較多股數,如同自行調節一樣。
要注意的是,由於每月持續投入資金,因此一定要選優質股,長線投資,同時要以儲股票的概念進行,最少持續供3年以上,之後持有5年以上,當然越長期就越理想。
以下都是有增長力的優質股︰
平穏增值股︰盈富(2800)、港鐵(0066)、金沙(1928)、煤氣(0003)、恆基(0012)、中銀香港(2388)、長建(1038)、粵海(0270)、領展(0823)、港交所(0388)
潛力股︰比亞迪(1211)、中生(1177)或福壽園(1448)
------------------------------------------------
Q15870:
龔成老師,你好,我一直都有留意老師既專頁,今年決心行動起來實行投資。
作為初哥,想由月供股票開始,扣除日常駛費,每月大約可儲1萬,想利用當 $6000-7000 月供股票 - 盈富。
請問如全數集中月供盈富是否合適?
或 應該分散月供多1-2隻股票較好?
(如是,請問那隻股票較好 或 金額比例如何分配?)
以此組合,想5年後滾存到60萬是否可行?
謝謝老師百忙之中解答
龔成老師:
初階者,月供盈富(2800)是最好的,你可以進行,只要長期就得。
如果你有其他心水優質股,就在月供盈富的同時,並行供這些股票。
你可以考慮盈富(2800)、銀娛(0027)、恆基(0012)、中銀(2388)、港鐵(0066)、煤氣(0003)、粵海(0270)、領展(0823)、港交所(0388)、希慎(0014)、太古地產(1972)等,你可以了解下這些股票,然後從中選股。
如果你不懂股,就集中供盈富。
能否滾存到$60萬,好睇你點運用餘下的現金。
現時大市波動,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q15871:
龔sir!5號仔22400股、平均價65。3988有30萬股、平均價4。1398有7萬股、平均價6.8。
941有4000股、平均價70。857有80000股、平均價6。帳面已虧損很多。
已開始擔心.還有三百萬已用、要怎樣、我是沒有工作收入的.謝謝
唔好意思呀sir是還有三百萬可以用
龔成老師:
你的組合,過份集中在銀行股,這會出現系統性風險,如果之後大市上翻D,要調整下,建立一個平衡的組合。
如果你沒有工作,就要更小心運用,建立最多只動用$150萬,在12個月裡,分注慢慢投資收收息股及盈富(2800)。
你可以建立一個收息股的組合,目標是6%的股息率的收息股,例如港燈(2638)、深高速(0548)、香港電訊(6823)、置富(0778)、陽光(0435)都可以。
同時,可以考慮盈富,為組合平衡。
------------------------------------------------
Q15872:
龔成老師,你好~有這問題想諮詢一下你的意見。
澳門人,今年25歲,0投資經驗。月入25k,除返開雙糧戈啲平均一個月30k,基本上最基礎要有的保險都有,包括:危疾,年金存儲,人壽(家人已供完,在滾息中,現已滾到十幾萬)。
2019年剛置業一間唐樓,即刻簽左3年約租出去,租金HKD7000,計劃3年後收返間屋裝修自住結婚。原本係打算將每個月租金草起做裝修費。
但早排萌生一個念頭:呢三年筆錢係銀行戶口都係得個擺字,所以想利用呢三年收返黎既租金去投資。依加戶口現金有十萬,每個月會從人工撥5000入存儲戶口,另外加上7000收租。
有諗過以下方案:
1. 將今年目標設為戶口存到20萬現金。一年之後目標達成開始拎10萬出投資,逐手逐手買。
2. 但在於時間問題,只有3年時間收租,定係依加就開始拎租金去月供7000股票會好啲?
3. 股票組合可以點設計?月供7000盈富定係可以揀多隻分散投資?
4. 最近美股市況好似好可怕,會影響到港股?係唔係暫時唔好入場住?
希望得到你的指教,謝謝。
龔成老師:
1)雖然交向是可以,但你投資年期太短,1年後開始買,3年後要用。
由於股票要長期先可以有效增值,中短期存有不確定風險,因此,你就算進行這計劃,也只能動用部分資金,不能用盡。
2)現時可以開始月供,要做到平均的效果。不過,同時間要留有一定的現金。
3)我假設你會月$7000月供,$4000可以是盈富(2800),另外2隻兩選其他,不過,好似話澳門的手續費較貴,所以,如果手續費多過1%,就不值得。
4)這反而是月供的最好時機,只要慢慢分注月供就得。
------------------------------------------------
Q15873:
你好龔成老師,小妹今年21歲,做緊第一份工月入$16100,入職半年。
依加每個月草$5000,我想用其中$2000/$3000去投資月供股票,但係我無經驗,想問你有咩建議?
我想5年內草3,40萬
請問有無依個可能呢?
另外我想問如果我入一手阿里巴巴,你建唔建議?
龔成老師:
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先。做月供股票,每月$5000
。
你可以考慮盈富(2800)$3000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
能否滾存上$40萬,好睇你可唔可以有效運用餘下的現金,能否把握到大市機會,現時大市波動,有危有機,要小心應對。盡快學知識。
阿里(9988)現價可以。
------------------------------------------------
Q15874:
你好 龔成老師
我買入了不少1810小米..而家1516唔知點好
應該放定繼續留
另外可以祥細分析下呢隻小米嗎
謝謝老師
龔成老師:
小米(1810)都有一定的潛力,這股不算差,你持有無問題,有得守。不過,這股業務上落始終較大,唔建議太大注投資,因此,如果持貨太多要小心,但如果貨不多,就無問題,但你預中短期一定好弱。
------------------------------------------------
Q15875:
你好我有投資問題想請教你
我2014-16年去左澳洲working holiday,個陣賺左筆澳元但無拎去投資放左係銀行。
最近睇左你本書 覺得應該拎個筆錢去投資,但澳元剛剛跌到4.9,所以猶豫緊而家到底放係銀行先定兌換成港紙去投資。想請教你意見
龔成老師:
你可以將澳元轉成港元,然後投資,這動作可以分2、3次進行,令你的價位比較平均。
港股開始有投資價值,你可以分注投資,但一定要同時留有現金,慢慢用。你預買入後,中短期可能會弱,但長期來說,增長力一定比你單持有澳元較好。
------------------------------------------------
Q15876:
你好,想請教一下,我36歲,已有自住物業,現在有200萬現金,想請問如何設定計劃或組合去作資產增值?
龔成老師:
我地理財,要做到平衡,做好財富的配置,你已有物業部分,因此,之後的投資可投資股票,令財富裡做到「股樓平衡的效果」。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你現時可以利用$200萬,運中部分,例如$100萬,投資一些「平穩增長股」,小注「潛力股」,長線持有,相信對你的財富平衡及增長方面,是最好的配置。
平穩增值股,例如盈富(2800)、金沙(1928)、長建(1038)、中銀(2388)、港鐵(0066)、恆基(0012)、港交所(0388)。建議你分注投資,建立組合。
另外,以你的情況,財富仍有一定的增值力,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q15877:
老師你好,我是你澳門的舊生,上年上完你堂之後一直有入你介紹的股,現時有市值110萬嘅股,有500萬現金,應如何入市好呢?
龔成老師:
你現金比例較多,對於現時的大市來說,是一個難得的機會,要好好把握。
如果這些都是「閒錢」,你可以將其中$$300萬-400萬,在12個月內,分注投資優質股,只要你投資優質股就得。
大市上落好大,但絕對是有危有機,問題是點樣有效把握機會。
------------------------------------------------
Q15878:
老師你好,想問問你有關長遠投資的策略。本人34歲,月入2萬4, 存有30萬港元現金及10萬人民幣現金,手持以下股票:
匯豐 2000股
港交所 100股
領展 200股
金沙 1200股
都市麗人 7000股
想問下呢個組合,還需要加盈富基金嗎? 10萬人民幣現金是否只能做定期?
如想月供股票,可以揀哪些優質股呢?
麻煩老師,謝謝
龔成老師
匯豐(0005)只是收息股,對你的年齡來說,未必最適合,因為股價增長有限。你可以等有股價上翻D時,轉其他股。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
都市麗人(2298)質素只是一般,長線投資價值不算太高,不宜持有太多。
至於其他幾隻,都是有質素的,可長線持有。
現時分注投資盈富(2800),可以,只要慢慢入,同時留有現金就得。
至於人民幣定期,可以保持。唔建議太急用投資。
------------------------------------------------
Q15879:
阿sir, 如果以我呢啲一個比例,係咪唔係好平衡?地產佔多左少少?唔好意思,我未有信心肯定呢一個問題...
12 - 1000股
66 - 2009股
270 - 2000股
590 - 1000股
1211 - 1000股
龔成老師:
基本上都算可以的,但地產類當然多左少少,不過仍是可接受,因為港鐵(0066)及恆基(0012)都不是100%是純地產業務。
上述都是有質素的股票,都適合長線投資,只要你之後增加地率類的速度,不要太快,保持平衡就得。
------------------------------------------------
Q15880:
你好成哥,我想請教下你對2013,331及3380嘅睇法,謝謝
龔成老師:
微盟集團(2013)集團主要在中國從事提供軟件即服務產品及營銷服務。
佢的產品分為「商業雲」解決方案、「營銷雲」解決方案及「銷售雲」解決方案三類。
「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及AI技術為商戶提供智能營銷服務。
這些都是將來發展的大趨勢,從業務潛力上,的確是有的,見佢財務數據的增長都強勁。但在估值上都唔平,所以,如果投資,這刻小注好了。
豐盛服務集團(0331)主要係於香港、中國內地及澳門,從事機電工程服務、建築材料買賣、環保產品貿易及提供相關工程諮詢,亦於香港從事清潔及廢物處置管理服務、回收及環保處置服務以及洗衣服務。
過往生意都有穩定的增長,而盈利都是,但企業的規模較細,因此風險較大,同時規模效益不高。但以佢現時的估值計算,價格是在合理區。
你可以投資這股,分注買入就得,長線持有,但就不建議投資得太多,始終這企業有點風險。
龍光地產(3380)質素不算差,但又未到高質之列,佢生意保持理想增長,企業都算有一定的規模,而且盈利保持增加,整體在業務上,都是不錯的。不過,佢的負債較多,這點令企業扣分,令這企業有較大的風險。
這股長線可以,但由於風險問題,不建議太大注。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。