【《#南山的部長們》：南韓拍呢啲題材係得嘅！】
《南山的部長們》係2020年南韓最高票房嘅戲，都代表南韓出戰今年奧斯卡「最佳國際電影」，講南韓前總統朴正熙被刺殺前40日嘅故事，係南韓最拿手嘅政治驚慄片，精彩到不得了。導演禹民鎬最叻拍呢類題材，當年嘅《寒流黑金》已經超正，呢套更勝一籌。
唔知香港係因為疫情上唔到，定還是根本冇人買？2020年有唔少韓片上映，但最高票房果兩套竟然冇上，想當年得利仲「健在」時，應該會同安樂爭嚟做嘢，定還是套戲又將會上Netflix就不得而知，但絕對係舊年南韓最佳電影。
南韓拍呢類題材最勁係，令你唔認識果段歷史，甚至係（曾經）同你完全無關零共鳴，都會睇到熱血沸騰，然後搵返果段歷史。南韓黑歷史題材，我哋睇得多係全斗煥果期故事（一堆「逆權」片），但再往前睇都唔好得幾多。前總統朴正熙企圖實行高壓獨裁，身邊情報局局長又要面臨權鬥、自己不受重用，加埋一連串政治風波，終於將佢「迫上梁山」。
雖然，《南山的部長們》冇果堆「逆權」片，又或者《北寒諜戰》一類戲咁有娛樂性同感染力，但即使你唔識段歷史，睇時都劇力澎湃。n條支線初時或者唔明佢做緊乜，愈睇愈有戲味，即使只係班男人鬥來鬥去，都絕對唔及女人失禮，中段一隻「權鬥棋子」支節仲好緊張添。呢一切鋪到終極一刻嘅暗殺，場「鴻門宴」無論氣氛、鏡頭、對白、動作場面都完全係高潮戲典範，李炳憲刺殺之後冷靜離去，一鏡直落，型到呢。
睇返資料，主角中情局局長金載圭，歷史上冇講明佢做乜要刺殺總統，套戲取態係有少少偏幫佢，但唔好理有冇「白化歷史」，單係寫官場失意、權鬥嘅失勢者，點樣陷入絕境－－唔好理係咪野史，令成個故事言之成理，去到果步，佢點解咁做，絕對明白。
結局收筆更靚，唔止鏡頭靚，都有餘音裊裊感覺。《逆權司機》「返轉頭」嘅意義或會令佢成為歷史無名英雄，但《南山的部長們》呢個「返轉頭」舉動，同樣係一人足以改寫南韓歷史。睇返啲資料，佢唔「返轉頭」，南韓近代史隨時唔同。
當然，件事真好假好，最緊要戲好睇。又係老是常出現嘅李炳憲，但無可否認佢做呢啲角色一流，亦正亦邪。你可以話佢個角色玻璃心，但失勢果幾下內心戲，正到我都同情佢。
唔好問我點睇到，你識嘅😉
🏆第7屆晞。觀影記事讀者電影投選現已接受投票，請踴躍參加啦：http://bit.ly/392BwQ2
📣即訂Patreon加強版，閱讀更多精選深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
