《其實好多成年人到今時今日都唔知道玩FB 係要好高智商架》
今日有個麻甩佬上facebook，喺一個有2萬幾人嘅private group香港外傭僱主關注組入面呻苦。話自己個工人因為老豆彌留請no pay leave ，冇人湊bb，所以老婆都要返公司請no pay leave，老婆no pay leave嘅損失可唔可以扣工人嘅人工補償。 呢單嘢其實冇討論嘅餘地，所有人都唔會幫呢個麻甩佬，點解大家要花力氣去鬧呢個麻甩佬？鬧係冇用架，因為佢嘅智商，根本未達到會接受意見而且改善嘅水平。
我係想講下，有啲成年人 真係冇足夠嘅智商 同social嘅能力，喺虛擬世界玩social media
今時今日，好多成年人仲以為social media 係放工散心嬉戲嘅地方，虛擬世界講嘢唔使負責任，喺social media可以放低防線。你咁諗就錯喇，根本運用social media係需要高度嘅智慧。如果你喺真實世界都唔識social，好心你就唔好喺虛擬世界嘅social media social 啦
根本facebook係一個 好赤裸嘅地方......
你以為喺FB 大家見唔到大家嘅肉身，就距離好遠，減少兜口兜面同人social嘅壓力？你以為大家唔識大家，就好有安全感好穩陣，可以暢所欲言？ 根本所有social media facebook ig linkedin都係危機四伏嘅地方。
我諗大家都試過，你識一位新朋友，打算add佢facebook，好多次都可以喺佢身上搵到唔只一個mutual friend，可能你讀書做野上興趣班住個區有common 嘅交雜。
大家係唔係覺得customize咗你嘅post做 friend post就好有安全感？
根本網上世界就係一個好赤裸嘅場合，你幾乎唔使努力，就可以知到一個三五識七嘅人嘅底細 ，你喺facebook search bar嗰度打新識朋友嘅電話，就已經search 到佢fb acccount (因為有好多人，而家仲未知道將自己嘅電話link咗facebook account，而setting 又冇set disable telephone no. search)。你上linkedin 仲恐怖，有人係將佢成個生平完整咁present 出來，幾時讀咩書，做咩工，份工做咩，有咩connections，咩年紀，咩樣都show 哂出來。
根本大家都係國王的新衣嘅國王
以為自己喺網上或者social media保護得自己好好，實際上大家都只係著咗件透明嘅便利雨衣，底衫褲都唔著就行出街，喺個網上招搖過市。
social media嘅傳播性係高到你無法想像...
香港外傭僱主關注組呢個post入面，我睇到一個好荒謬嘅留言，有人留言話「呢個外傭關注組係一個private group，cap圖嘅人正人渣」，我真係笑左，一個group入面有2萬幾人仲係private咩？你有幾何同人盡訴心中情，係一次同二萬幾人講心事？我諗正常人一次同 好多人講嘢，應該係結婚擺酒講多謝嗰時，唔係你有咩場合會一次同萬九幾人講野？
唔好講呢個萬九幾人嘅group，一個普通人，personal account最少都add百幾二百個朋友，平時喺自己personal account你都唔敢亂講野啦，有啲根本呢世都唔會再見，三唔識七你都add 佢，甚至唔記得add 左佢，你都唔知邊個是敵是友？你點ensure 個個friend 同你立場一樣？個麻甩佬去個2萬幾人嘅關注組呻，想求安慰，真係太低b，佢同去北京天安門廣場大叫香港獨立一樣，咁危險嘅野佢都做。
Facebook嘅傳播力好恐怖，佢個記憶力仲恐怖....
所有野都有record，就算佢死左，好返啲 record 又會復活。極端啲講句，根本上人人都係阿嬌，你以為咁耐嘅野冇人提，但FB 係永遠冇腦人痴呆架。
真實嘅世界，你講人是非，成日都講「呢度講呢度散」，講完人是非你好快都會唔記得，FB 唔只永遠都唔善忘，佢仲一星期七日每日24 小時咁present 你嘅過去同現在，你發表任何言論，都會無間斷咁，坦蕩蕩咁present 喺公眾層面，比人冇時限地批鬥。
我覺得 喺香港生活，大家都有好多埋怨同壓迫，作為一個有好多埋怨同壓迫嘅香港人，要學得聰明啲，我都有好多好仆街好賤好冇人性嘅內心說話 好想 講，好想喺個網絡上面得到共鳴架，但我知風險好高，我承受唔到......
就好似呢個麻甩佬咁，好明顯你feel到佢對於工人唔喺屋企冇人湊細路係表現得非常徬徨同無奈，但我覺得呢個麻甩佬真係講下， even佢喺一個兩萬幾人嘅香港外傭僱主關注組入面呻，我都信佢只係牙痕，end up 佢就算條氣唔順，都會畀個外傭返鄉下探老豆，佢呢鋪衰嘅其實唔係冇人性唔識將心比己，佢衰嘅係冇智慧姐。
