要解決黃牛問題，
唔一定要搵把開山刀劈落佢，
嘗試拎走啲草，冇嘢畀佢哋食，佢哋自然會消失。
（講明先，講講下黃牛問題，
最後會講到我一年後個Show，
唔啱睇可以直行轉左走先唔送）
一講到黃牛問題，好多觀眾會話：「實名制咪得囉！」
我唔會完全否定實名制嘅可行性，
但喺香港，真係唔係個個Show都搞得掂實名制。
＝＝＝＝＝＝＝＝＝＝＝＝＝＝＝＝＝＝
首先，你要用多好多Check飛成本。如果係天王大Show就冇乜問題，如果係兩三場細Show，本身要收支平衡都難，再花人手Check飛就蝕硬……但唔緊要啦，「蝕咪蝕囉，打擊黃牛人人有責吖嘛！」大佬我都係咁諗，所以我都提出過好多次，但我啲同事每次都好聲好氣（心裡屌鬼）同我講：
佢：「（笑住屌鬼）唔work㗎，Check幾千人，會入唔切場，會搞到好夜㗎。」
我：「……咁你叫佢哋早啲嚟排隊咪得囉！」
佢：「（笑住屌鬼）唔得㗎……當你唔洗OT，六點放工，食個快飯，搭車過海，早極嚟到已經七點半啦。仲要多數人都要OT……（話中有話）」
我：「……咁即係星期日就搞到啦！」
佢：「（笑住屌鬼）唔得㗎，唔係個個人都肯早到，最後一大堆人依然係最後一刻先到……」
我：「……咁我哋請多啲人手咪得囉！咪Check快啲囉！」
佢：「（笑住屌鬼）好理想係咁，但實際上唔係。以伊館計，個場地設計本身就係有樽頸位，搞實名制係一定會塞死晒，搞好耐；你再諗下麥花臣，得一個入口，大家至少要喺街上面等多兩個幾鐘。Check完都完騷，唔係個個場都係亞博同紅館咁大。」
我：「……咁你隨機check少少咪得囉！」
佢：「（笑住屌鬼）……隨機check少少即係假㗎啦，下次咪又係唔驚你」
我：「……有人話用App Check！」
佢：「（笑住屌鬼）唔係我哋話做就做，要各大票務肯配合先得…」
我：「……」
＝＝＝＝＝＝＝＝＝＝＝＝＝＝＝＝＝＝
佢係完全覺得佢腦細我好L蠢咁嘅款。
次次都傾到我節節敗退、落荒而逃。
最後迫我諗返問題嘅核心：
最簡單，點解會出現黃牛？
答：因為供求失衡。
咁點解決黃牛問題？
兩個方法：
第一，解決「求」。唔好畀自己好似劉華咁受萬民愛戴，好似我咁，冇乜人識，自然就冇乜黃牛問題；
第二，解決「供」。你有足夠座位畀想睇你嘅入場觀眾，啲飛咪唔會炒到貴晒囉。
＝＝＝＝＝＝＝＝＝＝＝＝＝＝＝＝＝＝
如果真係提供多啲座位咁簡單，咁點解之前一路冇人做呀？
有幾個可能性：
1）有人話，有啲主辦單位扣起晒啲飛，因為佢哋就係黃牛本人。我唔知啦，冇證冇據；
2）喺香港Book場真係好難，除非預早好多Book，否則好難Book好多日；
3）你點知有幾多人會嚟睇自己個Show？大Show都好啲，製作費冇咁緊，如果係細Show，開多一場場租就多一場場租，好蝕的；
4）（咁大明星騷咪可以book多啲場囉？）有一個核心問題，冇乜演出者會鍾意見到自己個場好多空櫈。
總結以上三點，就係大家都「寧願有觀眾買唔到飛，好過有空位冇觀眾睇。」
＝＝＝＝＝＝＝＝＝＝＝＝＝＝＝＝＝＝
人哋係點，我都只係靠估。
至於我自己係點，我可以控制。
至少我可以試下。
於是我就喺幾日前搞咗個「人類史上最優先訂飛」。
優先預購其實絕對唔係乜嘢新鮮事，
舞台劇界（尤其小劇場）一直都有咁做，
近年好多演唱會都會咁做，
其中一個目的都係為咗畀主辦易啲預人數。
但佢哋都係book晒場，預早兩三個月去做，變咗都係有限制，預期人數同最終人數落差都可以好大。
今次我預早一年，未有場地，未有日子，
可以先預一預有幾多人有興趣，
然後因為場地票務各規定主辦單位要留兩成至五成不等嘅飛作公開發售，
計一計數，我就可以去Book返相應場地／場數。
（用我自己做例，聽日截止，七七八八，有七千幾八千條癲仔預早一年訂咗飛，咁最後，因應不同場地及票務嘅規定，我最後就會開一萬至萬五人左右。）
咁你話，咁你都係估，到時都有權多咗人買飛，咪又係供求失衡？
講返轉頭，個重點係，我又唔係劉華，有黃牛嘅機會本身就係細，其實預得差唔多㗎喇。
再者，咁我Book場時又再預多啲少少座位，
總之我抱住「寧願有空位冇觀眾睇，好過有觀眾買唔到飛」依個心態，盡力做，最後都有黃牛嘅機會已經比平時少好多。
＝＝＝＝＝＝＝＝＝＝＝＝＝＝＝＝
最後一日訂飛，
聽日31號朝早10點截止。
《林日曦細聲講＿＿＿》（名都未有）
演出日期：下年年尾（即係2019年11月－2020年2月之類其中一日）
演出場地：未定場地（放心，萬一book唔到場，一定退票）
演出內容：un腳
「人類史上最優先訂飛」
來龍去脈：https://goo.gl/EP4G26
訂飛網址：Ticket.TVMostMall.com
訂飛日期：2018年12月22日上午10時至12月31日上午10時
訂飛優惠：一年後睇Show時，將可得到一份低能小禮物
#林日曦細聲講
#人類史上最優先訂飛
