【誠實食後感】回味 蛋卷、鳳凰卷、蝴蝶酥
#非自購 #非廣告 #得罪PR系列 #回味
多謝回味傳統手工雞蛋卷 After Taste送嚟各款「回味‧ 細嚐」系列產品同傳統手工雞蛋卷嚟畀我試食!🙇
「回味‧ 細嚐」系列都係迷你size嚟,
而且獨立包裝,每小包有兩件,好啱拎返工食!
獨立包裝唔使怕疏氣,口痕拎兩粒嚟食啱啱好。
同埋食呢啲蛋卷類嘅嘢成日食到周身碎,呢啲一啖一粒好方便!
而且整個包裝盒好揼本,好精美👍
另外有「傳統手工雞蛋卷」,外表唔老套,
鍾意佢用咗兩個蓋果種鐵罐,非常存氣!
如果有呢啲罐不妨嚟返嚟放餅乾,因為仲好過用密實玻璃樽,啲餅擺耐啲都唔會咁易疏氣。
味道方面:
「傳統手工雞蛋卷」
夠脆、鬆化,拎起同咬如果唔小心都會一枱碎果種鬆脆法。
手工做嘅比起機器整嘅,一層層鬆化嘅口感較明顯。
有蛋香,可惜雖然成份中無香精之類嘅「假味道」,
不過聞起嚟果種帶甜嘅牛油味我覺得唔太自然,
令我諗起多年前喺大陸行過超級市場烘焙部果種氣味…
「回味‧ 細嚐 雜錦蛋卷(原味及芝麻)」
味道、氣味同傳統手工雞蛋卷相似,但實地比較實,
「一層層」嘅口感無傳統果種咁明顯,但都算鬆化夠脆。
但芝麻味嘅黑芝麻太少,感覺芝麻味唔太明顯。
「回味‧ 細嚐 紫菜肉鬆鳳凰卷」
全個系列我最鍾意嘅一款,亦係最唔甜嘅一款。
一咬就有明顯嘅紫菜味,肉鬆味比紫菜味淡但已經足夠。
不過因為迷你,比例上又多餡,唔係好食到外皮嘅味道。
真正一口size,好cute,拎出嚟食一啲碎都唔會跌。
「回味‧ 細嚐 椰子芝麻鳯凰卷」
同紫菜肉鬆果種一樣大細,咬落一口都係椰茸,
食得出明顯椰子加白芝麻味道,兩種味加埋出奇好夾,
同樣因為內餡唔係好食到外皮嘅味道,同埋呢款比較甜。
「回味‧ 細嚐 蝴蝶酥」
脆,但唔夠鬆。好大陣牛油味不過果種牛油味真係唔討好,
有啲假而且唔好聞,老實講係聞到都唔係好想食果種。
睇返成份有加食用香精,可能要換一換個配方喇…
同時也有10000部Youtube影片,追蹤數超過2,910的網紅コバにゃんチャンネル,也在其Youtube影片中提到,...