＜節錄＞
“I can't love..."
「表妹，你大個想做咩？」
「我想做一個同性戀者，想做一個正常人。」
社會定義了什麼是正常，什麼是不正常，什麼是強勢，什麼是弱勢…
我只知道：”The difference between ordinary and extraordinary is just that little extra", and in this case, being "normal" is "abnormal"...
深思，到底什麼是“愛”…？一早起來看了這文章，我眼中有淚…
圖片轉載自：http://joancornella.bigcartel.com/
(開宗名義，我會用廣東話打這篇文章，因為我實在太難過。)
我表妹係Lesbian，你地口中既基婆。我愛佢。
由細開始，我就知道我表妹會好得人鍾意。佢五官標緻，一頭長髮、文靜又有時活潑，即係嗰種新年拜年既時候，會主動出黎唱歌跳下舞娛樂啲大人嗰種。
我細個既時候，因為同佢只係相差一年，所以好多機會同佢坐埋一齊玩，問佢大個左想做咩：「我想做....電視嗰啲人。」到依家我都唔知佢意思係藝員、香港小姐、定係整電視既電器工人，總之，我細個時某程度上覺得，表妹係真係有機會做下明星。
成長過程入面，表妹都係好循規蹈矩，讀女校，平時既朋友都係同學、女仔。
我好記得我讀中學時，一次家族聚會，食食下飯，表妹突然收到一個SMS，當時佢望左一望，就收番埋個電話。然後，我平時已經幾神經質既姨丈大發雷霆「轟」一聲拍左張枱一下。我承認我見識少，現實中好少機會見到排雲掌，多謝姨丈畀依個機會我。原來嗰時有個隔離某名校既男仔喺一次聯校Xmas Ball度拎左表妹電話，三日唔埋兩日send幾個sms黎搵表妹，搞到姨丈鬼死咁緊張。我除左覺得個男仔幾有錢之外(當時sms一個一蚊)，心入面默默有啲安慰：表妹都大個囉！
到後來表妹會考拎左五B一A，加上佢亭亭玉立，身型瘦削之餘又有少少Baby Fat，長髮及肩，成日著住一條牛仔裙，係好似純情版既少男殺手「我愛夏日長」鄒靜(90後如果唔識，自己google下)既。所以我勁老土咁，銀包放一張同佢既合照，周圍畀啲朋友睇，唔講以為我表妹係我生既；亦試過追女仔時，指住張相話佢係我以前女朋友，自抬身價。自不然有好多豬朋狗友，當中大部份都係狗，想透過我拎到表妹電話。依個時候，我就會模仿同一屋簷下既江口洋介：「佢當佢係我細妹，你地要蝦佢唔使旨意。」
其實係無人有機會蝦佢。
表妹佢讀完中五，就畀我姨丈送左去英國讀書，一年先返黎香港一兩次。我同表妹既關係反而愈來愈close，最大理由係佢喺香港icq或msn既親戚得番我一個，變成我地咩都傾一餐。
佢不時會send佢自己喺嗰面啲生活照黎畀我睇，相入面，多數都係佢同一兩個女仔影，無論去旅行又好、落bar又好，基本上唔可能有男仔既出現。間唔中有男仔出現，都係啲camp camp地類型既鬼仔.........好啦我承認，係我事後諗番，覺得佢地camp camp地。
我係屬於後知後覺既人，都以為表妹離開左香港後，仍然畀姨丈既陰影籠罩住，搞到讀大學都唔敢同男仔在來往。而我阿姨同姨丈喺家庭聚會時，每次有人問起表妹，佢地既面色總係有啲唔妥，唔多想提表妹既事，最頂癮既係我阿爸阿媽就好似視若無睹咁，繼續高談闊論表妹幾時嫁人、去選香港小姐，姨丈就繼續爬飯爬得好快，粒聲唔出。
直至有次表妹msn個狀態話「can't help crying」，我立即江口洋介上身問咩事。然後佢終於崩潰，話自己失戀，仲話Christine鍾意第二個。我好努力去用文字安慰佢，仲叫佢過埋今年final year就可以番香港，忘記喺英國既事。到佢offline之後，我望住佢同我既文字記錄，心入面出現一個問題：
「Christine唔係女仔名黎架咩？」
咁我作為香港讀大學既平民，對洋鬼子文化認識唔深，都有懷疑過christine可能係男仔都用得既名，仲走去問一名曾經留學美國既朋友，佢聽完事情始未後，得出既答案係：「christine？女仔名黎架喎！不過無所謂既，依個年代，lesbian好小事啫！」
如夢初醒，我再將所有前塵往事連繫，先知道原來我表妹係個同性戀者。當我再喺msn見到表妹問清楚後，佢有少少尷尬咁如盤托出，仲send左一張佢同佢ex-lover既合照畀我。嗰一刻，我感覺自己係個入左巴塞集訓既港甲球員，完全推翻左我既觀念。我唔係接受唔到同性戀，只係一直以為lesbian其中一個都會係男性化啲。而相片中既christine，絕對係金髮既性感美女，係你喺中環見到都唔敢望嗰隻，因為驚畀佢見到歧視你！兩個都絕對係女性化到不得了既青春少艾，係一對couple?
只係我心入面，仍然默默祝福我表妹。因為佢係一個咁好既女仔，每次番黎香港，都會送一份小禮物畀每一個長輩，有時會整甜品畀大家食。談吐大方得體，連對住佢養既狗仔，都係咁斯文。唔怕麻煩，有人託佢喺英國買野，幾辛苦都一定會帶到番黎。喺我知道左佢性取向之後，佢番黎既一個暑假，佢問我會唔會介意。我問佢，點解我要介意？佢開始眼紅紅，擦一擦鼻講：「我阿爸佢好怕我，佢話我唔正常。」我輕輕拍佢膊頭同佢講：「如果你唔正常既話，我地全家人都唔正常。」佢唔出聲默默點頭，我感覺到，依件事唔會平常咁完結。
姨丈喺表妹畢業後，立即迫佢番黎香港。姨丈好天真，一個人既性取向，又點會受居住既地方影響。等於你叫我去成個島都係得男人既島住一兩年，唔通我會變左唔鍾意女人？表妹番黎之後，好快又同唔同既lover拍拖，我就成日做左佢傾訴既對象。我對同性戀唔認識，但愛情既野，異性同性又有咩分別？佢每一個女朋友我都識，有一兩個仲同我做左朋友。
其他人眼中，表妹既唔尋常，反而令我同佢既感情更加深厚。可能我知道佢要面對好多來自屋企既壓力，我會好努力去保護佢。
不過，我姨丈既壓力就一日都無減少，表妹已經無希望佢接受，只係想大家相安無事。姨丈就日夜炮轟，日嘈夜嘈，又會好老土咁安排男人同表妹食飯，最過份係偷聽佢講電話。每次表妹頂唔順既時候，就會打畀我同我講。我當時已經搬左出黎住，就提議佢搬過黎住，最少姨丈知道表妹黎左我度，唔會出聲。畢竟治標唔治本，表妹住左一陣子後，都係搬番去。臨搬前一晚，佢同我講：
「我唔想同阿爸關係咁差，但我真係無辦法。」
講真，我都無辦法，只能夠心入面，暗暗希望姨丈會明白，除左天要下雨、娘要嫁人，其實仔女要愛人，都係不能扭轉。
就咁一段時間，喺前幾個月，我收到一張請帖。
係表妹要結婚。我望下窗外面既景色，係香港黎架喎？乜我去左荷蘭咩？
實情係，表妹為左平息同我姨丈一直以來既長期戰爭，自願犧牲嫁人。你無睇錯我無打錯，今時今日既香港地，係有咁戲劇化、又咁荒謬既事。
我好記得見到依張帖後，我send左一個短訊畀表妹，內容好簡單：「why?」喺幾個鐘之後，表妹亦好簡單回覆左：「I can't.」
可能係，佢唔可以違背佢阿爸；可能係，佢唔可以令佢阿爸傷心。但我當時睇到既理解，係表妹既「I can't.」，係「I can't love」，係因為愛佢父母，而揀左自己唔再去愛。
表妹婚禮上，我喺一個表妹既ex-lover口中得知，新郎係咩都唔知，真係傻傻下追左表妹好耐既一個會計師。表妹上面姨丈笑得好開心，成晚不停同人祝酒，表妹都整晚微笑，總之成場人都好交戲，唯獨宣誓時，我見到我阿姨喊到收唔到聲，我估在場知情既人都好清楚，嗰啲絕對唔係開心既眼淚。
嗰一刻，我心入面係充滿憤怒同憎恨。表妹係一個咁好既女仔，佢對身邊每一個人都無微不至。就係因為佢鍾意女仔，要畀屋企人迫佢行到依一步？我真係死忍爛忍，先忍到唔喺心入面鬧出黎：「邊個反同性戀，你地係唔配有人愛你地，到死之前一刻都唔值得。」
我梗係無喺婚禮現場搶咪咁講，我成晚唯一講既兩句說話就係：「恭喜！」「走先喇！」然後我離開尖東，行到文化中心一帶，點起一支煙，望住個漆黑既維港。嗰一刻，我睇唔透表妹既未來，睇唔透愛究竟係點樣一回事。
然後，我又諗起細個時，問表妹既未來志願......
「表妹，你大個想做咩？」
「我想做一個同性戀者，想做一個正常人。」
