請不要無力，因為大家其實好忙
必須要坦白，自從九十年代尾二千年初出黎社會做事，就開始唔係特別鍾意蘋果嘅新聞報導模式。不過作為一個殖民地時代前後成長嘅香港仔，可以好肯定咁講，蘋果日報，無論新聞、財經、娛樂、專欄、副刊甚至波馬也好，或多或少都係伴隨我地呢代人成長。所以嗰份感覺好似一個從小認識但唔相熟嘅中學同學突然離開咁，如果話悲傷就太矯情扮嘢，不過係一份避唔到嘅可惜同有點失落。
發覺網絡上好多香港人覺得係香港未日，新聞已死，步入黑暗等等，隔咗半個地球都感受到嗰種無力感，彷彿從今天起就什麼都無嘢可以做到。
從來都唔鍾意賣情緒散播無力感，相反，蘋果日報停刊我唔相信係香港未日，更加唔代表新聞已死，所謂嘅「無力感」只係短暫嘅集體氣氛，事實上大家仍然有無限咁多空間，可以做好多嘢，可以好忙㗎！
失落、傷感總會有，但無可否認，我地多年黎嘅心態的確出現咗好多問題，間接令大家好容易感到無力。所以係咪可以借呢個機會「白事」當「喜事」去思考下之前有咩問題？
老實講，由九十年代開始，香港嘅食買玩即食文化，揾錢至上缺乏文學藝術修養，無國際視野（只有大中華視角）已經影響整個報紙傳媒生態，咩人睇乜嘢，咩社會做就乜嘢傳媒，如果話「新聞已死」嘅話，於個人而言...死咗好耐。然後，唔知幾時開始，香港嘅傳媒就帶起咗標題、口號、表態、畫面，但缺乏細節嘅論述模式，呢個現象延伸到網絡同依家嘅社交媒體時代。
呢個現象（同後果）係我、你同大家都有份營造出黎，唔應該亦唔可以賴誰，衰啲講係共業。去到依家咁嘅環境，失落過後應該借呢件事去集體面對下之前嘅不足，好老土咁有則改之，無則加勉。
進入咗網絡時代已經好耐，只要有心唔會無新聞或者真相，哪怕係戰亂或者極獨裁國家（例如緬甸或者伊朗）都總有唔怕死嘅記者報導，問題係大家肯唔肯唔靠社交媒體，直接去各大國際傳媒去睇。什麼假新聞當道，唔知信邊個，笑話！同一單新聞可以睇幾個國家，唔同傳媒嘅報導。擔心英文水平唔得，咪順便練習英語閱讀囉。一次過提升香港人整體英語水平同國際視野，邊個夠膽話長遠無用？
一個地方嘅報紙其實就係反映當地文化，所以大家唔係純粹靠買份報紙支持，而係長遠思考點樣支持香港文化。唔洗諗得太文藝，電影、音樂、文字、攝影、畫畫、就算網絡創作都係文化嘅一部份。唔好覺得無用，講個關於英國人五六十年代對國民身份迷失嘅真實歷史比大家知。
經歷戰後重建，五十年代英國經濟雖然回穩，不過迎來嘅係蘇伊士運河危機，被盟友譴責遺棄，各個殖民地嘅獨立運動興起，英國人真正要面對帝國沒落，然後經濟回落，英鎊國際地位受挫，執政保守黨唔長進，全國直情要接受自己係「廢國國民」。
响呢個時候，利物浦就出現咗一隊樂隊，無錯喇就係Beatles，純流行音樂，結果响六十年代中做就"British Invasion"，入侵美國繼而全世界。佢地就為英國帶黎超大嘅經濟利益，連英鎊都帶動埋，如果話救咗個國家同民族一啲都唔誇張。Beatles初期係無政治立場，不過一隊band帶動國家經濟，搞到當時嘅工黨首相Harold Wilson競選都要做攝石同佢地合照，影響政府嘅匯率政策。同時"British Ivasion"帶動整個英國創作工業向國際再一次輸出差啲變廢國嘅英國文化，而英國人就揾返自己嘅身份，。
所以，邊個話流行娛樂唔係文化？再深入啲講，Beatles當年無立場，無嘢要大大聲表態，但由佢地帶動嘅其他產業參與者呢？七十年代點解John Lenon响美國咁有政治影響力？即係咁，大家好憎TVB，但憎唔憎「天與地」，ViuTV算唔算中資，咁格仔Mike導呢？再遠啲，大家恥笑陳奕迅，咁佢唱林夕嘅詞有無影響力？
大家排隊賣報紙嘅時候，有無諗過將來點樣用嗰每日十蚊支持其他香港文化產業堅持緊嘅朋友？賣份報紙都未必由頭到尾睇晒（死唔信個個都連波馬經廣告都睇埋），咁可唔可以用同樣嘅寬容心態對待其它本地文化產業，就算有些少唔啱心水都揾可取之處企硬支持呢？有無諗過每日50萬份xHK$10第如幾多票房，幾多本書，幾多隻CD等等？香港人口雖然少，但勝在平均消費力異常強，勁過好多國際大城市甚至國家㗎，有無好好利用？
點樣無力感法？好忙喎，至少我都病都仲做緊，休息下瞓醒，又一日啦，朋友！
#有緣再會
british invasion 在 The British Invasion - Facebook 的推薦與評價
The British Invasion. 32092 likes · 145 talking about this. www.TheBritishInvasion.org This is the OFFICIAL Facebook page of The British Invasion. ... <看更多>