入到產房，所有孕婦都會駁住一大堆嘢，有止痛嘅 TENS、有心跳血壓計、亦有簡稱 CTG 嘅電子胎兒監測(Cardiotocography)。CTG 個樣同心電圖 (Electrocardiography, ECG) 差不多，條條線飛上飛落，除左會死人嘅情況我地有機會睇得出，其他時候都只係扮識扮明，講句「嗯，睇落都正常」。
⠀⠀⠀⠀⠀⠀⠀⠀⠀
每到一個專科，我地學生們最首先要學嘅就係「會死人嘅病」。內科可能會係中風、心臟病；骨科會係壞死性筋膜炎；而去到婦產科，就一定係妊娠毒血症 (Pre-Eclampsia)。好彩嘅係，搵出妊娠毒血症唔需要睇 CTG，只要孕婦係懷孕超過廿週之後，出現高血壓同蛋白尿嘅情況，就可以作出診斷。婦產科咁驚妊娠毒血症，因為佢有機會發展成子癇 (Eclampsia)，而機率就要睇下妊娠毒血症有幾嚴重。大概每一百個患上子癇嘅人，就會有一個死亡。全球有 10 至 15％ 嘅孕婦死亡個案都係因為妊娠毒血症或者子癇。
⠀⠀⠀⠀⠀⠀⠀⠀⠀
尋日新聞報導出現左一單醫療新聞，妊娠毒血症於是開始係大眾談論間出現。有好多人話，「晨早就開刀生啦！」。其實係網上資料黎睇，個位不幸嘅媽媽只係有蛋白尿同少羊水嘅問題，理論上係未符合妊娠毒血症嘅診斷。孕婦出現抽筋嘅情況，最驚嘅的而且確係子癇，但我地係無病人嘅病史情況下，都好難作出猜測。
⠀⠀⠀⠀⠀⠀⠀⠀⠀
的而且確，患上妊娠毒血症，最好嘅治療就係將 BB 生左出黎，其他治療方法都只不過係買時間同防止佢惡法。根據 Dr Who 八卦返黎，呢位媽媽入黎嘅時候根本係一個低風險嘅個案，無人預左佢會咁。需唔需要催生，除左睇妊娠毒血症，仲要睇下胎兒發育夠唔夠成熟、媽媽情況如何，「晨早開刀或者生左佢出黎啦啦」只不過係事後孔明嘅講法，始終而家連媽媽係咪真係有妊娠毒血症都未知。
⠀⠀⠀⠀⠀⠀⠀⠀⠀
上得新聞，陰謀論就會四起，話係咪某某斷漏症、係咪某某睇漏嘢。有人問我，係咪又醫療事故。
⠀⠀⠀⠀⠀⠀⠀⠀⠀
我唔知詳情無得講，但如果大家有係香港分娩嘅經歷，就會知道每個孕婦都有一本小冊子，每次覆診乜都未寫之前，最緊要就係寫上血壓同驗尿結果。姑娘度完，醫生打入電腦，如果有學生在場，呢幾個數字都係必需要匯報。上到產房，唔好話醫生姑娘，我地醫學生乜都唔識睇，血壓心跳數字都仲會識望，如果有高血壓情況，我估、亦都希望無理由逃得出咁多對法眼。
⠀⠀⠀⠀⠀⠀⠀⠀⠀
[精選留言系列]
⠀⠀⠀⠀⠀⠀⠀⠀⠀
Dr Who 係各大新聞網睇大眾留言，有一則留言我睇完之後真係笑左十分鐘。笑完再睇，發覺原來又唔少人都有同樣觀念。
⠀⠀⠀⠀⠀⠀⠀⠀⠀
「BB 係靠羊水呼吸。少羊水，BB 係會窒息死」
⠀⠀⠀⠀⠀⠀⠀⠀⠀
BB 嘅所有氧氣同養份都係經胎盤、用臍帶血從媽媽身體運送過去。當 BB 一出世，喊出第一聲，身體入面會分泌一種物質，將肺部血液循環啟動，再等 BB 嘔返哂羊水出黎之後，先至會出現大眾心目中嘅呼吸。
⠀⠀⠀⠀⠀⠀⠀⠀⠀
#DrWhoHK
🔻🔺🔻🔺🔻🔺🔻
Dr Who 開左個新 IG account
有興趣就快啲 follow 啦！
IG: DrWho.HK (instagram.com/DrWho.HK)
🔻🔺🔻🔺🔻🔺🔻
FB 逼到我地呢啲無比錢嘅 Page 消失
Reach 數越黎越低
所以大家 like 完 post
記得 like 同 follow 埋個 page
有興趣仲可以較埋 “See First” 就唔會 miss 嘢啦
