香港人，點解會出咗個何君堯？同問點解出咗個梁振英一樣，冇解的。
Medium link: https://link.medium.com/HMOCa8drb0
//
是咁的，賴叔人到中年，又又又再重返校園，今次修讀嘅係法律。
對於法律，我第一個概念係源自當年仲未係 CCTVB 嘅 TVB 嘅劇集《壹號皇庭》 (屌你，個「壹」字當年寫到我) 。如果呢一刻你耳邊已經響起嗰首片頭色士風音樂 (024 2052…)，恭喜你，你都有返咁上下年紀。
唔明乜嘢係 0294 2502 嘅，留意返以下呢篇：《笑談廣東話 之 數字九聲》 (https://link.medium.com/F1Lu8DFt0Z)
- - -
咁當年嘅香港仍然相當之美好，歐陽震華 (當年仲大把頭髮) 同林保怡等飾演嘅大狀上到法庭好型棍不在話下，放工之後奉旨落清吧把酒談心，不至於後來嘅《喜愛夜蒲》咁放蕩，但又營造到嗰種優皮中產生活嘅寫意。難怪當年賴叔個老母都話，阿仔，你第時讀法律啦。
結果我入大學，就唔係讀法律嘅。一來英文成績唔夠好啦 (相傳 HKU Law 英文科 triple count ？) ，二來我都怕悶。啲法律修文都唔係正常人睇得明嘅，點讀啫？何況，當時已經有人糾正我，讀 Law 出到嚟上 court 打官司嘅只係少數，香港嘅大律師 (Barristers) 人數大約係 1,500 個，而律師 (Solicitors) 就有一萬個左右。做人真係唔好因為劇集嘅張力而產生太多不必要嘅幻想。
根據我當時嘅理解呢，大律師公會係會致力爭取民主嘅，而律師會嘅立場就相對地保守，甚至親中。咁後來我當然明白，律師主要處理商業案件，要有生意，當然就要同客戶 (即係好多商家同大財團) 打好關係。冇客人幫襯，你有律師資格都可以食風架。
- - -
律師呢個行業，其實同廚師一樣，都有分唔同級數。你喺米芝蓮食府度做主廚，同喺連鎖店嘅中央廚房煮飯，都已經差天共地。
同樣地，律師都分好多種，有啲專注意金融行業，深耕投資產品相關嘅法規演變。例如話，香港而家允許以開放型基金公司 (Open-ended Fund Company) 嘅形式，畀業界成立基金，志在同其他國家例如開曼群島 (Cayman Islands) 、盧森堡 (Luxembourg) 等地爭一日之長短咁。要開發基金產品，就當然唔少得熟悉法律嘅律師去幫手起草基金銷售文件 (which is a legal document)。
咁當然有其他類型嘅律師，例如話專門處理樓宇買賣，辦理按揭嘅律師。亦有律師會做證婚人，一個好日走幾場，其實都可以幾好搵。我就見過鄭家富喺左邊嗰個禮堂行出嚟，轉頭就仆去右邊個禮堂趕下場咁。
大家又唔好反白眼。人各有志，職業無分貴賤，假假地都係一個律師，係咪？
- - -
直到近年，我喺香港見到另一啲掛住律師銜頭嘅人行出嚟，喺政治舞台上佔一席位。梁美芬、馬恩國、陳曼琪，全部都係極品，甚至令原本已經好騎呢嘅謝偉俊忽然間都似返一個正常人。但係佢哋咁多個加埋，對於香港、對於香港人嘅傷害，都唔夠一個何君堯咁犀利。
其他我唔講，淨係 2019 年 9 月 18 日，何君堯名下嘅馬匹「天祿」出賽，觸發廣大網民號召去快活谷「撐場」，最終賽馬會宣布取消當晚所有賽事，都已經顛覆咗中共前領導人鄧小平當年所講嘅「馬照跑」。不過根據某啲人所謂，《中英聯合聲明》都已經係過時、無效，咁鄧小平以前講過啲乜，可能都真係冇乜意義？
撇開人品唔計，修讀法律嘅人，最主要嘅共通點係知道遊戲規則係乜、如何解讀。俗啲講，所謂法例，咪就係個人處世、企業營運以至政府管治所需要遵守嘅遊戲規則。法律修文如何詮釋，以往嘅案例有乜嘢法律觀點，法庭判案嘅理據係乜嘢，有讀過法律嘅專業人士，同 layman 普羅大眾嘅理解，程度上會有啲唔同。
人讀法律，你讀法律。動機純正嘅人，知道社會運行嘅法則，教人如何奉公守法，以至喺需要時捍衛自己嘅利益。心術不正嘅人，尋找法律嘅窿窿罅罅，依仗權勢踩晒灰色地帶，藉辭「清潔香港」營造白色恐怖，串同地區勢力人士喺 721 發動恐怖襲擊。
- - -
蔣麗芸或麥美娟呢類型保皇黨，你最多話佢哋鳩噏當秘笈。但係何君堯明顯地唔係傻仔，而且十分聰明。即係，學識咗英國普通法嘅精髓，套用喺 1997 年之後嘅香港，戴上富有中國特色嘅「法治」有色眼鏡去演繹、運用，其惡之大，足以遺禍千年，對一國兩制嘅破壞力，直迫「港獨之父」梁振英。
至於點解何律師做咁多「好人好事」，佢嘅律師資格、嶺南大學校董資格都仍然一切安好呢，大家就諗返香港律師會係咩組織，大學校董其實咪又係政府決定囉⋯⋯喺一個缺乏制衡、「三權合作」嘅社會，就會助長更多人向何君堯學習、以佢為榜樣。因為，佢成功吖嘛。
吖不過又咁講。桐油埕始終都係裝桐油。話說香港賽馬會喺叫停 918 賽馬之前，係有聯絡過馬主嘅。咁何君堯話，馬會冇要求或暗示馬匹要退賽，佢就堅持出賽。 Come on Junius ，馬會係由英國殖民地時期遺留嘅產物，入面仍然流住當年嘅藍血。一通電話，就如喺高雅餐廳入面同侍應嘅一個眼神，後續嘅落單上菜全部自動波。要人哋好似大排檔咁「伙計！寫嘢！」先至醒水，咪就係冇格囉。
(圖片來源：香港恒生大學學生會編輯委員會 Editorial Board, HSUSU https://www.facebook.com/hsusueb/posts/2280531192069193:0)
