【外表嘅靚，太易被取代同遺忘】
耐唔耐梗有啲客話要請靚仔靚女，唔係唔想幫，只係主觀成分好重，不如我話你聽我嘅審美眼光先啦!
靚嘅標準人人唔同，否則都唔會屆屆港姐俾人彈三彈四，吳彥祖、古天樂、劉德華一樣有人嫌，嫩模o靚模老模亦不能倖免，你33，佢34，下年又有個35，你C呀？佢F喎！
我身邊啲C9日日對住宋仲基、李敏鎬、孔劉、光洙嚟FF，佢哋點會記得14年前曾經話過天國的豬西個誠俊哥好靚仔。
單純以五官同身材去比較，總有人靚過你，個胸大過你，隻腳長過你，永遠冇盡頭，因為外表嘅靚，太易被取代同遺忘。
我心目中最正嘅女人係衛蘭，佢成日俾人話「肥過部電單車」，自認由最初好介意到而家聽慣晒，幾鬼得意架佢。我知，有少少似盧宛茵吖嘛，不過衛蘭係獨一無二，我真係會掛住佢把聲。
噚日、前日同埋大前日，我喺街、喺office、喺屋企附近都見過無數靚女，係眼前一亮，但亦冇晒印象，所以我量度靚嘅標準，係睇性格同埋Talent，因為呢種人先至會被記住。
喺呢個以貌取人嘅社會，無論係幾靚，都唔會取得最後勝利，性格好，有自己風格，先會令人久久不能忘懷。
「如果輸，想輸給些厲害對手...」、「我想識你女朋友，我想敲穿你門口...」我個腦又開始loop衛蘭啲歌喇。
