［2019 Medium 收視回顧］呢幾篇文，讀者話最好睇（我冇話過）
1.繼續都係向 置地記者致敬，舊年搞呢個收視回顧就係抄佢(http://bit.ly/2rMTWD5)，雖然佢今年已經唔搞。但我覺得呢個環節幾好。讀者得著都有，就係睇邊啲文熱門。西瓜靠大邊，又唔係內容農場，呢度寫得啲長文，如果好高收視嘅，總有啲原因（想知舊年邊啲高收視就睇舊年嗰篇）(http://bit.ly/2rMTWD5) 。初嚟報到嘅讀者，咪由嗰啲文睇起—等於你認識個新歌手都搵佢熱門嘅歌咁。
2.但最大得著都係自己：知道邊啲文冇人睇。當然唔係話冇人睇就實唔寫，有人睇就寫多啲咁媚俗（你有冇科水先？）。但，至少調節到自己啲期望，第時寫啲毒藥嘢唔好期望有人睇，明白只係自己飛機或過癮。包括呢篇。同樣地亦畀自己知道，如果想呃收視，寫乜好—不代表你實要寫，但至少知道要舔人地嗰時舔邊度人地敏感。
3.總產量：2019在medium一整年，寫文90篇，即係一個月7篇半。都係比我想像中多，但其實少過2018。2018又係90篇，但我舊年4月先開始寫。
點解少咗？首先，返工壓力細咗：2018好多文我係7/8月寫，除咗因為世界盃，亦因為係辭工之前（亦都即係2019冇世界盃寫少咗啲相關嘅文）！另外，我估都同去多咗旅行有關 (http://bit.ly/2QeBWL0) 。旅行我就唔多寫medium，因為手機上我唔會寫medium文，反而Facebook Page啲一千幾百字我都仲會寫。最後，我估亦因為我有啲懷疑，好似貼medium嘅文，在Facebook嘅reach 係會少啲的。
真定假唔知，但對我嚟講，medium嘅平台只得兩個好處：方便多圖嘅文，或者方便啲真係比較 「傳世」，第日都會有人睇，或自己會引返嘅文。
4.季節性：睇返，3月，6月，9月，11月，都係寫得少文嘅。點解？咪去咗旅行咯。但話說回頭，十一月嗰三篇我好滿意。LVMH買唔到Tiffany，咪買Pandora咯，三份一價錢咋(http://bit.ly/35bjDuJ) 。 千祈唔好搞同事 — 漢堡神偷麥當勞CEO落台 (http://bit.ly/2ZIUjem) 。 Google買Fitbit，有乜鮮甩治？ (http://bit.ly/2C4jeOy) 。收視就普通。
5.平均收視：好，唔講實數，但自己同自己比。今年嘅平均收視，係略高於上年嘅。但唔好自滿。首先，係多得一篇爆紅嘅文，如果唔計嗰篇，或者用median計，收視仲差過上年。另外，理應讀者係越積越多嘅，所以直頭係不進已經係退，咁低過上年，都幾差下（當然可以安慰自己：medium同Facebook Page有樣唔同，啲舊文比較大機會有人睇）。最後，好似以前有幾檔媒體會轉貼我medium啲文，而家少咗。
6.今年最勁嘅文：係呢篇—香港讀Master，嘥錢嘥時間 (http://bit.ly/2sWcPn8) 。理解到會受歡迎，因為多人有共鳴，但亦多得有人貼上啲Secrets Group．篇文其實寫得唔太好，肯定可以寫好啲。但勝在個題夠搶，立論清晰，中間寫乜已冇乜人理。呢篇文嘅view and read，拋離第二位幾倍，更加係平均嘅幾十倍。
另一篇多人睇嘅文：［再見理想］靠公司自動自覺加你人工，就含得撚(http://bit.ly/2GAaD8P) 。同上，個題夠直接，立論清晰，而且又多人切身。
7.其他多人睇嘅文：被炒記：到嗰日你先知被炒，你個人都幾失敗 (http://bit.ly/2ZhBXA6) 。CFA難唔難考？考唔考得過？(http://bit.ly/2PP0dqQ) 。CFA難考，咁做乜仲要考？(http://bit.ly/2ZHRZnP) 。—似乎寫下升學或職場文係幾好，雖然呢個唔係我強項。無他，因為真係有興趣嘅人多。
仲有兩篇其實唔知係咩類別。總有一個喺左近 有關人類愚蠢的五大定律(http://bit.ly/2Fct9TI)．可能係全香港第一篇雞煲新股分析 (http://bit.ly/2OPprqV) 。但一樣，多人會有興趣，唔係太小眾。唔識新股都會識雞煲，正如人人都覺得其他人係蠢人
8.票房毒藥嘅，就梗係足球文。如果冇 體嘢 SportsYeah推嗰啲更甚（話時話，體嘢搞手我當然識，當然有拎我同意，但佢地好似興放在自己網，而唔係些牙我medium嘅文）。留意齋足球嗰啲還好， 「至撚怕你老哥仲發表埋自己啲原創高見懶有文化嗰啲」。毒藥就係呢兩篇，讓漢江將你我像南北般分開 — 南韓足球隊30年首次作客北韓 （http://bit.ly/2VRz5ZF） 。思古之情：羅馬尼亞冇晒「斯古」？（http://bit.ly/2tqc1Hh） 。鍾意人棄我取，或做好心刷返數據上嚟嘅，可以去睇。
9.付出多回報低嘅，正係上一篇：［一年去四次日本］2019回顧之驛馬星動篇 (http://bit.ly/2QeBWL0) 。當然預咗，好多程度係為自己留紀錄。置地記者講過，寫自己啲文多數毒藥。我覺得一半半。一來佢剝得唔夠徹底。二來就係睇你講乜，講自己轉工被炒之類嘅，讀者好似有啲嘢學嘅，都仲會OK。但寫你舊年去過邊，炒過幾棵芥菜，食過幾多條女嘅就WFC。放心，陸續有嚟，我嚟緊會有文寫我2019年食嘅......飯。
付出少回報高嘅？其實最勁嗰幾篇全部都好快寫完。寫文有時真係同自己過唔去，寫到懷疑人生。好似真係寫嘅時間同收視，有微微的負相關。作者明顯同個世界嘅口味有啲脫節。
10. Fans數量最多最少嘅，大體都同上面嗰幾篇差不多，不再重覆。同樣地，回顧2018年時有睇埋read ratio，當年已經覺得完全冇啟示性，今年更肯定，所以唔討論了。
11. 展望？其實都係冇乜嘅。固然肯定嘅係，寫啲職場文係比較多人睇。但我都係冇刻意咁寫多啲，因為總覺得自己唔係好夠班寫—當然我而家返咗工亦係一個問題。寫回顧尚可，但我估老闆點都唔係太鍾意佢馬仔寫：［再見理想］靠公司自動自覺加你人工，就含得撚 (http://bit.ly/2GAaD8P) 之類。亦因為同樣原因，你見我都係冇寫如何跳草裙舞之類。
12. 亦都肯定嘅係，寫足球文係保證嘅毒藥，但始終自己過癮，一般嚟講用嘅時間都唔會太多。
13. 當然，medium絶對唔係寫文嘅全部。其實medium介面好，但小眾玩意，寫中文更加係不利。所以好多時冇必要放medium我都唔放—咩文有必要？就係多圖嘅文，或者預你幾年後都會睇嘅文。
14. 主力平台始終係Facebook Page （你like咗未？）。二來其實2019年係多咗在其他平台寫嘢嘅，明報有專欄，在GoBear Hong Kong同獨角號都有專稿，咁可能亦係產量下趺嘅原因之一。
