【醉後無事】
而家揸的士真係講運氣，柯打都好少睇，老實講，政府迫令的士停駛，對司機而言可能更好。
喺灣仔道近酒店間七仔，忽然就有人滿身酒氣咁上車。好陌生嘅味道，好耐無載過酒客。明明酒吧都無得開，附近又無住宅，唔通喺七仔劈完？
「康怡⋯⋯」
「好呀，你要唔要膠袋呀？」
「唔使，我都無醉，飲咗少少啫。喂有份蘋果嘅？」
「係呀，俾客睇。」
標準飲醉酒嘅反應，呢位仁兄勝在有自知之明，唔揸車避免楊明立萬，問題係飲到劏依然會困擾我。
掉頭落返摩理臣山道，已經唔係好對路，照俾個膠袋佢。「唔洗啦。」一手推開，叫醉客攞膠袋難過叫廢老戴口罩。
「邊度有得飲酒呀？你去酒店？」
「酒咩店？咪平時啲樓上Bar，又無人巡嘅。」明明呢排差佬巡得好勁，唔通係漏網之魚？咁就正喇，要上去玩。
「都keep住有人巡呀？我見周圍都有警察喎。」「巡都無用呀，私人俱樂部會員制，唔交易即係私竇，酒牌都唔洗，何況聚會。」又幾清醒咁，機會留俾有準備嘅人，法律留俾無錢打嘅人。
「咁今晚你哋咪好開心？」上到東區走廊，總算可以加快速度又唔驚佢嘔。「直情爽啦，叫哂啲女嚟，老婆當我喺公司ot，特登放啲酒喺公司影埋相，有埋限聚令，唔知我去玩嘅。」咁真係好有說服力，睇嚟限聚只係限普通人，識玩自有方法。
「師傅，袋！」
「攞緊！」妖，頭先又唔要，我已經塞返入袋，當我攞到時，已經傳來不祥嘅聲音。
「對⋯⋯對唔住，我嘔咗。」好似啲男人中出咁，用死狗sorry去掩飾早有預謀。「唔緊要呀，部車無事。」部車無事？你瀨返乾淨就無事，清潔費真係無得走，疫情下要雙計。
點知乘客打開窗，掉咗舊嘢出去，異常清醒咁話：「嘔完真係好好多。唔驚呀，我嘔晒落份報紙度，真係無整污糟。」吓，我份蘋果啊！？不幸中之大幸係有蘋果擋一擋，多謝Apple。
「你嗰個咩場嚟，等我又去。」
「緊係唔講啦，你當我真係醉到on9咩，去Happy仲四圍揚，識嘅先上到去㗎。」唉，嘔完真係清醒晒，否則犯罪然後自留證據，係普遍香港人嘅癖好嚟。
我想去玩啊，奈何唔止有疫情，本身都無心情。一個城市，一個晚上，待審嘅人多過酒醉嘅人，只可以祈求好法官，最後無事。
