//本Page Patreon經已開通，請訂閱支持本Page運作，謝謝！ 連結： https://bit.ly/2TvzIaF //
//當然，捉棋於我仲有一個好處就係，等我理少好多網上是非，花少咗時間陷入啲毫無助益嘅罵戰入面……//
響肺炎病症之下，有一個好多人都要面對嘅就係體重暴增嘅問題：鬼咩，而家街又唔出得，Gym又唔做得，人人屈響屋企無嘢做就會開始炒嘢食。同埋唔好睇少一樣嘢就係，平時你番工搭車放工行街其實行埋唔少路，如果你變埋Work from Home，變相一個星期可能行少幾公里，相對增加嘅熱量可以好得人驚。
所以呢排好多人都同我反映，自己嘅體重係去到前所未有嘅高峰，對於全面停課轉哂響屋企網上教學嘅教育界尤其嚴重，我當然都係受害者之一。當初因為無嘢搞諗住搵啲嘢過日晨，於是開始每個禮拜都約Friend捉Boardgame，點知響幾個禮拜之後上磅，竟然輕咗成2kg！
當然，咁講係誇張咗，因為除咗捉Boardgame，而家我仲會堅持每日玩番20-30分鐘Ringfit+其實之前重咗好多，而家只係減番個零頭轉頭……仲有就係自從發覺自己重咗，都開始注意番飲食，同埋萬不得已要出街，都會搵啲機會行多步路而唔搭車。
但我始終堅持Boardgame的確係有減肥作用嘅，原因在於：
1. 捉Boardgame本身就係一個燒腦行為。據華盛頓大學路易斯分校研究所得，相比起全日睇電視上網放空，集中精神思考或者學習，係會比平時消耗多100-200卡路里──聽落好似好少，因為一隻烚蛋都有成80卡，但日日做Ringfit嘅我知道，平時你做10分鐘唔太激烈嘅運動，都係消耗100卡左右架咋，多無少補；
2. 我玩Boardgame有一個習慣就係要踱住步諗嘢，同埋長期企響檯面「觀察局勢」，跟住我發現如果持續做呢種動作六七個鐘原來都真係會好攰，甚至捉完往往出一身汗搞到要即刻沖涼；
3. 當然最重要就係，往往玩Boardgame都會玩到廢寢忘餐，飯都唔Q食──平時同班Casual Game玩，佢地往往去到咁上下又要食鬼哂我啲蛋糕同其他垃圾食物，到時到候又催我落街食飯；
但遇著同Hardcore Gamer玩，我往往叫佢地食定飯先捉棋，跟住一捉十幾個鐘飯都唔食，而我有時甚至因為掛住睇Rule book周Setup連對上果餐都唔記得食，玩完一訓訓到天光，變相斷食咗一日……
當然，有人會覺得捉Boardgame本身就係高風險行為，因為咁中咗武肺就唔抵，所以究竟搏唔搏、捉棋果陣要用幾多防護措施就自己衡量。但現實卻係，只要疫情持續落去，你係無可能永遠匿埋自己一個響屋企，一啲正常社交行為最尾都係會以唔同方式重現番出黎──問題只在於點樣同防疫之間取得平衡。
無論如何，好多人都會用唔同角度分析武漢疫情對經濟、社運、政治嘅影響，但實際上對我地最切身嘅打擊其實卻在於日常生活習慣嘅轉變，同埋長期屈響屋企對身體健康同心理健康嘅打擊──偏偏政府響呢方面，卻係幾乎完全唔理，長久落去其實會係非常大鑊。有機會寫文再講。
