[方以文問兩句][黃得生][不懂撒嬌的女人]
有睇嘅，大部分都讚「暉型雙子」同「商場三大美人」好夾，帶動晒個氣氛。我個人就覺得佢哋好重要，如果冇咗佢哋，王浩信同唐詩詠嘅戲份可以話係悶到喊……今次我問咗劇裡面飾演王浩信手下、「暉型三子」之一阿Bill嘅演員黃得生，唔只兩句，但值得睇晒佢。
**********************
問：今次好多觀眾都對「暉型雙子」同埋「商場三大美人」有好高評價。你自己點睇？未播出街嘅集數當中戲份如何？
答：首先係好多謝觀眾欣賞，亦都好開心做到監製想我哋五個人做到嘅事，就係搞氣氛。其實主力諗啲古古怪怪嘢嘅一個係KT 唐嘉麟，一個係吱吱喳喳嘅林秀怡。佢哋兩個喜劇細胞都好高吓。之後嘅劇情會開始重點講Saving同Cherry嘅感情線，暉型兩子亦都會慢慢引導出Saving既身世，例如係點解會請咗Bill同Leo，點解佢一定要做老闆等等~~
**********************
問：自己有冇設計過個角色？點樣去演繹？
答：入行七年左右 ，其實大部份都係做緊學生、做人個仔或者比自己年齡細個嘅角色，所以今次接到呢個角色都有啲打咗個突，因為要做一個爸爸（雖然成套劇都未見過自己老婆同個仔😂），仲要係窮爆嗰種，所以好多時候我都係會拎住把舊紙扇、有得食就瘋狂咁食，盡量去表達「慳得一蚊得一蚊！」呢一個大原則！當然亦都參考一啲真正爸爸嘅心理同意見、對自己仔女態度同埋期望，從而增加自己演Bill嘅時候嘅內心反應。
**********************
問：你同其餘兩個「暉型三子」王浩信、唐嘉麟之前有冇合作過？今次夾係咪好快就有種默契？如果唔係點培養？
答：浩信其實喺6、7年前套《型警》就認識。嘉麟仲得意，佢係我中學師兄😂，我哋第一日開鏡嗰陣係有啲唔夠默契，但因為嗰日我哋係拍足成日，再加上導演同浩信畀好多意見我哋，叫我哋放鬆，咁我哋就開始入到局，再之後有時直情會over晒，要導演壓一壓先得😂。
**********************
問：同「三大美人」又有冇咩合作火花？
答：呢個問題絕對會令到我哋變成宅男公敵。我同阿雪之前合作過，秀怡又係同期訓練班同學，所以冇咩隔膜，再加上KT對住女性嗰種幽默，連原本唔太熟嘅Gloria（鄧佩儀）都癲埋一份，好多時候，我地五個嘅場口都係free咁去做畀導演睇，所以出到嚟會放鬆啲同好笑啲。
**********************
問：喺觀眾印象當中最深刻嘅角色，應該係《點解阿sir係阿sir》嘅「K4」。由「K4」到「暉型三子」呢段時間，你嘅經歷係點？有冇咩難過嘅關口？又學習到啲咩？
答：「K4」令大眾知道有黃得生呢個演員，當時係開心，再加上緊接就播《結·分@謊情式》，所以有會種期盼係咪咁好彩可以上到位。但現實好快話我知我諗得太簡單，由23到28歲嘅呢五年，我接過好多唔同角色，劇集單元主角有，但做路人甲乙丙就更多。有時都會諗自己喺度做緊咩呢？不過好彩嘅係有「K4」。點解咁講？因為我哋四個由嗰陣拍完《點解阿sir係阿sir》之後，就真係當大家係同學咁睇，互相鼓勵同支持，如果唔係佢哋，我未必仲喺度😆。（按：K4包括羅鈞滿、朱敏瀚、樂瞳）
**********************
問：你喺第23期藝訓班畢業，入行7、8年，有冇咩做過嘅角色你自己最鍾意，或者印象最深？有冇咩角色想挑戰？
答：《點解阿sir係阿sir》一定暫時係我最喜歡同懷念，因為係做一個學生，令我諗起最free、最開心既日子。印象最深反而係《使徒行者》第一場戲，嗰場戲雖然我得一場，但我自己好滿意個發揮，出到街嘅效果都好好！其實做得演員，當然想挑戰一啲高難度演繹嘅角色：反派、多重人格等等！但我自己希望挑戰到嘅，係自然、唔做作嘅演出，係可以感動到觀眾嘅演出！
**********************
問：之後喺咩劇會見到你嘅演出呀？
答：暫時拍攝中嘅有《宮心計2深宮計》 同埋《溏心風暴3》，兩套都有少少戲份🙏🙏🙏 。
#黃得生 #無綫 #TVB #不懂撒嬌的女人 #暉型三子 #點解阿sir係阿sir #K4 #羅鈞滿 #朱敏瀚 #樂瞳 #唐嘉麟 #鄧佩儀 #林秀怡 #孫慧雪 #王浩信 #唐詩詠 #深宮計 #宮心計2深宮計 #溏心風暴3 #使徒行者 #結分謊情式 #方以文問兩句
