我嘅一粒鐘，你嘅五分鐘 (之一)
Medium link: https://link.medium.com/sJhG5g62R4
//
又嚟開場白。
呢期因為要喺唔同平台、出唔同題材嘅文章嘅關係，少不免要畀返少少引子大家，畢竟唔係個個讀者都跟到好貼，無所適從嘅結果通常都係無心閱讀。而咁樣樣對我嚟講其實一啲好處都冇，寫文射落海絕非原意，而流失讀者更加大吉利是。所以，每當我開一個新系列，例如話 #酒精抗疫 或者為 #職場心經 正名嘅時候，都要禮貌上交代兩句。
咁呢個「我嘅一粒鐘，你嘅五分鐘」又係乜撚嘢嚟嘅呢？
嗱，賴叔用倉頡車字大大話話都接近廿年，專心咁車、唔使點諗嘅話，每分鐘都應該有 40 - 60 字走到出嚟。咁闊嘅 range ，其中一個因素係我用乜嘢工具車字。如果係屋企部 Macbook Pro 配 Apple 個 Magic Keyboard 的話，應該會最快； Microsoft Surface Pro 個 Keyboard Cover 次之 (用慣咗 Apple 輸入法， Windows 10 嗰個輸入法硬係怪怪地) ；手機 iPhone XS Max 又慢啲，後備機 iPhone 8 最慢。啲掣豆咁細粒，唔覺意就打錯隔離。
但其實，現實之中，我車字都係要用腦嘅。如果平均每篇唔係特別認真寫嘅文章， 1,500 上落，其實都用咗我半個鐘至一個鐘嘅時間。 Patreon 嗰邊收得訂戶錢，就畀足十足功夫，冇二千字唔落樓。時間用多用少，又係精神狀態使然。例如話，飲住酒咁車字，係會意識流少少，順暢但唔太顧及大家感受嘅。
所以，當每篇文喺 Medium 被界定為 5-minute reading time 嘅時候，其實係將我用 6 至 12 倍時間車出嚟嘅文章，濃縮為五分鐘了事嘅一篇嘢。呢條題，或多或少係向大家解釋返，喂，其實賴叔車字都要時間嘅，唔係咇出嚟就有。
- - -
講咁多大條道理，其實性質就係其他作者嘅「隨想」類型。當然，我個人嘅思維就唔係咁跳脫嘅，冇得話上一刻談及圖書館，下一秒會說到字母湯 (邊位認得呢句歌詞嘅舉個手？) 我啲「隨想」文章，來來去去，其實可能都係關於成長、關於生活、關於蜚短流長。總之唔係寫工作、唔係寫政治經濟財金嘢啦。
專登開一個新欄目去寫埋呢啲濕星嘢，都有多一重考慮： Medium 呢邊已經冇乜新文章刊登，而我又分散唔到資源喺呢邊好認真咁寫一啲嘢出嚟然後收返五蚊美金嘅收益。咁樣我都覺得對唔住自己，更對唔住每個月訂閱緊 Patreon 專欄嘅讀者。但係， Medium 始終有佢嘅 Organic Growth ，每一兩日都有一兩個新 followers for whatever reason 加入，咁苦心經營咗兩年有多嘅一個地盤，白白由佢生草或者養蚊，我又於心不忍。
咁，就索性喺呢邊寫啲隨意啲嘅文字，娛人娛己。講明先，純粹個人意見同感想，唔一定啱，更加唔一定有營養，要睇啲正經嘢嘅， Medium 呢度嘅舊文多到足以醫好你失眠。
- - -
好，終於可以開始寫「隨想」。
有留意賴叔 Facebook 嘅話，可能都會發現，好悶。唔係轉載自己 Page 嘅新文章或者新聞，就係公布一下版務或者 share 下其他友好 Page 嘅動態，或者一啲真係好鳩或者好好笑嘅片/相/圖/資訊。
換句話講，我係幾乎唔將啲咩個人感想或者喜怒哀樂擺上網同人分享嘅。
或者大家會話，賴叔你呢個 account 要嚟做正經嘢啫，平時用返私人 account ，唔畀大家知道咋啩？
其實唔係。賴叔曾經有過私人 Facebook account ，但係本身少用。冇興趣睇其他舊同學或舊同事瀛寰搜奇，亦唔覺得其他人對於自己諗乜有太大嘅興趣。閒雜人等啊，都係是非當人情，聞到花生或者血腥味就一湧而上。落井下石多，雪中送炭少。何況， Facebook 上面嘅留言或 pm ，又算得上啲乜嘢「炭」？
既然無甚益處，而社交網絡上嘅足印，今時今日又可能被用作其他用途，風險大過潛在得著太多，咁倒不如刪除，冇眼屎乾淨盲。事後孔明咁講， 2019 年 6 月份開始嘅一切，我見到好多升斗市民都要更改面書用戶名字，好似要避開政見唔同嘅同事或朋友嘅舉報咁。嗰下，我就更加肯定，鏟咗私人 Facebook account 更開心。
大家又可能會問，咁你現實世界之中嘅朋友，咪喺 FB 搵唔倒你囉？係架， but so what? 如果本身認識又有來往嘅，自然有其他方法聯絡。如果係純粹 hi-bye 嘅閒人，寧願去搵其他人打聽點解喺社交網絡上搵我唔到，都唔敢 WhatsApp 問一句，試問又有乜在意嘅價值？
時間，係留畀值得嘅人。
空間，都係留畀值得嘅人。
至於你話個人情感嘅出口或者抒發渠道，我覺得，返工嘅感受，喺 #職場心經 已經呻得七七八八，而其他私人生活上嘅大小事，其實，一係，自己吸收、消化，一係，就同身邊嘅人講。講完，即日事，即日了，就好似倒垃圾咁，了無痕。
如果仲有啲咩剩餘物資，咁一般會成為下一篇嘅題材，或者將來寫進歌詞裡。
- - -
想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai
#hk #hongkong #patreon #blogger
