身邊啲朋友有時會叫我幫手搵工，其實好慚愧，因為大部分時間都未必幫到，呢點關乎到headhunt生態，呢個月可能搵緊Account、Sales、Project Executive、CS，同埋Marketing Manager，下個月又洗牌唔知要做啲咩job，然後突然有朋友問：「我要搵工呀，有冇Event方面嘅job？。」
我都唔知點嘔份Event job畀佢，睇JobsDB逐間公司打去？咁同佢自己搵有咩分別？呀！有分別！佢自己apply的話，間公司唔使畀佣我，一定易請啲。將朋友份CV射去隔籬team求助？其實佢哋好少會積極幫手，有啲人驚要拆佣畀你，有啲人驚你套佢個客啲料。
早兩年有個friend失業，加加埋埋做咗「量地官」超過一年，其實佢離職之後抖咗一個月先開始發力，偏偏事與願違，最雄心壯志嗰期連續見幾份都冇下文，唔經唔覺咁就半年。
佢係IT界別，完全唔係我熟悉同埋負責嘅範疇，一般headhunt公司都會將IT job劃分出嚟，你踩過界會好麻煩，IT個阿頭一定嘈：「IT job你哋唔好掂吖嘛，大家唔同sector河水不犯井水，再係咁我就同大老闆講㗎喇！」十足十小學生同班主任投訴有人偷佢嚿擦紙膠咁，呢類衝突係經常喺headhunt公司內部上演。
不過我朋友真係失業咗太耐，所以我除咗鼓勵佢之外，唯有低聲下氣將佢份CV射去隔籬IT team，再語重心長咁同佢哋講：「老友嚟㗎，幫幫手睇下有冇position吖，我唔使拆佣，最緊要佢搵到工。」擺低份CV，我再重覆講咗兩次：「真係唔使拆佣畀我，真係唔使拆佣畀我。」
呢次忍辱負重都冇白費，隔咗兩個星期真係有job畀我朋友去in，但佢當時已經見工見到冇晒信心，嗰次interview表現不似預期，連佢自己都話講嘢口窒窒，如是者，數數手指又九個月。
聽佢講，Send出去嘅CV一早過百，有得去見嘅加加埋埋大約得十幾份，難度一日比一日增加，當佢失業半年，啲人就問：「點解你半年冇做嘢嘅？」失業九個月嘅時候去interview又會聽到：「點解你九個月冇做嘢既？」見一次被問一次，其實咪就係因為冇人畀機會囉！
一日一日過去，消失嘅唔止鬥志，仲有佢銀行戶口裡面啲錢，好在間中有啲寫網頁嘅freelance job吊命，雖然唔多亦唔穩定，但除返開每個月平均有＄4000至＄5000左右，否則更加捱唔過呢關。
某日下午，佢突然同我講搵到工。
「真係？慶祝啦！邊間公司？咩title？人工ok嘛？」
「我屋邨街市檔五金舖，行過見到佢哋貼張紙請人，真係得『請人』兩個字，所以唔知咩title，平時啲人嚟買廁所板、螺絲釘、角鐵、燈膽，仲有配鎖匙，招呼下啲街坊同埋收錢。有個師父會幫附近住戶做細裝修工程同埋維修水電，跟出跟入幫手做下欄嘢。」
嗰一刻唔知可以講乜，好想讚佢能屈能伸，但唔肯定係咪恰當。可能朋友feel到我猶疑，自己又接落去：「唔使擔心，屋邨街市仲有十幾廿蚊一個燒味飯盒，份工當然唔係理想啦！但都唔可以自怨自艾，最緊要唔好餓死，之後一定有機會，一個人肯做嘢點都會搵到工嘅，而家日日未夠6點就收工，睇下書做下運動，仲健康咗。」
以上係一個失業咗超過一年嘅人，喺呢段時間嘅心路歷程同遭遇，五金舖份工佢做咗半年，最後搵得返老本行，因為其中一個freelance客公司有人離職，所以佢入咗去做full time。
有時你想做得好，淨係睇啲成功故事同埋雞湯文係冇用，應該要睇睇挫敗嘅人同埋佢哋經歷，將來你哋會比任何人更清楚點樣去避免失敗。
如果呢度有待業嘅朋友，我希望借呢個故事去同你講一聲：「唔好氣餒！」
marketing executive 見工 在 我做Marketing - 見工interview 短短幾十分鐘，面試官其實 ... 的推薦與評價
「都係in house 咋，不過title 係Senior Marketing Executive 囉。」佢一路坐低一路答。 「啊，我仲以為你想轉行做倫敦金sales。」 我眼前嘅Kevin 一身超 ... ... <看更多>