1. 科索沃塞爾維亞卒之有直航！
2. 拿，國際關係呀。「塞爾維亞你都去過？」。梗係去過，同女去添！「科索沃你都去過？」梗係去過！同第條女去添！
3. 而最正係，本Lonely Planet 西巴爾幹（係呀，分兩本，證明我真係買過）仲係同一本，護照都係同一本（伏線嚟的！）
4. 停咗21年，科索澳首都Pristina 同塞爾納亞（以前南斯拉夫，後來嘅塞爾維亞及黑山，呼，冇晒）首都貝爾格萊德Belgrade，卒之開返直航。德國漢莎飛。美國從中協調，可以威威。坐幾耐？唔知，但巴士都坐五六粒鐘，飛機應該個幾鐘。
5. 之前打仗嘛，獨立嘛，梗係唔妥。21年都冇機，兩國當然都交惡，結果齊齊都入唔到歐盟，亦都因為歐盟仲有5個成員國唔承認科索沃獨立。（同係所謂「受害者」嘅波斯尼亞亦都唔承認科索沃獨立，因為仲有好多塞族人，而根本不存在「波斯尼亞族」）
6. 唔止咁，塞爾維亞，係禁晒所有科索沃航機飛越佢領空嘅！係咪似層相識呢！咁點算？咪兜路，經其他國家，南面或西面入。很煩。
7. 然後我諗一個問題：如果你成個國家畀人包住，佢又唔畀你飛越佢領空，咪仆街？答案係：好少咁嘅國家。其一係梵蒂岡，但梵蒂岡冇機場（不過有直升機場）。聖馬力諾都係咁情況，都係冇機場。但非洲萊索托就有機場！不過全國畀南非包圍住，佢唔畀你過領空你個機場就冇用了。
8. 最新交惡係，之前科索沃向塞爾維亞貨物收100%關稅，因為報復塞爾維亞游說其他國家唔好承認科索沃。塞爾維亞而家話，只要唔收關稅，就可以開通返條航線。科索沃都歡迎，但又堅持唔減關稅，你叫我停先我又叫你停先，但似乎都係會開條線
9. 最後補充：關護照乜事？就係，護照打過科索沃印，係入唔到塞爾維亞的。至少當年係。官方講明，你入到你好彩。所以我嘅做法，就係去咗塞爾維亞先！但到再去科索沃時，已經係三年後，女都換咗，但護照冇換，Lonely Planet都係嗰本
10. 當然，實務上其實就唔使咁做嘅。而家唔知，但當年，科索沃根本來者不拒，全世界去都唔使簽證，塞爾維亞人日日去都得。仲話唔會打印—但我當年有個印！。
11. 剛查過，而家唔係了，要簽證嘅包括中國（嘻），印尼，烏克蘭，俄羅斯，埃及。「全部都係麻煩友又多人」。有話係因為中國俄羅斯唔承認科索沃獨立，呢個係事實，但其實好多國家都冇正式承認，包括自己身有屎嘅西班牙。
12. 塞爾維亞人呢？護照都唔使
13. 而我當年係由馬其頓坐……的士去的。最Q好笑係，我原本係坐的士去巴士站，個的士司機問我之後去邊，講得兩講，話「不如五舊水，車你過去科索沃」。
14. 又，早兩年去北韓，團友就係對塞爾維亞情侶。我話去過塞爾維亞佢地十分雀躍，特別係我話唔止去過Belgrade – 咁我當然唔會話「我仲去過科索沃」，否則唔知佢會咩反應。當年去塞爾維亞，一街都係Косово је Србија，科索沃是塞爾維亞
15. 又又，本人仲要講Beograd而唔係講Belgrade，正如同德撚講Muencen而唔講Munich，意撚就Firenze唔係Florence。塞撚十分開心我知道Beograd —而其實呢個地名比較有意思。Beo就係白，白俄羅斯就係Belorussia。 Grad就應該好多人知係 「城」，一大堆乜乜格勒全部係乜乜之城。Beograd就係白色之城。
16. 最後講，應該冇人留意，睇下張相，細細隻字，Belgrade個機場，叫做Tesla 機場。當然唔係電動車贊助，而係人名。全名係Nikola Tesla機場，讀物理或者睇戲會識。Tesla邊樹人？有啲惡搞，佢出世時仲係奧匈帝國，而家克羅地亞境內，佢死在美國，但後人將佢運咗返塞爾維亞。在Belgrade有個博物館，有得睇骨灰，我都去過。
