［肺炎受惠股：鞋股篇］呢隻鞋股品牌疫情下好好賣，估下乜水？
1. 呢隻係一隻鞋股（Footwear），股價升10%。原因？唔係出業績，但有市場研究發現，3月，30個最大嘅鞋類品牌，得一個有銷售增長，銷售升咗14%。就係佢
2. 去到4月，好多舖頭都冇開，但呢個品牌銷售都仲有增長（而另一個就係毛毛鞋Ugg）
3. 咩品牌？我都識嘅，唔難估。我諗我識嘅鞋類品牌都冇三十個（唔計Yasaki Kamachi之類），廿個都唔知有冇。所以我都識嘅，當然係好大路嘅嘢，仲要係獨立有上市嘅。你見美金就知美國上市啦（咩呀？上海B股唔得？）
4. 其實諗到3月4月咩事嘅，應該唔難估。Work from home，或者隔離，或者畀人炒咗。唔返工，唔出街，咁著乜？
5. 就係著Crocs
6. 而埃汾從來都冇著過Crocs，倒係我阿麻（已死）生前都幾鍾意著，很潮。不過我冇留意係正版定老翻。
7. Crocs，咪鬼佬懶佬膠鞋，自己在屋企可以著，落街買嘢可以著，返工就應該唔得掛？唔使返工唔使返學冇街出就買多啲。上個月Google Search次數去到15年新高
8. 不過WSJ篇文話（ https://on.wsj.com/2X3gRGT），一方面佢係「冇人見先著」嘅懶鞋，受惠於疫情。但另外亦有人當係潮嘢著出街。文中仲訪問咗個女仔，11歲時第一次見到Crocs，話呢世都唔會買啲咁核突嘅嘢，結果事隔15年後買咗。果然膠到盡頭便是型。
9. 而事實係Crocs搞咗好多聯乘，同啲潮人音槳人合作，又同大牌子crossover咁，如是我聞。
10. 早幾年Crocs都有啲品牌危機，做嘅嘢都唔係好複雜。繼續保留返核心價值：易洗，易著易除，舒服，顏色繽紛。然後摺咗好多實體舖，上Amazon上天貓賣，仲有行銷針對返年青人，個性化，搵其他牌子合作，搵潮人代言。當然講就簡單，Bossini夠搵謝霆鋒（仲係咪潮人？）
11. Crocs合作過嘅大牌子，都唔少，Balenciaga，Vivienne Tam。至於點叫到人合作就係功力了。原來出過4.5寸厚底鞋，賣850美金，話咁快賣晒。
12. 另外Crocs好早推出咗啲Jibbitz，而家好似越出越多，一粒粒釘咁，4蚊（美金啦）一粒，一對鞋可以釘（？）26粒，少數怕長計，分分鐘就啲釘貴過鞋。膠鞋Pandora 化？呢條橋幾好。但最緊要可以personalize，人地又睇到，自己整對「獨一無二」，反映自己個性嘅嘢，啱晒而家啲友云云。
13. 分析員就話，Crocs同其他品牌就係有呢樣嘢唔同，懶膠鞋就係有種「柒到盡頭變是型」嘅價值。有啲友覺得落地獄，但有人當係神咁拜。有人當係懶佬鞋咁著，但有人當係潮流尖端反映個性。
14. 好啦，悶嘅嘢，數字。Crocs講緊舊年收入12億美金多啲，升13%，但其實之前好多年都係10億11億咁，增長唔太大。但純利就起伏幾大，好景時賺1億美金，唔好景時要輸錢
15. 最後睇下股價，公司其實相當年青，廿年都未夠。2006年先上市，十幾蚊升到七十蚊。金融海嘯跌到1蚊！之後其實幾年升返上30蚊。但2011至到2017年都係一路係咁跌，係近兩三年先再彈返上嚟。然後今年一樣十分波動，年頭40蚊，3月尾插到10蚊，而家又30蚊。相當好炒。
16. 原因好簡單，因為其實市值好細，又係同名牌知名度唔成正比（因為太易抄？）。舊年先賺1億美金左右，已經算相當好嘅一年，市值20億美金（20倍去年PE），美股嚟講真係極細隻。
17. 最後一講，Crocs係在Nasdaq上市的，雖則唔係咩高科技股。唔止，Starbucks都係。美國有不同嘅股票交易所，除左Nasdaq仲有大家知嘅NYSE紐約股票交易所。以前（2008年前）仲有AMEX，唔係美國運通，係美國股票交易所，但而家畀NYSE吞埋。
18. 唔止，仲有檔LTSE，原來我都寫過（！），本專頁真係多嘢睇（https://bit.ly/2TCyT0A）。呢個LTSE一般人唔會接觸到，我甚至唔知真係開咗檔。簡單嚟講就係矽谷啲初創科技小朋友嘅交易所，冇錢但又唔想畀你啲有錢嘅人話事，唔想你咁「短視」，所以股票都玩loyalty program，你渣得耐（即係創始人）就好很多倍投票權，後來者買起我七成都話唔到事，吹咩？擺明就係自己搞檔嘢，唔守你出面嘅法則。
19. 係咯，交易所其實係可以有幾間的，互相爭生意，而你買Starbucks，一般根本都唔知亦唔使知佢在邊個交易所。但香港就港交所玩晒。一路如此，英殖都係（你唔係想講四會下話？）。
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
