《禁室殺戮》：創意取勝的驚慄入門
之前留意到呢套《Don’t Breathe》係因為幾個台灣Cult片網已對佢超級推薦，講到套戲突破咗好多密室驚慄片傳統格局，所以不期然都對佢非常期待。
《Don’t Breathe》故事設定其實非常簡單（其實好多驚慄片設定都好簡單），有三個年青人為咗籌錢逃離底特律呢個經已失去希望嘅城市，決定走去一個因為打仗盲咗雙眼嘅軍人屋企爆格，然後好似套戲中文戲名咁，之後就比人困住響間屋入面進行「禁室殺戮」。
基本上成套片大橋大家都應該估到係點，甚至如果睇過Trailer都知道套戲最大賣點係，個殺手係一條盲佬，換言之有幾個主角其實有好多時候都會處於優勢；而呢個盲佬亦都要借助更多嘢去拉近番呢個劣勢，結果成個格局就變得均衡得多，唔似一般驚慄片受害者通常都只能任由殺手宰割。但既然成條大橋都知道哂咁滯，點解《Don’t Breathe》仍然全無悶場、兼夾大獲好評，只以不足1000萬美金Budget，卻能夠勁收1億5千萬美金呢？
首先第一樣係因為《Don’t Breathe》響場景攝影做得非常之好，其實成間屋三層最多每層一千呎倒，但透過鏡頭運用令到成班人好似響個迷宮入面做戲，果種壓迫感同埋成日走入崛頭路嘅緊張感即使出哂黎；其次係因為個殺手係透過聽聲黎搵倒主角位置，所以好多場戲都好切合戲名《Don’t Breathe》嘅主旨，仲要即使你明知佢係盲照理應該走得甩，但總會形住佢有方法搵倒你出黎，果種不安感就KEEP住貫穿全場。第三係正如導演Fede Alvarez所講，呢套戲特別為咗回應觀眾對佢前作《鬼玩人》太血腥嘔心嘅批評，所以響血腥暴力方面都刻意有所節制、甚至連強暴虐待都用「意識」黎替代視覺刺激，咁樣不單令更多怕睇核突嘢觀眾能夠「入口」，對於驚慄佈局嘅設定要求亦更高，而Fede Alvarez竟然響咁嘅限制之下仍然令你套戲大部份時間都處於緊張狀態，技巧都真係高超。
但要講到我最最最欣賞嘅係，一般驚慄片主角都係任由劇情擺佈，只能夠從生死之間二選一；但《Don’t Breathe》響幾個主角逃命嘅過程入面，其實都比咗好多抉擇佢地，而呢個抉擇有時係一種良心嘅掙扎，有時係貪婪嘅誘惑，結果就係明明佢地有好多時候都可以提早得救，但最後佢地最後都係決定繼續留響呢個恐怖旋渦入面，充份引證咗「條路自己揀、仆街唔好喊」。
當然仲有就係，套戲好多長鏡頭都做得好好，有朋友話套嘢啲視角好似隻Game咁，但我更鍾意係去到片頭同最後外景果個Wide Shot，完全表達得到「你以為走得出密室，其實只係另一場惡夢開始」果種感覺。
我雖然好鍾意《Don’t Breathe》，但當然佢唔係十全十美。例如我本來以為間屋入面其實困咗好多以前嘗試偷佢錢但失敗而比佢捉咗或者殺咗一堆賊，但結果向咗另一條線走；雖然都算有驚喜，但總係覺得Twist位仲係爭啲唔夠爆。此外就係將盲佬設定為一個「鐵漢好爸爸」固然好破格，不過相對而言個殺手定位就唔夠變態；再加上血腥核突又無乜，個人又一向覺得狗狗係人類好朋友，其實去到後面我覺得似劇情片多過驚慄片。
另外有一場好多觀眾都大讚嘅熄燈戲，由為佢用咗夜視鏡方式黎拍攝番主角摸黑嘅情況，但其實咁樣係同之前著燈個感覺太似而浪費咗呢場戲。其實如果佢真係可以將夜視光較暗一啲、插多啲全黑畫面入去、又或者直頭用啲方式整到有時黑有時光，可能先真正做到摸黑不見五指嘅感覺出黎。至於演員方面，盲佬Stephen Lang係做得唔錯，但係可以發揮空間其實唔多，反而女主角Jane Levy由頭帶到落尾，個人覺得非常討好。
總括黎講《Don’t Breathe》係一套靠創意取勝嘅驚慄片，入面恐怖同嘔心元素都相當有限，唔怪得只係IIB連三級都唔係，所以對於一啲好細膽又想睇驚慄片嘅朋友黎講，呢套真係非常好嘅入面嘗試；但如果以為套戲會好似《鬼玩人》咁核突變態，又或者你諗住帶個女仔入場嚇下佢，咁就可以放低你嘅期望。
