2016年3月12日
【末日火山Tongariro Alpine Crossing “SIR”住咁落山?!】
(有片睇😁😁剪左成個月呀要將九個鐘既野剪成幾分鐘真係一啲都唔易呀…😂😂)
終於…終於要行依條北島最出名既單日行山路徑啦!!! 好緊張，去之前好多朋友都話要行好耐行到好攰但係又好值得去!咁點都要行一次啦係咪先?!
依個山係電影魔戒其中一個拍攝場地 ，亦即係電影中個末日火山果度啦!!!
整條Tongariro Alpine Crossing 總長19.4km，由起點Mangatepopo Car Park 行到終點Ketetahi Car Park 大約要行7-8小時(佢個牌就寫6hr20min，但我覺得除非我中途唔休息唔食野唔睇風景唔影相再加上連跑帶跳先可以6個幾小時完成😂😂…)我地當日慢慢行連埋食lunch放smoko咁大約由十點行到七點！行左九個鐘左右！
行既時候上山唔難呀！最難係上到最高點後落斜果個堅斜路…(我自己係咁覺得囉…但可能啲外國人唔覺架…佢地真係堅跑住咁落山架！)
風景好靚，好特別，我唔識形容你睇片就會知係點，真心覺得黎到紐西蘭北島既話真係要行一次！主要好靚既景都比較喺起點果邊，近終點果邊有好大段路都係喺樹林裡面。由Mangatepopo Car Park作為起點行到Ketetahi Car Park係因為咁樣行比反方向行落斜既位會多啲，行得會舒服啲。另外呢如果你反方向咁行既話，一開始只會係一大段好悶既樹林路，到你行到開始變喪屍你先會見到少少既風景，而到你行到最靚既位果時你應該已經變成左隻悶死既喪屍，所以我一萬個唔建議網上有啲人話可以分兩隊人馬，分別從起點同終點出發然後中途遇上既時候交換車匙，大佬呀你係咪想行死又悶死喺終點出發果班人呀…
當然冇車既都可以揀搭Tongariro Alpine Crossing Shuttle Bus，一人35NZD。
一路行一路討論行完山之後既晚餐買乜餸煮乜野食好，又話整肉餅呀烤羊呀煲湯呀勁吸引，我地一直都用依餐豐富既晚餐作為我地完成整條路既動力…好可惜…我地行完山後竟然發現我地間bnb附近個小鎮Turangi唯一一間大型超市8pm就關左門…餸都買唔到呀煮乜L野飯呀！！！！嬲左囉…
好彩喺鎮上都仲比我地搵到間Chinese Takeaway，求其叫左隻炸子雞同幾個炒粉麵返bnb食就算啦！果隻炸子雞…嘩難食到呢…真係成隻雞攞去炸架，冇醃過架，乜調味都冇架，雞味都冇架，貨真價實既炸子雞黎架！
___________________________
Tongariro Alpine Crossing：
起點: Mangatepopo Car Park
終點: Ketetahi Car Park
