[劇透慎入] 電視史上最黑暗的一個月
今日準備睇權力遊戲最後一集之前，我偷偷上imdb睇定觀眾評分，結果分數再度尋底，只得５分 (執筆時已低至4.8分)。我無失望，仲放鬆咗一口氣，因為我知道盲撐套劇o既人睇完呢集會進一步消失。
權力遊戲由我第一季開始追，追足八季，跨越九年，我無諗到自己會因愛成恨到呢個地步，因為我天真地真係以為全球過千萬觀眾o既荷李活頂級製作，只不過爭幾集就完結，電視台係唔會容許佢拍爛，亦好難拍爛，但係，結果，我錯了。最後一季崩潰o既程度，係超乎想像，除咗一心一意專登寫爛佢，我係想像唔到任何荷李活受薪編劇係點諗到呢種程度o既佈局同劇情。
鋪排咗八季o既Night King主線，打一集就完，你集數有限，唔夠時間，我都忍，但你老味Bran究竟係做乜春？大家遐想佢補充到Night King o既背景，以為佢會控制到龍，以為佢回到過去做出左右歷史大局o既決定，甚至乎以為佢就係Night King，以為佢就係Lord of Light，結果唔係，乜柒都唔係，乜春都無做過，由第七季開始佢只係不斷故弄玄虛，甚至乎佢做唔做Three Eyed Raven都對成個北境主線係完全無影響，有無Bran呢個人，根本Night King都一樣可以南下，一樣可以攻打Winterfell。
可憐o既Bran唯一作用，就係證實Jon係Targaryen。但呢度衍生更嚴重o既問題，就係Jon完全浪費Targaryen神聖o既血緣身份，佢知道自己係Targaryen後，依然忠於龍母，變得更優柔寡斷，”She is my queen”, “I don’t want it” x 100，全季幾乎未勇猛過一刻，主角唔似主角，觀感上極差，好多人話權力遊戲呢套嘢真實在無主角光環，但無主角光環唔代表要主角變成路人甲。
龍老母直頭係一個被編劇徹底強姦o既角色，第三集仲係救世主，隔咗一集，經歷一堆強行要佢黑化o既劇情，結果黑化理由仍然唔充份，但第五集就要化身成天火屠城o既Mad Queen，再過一集，一統Westeros可能只係二十分鐘，講咗兩段對白，再加一場同Jon o既對手戲，就趕住被人一刀桶死。呢種角色心情既急速轉變，我只係响一套戲見過，就係喜劇之王，導演叫周星馳示範喺醫院等老婆生仔嗰種表情個場戲：「個仔出世，老婆死咗，個仔識叫爸爸，天才呀，條啫生喺個頭度，畸形架。」難怪Emilia Clarke話接到劇本後，自己一個人响倫敦戇鳩鳩行咗兩個鐘，如果佢唔去多人o既地方，睇唔開去自殺好合理。
今季難睇劇情係數之不盡，Jaime選擇北上，援助Winterfell，完成自己o既救贖，本身可以係呢套劇經過八季後心路歷程發展得最完滿o既角色，亦都係我鍾意o既角色，但忽然之間唔知痴起邊條根，佢走返落去Kings Landing救Cersei，當年為咗阻止Mad King濫殺無辜而弒君o既佢，結果講咗句“I never really cared about the innocents”呢句最崩壞o既名句。响我o既角度，Jaime係變咗無啦啦北上，Battle of Winterfell無乜特別建樹，跟住又無端端落返去，佢呢個角色今季仿佛只係為咗扑大隻妹而存在。
今季完全係角色違背性格設定，劇情放棄常識邏輯。Tyrion弱智咗兩季，我已經唔洗多講，就算二線角色o既劇情與行為，都一樣係咁離譜。Bronn衝入Winterfell勒索係發生咩事？佢要錢我明，但佢同Jaime叫出生入死過，仲救過人一命，而家玩乜尻勒索？Euron上水唔知點解會撞到Jaime都算，無情白事同人隻秋呢度直頭滑稽過笑片，The Mountain都唔會好似佢咁失控。Varys呢啲角色可能唔受歡迎，不如快手快腳處置佢，結果編劇安排佢眾目睽睽下叛國，入紙申請死刑。
士兵响城牆外防守敵人我都忍到，我話畀自己聽呢套唔係戰爭戲，唔好咁認真，但龍老母唔小心畀Euron撃落一條龍後，佢隔一集竟然用一模一樣o既方法再次進攻艦隊，今次唔止成功，仲成個城滅埋，我睇緊啲乜撚嘢；Bran打打吓仗反咗白眼，正常觀眾都認為一定有固中原因未解釋，記得有人講笑話佢變烏鴉飛上天觀戰，屌你老味原來係真；The Prince That Was Promised呢個預言仲有無人記得，我開始懷疑係啲紅祭司圍內講吓笑，根本唔重要；無端端地獄咁既廢墟中出現隻身光頸靚o既白馬Slow撚晒Motion咁救Arya，個個都以為有咩寓意，有咩解釋，無，佢真係只係隻無撚端端出現o既白馬；你老味臭閪講幾句話唔想再打仗，唔想再勞民傷財，Westeros就突然變咗公投選皇帝，咁呢八季究竟爭緊乜春，我睇唔透，我未撚試過咁撚憎民主社會。
有無人好奇怪點解呢個post我會揀呢張配相，呢一幕係第七季Cersei响Ellaria Sand面前將佢個女Tyene Sand落毒，Cerci好恨毒咁要Ellaria响地牢慢慢睇住自己心愛o既人迎接死亡，再响面前慢慢腐爛。而呢個月，我肯定所有GOT fans，都係以同一種心情眼白白睇住自己最心愛o既劇被摧殘。
如果夾硬要我揀一幕係全季最鍾意，諗起都好笑，我只能揀Podrick唱歌個幕。
GRRM未寫完書，絕對唔係David Benioff同Daniel Weiss寫爛呢套劇o既藉口 ，因為網上無數咁多theories，甚至乎鳩作o既流出劇情，都比現在出色同合理。第七八季有無可能重拍已經唔重要，作為GOT fans當前最大o既願望係D&D可以被踢出StarWars 10-12 集o既班底，我唔係Star Wars fans，佢地搞唔搞死Star Wars唔關我事，但我好想D&D畀人搞死。
經過九年時間，我無奈地作出以下結論：權力遊戲絕對係推薦畀仇家睇o既美劇首選。
HBO
HBO Asia
tyene sand 在 Tyene Sand #gameofthronescharacters | Rosabell laurenti ... 的推薦與評價
Tyene Sand to Bronn Tyene Sand was a bastard daughter of Prince Oberyn Martell and his paramour, Ellaria Sand, and one of the Sand Snakes. ... <看更多>