雖然話一竹篙唔能夠打一船人，而確實我自己都曾經請過一個bootcamp畢業嘅同學，我覺得佢係少數「識嘢」嘅developer（咁我哋請人都係千挑萬選先請嘅）。
但係又確實，某間bootcamp畢業嘅同學，CV都係大同少異，github上面嘅project又係差唔得幾多。喺某bootcamp畢業，而我又in過嘅同學（數埋都有十幾個），基本上除咗曾經請咗嗰位同事，其他嘅都係答唔到啲基礎問題，即係話，根基未夠，一超越咗佢學過嘅嘢嘅問題就答唔到，就算係bootcamp學過嘅嘢，都唔算好熟，問深入少少，好啲嘅就直認唔識，唔好嘅就遊花園問非所答。
如果有啲公司，負責in人嘅並唔係IT底，係有機會俾某bootcamp嘅同學拋到，因為佢哋學個set嘢係比較新嘅tech，in嘅人冇接觸過可能問都未必識問，或者就咁講個信字就會請咗。但係以我所接觸嘅行家嚟講，如果in人嘅係識tech嘅話，基本上九成九都唔願意花時間去in bootcamp出嚟嘅同學，因為命中率實在太低。
咁樣對行業係好事定壞事？我覺得凡事冇嘢係「好晒」或者「壞晒」，永遠係講緊「好嘅多啲」，定係「唔好嘅多啲」。我個人睇法係，咁多大同少異嘅CV湧現，而其中大部份都係根底未打穩嘅同學加入市場，可以話係「壞多於好」。
而家呢個情況嚟講，唔可以怪晒bootcamp，因為就算唔係某bootcamp教啲同學寫CV（我希望唔係），啲同學自己都會互相「參考」。而請咗唔啱用，呢個係僱主in人嘅問題，唔係求職者嘅問題。但係如果請親都唔啱用（無論係因為見工時「吹大咗」，又或者低估咗現實嘅殘酷），機構對於「IT人」嘅印像就會更加差，同業嘅地位就會變得比而家更低。
Developer嘅世界好大，識得越多，就越知道自己渺小。Bootcamp出嚟嘅同學，啱啱進入呢個花花世界，眼花撩亂，好容易以為自己已經學識咗好多嘢，成為咗Full-Stack developer，任何難題都能夠解決。但係世事永遠係冇咁著數，實際應用要考慮到嘅各種問題，寫程式嘅刁鑽技巧，冇返三五七年嘅洗禮真係唔敢認叻。
循正統途徑入門嘅developer，絕少會夠膽自認Full-Stack，而真正Full-Stack嘅人，多數都係被逼（例如自己開公司又唔夠錢請人），先會硬著頭皮Full-Stack，但亦唔係所有人都做得到，係需要有相當經驗，投入大量精神時間，加埋有天份嘅人，先有機會可以瓣瓣都精。
所以當收到某bootcamp同學嘅CV，話識晒前台後台又web又app，標明係Full-Stack，就真係要加倍留神。
