真係走得就走 (4)：「乖」與「聽話」？
「乖」厘個字英文可能係翻譯做"Be Good" 及 "Well Behaved" 加上 "Obedience" ，我才疏學淺，真係諗唔到一個英文詞語可以直譯。
唔理點譯都好，响英語世界都係包含咗良好品格厘個概念（如果連良好品格係乜都唔知，就唔該先學「四維」：禮、義、廉、恥；同「八德」：忠、孝、仁、愛、信、義、和、平）。但係响華人社會， "Obedience" 「聽話」已經代表咗「乖」嘅全部，而良好品格真係唔重要嘅。（上面嗰十二個雖然係中文字，有幾多個係同現今香港人或者中國人有關？）
而我做咗幾十年香港人，由做仔到做人老豆，我深深體會到一樣嘢。華人社會家長最需要嘅係「聽教聽話」多於一切，最緊要子女跟家長嘅意思做，亦唔好比到麻煩自己。所以，「乖乖地」一定係跟埋「聽教聽話」！
結果係「乖」就可以令小朋友讀書讀到儍，學嘢學到癲。最後慢慢咁傳染到整個社會，要所有嘅年青人都要「聽話」，唔「乖」就罰，係重罰，而良好品格再唔須要！
各位香港嘅家長，如果你地繼續理所當然地覺得「聽話」係等如「乖」的話。唔洗擔心，我相信不久嘅將來，你地嘅家長（即係政府）都會要你地「乖乖地」同「聽教聽話」。因為香港已經唔再需要"be good"或者"well behaved"厘啲原素，以後只係要你地「聽話」！
#走得就走 #乜都唔緊要 #乖乖地睇股票升 #乖乖地等層樓升 #最憎啲細路唔聽話 #多事就抵死 #無人叫你搞事 #係咁㗎啦
***************************
真係走得就走 (1)： 國教、普教、蔡若蓮
http://bit.ly/2vPyVHq
真係走得就走 (2)： 代言人
http://bit.ly/2w8vqww
真係走得就走 (3)： 移民係一條數學題
http://bit.ly/2wgKIyP
***************************
