前幾回講到，「線嘅方程」其實係「無限粒點嘅x值y值嘅關係」。施主，色即是空，方程即關係。
.
講到關係，唉！呢家嘢好複雜……Tommy中意Mary，但Mary就中意肥釗，偏偏肥釗係Chris個細佬，Chris之前就同Tommy個Ex有路，後來Tommy轉咗基，又同肥釗曖昧過吓，仲畀Mary見過佢地拖手……
.
關係複雜，數學都係㗎咋，x值唔同嘅話，y值就會跟住變嚟變去，咁點算呢？
.
唔知你有冇睇過上一代香港人好中意睇嘅娛樂八卦雜誌？啲爛臭記者為咗將明星嘅醜聞發大嚟講，拉多啲人落水，最中意整張蜘蛛網咁款嘅人物關係圖，將七國咁亂嘅關係show畀讀者知。
.
用圖像（Graph）嚟表達關係，就最適合不過啦！
.
咪住！話說，第一段提過，方程（Equation）係交代關係，咁咪即係……
.
無錯！圖像＆方程，都係做緊同一件事。兩者嘅分別在於，你準備將呢段關係，透露畀邊個知？想話畀「人類」知？佢會中意睇圖像，升就升跌就跌，好似啲股票財經風水佬咁。想話畀「電腦」知？佢會中意睇方程，無計，電腦無眼。
.
舉個例，若然我想表達一個兜兜轉轉，最終又喺返埋一齊嘅關係，我只需要畫個圓圈（Circle）就搞掂。但係要向電腦準確地表達一個圓圈，就要寫【x^2 + y^2 = 1】咁電腦先至會明白一個圓心喺O而半徑係1嘅圓圈。
.
換言之（重點來了）唔同圖像，就有唔同方程；唔同方程，就有唔同圖像。方程嘅每一個細節，都反映圖像嘅每一個特質，所以，想學電腦透過方程閱讀圖像，就要識得各種方程嘅格式啦。
.
例如：【y = 乜x + 乜】係直線，第一個乜係斜率（Slope）即係條線有幾斜；第二個乜係Y截距（y-intercept）即係切過Y軸邊度。
.
又例如：【(x - 乜)^2 + (y - 乜)^2 = 乜^2】係圓圈，第一個乜係圓心嘅x值，第二個乜係圓心嘅y值，第三個乜係圓嘅半徑（Radius）。
.
再例如：【y = 乜^x】係幾何曲線，如果乜大過1，就越飛越高，越升越猛；如果乜介乎於0至1之間，就越飛越低，低到趨近貼地。
.
方程就好似香港人嘅身份證，睇你出生日期就知你幾歲，睇身份證號碼首個英文字就知你係咪新移民，輪入去警隊嘅電腦，仲可以起你祖宗十八代嘅底細。
.
換言之（又有重點）若然幅圖像有變動，郁咗啊、反射咗啊、撳扁咗啊、拉闊咗啊……條方程都一定有所變動。
.
點變？去YouTube搜尋【杜氏數學 graph】你就會見到有條10分31秒嘅Transformation of Graphs圖像變換教學短片（ https://youtu.be/88BCf9H_eDA ）。
.
好高興【數學外掛懶人包】已經連載到第22篇，寫到上咗軌道，我預計自己寫多十篇左右就會完稿，同另一位數學前輩Kxx Txx，合著《5**數學男人嫁得過》！暫定本書會分四大部份：
.
👉坐標攻略👉備試心法👉考試技巧👉生活數學
.
請多多支持，本書會繼續用雜誌吹水形式，將嚴1肅嘅數學話題，寫得搞笑啲、易明啲、親切啲，同時又會對學生考生極有幫助，勁多連日校老師＆補習老師都會大有裨益。
.
請大家繼續支持【數學外掛懶人包】以及【全港第一訂閱人嘅數學YouTube Channel】👉杜氏數學👈最近11月起又開始咗大量連載Skills，各位同學兼補習行家，歡迎收睇，同埋多多分享畀親朋戚友。我嘅理念係幫香港後生仔花最短時間考好數學，跨過迂腐過時嘅考試制度，慳更多時間做自己真正中意做嘅事，活出自己嘅人生。
y-intercept 在 How To Find The X and Y Intercepts of a Line - YouTube 的推薦與評價
... <看更多>