【龔成問答信箱】（Q16441-Q16460）
Q16441：
成哥,我係你舊生,依家就分析緊837 譚木匠,我有幾個問題先問你
（1） 我見到佢原本嘅派息比率就50%,最近三年就別特別股息派得好勁,但係最近3年年報又搵唔到原因,想問下係咪需要對呢隻有所保留?
（2） 由於梳呢個行業係完全競爭,但佢係行高檔梳市場,呢個會唔會成為佢嘅護城河?但佢又容易被低檔梳取代,你認為佢嘅護城河係咪唔夠闊?
（3） 佢係以特許經營去營運,唔知呢個係咪佢最大嘅風險?
（4） 我認為呢隻股派息勁,但反而係平穩增長股,合理價係$3.08-$4.2,唔知大致上有冇錯誤?希望唔阻住你!!
龔成老師︰
1） 譚木匠（0837）在年報無表明派特別息原因，我估計有機會係因為集團覺得暫時市場無重大發展機會，故將部份預留發展的資金，以特別股息形式發還股東。
但留意翻佢2019年派發股息金額比盈利多近一倍，這樣做會減少集團本身資金儲備，以企業長遠發展的角度分析，這並不是增長型的股票。
2） 過往幾年盈利只是平穏發展，而且毛利率和純利率有略有下降情況，可以估計佢這個護城河不太強。但整體是不差，不過未到最高質素類別。
3） 特許經營去進入一個市場有好有壞，好處是可以較快將品牌打入一個新市場。而壞處是營運質素一般會較難控制，同時可能對品牌的認知度還不夠深入，令品牌發展有負面影響。
4） 這股收息可以，長線並不是高增長類，收息及平穩增長型。近年偏向將所有收入以股息派發。但由於股息派發政策多變，你保守D以佢一般股息計，例如用平均股息去計算分析。你計算價值大致正確。
------------------------------------------------
Q16442：
龔Sir~想一問，了解股票要看企業本身實際能力、現況社會環境多於估市升跌，所以我在想是否都應考慮一些企業當市況回歸正常時有上升嘅空間，如以下：
香港寬頻
阿里巴巴
騰訊
九毛九
海底撈
另外這些股票的合理價和便宜價大約幾多？
謝謝指數
龔成老師：
我地買股票就是買企業，因此要找有實際價值的企業。如果現時較平，當市況正常佢將會回歸至合理價，就是有一定的升幅。
上述的股票，基本上都是有質素，可以投資，但就算到平的狀態。
香港寬頻（1310）合理區中上部。
阿里巴巴（9988）$180以下先合理。
騰訊（0700）跌翻1成先合理。
九毛九（9922）現價合理區頂。
海底撈（6862）跌翻1成先合理。
------------------------------------------------
Q16443：
龔成你好呀
我終於開立了月供
供款如下：
2500 盈富
1500騰訊
1000 港鐵
甘既租合可以？
我另外手上有以下各一手 可評論下，ok 嗎？
0002 中電79.2入
00011 恒生139.6入
00823 領展66.3入
2800 盈富24.6入
3988 中銀2.99入
另外想為黎緊出世小寶另外設月供 將來之用
金額可能2-3千 可以以上月供租合？
龔成老師：
你現時持有的，都是有質素的股票，買入價基本上合理的，持有無問題，但要記住，銀行股的比例唔好過多，合適就得。
至於月供方面，都是有質素的，無問題，金額的分配可以。你只要長期保持進行就得。
如果你為小朋友設定長期的月供，建議你集中供盈富（2800），這是最方便及平衡風險的。
------------------------------------------------
Q16444：
成老師，想請問你保險你個人係買左邊幾樣？(危疾，醫保，意外) 我發現保險公司對危疾保賠償時有太多條款，好怕反而最後冇得賠，係度諗梗好冇寧願唔買自己投資。
起碼舊錢肯定係自己度，而醫保我就覺得反而可能有需要，而且容易claim。意外保保費平，但都容易理賠，感覺冇危疾保咁呃錢。想請教老師睇法
龔成老師：
其實保險是好個人化的，你只需要找翻「適合」自己就得。
保險的原理，就是將你不想承受的風險，轉嫁比保險公司，你要睇翻自己的需要而定。買得太多無意思，「適合」就得。
我自己買左人壽及危疾，只要小心睇條款，問清楚就得。
------------------------------------------------
Q16445：
老師！多謝你既意見！我已經成功做左業主了！非常非常感謝你俾信心我！
今次想再向老師請教另一樣嘢，
事情係我現時係公務員嚟嘅，原先退休年齡係60。公司就問緊同事意向，可以選擇延期至65。
我睇過哂文件，感覺現時60歲個offer好啲，好喺自願mpf部分政府額外供果個%會高d。例如係年資第15年起，政府會按人工供17%，第20起供20%。如果揀65退休，相同%要等年資第18年及24年起先至有，如此類推。
但，61-65畢竟真係賺多五年薪金。假設保持現職唔升職，正常加薪咁計，做到頂薪，果五年淨人工至少四百萬。
我有同事認為65先退休，可以有多重保障，收入同醫療等等。有同事就覺得65仲做都辛苦，不如俾心機做好投資理財可以早點退休環遊世界。
我想請問，我應該從咩方向考慮好呢？
背境資料：現在三十出頭，喺公司既年資已六年，月入約四萬，每月儲蓄至少人工1/3。層樓現值約五百萬，其他資產共大概八十萬
龔成老師：
恭喜！你之後都要做好理財，能「持續地供款」是最重要的，這比起樓價升跌更加重要。
至於退休方面，真係好睇你自己想點，如果我計過數60歲已有好生活，我會選60歲退。但如果當時的生活都只是一般般，就會65歲。
其實要而家決定，的確好難。如果可以當然遲D先決定較好。
------------------------------------------------
Q16446：
龔老師你好：本人40歲，有一層樓收租，每月大概收租$19k及打工收入每月大概數萬。另有儲蓄約2.5M. 股票約50萬
現想用1.5M買股票，心水有：303，823，52，388
另外想用租金一半（大嘅9k）月供股票，因為一直都是放在saving 沒有增長可言，請問月供盈富及港鐵可以嗎？或有更好提議嗎？
因為本人不擅買股票，多次也慘輸收場
希望借今次跌市可以買到優質股票
期望10年後有一筆錢可讓小兒升學（大嘅預3M）
請老師指教，感謝
龔成老師︰
首先講你$1.5M的組合，當中股票有質素和增長力，可以用來投資增值。除了偉易達（0303），佢雖然本質都算不錯的，但增長力就唔叫好強。
佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。
公司已不需要每年投資發展，反而管理層、大股東，偏向想收息，因此這是重派息多過重發展的公司，這股以收息股看待。我建議你用盈富基金（2800）去代替佢。
由於現時大市只在合理區，未算平，你這$1.5M入貨時，要分多注進行，唔好一次過入晒。另外，比重上你可以比多D盈富，佢是包括50間質素不錯上市公司股票的組合，有助你平衡組合中的風險。
而月供方面，這個組合可以，資金分配你可以盈富（2800）$5000和港鐵（0066）$4000。
以恆指過去年平均回報10%計（連股息再投資），你每月投資$9000+現有資金$1.5M，10年後大約會增值至560萬，故這樣安排相信很大機會達至小兒升學所需目標。
------------------------------------------------
Q16447：
老師你好：打攪你，見最近個市場對隻1833平安好醫生炒得咁熱，就試下用進階班學到既估值方法（P/S)計下，請教老師我咁計法合唔合理，同埋有冇改善或注意既地方
數據由7-4-2020大行報告提取（詳見圖）
年份：2018A- 2022E
平均營業額 (萬）為7475.17
發行股數（萬）1067（因大行報告沒有作預算，所以我用返2019年既數目）
P/S 區域 6.84 - 12.76
每股有代表性營業額為 $7.01
估值：
7.01 x 6.84 = $47.95
7.01 x 12.76 =$89.45
呢個估值我需唔需要再保守點再打折？
請老師給予意見，謝謝您
龔成老師：
我認為你的方向不差，該報告的數據有一定的參考價值，而平安好醫生（1833）由於未有實質盈利，我地要用其他方法去進行估值，而P/S估值法是其中一個方法，但要留意，這只能參考，不能只用這方法。
你以這方法作基礎，計算了上述的估值，我認為有參考價值的。但我會建議點都要打折，因為你的估值基礎只用一間企業，而這企業上市年份唔長，數據少，其實好難作合理的推算，以低風險原則，會有少少打折。
你可以同時以預測市盈率概念去進行估值，多個方法一同進行，參考價值會更加高。
------------------------------------------------
Q16448：
老師，請問講吓美股嗎？本身持有港股，受近期政治形勢影響，想買啲美股分散下風險。謝謝！
龔成老師：
最簡單的方法，你可以投資，領航標普五百（3140），這是追蹤美股的指數，你可以好簡單就能以這方法買到美股。
美股現時處合理區，美國經濟有不確定性的，股市之後仍有潛在波動的風險，所以買入時要分注進行。在長遠計，美股仍是正面的，你可以作為財富分配的一部分。
至於個別美股，由於無仔細研究，所以不亂作推介了。
------------------------------------------------
Q16449：
老師，想請教一下老師點睇6055 中煙香港
龔成老師：
中煙國際香港（6055）係中國煙草總公司的全資附屬公司，承擔中國煙草總公司國際業務的管理及運營工作。
中國煙草總公司為中國唯一根據國家煙草專賣制度從事煙草專賣品生產、銷售及進出口業務的實體。
業務上，的確有獨特性，不過，佢上市年期不算長，真實面要慢慢先見到，加上佢股價較波動，因此是較高風險的類別，就算投資，也只能小注。
------------------------------------------------
Q16450：
想問如果有100萬資金想五年後增值適合投資盈富基金嗎？大概回報率有多少？
龔成老師：
投資盈富（2800）是最簡單，以及較好平衡風險的項目。你可以進行，不過就建議買入時要分注，唔好一次過動用。
過往50年，恆指的升幅連股息，每年平均複息約14%，近年有所減少，但預期都可以有8%-10%。預期$100萬在5年後，會滾存到約$150萬。
------------------------------------------------
Q16451：
老師，睇返去年六月我給你留言之後，我開始認真儲蓄做了副業，認真記帳存錢分配花費。不到一年時間，我已累積比去年中多一倍的積蓄。你啟發了我很多，謝謝你！
現時，我有打算部署買入大灣區佛山的樓盤，但家人不能給予資金支持，所以可能會動用我大約8-9成的所有錢，後面供款約佔工作收入3成（不計副業）股票亦要全數放出。但我覺得可接下來的時間再儲過。老師認為這會太衝動嗎？
龔成老師：
你要分析翻該物業的投資價值，大灣區雖然長遠發展看似正面，但你都要睇翻個別地區，當地的交通配套，經濟發展，以及租合回報率，如果回報率過低，反映投資價值唔算高。
你這動作會令你的資產集中在物業，但不是話不能進行，而是你一定要經過仔細的分析，確保這投資長期有理想回報，先可以進行。
我地進行人生財富累積，就是不斷買入「資產項」，你過往儲蓄，投資，就是進行這一步，而買樓，都是行這一步，問題是點樣行得較好。
------------------------------------------------
Q16452：
老師，現在內銀股前景點睇？重倉左3988。價位在3.05。未來兩年重上4蚊機會大不大？
龔成老師︰
由於現時利息偏低，再加上內地經濟導致壞表增加等風險，預期中短期內銀都會較弱。
但長線，銀行作為百業之母，加上中國為全球其中一個高增長國家等，都有利內銀發展。
中行（3988）有質素，是優質收息股。但增長力唔會高，要上翻$4你要較有耐性。
另外，我地投資組合中，唔應該過份側重於單一企業或行業。因為當這企/行業出問題，就會嚴重影響到你組合回報。
------------------------------------------------
Q16453：
老師，以現金買入的股票，是不是一直積存落去，到價格相宜時再買入？
另外，白痴一問，如果想月供股票，是不是一定要去股票行買這種碎股？我本身只有渣打戶口，但它的股票app只能1手1手買，不能做月供
最後，我的確有興趣去上堂學習這些知識，不過因為小弟番工時間暫時唔太方便，想問一下，如果尼次之後會大約幾時再開班，到時希望就到時間上堂
龔成老師：
要睇翻你的現金比例。首先，我地會分注買入優質股，原理是建立一個優質的財富配置，要衡量當時的平貴，以及你現金，去決定點買法。
大部分銀行都有月供，我唔記得渣打有無，你去匯豐中銀都有，登記月供，每月供那隻股，每月投入金額多少，就可以進行。
我每1、2個月都會開一班。
------------------------------------------------
Q16454：
亞Sir, 我依家有120萬，3月用左20萬入左第一注股票，跟住都未再入第二注。現在住個層自住樓，市值$550萬，係我同老公聯名
黎緊想甩左我個名，老公之後加按$200萬（計過老公不會過50%入息）比首期，用我個首置名額買多一層樓收租（已計過到壓力測試），諗緊以下兩個方案：
1. 長沙灣/茘枝角區，地鐵站附近，樓齡6-16年私樓，400-500尺，兩房，$800-850萬，做9成按揭，供30年，月供$28000，可月租$18000，第一筆資金約$120萬。
2. 葵芳/葵興區，樓齡36年私樓，地鐵站上蓋，400-500尺，兩房，$600-650萬，做9成，供20年（因樓齡高，最多只可做20年），每月供$28000，可租出$15000，第一筆資金$84萬。
家庭收入：11萬
四大長老家用：$22000
兩人個人洗費：$15000
每月家庭開支：$6000
自住物業：$11000 （月供）
加按$200萬：$8000（每月還）
第二個物業：28000（月供）
第二個物業出租：$15000-17000
月供股票：$16000
每月剩$19000，另銀行有$100萬做後備金，或股市進入便宜區時再入貨。
負債大約入息43%，這個安排是否可以？方案一，二，那一個好呢？
龔成老師︰
你利用這方法，買多一個物業，不是不可，但你要明白這會增加了你的風險度。
首先，財富會較集中在物業，另外，你地的總負債會增加。當然，這不代表不能進行，只要你明白當中風險就得。
方案（2）是較好的。
方案1的物業金額較多，同時總負債的增加較多，風險度較多，加上租金回報率不及方案2的物業。
考慮到你地的背景情況，暫時睇，方案2會較好。
但要留意，你要確認該物業的維修問題不嚴重，如果已經進行了大維修就更好。
------------------------------------------------
Q16455：
Hello, 我有以下問題, 希望伙可解答, 謝戲
拜讀多時, 今天重讀你的出身, 由八千月薪到萬六至2018年坐擁千萬資產, 真的很慚愧。
想當年, 大學畢業數年, 月薪已有兩萬元, 可是至今一貧如洗, 沒錢沒樓。看著樓價愈升愈有, 因此向你請教可以怎樣規劃下半生的財務。
1. 年50歲, 月入接近5萬, 單身
2. 與家人同住, 長遠需要有自己的居所
3. 資產: 2M cash, 20萬港股, 有保險; 沒退休金, 只有MPF
4. 每月可儲2萬
5. 想買樓, 又覺得現時樓價太貴, 供唔起; 買股票, 累積財富, 又擔心經濟差。應買樓買股怎部署?
龔成老師︰
每個人都有佢自己的目標，最緊要做好自己，有心唔怕遲，你設定好自己的理財方向，努力追求就得。
長期而言，香港樓市潛在需求依然大，加上供應不足，因此長遠仍會向上的。
記住我地投資樓市，唔好以「預期」的模式進行，只要你資金足夠，堅守「供得起」原則，而樓市唔太貴，已可以買入。
香港樓現價略貴，投資價值較少，但自住價值仍在，你唔需要擔心買入後樓價的升跌，因為你買入後，影響的是供款。
現時比合理價，依然稍為貴少少。但你唔好因為咁樣乜都唔做，你要開始慢慢睇樓。一旦遇到一些心急業主，或樓市再向下調，令樓價下跌10%左右的話，你已經可以入市。
除了睇樓外，我建議你先用股票幫你做財富增值。現時你可用每月儲到的5成錢去做月供股票，其餘先儲起，用一邊月供一邊儲蓄的策略。選股方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）。
由於現時大市只是合理區較低位置，你現有200萬資金可以先投入一半，用"分注"形式買貨。記住係慢慢入，唔好一次過買晒。
餘下100萬和每月所儲倒的資金，就等大市出現一定程度的下跌，才大力度掃貨，然後長線持有。同時間，若出現合適的物業，也可以動用這筆錢去助你置業。
------------------------------------------------
Q16456：
Halo 龔sir，想問問 我系8.5入左1萬股...現價好5好再溝呢？定還是應該止損離場..希望龔sir可以解答。唔該晒
1萬股2099中國黃金國際
龔成老師︰
中國黃金國際（2099）是中國最大黃金製造商中國黃金（國有企業）的唯一海外上市公司，主要業務為勘探、開發、開採黃金及其他有色金屬和進行相關選礦工序。
睇翻佢過往多年資料，大多數年份都出現虧損，本身負債也偏高。
暫時見唔倒佢有投資價值，建議你沽出，轉至其他優質股。
另外，你要理解清楚一個投資概念。"溝貨"是指「在預設金額以上不斷加注」。如果投資了某股，最初只投資$10萬，因為股價跌，加多$10萬，目的是拉低平均價。
就算這是優質股，仍會加大了投入的金額，仍然會令組合的風險提高。
其實，這是「計劃與沒計劃」的問題。
因為就算是優質股，我地都不能佔組合的比例太多，愈跌愈入，的確可以買到更多優質股，但無可避免地，會令我地的風險度提高。而我地投資，一定會「先想風險，後想回報」。
如果你一開始，設定了買入的金額，到用盡了這金額後，就不要用，就算優質股也是。金字塔式投資法，也要有完成計劃，以及金額的上限。
但一般散戶溝貨，則在預設情況以外，甚至根本無計劃，只是買入後，見跌就入，目的只是「拉低平均價」，這就是錯誤的方法。
------------------------------------------------
Q16457：
龔成老師你好
感謝您抽時間閱讀此信息！
最近經朋友介紹下開始睇你FB認識你，亦打算跟你上堂學習一下知識。
但有個愚蠢嘅問題，想請教你 ～之前聽朋友講買咗隻[email protected]買咗250K股，現在我應該繼續放喺度或忍痛轉其他，佢有機會再上返點點嗎？
另外981@平均價$12，我應該繼續持有或放咗去？
Thank you very much!
Bless you stay happiness .
龔成老師：
首先你要明白，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。
創聯教育金融（2371）業務波動，睇翻過往的財務數據，5年有4年虧損，投資價值當然好低，賣出這股較好。如果你覺得一次過賣出蝕好多，就分幾次賣，但方向點都是賣出的。
至於中芯國際（0981）這企業有發展的，不過現水平就唔算平，因此，不建議太過大注持有，你要睇翻你持股的比例。
------------------------------------------------
Q16458：
老師，請問2588 是否潛力股？以現時航空業務差，算是便宜嗎？ 長線會否有增長力？謝謝
龔成老師：
中銀航空租賃（2588）可說是有風險有質素的股票，業務本質不差，過往生意與盈利都保持理想增長，加上賺錢能力不低，同時企業有獨特性，因此企業正面。
但要留意，佢的業務原理，是利用借貸投資飛機然後放租，由於收到的租金比借貸的利息成本高，因此賺取了中間可觀的利潤。
但如果日後加息，對佢盈利有影響，同時，佢現時的負債不少，這都是風險的來源。
加上航空業對佢點都有影響，這都是風險所在。
整體來說，這股你可以考慮，只要注碼不能過大。現價算是合理，未平。
------------------------------------------------
Q16459：
龔成先生，你好， 本人想買一層五百多萬的樓投資， 現正在一個抉擇想請教一下你， 正在抉擇於太子一個540萬嘅樓盤，單幢式一梯兩伙， 25年樓齡， 實用330呎， 現在有租客正在租住一萬五千元。
還是用呢個價錢買一個嘉湖山莊兩房單位，實用約471呎。 租金估計一萬至萬一。
但由於擔心單幢式保養維修開支大， 嘉湖山莊始終係一個屋苑，勉強叫做有會所，不知道保值能力會唔會高些。
希望你給予一些意見怎樣選擇
另外也考慮一個點無論太子還是嘉湖山莊樓齡都差不多，但係太子的單幢式樓宇嘅resell能力會唔會畀嘉湖山莊差？
龔成老師：
其實各有各好的。
如果從投資收租的角度，太子會較好，始終是市區，同時當區供應不會多，長遠的樓價與租金支持力較強。
當然，你要留意翻C問題，其實25年樓應該不差，但如果該物業的維修問題較多，就要小心。
另外，管理費方面，單幢式一梯兩伙會有較高的管理費，這是扣分位。
從穩健度角度，大型屋苑會較好，但始果講收租及租金潛力，太子樓會較佳。
------------------------------------------------
Q16460：
老師你好，最近開始追讀你嘅fb page 同著作，已拜讀股票勝經同選股勝經，好認同你嘅投資概念，有以下疑問，希望你可以指點一下：
我28 歲，大概有120-150K流動資金，每月大概可儲/ 投資20-22K.。投資做開定期－100K 3個月，同買股票，過往幾年主要偏向買收息藍籌股，現持有以下股票及購入平均價:
1038 - 2000 @ 55.27
5 - 1600 @62.55
66 - 1000 @ 42.93
11 - [email protected]
388 - [email protected]
6823 - [email protected]
2800 - 1000@ 22.65
778 - 3000 @ 9.07
857 - 6000@ 4.56
Q1: 書中提到牛熊期同購入股票嘅時機，我自己覺得依家屬於熊2-3，未到牛1，所以如果價錢跌到合理或便宜價，都仲可以考慮購買優質或潛力股，呢個諗法正確嗎?
Q2: 對於現時持有嘅股票，我自己係覺得佢哋都係優質股同埋都有分開唔同行業，所以風險係可以diversified 到。
股價主要因為社會因素同埋環球經濟拖累而下跌，但係企業本身嘅價值係無變，所以應該係守，而唔需要減持。對於現有portfolio 嘅增持／減持，請問老師你意見係點，如果要增持／減持，咩位屬於合理 ？
Q3: 睇咗好多老師你嘅post 同書中嘅講解，我就希望趁著後生，可以接受多啲風險嘅時候，增持潛力股同現有嘅優質股。請問潛力股應該佔portfolio 大概幾多成?心水嘅1928, 66,1211 同823，請問咩位屬於合理同便宜價?
Q4: 有關投資習慣，過往有做過月供股，不過可能供嘅金額唔大，造成唔少碎股，所以近1-2 年都係1-2 手咁入，請問如果以我依家呢個年紀同puchasing power
目標係30歲前可以儲到1M，呢個係唔係一個理想增加財富嘅方案？以已有流動資金同每月儲蓄來講，應該在分配幾多落股票?
龔成老師：
你現時持有的股票，大致都是有質素的，不過你年輕，唔應該投資太多收息股，應該增加翻增長力方面的比例。
1）其實現世代已比較難掌握牛熊市，因為不確定因素、人為因素較多。現時經濟轉弱，是熊市的狀態，但無人知幾時會轉到牛市，因此，最好的方法，就是持有一定的優質股，長線投資，同時留有一定的現金等機會。
2）除非企業價值改變，或大環境明顯改變，又或買入時處貴水平，否則，一般的優質股仍是可以長線投資的。
3）潛力股去到3-5成都可以，你這幾隻股都有增長力的，但仍可以增加一些更高潛力的。
4）你每月儲到$20000，能否30歲前累積到$100萬，好睇這段時間的股市情況，如果出現中短期下跌，長期向上，就對你最有利。
但這始終存有不確定性，所以你只有保持每月投資，平衡增長就得。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
diversified意思 在 diversified中文-在PTT/IG/網紅社群上服務品牌流行穿搭 的推薦與評價
diversified 中文的意思、翻譯及用法：v. 使…多樣化（diversify的過去分詞）adj. 多樣化的；各種的。英漢詞典提供【diversified】的詳盡中文翻譯、用法、例句等. ... <看更多>