Samsung旗下嘅A系列手機，一直都喺平價同埋中階市場好受歡迎，近日佢哋就推出咗最新嘅入門級 5G 手機 Galaxy A32 5G，就等我今日同大家介紹下！
Galaxy A32 5G 機身使用無縫設計，側面設有指紋解鎖，機底有充電位、3.5mm耳機插頭，值得注意嘅係，機背鏡頭位取消咗以往嘅方形設計，直接將四個鏡頭加補光燈放喺機背上，望落就好似鑲咗落去咁，更加簡約。呢部機採用咗 6.5 吋 HD+ TFT Infinity-V 水滴屏設計，配備聯發科天璣 720 處理器，預載 Android 11 系統。另外，佢嘅卡槽使用三選二設計，支援 5G + 4G 雙卡雙待，或者 5G 加最高一張 1TB 容量嘅 microSD 記憶卡。
鏡頭方面，Galaxy A32 5G 後置四鏡頭包括 4800 萬像素主鏡頭、800 萬像素 123 度超廣角鏡頭、500 萬像素微距鏡頭、同埋 200 萬像素景深鏡頭，前置鏡頭都有 1300 萬像素。以呢個價位嘅 5G 入門機嚟講，鏡頭有咁嘅 spec 都算收貨。
Galaxy A32 5G電池容量有 5,000mAh，支援 15w 有線充電。雖然充電速度上唔算好快，但係佢嘅 5,000mAh 容量夠晒應付全日使用 5G，所以唔駛太擔心。
呢部機香港已經正式發售，6GB RAM 同埋內置 128GB 儲存空間款式，賣緊 HKD$2,698，有炫目紫、炫目黑、炫目藍、炫目白 4 款顏色選擇。對於想平平地，又想買部 Samsung 品牌嘅 5G 手機嘅人嚟講，都係唔錯嘅選擇。
