【 訓住黎搵錢就係絕世筍工？ 】#MrBusiness #絕世筍工 #搵工
閒時打開個 Facebook 或者睇新聞不時都會見到「十大筍工」、「疫情筍工推介」、「終極筍工」等等類似文章。其實筍工定義係咩？唔同人有唔同定義。
前兩日係 pantry 聽到兩個 Intern 講佢地有個 common friend 搵到份筍工，係做 Game tester ，即每日不停打機試 bug 就有3萬入袋。打蛇隨棍上，我就問佢地覺得咩工先叫筍。原來要搵到宜家後生仔所謂「筍工」同中六合彩一樣咁難：第一個係要學到嘢、其次人工高、最好老闆唔多管閒事、之後份工做落又唔悶、公司假期多福利好，Work-life 仲要 balance到 ，最後好似中埋「特別號碼」咁實現埋理想就perfect喇。
世界各地都有所謂的筍工，如有英國公司徵五星酒店試訓人員，測試房間的床褥舒適度，訓一晚就賺逾1萬蚊；美國有一間智能座廁公司招聘「糞便事務副總裁」，應徵者毋須高學歷或工作經驗，每日只需紀錄自己排便狀況，三個月就能穩袋7、8萬。美國太空總署NASA亦曾招募志願者，七十日內在床上躺着，就有約14萬港幣報酬，確實名正言順：訓住黎搵錢。你以為真係筍工在你附近，其實少年，你只係中左佢地公司嘅宣傳技倆。
人人都想搵份筍工，但份工要集齊上述 7 個「號碼」的話，職場打滾過嘅人都知，中到 4 個半字已經要皇恩浩蕩。所以，與其尋覓絕世筍工，不如先腳踏實地工作，有時間可以裝備自己，假如你本身 Marketing 底進修下設計，就多個專業傍身，你個CV又會多樣野寫。越多專長，加上經驗累積，你揀工嘅power就越高，身價高令你變成職場上公司夢寐以求嘅「筍員工」，要叫價就更容易。比起一直諗住「搵筍工」黎得更實際、主動。
小弟以前有個老闆個辦公室會掛住一副對聯：
「發上等願，結中等緣，享下等福；擇高處立，就平處坐，向寬處行。」意思是指，要胸懷遠大抱負，順應人生的際遇，享受平淡的生活；看問題要高瞻遠矚，做事情要腳踏實地，過日子要心態平和。
人長大後，就能明白箇中道理。
