［不自量力誠實影評］
《今晚打喪屍》要判佢係一套垃圾、回水、浪費時間嘅電影，呢個行為太港共，呢套戲有三樣值得入場睇。
1.政治隱喻（我附上呢篇影評分析得不錯（含劇透））不過你唔當佢係政治片睇都無傷大雅。
2.演員好睇，得罪講句反而兩位老演員嘅演出有少少影響咗個整體演出，特別要讚：阿倫、朱康、朱謙@朱凌凌，張繼聰太討好好難唔鍾意睇佢驚喜不斷，白只嘅演出我有少少失望因爲我喜歡呢位演員，今次以穩定姿態完成演出（可能拍住張繼聰俾佢搶晒戲🤣）。
3.新式港cult味原素，話雖新嘢，我本人又喜歡cult片（我都叫識分low同9同cult嘅）我覺得呢part冇令我有太大嘅失望，但以cult片嚟講，我感覺顏色 lighting 方面有種說不出嘅唔夠🤔。
此片有一個位好強烈地令我及身邊觀眾感到格外抽離，我直頭聽到觀眾打呵欠，係雞蛋偷襲之前嘅關於「情」嘅了斷戲，個段開始劇情節奏突然變得太慢，有點可惜，不過後段節奏有被拉返起。
總括而言：
我見到hk movie話佢2.5星真係有少少睇唔過眼，我又唔係打手又冇打手朋友，如果要我評分我俾3.8星，但我本人俾《屍殺列車》只係3.5星，即使佢係港產片幾倍嘅成本，但我都唔覺得佢好睇過《今晚》好多，可觀性我覺得《今晚》背景題材更接近我生活我反而更享受同有更多思考空間俾我填滿，當然兩套嘢無得比較我只係供參考。
今晚值得入場支持打喪屍！
《今晚打喪屍》觀後分享
「寧為玉碎 不作瓦全」
—談觀看CULT片的一堆閃念
（含劇透慎讀，乃個人見解無對錯之分）
—
—
—
如果要我好有深度地解釋到每一忽《今晚打喪屍》嘅情節，我諗我做唔到（唔知編導作者會唔會做到？）。但睇緊套戲嘅時候，總會諗到好多九唔搭八嘅野，不斷嘗試去猜度電影究竟想表達d乜，所以以下文字僅將一些電影設定或者我認為係象徵嘅象徵講出嚟，等大家再諗下。歡迎踩場交流，因為我相信每個人心中都有自己一套《今晚打喪屍》嘅解讀方式，亦係呢套電影珍貴嘅地方。
—
基本象徵：
—
一些基本象徵我唔會多講，例如點解間粵劇社會係西環，點樣「馬照跑，舞照跳」，甚或班地產經紀喪過喪屍等等描寫，呢d野可能搵個中學生睇都可以get到有乜含義，於此不贅。但我想強調嘅係，由第一秒鐘開始，我已經將佢當「政治片」咁睇。
—
三種人：
—
第一樣想講嘅係戲入面嘅角色。其實就只係得三種人：活人、死人、同喪屍。喪屍因為被隻四方雞吹出仙／屍氣迷惑或者比其他喪屍咬咗而變成。對我黎講，佢地就係象徵緊係社會上無左靈魂嘅活死人，病毒由西環開始屍傳人咁擴散開去，佔據左成個社會，反映左多少人為左利益而甘心每日行屍走肉，過住喪屍般嘅生活。
—
而既然比喪屍咬完就可以埋堆，點解隻四方雞仲要用d「飛蛋」去置人於死地？原因就係喪屍病毒雖然勁，但總有人係難d被感染，總有人係有天然嘅抗體（其實天地雙龍都比撳釘華咬過架）。如果收編唔到你，唯一做到嘅，就係殺左你。
—
但點解果班騎尼怪主角會有所謂「抗體」，或咁難受感染呢？我覺得「堅持」呢樣野就係呢套咁散收收嘅電影入面一條最明顯嘅線索。戲入面每個主要角色都有住自己嘅一d堅持，例如張繼聰同白只兩兄弟對自己係十五年來承諾嘅「天地雙龍」身份同佢地所喜歡嘅人有好強嘅堅持；吳家麗對粵劇、家訓、傳統等等好執著；萬子堅持於報恩；外賣仔同王敏奕倔強於愛情等等。呢班人有嘅係一顆唔比自己成為喪屍嘅心，所以搏命走，至少係走住先見步行步，堅持要生存，因為佢地唔願放棄自己嘅核心價值。
—
至於呢三種人同香港政治有咩關係，自己想像下。
—
四方雞同雞蛋：
—
如果你大抵知道上面果三類人係乜，咁雞嘅象徵其實都呼之欲出。究竟係西環嘅乜野令到香港人變曬喪屍，係度互咬呢？打從戲嘅一開始，當隻雞向人噴出仙／屍氣嘅果一刻，我已經認定佢係代表緊中國。隻雞睇落外表天真無耶，好似無乜殺傷力，但做起野上嚟就心狠手辣，吹一啖氣就足以令社會淪陷，人屍互片，你想封住自己唔同外界聯繫，佢就直接飛蛋入屋，將珊姐秒殺。總之，終極目標就係要將所有活人變成喪屍，將有諗法肯堅持嘅人趕盡殺絕。
—
即使四方雞係代表中央，咁d飛蛋又係乜嘅一回事？容許我繼續腦補，蛋即係生命，生命就即係人，呢個電影設定可唔可以演繹為中央對香港執行嘅人口政策呢？每日輸入新移民來港，溝淡香港人嘅成份，然後走嘅走，死嘅走，隨年月過去，「雞蛋」終有一日可以攻陷香港，源源不絕嘅新生命就係中國對於香港最致命嘅武器。
—
拳手：
—
係戲入面，喪屍並唔係無敵嘅，就好似撳釘華就比天地雙龍KO咗，個拳手都可以一掌FIGHT低d死鏟。但電影話比你聽，獨力難支，你係葉問一個打十個都無用，因為包圍你嘅係條街上面成千上萬嘅喪屍，要逃出生天，就算你天生係孤兒都無緊要，唯靠真實的連結。
—
ONE TWO：
—
有無諗過點解牛山龍同呀讓成日都要玩one two？因為「我痛故我在」。無啦啦喪屍圍城，比你都唔信啦，玩刮巴就係驗證真實與虛幻嘅最好手段。而呢樣野恰恰就呼應到近年黎興起嘅一句說話：「現實比小說更離奇」，係每日嘅新聞入面，更荒謬離奇嘅事都成日有，就好似派傳單要恐嚇話掹槍，就好似低民望可以做特首，就好似大台要開BIG BIG CHANNEL咁，只要你一百歲唔死，都會有新聞。
—
負能量儀：
—
有負能量，始有負能量儀。有太多負能量，始有發明負能量儀的需要。香港也許就係一個充斥住負能量嘅都市，好似令人好沮喪。但請唔好唔記得，原來只要打開負能量儀，舊野就會變左做電磁炮，可以橫掃班喪屍，釋放壓抑已久嘅情緒可能唔係壞事，可以變成你生存嘅動力。
—
結局：
—
好多人話睇完套戲話完全唔知睇咗D乜，完全唔知個結局想點，我都好理解大家嘅怨氣。但對我黎講，個結局反而白到將套戲嘅商業味道拉番高左幾個層次。訊息其實好簡單，最後隻四方雞大佬竟然係白只自己，WTF?「點解咁對我，同你無仇無怨」撇除史學，從地緣政治角度去睇，香港係中國嘅一部份是合理不過，但點解偏偏中國要搞散香港，將自己嘅地方搞到烏煙瘴氣呢？
—
「係咪一開始就注定要死？」當成個香港都係喪屍嘅時候，係條渠度走嚟走去又有乜意思？跟住真假白只就猜左幾鋪ONE TWO，假白只狠狠咁刮左牛山龍幾巴，牛山龍話「唔痛」，跟住終於一句大爆發「好撚痛呀」。呢個情節令我諗起一國兩制嘅「五十年不變」。人地大大力BAN埋嚟，我地仲要不斷呃自己話唔痛，其實同我地不斷催眠自己話香港無變到，「馬照跑、舞照跳」有乜分別？與其係咪都會變成喪屍或會死，點解要再去選擇逃避現實，而唔係好似白只咁大叫一聲「我唔GUR你！」？
—
原因就係因為你驚，因為你自己都放棄左自己，記唔記得戲嘅前半部份有幕係講有架VAN仔衝落黎差D撞到人？張繼聰因著信念堅持唔走要變身，但白只就好慌失失咁兩頭望所以變唔到身？就係因為佢驚，連自己一直以黎嘅信仰都堅守唔住，可能佢都覺得自己信嘅野好無稽，咁難怪佢會差D比架車撞死。呢樣我諗或多或少都會涉及「身份認同」嘅討論，今時今日你仲會「荒謬」地信自己可以堅守到「香港人」嘅身份嗎？
—
「寧為玉碎，不作瓦全」，《今晚打喪屍》比我地嘅訊息係，你明知唔夠打，但請你堅持住去打，「就算死，我都唔可以輸」，結果係點又有邊個知呢？隻四方雞之所以係表面上咁恐怖，其實內裡係因為白只自己嘅心魔，當然喪屍係真嘅，隻雞都係真嘅，D雞蛋都係可以殺人嘅。但人一定要過到自己果關，忠貞於自己嘅信念，先開始配去講「打大佬」。
—
套戲咁樣拍法，基本上都反映到成個電影團隊放棄照顧觀眾、放棄市場嘅心，同戲中意思係「堅揪地」互為表裡，非常值得欣賞，我只希望佢地票房唔會碎得咁交關。
—
而有D野你愈驚就愈要去衝，面對中央嘅壓迫，你得一粒玉碎就梗係唔夠打，但如果千千萬萬粒玉碎可以聯起砌成一隻玉扼，將D雞蛋整成雞蛋仔再一野吞曬落肚，或者用煎PAN當佢地網球咁打，甚或煎佢地做荷包蛋，香港可能就有救。
—
好多野都可以去逃避，而且好有用，乜都唔洗煩。但若果你真係真心重視果樣野，你係會選擇堂堂正正地去面對的，就好似白只最後終於鼓起勇氣抬起頭果個凌厲嘅眼神，果個係咪佢死前嘅眼神嚟？但就算最後死左，又如何呢？
—
（一篇影評其實要寫嘅時間真係頗長同相當費心力的，正如呢篇野都過左二千字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
—
今晚打喪屍
Movie Express電影速遞
Cherry Ngan 顏卓靈
張繼聰 Louis Cheung
白只
余兒
王敏奕Venus Wong
KuBrick Lo
其實葉念深d劇情係真既 在 其實葉念深d劇情係真既 - YouTube 的推薦與評價
P.S. 片頭真係唔係IKEA廣告，除非係。 #其實葉念深d劇情係真既#你暪我我暪你#道德倫亡#婚禮#有食唔食罪大惡極#前度#廁所#速 ... From the video description. ... <看更多>