[1230隔夜超短劇評][無綫][不懂撒嬌的女人 第21集]
[讚] 冇嘅。
[彈]
上集尾段大家睇到Saving爆大老闆游生，睇到好高興，大家洗晒版。我都睇得好開心，因為佢幫一眾打工仔出咗啖氣。雖然個劇情冇乜力去推動鬧老闆呢件事發生，但都引起咗一晚嘅強烈回響。
今集未播，我已經諗，嘩咁搞法點收科呢？原來係唔使收嘅，就算Saving打埋落去游生度都得，因為只係Saving自己嘅幻想情節。
我自己就嬲嘅。睇戲睇劇，其中一個觀眾最慘嘅位，就係劇情去到一個高峰時，打算睇吓佢點再推進或者收個靚尾嘅時候，佢話畀你聽個情況其實係幻想出嚟，例如係佢發夢，又或者係有外星人幫手咁，因為個情節去到幾一發不可收拾都得，講一句「幻想出嚟」、「平常人控制唔到理解唔到」就可以完咗佢。
唔係話唔得，但係你要配合返套劇嘛。《紅Van》有外星人得，因為佢係科技懸疑、《志明與春嬌》有外星人得，因為佢擺明係玩嘢、《再生號》講到曉飛都得，因為佢係小說創作。但係呢套係寫實愛情劇，點解要安排呢個情節？對個劇情推進係冇幫助嘅。係就換嚟咗一晚之間嘅熱烈討論，但播完話畀觀眾聽成件事係Saving FF時，好多觀眾都__出聲。尤其係喺第二季即係第15集開始大家覺得劇情愈來愈散亂時、覺得愈來愈唔好睇時，簡直係引火自焚。
有人話，好切合Saving嘅性格呀，因為佢依家為咗份工乜都忍，畀着你喺Saving你都唔會爆游生啦。畀我我梗係唔敢爆啦，但係呢個係電視劇嚟喎，有啲位我就係要睇啲我唔敢做嘅嘢先過癮，之前Saving爆Mall姐，你現實中都唔敢啦，但係呢個情節可以推動個劇情，又可以建立Saving鍾意Cherry。今次無啦啦話想搵份安穩嘅工已經係離題少少，仲要呃我，我接受唔到。
有觀眾已經講到明話希望唔好喺呢個位再差落去，我都希望快啲有起色，因為佢依家係消耗緊之前建立嘅收視。如果再係咁，呢個綜合收視衝到去30點嘅劇就會靚頭爛尾。
講多句，係，Saving本身為咗Cherry乜都可以唔理，但依家為咗份工要同賤Han拍住上，我真係O咗嘴。如果佢係想跣賤Han一鑊我會開心少少，但都唔符合Saving嘅人物性格。套劇開始亂咁嚟。
[演員表]
王浩信 飾 Saving / 袁文傑 飾 游生 / 宣萱 飾 Mall姐 / 唐詩詠 飾 Cherry / 黎諾懿 飾 賤Han
#1230隔夜超短劇評 #無綫 #TVB #王浩信 #袁文傑 #宣萱 #唐詩詠 #黎諾懿 #魏焌皓 #林秀怡 #鄧佩儀 #孫慧雪 #創世紀
創世電視呃人 在 創世電視Creation TV - 首頁| Facebook 的推薦與評價
創世電視 Creation TV 。 12700 個讚· 88 人正在談論這個。「創世電視」播放平台包括: 創世電視(香港)：myTV SUPER602 網絡實時收看: ... <看更多>