他被困在同一天（上）
2016年12月21日，一個平凡嘅日子。
我坐喺咖啡室，一邊飲嘢，一邊寫嘢。
然後，一個男人大剌剌咁坐低，對我微笑：「你好，我叫阿強，你寫緊小說？」
我仲未反應得切，阿強擺擺手：「你寫緊一個關於狗嘅故仔，隻狗叫旺財，佢會俾吸血鬼咬，變成吸血狗，永生不死......」
我望一望手上嘅原稿紙，只係寫到吸血鬼咬狗嗰部份。
「對唔住，我好似嚇親你。」
阿強尷尬一笑：「我自我介紹先，你有無睇過《Groundhog Day》？」
我終於有機會講第一句話：「嗰套電影，講有個人困喺同一日，不斷重覆？」
阿強一拍大腿：「無錯啦，我依加就遇到咁嘅情況，每晚12點，我嘅時間就會被重置為2016年12月21日，永遠困喺呢一日。」
「哦。」我唔知應該點樣反應。
「我知道你一定唔信我。」
阿強望一望錶：「五分鐘後，一個短頭髮著粉紅色衫嘅女仔會行入嚟，佢會叫一杯咖啡，但侍應唔小心倒瀉，整濕佢對鞋。」
我無出聲，靜靜觀察，過咗一陣，真係有個女仔行入嚟，事情嘅發展同阿強所講一模一樣。
雖然有啲驚訝，但我表面上依然保持鎮定，靜靜望住阿強。
「你可能以為，我收買咗個女仔同個侍應啫。唔緊要，反正你都未咁快走。」
阿強再望錶：「仲有半個鐘，恆生指數收市，會報21809.8點。」
阿強加多句：「我應該收買唔到恆指掛。」
我點頭，當係認可咗佢呢個講法，等多陣，睇吓佢葫蘆裡面賣咩藥。
半個鐘後，我打開網上財經：「恒指高開走高，截至收盤，恒指漲0.37%，報21809.8點......」
呢一刻，我先開始相信阿強。
唔通，呢個世界上真係有咁神奇嘅事？
阿強嘆氣：「我無論做啲咩，第二日都係會回復原樣，我咩都做唔到。」
我諗一諗：「你可以用晒啲錢，可以花天酒地，甚至可以借錢唔還......唔駛擔心任何未來。」
「我知道！我仲可以追我見到嘅所有靚女，只要搭訕多幾次，總會搵到啱嘅方法。但係，當一模一樣嘅事重覆一百次一千次，仲有意思咩？」
我答唔到，因為我無試過。
阿強講：「我曾經愛上一個女仔，係日久生情，但佢每日都唔記得我，每日我哋都要從頭嚟過，我好辛苦。」
我問：「之後呢？」
「我有時會好畀心機咁追佢，希望佢喺一日內愛上我，有時我會發脾氣，我仲自殺過幾次，割脈、上吊、跳樓......」阿強答。
我倒抽一口涼氣。
「唔駛驚，無論我做乜嘢，就算死咗，12點都會重置。」阿強苦笑：「死都死唔去。」
我嘆氣：「個女仔依加點？」
阿強指一指短頭髮著粉紅色衫嗰個女仔：「就係佢，不過我今日無去結識佢，所以佢唔識我。」
我都唔知講咩好，我只可以問：「我可以點幫你？」
「你係寫小說嘅，你可唔可以幫我寫低我個故仔擺上網？希望大家睇到，會諗到辦法幫我。」阿強神情懇切。
我點頭：「得，但我唔出名，唔會好多人睇到，未必幫到你。」
「我明啊，我只係咩方法都試吓，反正我......來日方長。」
阿強嘅答案有幾分苦澀：「我試過搵科學家，但我得一日時間，根本去唔到幾遠，有時人哋未覆我，時間就重置咗。」
我都唔知點安慰佢好。
阿強遞張卡片畀我：「呢度有我電話，如果你有咩消息，通知我。」
我有啲猶豫，即使有人諗到辦法幫阿強，都唔會係今日嘅事，阿強永遠困喺今日，我打電話佢都聽唔到。
「你袋住先啦，搵唔到我嘅話，就......算啦。」阿強咁樣講。
下集：http://bit.do/e9a3F
將專頁設定為「搶先看」/ "See first"，最新故仔馬上睇！
呵欠惹的禍：https://goo.gl/mRFC1B
換臉之後：http://bit.do/eJVyT
#短故 #短篇 #小說 #陳美濤 #廣東話 #粵語 #tomatochan #他被困在同一天
恆生指數收市 在 令指數升12點。創科(00669)跌1.3%，為跌幅最大藍籌股 的推薦與評價
恆生指數收市 升166點，國企指數升99點，科技指數升134點，成交1456億元。 昨晚歐美股市微跌，德國跌20點，法國跌18點，英國跌11點。 ... <看更多>