［隨筆］
不要問我從哪裡來
註：睇完電視有感，本身打算打幾十字，點知變咗千字口語嚕囌文，不喜敬請跳過。
睇電視講到亞裔美國人嘅移民歷史，當中嘅掙扎同身分嘅改變，而家用另一個身分黎睇，雖然時間太短仲未真切有咩體驗，但感受已經唔同咗好多。
節目提到有個中國婦女，（又係）靠做洗衣店，養活一家大細，仔女成材，做醫生律師同埋海軍，係一個國家嘅典範人物，結果英文都唔多識句嘅老婦人，國家頒咗個優秀美國人嘅銜頭。嘩，美國真係好聰明，呢個簡直係移民版貞節牌坊，有咗呢個示範單位，話畀所有亞裔移民聽，只要你乖乖地，不要問國家能為你做甚麼，要問問你能為國家做乜，努力讀書同生活，我哋就會加獎你。如果你群埋工會，社會分子之類，就係低等移民。推咗個示範單位出嚟，咁就可以成功叫你班移民做順民，尤其係果個唔公義唔透明嘅年代，有咩事都最好食咗佢，因為你嚟美國，根本就寄人離下，主要為生活比以前好呢個終極目標，點會為果啖氣而強出頭？總之你一定要表現到自己極之認同同積極融入美國主義同價值，努力做美國人，就會少好多麻煩。
以前我都好認同，當去到一個新國家生活，要努力融入當地，最好做到當地人咁，係必然嘅事。但呢一兩年，我開始推翻呢個諗法。因為咁諗實在太理智，理智到違反人情。以前去旅行時，我可以好大大聲話自己係香港人，但以後面對同一個問題，會係一個好複雜嘅答案，因為我好難話自己係澳洲人，但如果我繼續話自己係香港人又好奇怪，畢竟我已經漸漸離脫香港嘅生活。另一方面，係呢度我一樣會睇香港新聞同電視，講廣東話同食茶餐廳，仲有幫襯亞洲超市，你叫我完全淨係食麵包薯仔同飲咖啡，同埋睇埋d無聊到爆嘅當地節目，坦白講要完全融入全新嘅文化真係好難。
更矛盾嘅係，而家香港嘅文化同身分被大力打壓同消磨，愛香港嘅人，會好希望努力保存同強調香港，但最尷尬嘅係，係新地方生活，我仲大力宣揚自己文化同身分，算唔算係不忠誠？到底要點攞到平衡？
好彩年代已經唔同，我唔駛好似以前亞裔移民，摒棄自身背景以獲得認同，不過唔代表唔需要面對呢個窘境，而且作為香港人，呢個問題更為複雜。我之前好天真以為，不如好似猶太人咁，香港就可以不死。但其實，咁會令海外港人生活舉步為艱，違背咗離開初衷，更加對唔住而家身處嘅國家。
寫寫吓，我都唔知點收尾，或者我一路行落去，就會搵到答案卦。我好希望，有日大家互相定義時，唔駛再問你係邊度人，而係以價值觀定義。可惜嘅係，我啱啱先知，原來呢個國家大家最緘默，收得最埋嘅係，正正係自己嘅價值觀，唉。
圖：外地都食到但貴到爆嘅滑蛋叉燒飯
滑蛋叉燒飯英文 在 叉燒炒蛋Scrambled Eggs with BBQ Pork - YouTube 的推薦與評價
HKCooking 第一個video!HKCooking's first video, hope you like it! ... <看更多>