罐頭人生（上）
如果，你可以體驗其他人嘅人生。
如果，一個截然不同嘅人生擺喺你面前，你會唔會想去試一試？
可能富貴，可能貧窮，可能開心，可能悲哀。
一切一切，全部都係未知嘅。
最近，一種叫「人生罐頭」嘅科技產品推出市場。
顧名思義，就係收集咗好多人嘅記憶，擺落罐頭度。
買到罐頭嘅顧客，只要打開罐頭，就會瞬間進入另一個人生，由細到大、由頭到尾咁經歷一次。
過程中，現有嘅記憶會被封印，你會真心以為，自己就係罐頭裡面嗰個人。
直到罐頭人生完結，你嘅思維返到現實，你先會意識到，啱啱嘅事只係黃樑一夢。
但罐頭裡面嘅每一個細節，你都會記得一清二楚，可以隨時回味你嘅罐頭人生。
而現實嘅時間，只係過去咗幾分鐘。
聽落係唔係好正？罐頭初初推出嗰陣，第一輪全部賣晒，仲有人炒賣添。
但第一輪銷售過後，就傳出咗一啲嚴重嘅負評。
「人生罐頭」裡面嘅人生，係喺一啲過咗身嘅人身上，抽取記憶而組成。
換句話講，罐頭嘅人生有好有壞。
有買家開到悲慘人生，七歲死老豆，八歲死老母，顛沛流離，好不容易建立咗家庭，自己又患上重病，老婆走埋佬……仲要捱足十年先死。
呢個罐頭人生完結後，個買家成日諗起罐頭中嘅悲慘，甚至分唔清罐頭同現實。
買家日夜發惡夢，甚至患上抑鬱症，上庭告「人生罐頭」嘅製作商。
雖然法庭未審完呢單案，但呢啲負面消息，已經足以令好多買家卻步。
大家都會諗，我平時嘅生活雖然唔太完美，但都算比上不足，比下有餘。
貿貿然開個「人生罐頭」未必做到富二代，分分鐘帶住淒慘嘅回憶，返去現實。
而且，由於身處罐頭人生嗰陣，係冇現實嘅記憶，所以就算對境況不滿，都只會以為係自己黑仔，唔會諗自殺嗰啲方法去跳出罐頭。
所以，「人生罐頭」銷量大幅下降。
呢個時候，製作商產生咗一個聰明嘅諗法，佢哋決定將「人生罐頭」嘅主要銷售對象，變成長期病患者同老人家。
老人家時日無多，一日比一日衰老，一日比一日接近死亡。
如果佢哋可以體驗另一種人生，可以從頭嚟過，無論新嘅人生係順利定坎坷，相信大部份人都好樂意嘗試。
我都好樂意嘗試啊，我叫陳伯，今年八十歲，已經住入老人院。
嗰陣我睇到「人生罐頭」嘅廣告，我都好想嘗試吓。
可惜我冇錢，連依加住緊嘅老人院，都係政府為貧困老人提供嘅基本保障。
呢樣真係抵讚，隨住人口老化，老人福利都完善咗好多。
本來，每個老人去到七十歲後，就算身無分文、無依無靠，都可以入住政府安排嘅老人院，直到終老。
不過老人嘅數量愈嚟愈多，「七十歲」嘅免費入住年齡，漸漸變成「七十五歲」。
總之，五年前，我終於結束咗執紙皮謀生嘅生活，搬入老人院。
雖然衣食無憂，但我手上冇錢，買唔起「人生罐頭」，只可以望洋興嘆。
但估唔到，過咗幾個月，就聽到一個令人興奮嘅消息。
政府同「人生罐頭」製作商達成協議，所有喺老人院居住嘅老人，不論係收費老人院，定免費老人院，都可以定期獲派罐頭。
計劃嘅目的，係畀老人喺臨終前，嘗試更多唔同嘅人生，等於重獲新生。
我都有聽過「人生罐頭」嘅負面評價，有機會抽到不幸嘅人生嘛。
有邊個唔想做富二代，一世家庭美滿，事事順利？
所以老人院第一次派「人生罐頭」，我拎住個罐頭，手都震埋，心中暗暗祈禱，畀我一個好嘅人生啊！
第一世，我果然係富二代，係一對有錢夫妻嘅獨子，佢哋對我如珠如寶。
下集：https://bit.ly/3fj5Bhs
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #罐頭人生
老人院收費 在 [4] [養老院香港] 老人院收費睇真D - YouTube 的推薦與評價
02:46 https://www.elderlyinfo.swd.gov.hk05:53 比較3間院舍基本 收費 /雜費內容大家好！今日我想和大家分享一下香港 老人院 的 收費 。 香港 老人院 的 收費 ... ... <看更多>