母語的傳承
#上臺語 今仔日紹介 #阿旻 參加全國語言競賽提冠軍的過程，隔轉年換我鼓勵阮母仔參加南投縣初賽，結果得著第二等。
自第一擺徛起去演講臺比賽，是我國校仔一年仔，班導師鼓勵每一个同學莫生份、舉辦念課文比賽，表現好的，就會當得著獎品。當初時，嘛無感覺是比賽，但是一下參加，竟然就開展我的「朗讀、演講人生」，但是攏是華語的比賽為主。
國校仔五年轉學到市區的南投國小，逐个年級有七个班，練習朗讀的競爭者沓沓仔變濟，正式培訓代表學校參加‘’國語朗讀‘’比賽，毋過因為上過頭緊張，頭擺的市賽「跳逝」讀毋著去，排無著等。
但是自國校仔六年開始，政府開始推捒本土語言，開始有鄉土語言競賽，所以戰場就自華語轉到閩南語。猶會記得頭一擺縣賽是記持中，印象上深的經驗。尤其，老爸開車載阮規家伙仔到南投縣埔里鎮看我比賽。彼場比賽，發揮了算袂䆀，得著全縣第二名，南投的地方新聞台【李氏新聞】閣共我的比賽畫面剪做新聞，算是第一擺上電視的經驗。
上國中以後，我差不多是逐个學期攏代表學校參賽，攏總提過兩擺第二名，一擺第三名，有閩南語朗讀、嘛有演講，然後又閣參加英語朗讀。但是就是無一擺全縣的第一名。老師有講：「可能是你拄好聲音咧變，較食虧，毋過有這款成績，已經袂䆀矣！
靠這項專長以及全縣第二等賽的成績，予我用特殊專長加分進入「國立大里高中」。但是高中學校內的比賽拄著跨袂過的關，因為學生囡仔已經毋是攏南投爾爾。台中、彰化、南投優秀的參賽同學攏來囉。第一擺校內比賽，原本以為穩提第一等，但是成績連頭三名攏無！第二年比賽干焦全校第二名，無法度進一步去比縣賽，當然全國賽攏免想，朗讀演講人生就暫時放下。
交通大學咧讀冊的時，參加客家週比賽用客話播新聞，得著「俏客主播第一等」。
做記者、出社會了後，無意間看著台北市圖書館朗讀比賽的消息，彼當時雖然台風受肯定，但是台語的聲調、變調無深入去研究，連前十名都無。第二年，得著全台北市第二等、全國第六等。第三年，台北市第一等，全國嘛是第一等，這个第一等予我等超過２０冬。
過去我咧參加比賽的時陣，阮母仔三不五時會拿我的稿，念咧、讀咧。有一回我就想講，倒不如就鼓勵阿母去參加南投縣閩南語朗讀比賽，阿母自一个對台語文完全無熟悉的人，沓沓仔練習。我先錄予好錄音檔，請阿母綴咧念，有時用LINE語音指導，自按呢逐工練、逐工讀，到會使徛起去台仔頂，氣勢、台風、聲情攏有。比賽，嘛用盡全力去準備。我佮阿母講，有勇氣徛起去台仔頂，就是第一等啊。
母語是阿公阿嬤爸爸媽媽賜予我的養分，這陣我嘛用我佇語言競賽的經驗，交予阮厝裡的人。這个傳承，毋干焦佇厝內，更加是我這陣的身份，#公視台語台 #台灣新眼界 主持人的身份，拚勢推捒台語，就趁現此時！
閩南語朗讀音檔 在 真平語文- Posts 的推薦與評價
資料來源：教育部臺灣閩南語常用詞辭典 (聲音檔是機器人的聲音) ... 「真平語文110年全國語文競賽閩客語朗讀文章」徵求錄音授權說明真平語文基於著作權法，為推動本土 ... ... <看更多>