（轉自網上討論區）
我想寫少少野俾香港人睇。
對象係一直和平理性非暴力表達香港民主訴求既香港人。果Ｄ唔係既唔駛睇，幫我ＳＨＡＲＥ就得。
相信你地今日返工又好做自己野又好，睇到ＣＣＴＶＢ製造既一堆所謂「暴徒使用暴力衝入大肆破壞立法會內部」既畫面，你地又會話今次「佢地真係做得過份左」，又話「今次民意輸晒」，甚至企係政府果邊一齊譴責年青人之類。我諗你地開聲之前，不如捫心自問一下，問自己以下幾個簡單問題：
Ｑ１：你地係香港特區追求左民主，真普選幾多年？ （如果你唔記得，我幫你答。就係２２年。基本法話過有普選，但一直都無比我地，然後去到８３１規定一野俾人大委員會打殘晒所有真普選既希望。結果到今時今日，香港都係無得全民普選兩會同特首。香港既民主發展不單無進展，甚至倒退。） Ｑ２：你地究竟跟民陣行左幾多年，然後和平集會，散會，返去沖涼返工，繼續一邊鬧政府，然後繼續感到無能為力？ （你自己先可以答自己。 ５年？１０年？不過無力感幾多，你自己心知肚明。尤其是你自己如果已經係中產，又有細路，你有幾多錢掟落去下一代叫佢地去讀國際學校，去外國讀書，你自己明白其實香港前途有幾多。有啲野唔駛拗，自己心裡有數。） Ｑ３：係姐，就算真係已經無野可以做，我地都唔應該鼓吹暴力行為。 （講暴力，呢度有兩樣野：
第一／就係我地首先反思咁多年，政府對我地既「暴力」又係乜。立法會同政府咁多年究竟強行想推／推左幾多逆民意既政策同法例？由好早既廿三條好，香港電視發牌又好，高鐵又好，第三條跑道又好，港珠澳橋，新界東北發展，依家中環海濱割讓。。。仲有。鉛水事件有無人被問責，無。沙中線偷工減料，沉降，有無人要負責，無。梁振英ＵＣＬ事件５０００萬，佢有無事，無。。。 第二／更加唔好講６１２警方打記者，打示威者，亂咁開槍打頭，呢Ｄ係實質，活生生既暴力，已經有晒影片同埋證據。ＡＮＹＷＡＹ，希望大家唔好忘記，唔好睇少，政府同立法機關一直俾建制把持既制度暴力，你有無將呢Ｄ考慮在內？你地仲要一直對溫水煮蛙仲要心安理得到幾時呢。） Ｑ４：咁尋日佢地究竟有幾極端暴力？
（尋日既行動，大家見到除左係法律上既「刑毀」之外，拎ＣＡＮＴＥＥＮ野飲自動放低錢；法律圖書館自動ＳＫＩＰ左無搞；歷史文物同商品店無搞。無搶掠，無著一點火，無一個工作人員受傷，甚至見唔到藍絲前日既毆鬥。
我想問一句，如果你地都係追求民主既話，係咪有眼分究竟呢班人係咪真係只係只為一己私利，單為尋求破壞既暴徒？究竟你地所講既「極端暴力」係點樣ＤＥＦＩＮＥ架？） （唔知點解，寫去呢度，我諗起大家鍾意既衛斯理，倪匡，佢係因為係大陸當兵果陣，因為天氣凍，拎左條橋去燒取暖，結果就被共產黨追殺逃亡黎香港。佢係咪都係極端暴力？） （大家既義，究竟係咩？係安於逸樂一成不變既義？如果係咁，當初何必支持公民抗命既雨傘運動？點解大家唔安安份份打一世工就算數？你地對民主既追求，究竟願意付出幾多？） Ｑ５：咁我地都可以血債票償佢地架嘛。。。
（不如你又答番我，你可唔可以話俾我知隨左果班好乖既泛民主派之外，一直以黎，究竟ＤＱ左幾多個立法會議員同參選人？你覺得如果制度內既野盡做完之後都無晒用之後，一班已經對明天失去晒希望既年輕人，想升級又要驚俾香港人唾罵既壓力之下，仲可以有咩可以做？） Ｑ６：最後，不如都係問番最根本問題：大家咩抗爭手法都好，咩「階段勝利」取得左未？
１。林鄭落台未。未。
２。李家超落去未。未。
３。一哥落台未。未。
４。律政司司長呢？未。
５。撤回左送中法未呢？未。
６。成立獨立委員會查警察濫權未？未。
７。釋放左班年輕人唔會ＣＨＡＲＧＥ佢地暴動未。未。
乜都未。你地依家返晒工，又打算重拾舊日既生活。我無辦法去ＪＵＤＧＥ任何人既決定，每個人都有自己既背負。但好明顯你地都仲有工可以返，仲有家庭，仲有樓供。但係依家一班仲讀緊書既年輕人，佢地仲有乜？點解要去到有人自殺想政府讓步？點解要令佢地走向一條被捕就斷送前途既不歸路？
夏日炎炎，邊個唔想歎下冷氣。邊個想係街頭食催淚煙，唔係同男朋友拍下拖，去下旅行，放暑假休息下。過下舒適既生活。
佢地都知道後果。但係佢地都不顧一切，係因為佢地已經ＨＡＶＥ ＮＯＴＨＩＮＧ ＴＯ ＬＯＳＥ。點解佢地會要去到有咁既覺悟？政府係咪要有最大責任？唔係要大家一下子就去理解，但大家係咪應該唔好ＢＬＡＭＥ ＴＨＥ ＶＩＣＴＩＭＳ？點解我地唔可以槍頭一致，繼續將矛頭指向政府呢？
我地呢一代老鬼。點解我地唔嘗試理解，接受。
最後都係引多句，如果一塊玻璃既暴力你睇唔過眼，咁果白白斷送既三條年輕人命叫做乜。不如你答我啦。香港繼續七一遊行，可以一路去到２０４６。但我幾相信，２０４６年都不可能追求到Ｄ乜。
#HongKongFreedom
ＵＣＬ 在 UCL - YouTube 的推薦與評價
UCL (University College London) is consistently ranked among the world's top universities. Our excellence extends across all academic disciplines, ... ... <看更多>