一，有人以 「#百萬求一路」 為牌頭，話邊個可以提出「可行、理性、合法」嘅方法， 解決困局，「尋回昔日香港」，就會將個方案交相關部門參考。
二，嘩，一百萬喎，係咪好吸引呢？唔係話撥冷水，但任何比賽（我當呢個係比賽啦），最重要係咩？就係要先將遊戲規矩講清楚。
三，點評審呢？邊個評審呢？庸俗嘅人，就會比較關注邊個評審。不過呢，真正公道嘅競賽，最好係用客觀標準，游水跑步打麻雀，係唔需要主觀評審話邊個贏，大家一眼睇就知咩叫贏。
四，當然，再公道嘅競賽，都可能要有裁判；裁判嘅職責，唔係判邊個贏，而係判邊個犯規。呢個，就係普通法之下嘅自由競爭精神。
五，「百萬求一路」亦都反映呢個城市嘅膚淺（同埋打工仔嘅敷衍）。我唔懷疑金主係有心嘅，但就係冇細心諗清楚個遊戲規則：「大獎一百萬啦！」淨係諗到個銀碼，其他就交畀打工嘅下屬去處理。
六，打工嘅下屬，當然唔會諗下件事通唔通，老細叫做，就睇下 checklist ；賣報紙廣告，checked；facebook page， checked ⋯⋯ 如是這般，又一場大龍鳳。
七，以下係本少爺 unsolicited 嘅 two cents：解決任何問題之前，必須定義問題。假如將香港目前嘅問題，定義成置業問題，咁咪起多啲樓囉，限購囉，再唔係，賣樓賺錢收100%利得稅囉。大把方法，係咪？
八，香港目前嘅問題，係政治問題偏偏唔可以政治解決；結果經濟、法律甚至其他制度環節，例如文化教育社福，統統為維穩服務。
九，之前都寫過，寫多次，政治就係權力分配嘅過程；而權力，就係強制他人嘅合理性。注意，合理性唔等於合理；合理性就係唔合理都可以講到合理咁解嗟。
十， 所以，大多數嘅政治同政客，都係透過將某種理想合理化，然後奪取權力。你想保護環境咩？當選之後就用權力唔畀人去用飲筒囉。你想人人有樓住咩？當選之後咪平均居住權囉。
十一，又注意，理想同現實之間嘅距離，係實行。無錯，好似呢個「百萬求一路」嘅最大問題，亦係實行。咁，雖然徵文比賽都話評審標準之一，就係要「可行」。咁點證明一件事係「可行」呢？最填鴨式教育嘅方法，就係用外國例子。
十二，外國例子證明可行，香港去做又未必通，因為條件局限唔一樣；反之亦然。所以，一個好嘅實驗設計，甚至乎係「思想實驗（thought experiment），最最最重要係先將條件局限定清楚。
十三，咁香港嘅條件局限係乜？一國兩制？中國夢？又返到去根本：it is all about the definitions。
十四，又係之前寫過，社會現象同理想，有人話係科學，但其實係哲學。科學，講乜嘢為之事實；但社會嘅事實，唔少係「自我實現嘅預言」。哲學，唔止講乜嘢係真，亦都講乜嘢為之善。當然，有人會覺得哲學係轉牛角尖，但其實深入去探討問題本身都係樂趣；而且真係唔需要話好費神，重點係搵掂方法。
十五，「百萬求一路」假如作為一場公關表演，成功嘅，至少本少爺會寫下。我成日講，要 make some noise，去皇后大道中裸跑，一定成功嘅。但係要 make a statement，就唔止係裸跑。
十六，公道講句，「百萬求一路」都有 made a statement 嘅：「錢可以解決嘅問題，就唔係問題。」呢個真係香港嘅核心精神，唔該大家下次講到呢點嘅時候，記得係 #利世民 第一個話你知。
十七，再講多次，我唔係話「百萬求一路」動機唔好，但動機好都要配合執行。就算行禮如儀搞個徵文比賽，講真，都唔係咁做。返去 #十六 嘅香港核心精神論，有錢，都要識得點去發揮最大效果。好多生意人，自己做生意，就明白呢個道理，但一去到做公益，就忽然智商大跌。所以我經常話：「生意人，都係做返生意啦。」
十八，嗱，我知道，一定有人會諗：「利世民，不如你去參加啦。」寫兩千字搏一球大獎，講真，有賺啦；唔攞百萬大獎，搏五萬嘅細獎都唔差喎。就算唔收錢，我有時都日日寫，係咪？
十九，從贏錢嘅角度，估下邊個搞手，佢嘅意識形態係乜，要試下都無妨。不過，我應該唔係唯一識咁諗嘅人。即係話，呢個比賽最最最核心嘅錯誤，就係有啲問題，原來真係唔可以用錢解決。社會嘅問題，哲學嘅問題，有答案嘅人未必為個一百萬去服務你，服務你嘅攞咗個一百萬，又未必有答案。
二十，即係點？即係話，如果搞「百萬求一路」位金主如果有乜主張，可以直接少少。想學呂不韋？秦國呢，係極權國家；一字千金個故事，重點係在於話畀人知，某啲環境下，就算畀你講，畀埋錢你講，你都唔敢講。
廿一，當然，亦唔排除位金主係真心嘅。好似之前所講，解決問題係講方法，唔係講錢；錢可以買方法，但亦唔一定買到，因為都要睇買手有冇鑑賞力。本少爺嘅觀察，「百萬求一路」嘅執行，有少少膚淺咁囉；呢個係香港風土病，我唔怪位金主，甚至有少少同情佢添。
廿二，Tag Ideas for HK ，得閒飲茶，我請。
