間屋成日都火燭（下）
上集：http://bit.do/fkEX9
我問：「有無邊個單位，係從來無火燭過？」
靚女點頭，原來天台有間屋，住咗兩個人，據講幾十年嚟都無火燭過。
我又問：「你有無問去過天台，睇吓佢哋知道啲乜？」
靚女就講，原來佢去過天台，見到個留鬚嘅大叔，想開口問嘢，
但一個凶狠嘅外籍男人衝埋嚟，仲拎住把刀，好似想殺人咁，佢就嚇走咗。
「之後我都上過去幾次，次次都見到個鬼佬，我好驚。」
我都明嘅，佢一個女仔，如果無俾火燒死，反而俾變態佬殺咗，就更加慘。
但依加我哋有兩個壯男，我仲學過吓功夫，完全可以上去搵真相。
我哋拎住掃帚棍，小心翼翼咁上咗天台。
天台，一個男人坐喺藤椅上寫緊嘢。
靚女講：「嗱，呢個就係留鬚大叔。」
大叔聽到聲望過嚟，四目交投，佢個樣好熟面口......我驚叫：「乜嘢留鬚大叔，佢係魯迅！」
靚女同阿武七嘴八舌咁問：「魯迅係寫中文書嗰個？」「魯迅唔係古人咩？」
我答：「教科書上有佢張相㗎。」
呢個時候，一個拎住刀嘅外國人衝埋嚟，咬牙切齒，揮刀就斬向靚女。
我同阿武夾手夾腳，制伏外國人，亦難免受咗少少傷。
魯迅點點頭：「唔錯，沉著、勇猛！」
「你真係魯迅？」我問。
靚女問：「魯迅唔係死咗啦咩？」
魯迅輕描淡寫咁答：「我死咗，你哋都死咗啦。」
我正想反駁，我明明未死，我有份工，我係一個的士司機......我突然記起，一條濕滑嘅公路，一個粗心大意嘅司機。
我當時嘅乘客係，阿武，意外之後，我哋就莫名其妙咁搬咗嚟呢度。
見我哋一臉震驚，魯迅微笑：「睇嚟你哋有印象啦，呢個係死後世界，每個人都死咗。」
阿武問：「點解會有個咁嘅世界？」
魯迅解釋，佢都係死後自動入住呢度，據佢觀察，係仲有在生嘅人記得死者，活人嘅記憶，令死者嘅靈魂留喺度。
阿武又問：「點解我哋唔記得自己死咗？」
「死時靈魂有破損，會失去少少記憶。唔少人接受唔到自己嘅死，直情唔記得自己死咗。」魯迅答。
怪唔知得阿武咁憎我，佢下意識覺得係我害死佢，
但因為生前只係同我有一面之緣，所以佢唔記得點解憎我。
我最關心嘅係：「點解會有人突然俾火燒死？」
靚女若有所思：「如果牽掛你嘅人死咗，或者漸漸忘記你，無咗活人嘅牽掛，我哋就會從呢度消失。」
「所以，嗰啲火......係火葬場嘅火。」我好似明白。
魯迅答：「我初初搬入嚟，消失嘅人都係被土壓到消失，後來漸漸變成火。」
魯迅係超勁嘅文學家，一直有人讀佢嘅作品，所以佢永遠都唔會消失。
「咁永生嘅，咪全部都係文學家、藝術家囉？」
我望一望我壓住嘅外國人，佢一臉凶狠，一直講粗口，真係一啲都唔似藝術家。
魯迅搖搖頭，指住個外國人：「佢叫Henry Lee Lucas，十幾年前搬入嚟。」
Henry Lee Lucas，美國殺人最多、最殘忍嘅連環殺手，至少殺咗三百幾人，佢仲自稱殺咗三千人。
如此惡名昭彰，會永遠留喺犯罪史上，被人唾罵。
阿武一臉不忿：「魯迅咁叻，永遠俾人記得，我服氣啊。但呢個Henry靠住衰格變態，就唔會消失，咁樣公平咩？」
「你以為佢好開心？佢唯一嘅嗜好係殺人，但喺呢度，佢殺唔到任何人，因為所有人都死咗；佢甚至無法自殺，因為陽間仲有人記得佢。」
魯迅微笑：「而我，就可以繼續寫嘢，無嘢會阻止到我。」
Henry望住地下，一言不發。
阿武望住手上嘅傷口：「但佢可以斬傷我喎。」
魯迅答：「係你自己相信『被斬傷』，傷口先會出現，你試吓幻想，佢其實傷唔到你。」
我照做，我嘅傷口居然消失咗，睇嚟我唔駛再驚阿武報復我，佢都傷害唔到我。
魯迅哈哈大笑：「所以佢成日拎住刀走嚟走去，我根本唔驚佢。」
謎底已經解開，但係解決方法......依然係無。
我哋都唔係咩名傳千古嘅人物，可以想像，我哋會逐漸被世界遺忘，然後靈魂燒成灰燼。
阿武垂頭喪氣：「其實真係唔公平，有啲人可以一直存在，我哋就要消失。」
「其實，你未死之前，都有人長命有人短命。」
我拍吓阿武嘅膊頭：「個世界本來就唔公平㗎啦，唔通真係好人長命，壞人短命咩。」
阿武問：「所以呢？你未來有咩打算？」
我細細聲答佢：「我打算追A室個靚女，你點睇？」
阿武目瞪口呆。
呢個世界本來就唔公平，我哋渺小，我哋連自己幾時死都掌握唔到。
有人長命，有人短命；
有人注定精彩，有人一世平凡。
但至少，我哋可以用平凡嘅生命，去搵自己嘅快樂。
－完－
註：概念來自「墨西哥亡靈節」，他們相信，死去的人依然活在群體的記憶和精神中。
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #間屋成日都火燭
