答返大家對於美美做手術嘅問題先...
大家唔駛咁緊張,小朋友同美美有相同徵狀係唔代表一樣都要做手術架。如果情況唔太壞,其實鼻塞同鼻敏感係可以用藥控制,只不過美美係因為實在鼻敏感得太耐而我又冇認真同佢睇過醫生,搞到一發現時已經又中耳炎又腺樣體100%脹大,用藥都已經解決唔到,先至要做手術處理啫。
講返美美呢,其實佢BB時係一個濕疹B,個陣時我就同佢做過測試,知道佢係對塵蟎敏感嘅。當時我仲買晒防塵蟎床品、空氣清新機、吸床機等等.....後來過左一歲,佢嘅濕疹好返晒,醫生已經提左我地,濕疹小朋友通常大咗就變成氣管敏感,再長大就變成鼻敏感。所以佢一夠三歲我就要佢每星期都學游水,一年四季都要游,希望佢強壯啲。大約游到第二年,佢就由一咳就會氣喘要聞氣慢慢變成有咳都唔會喘,游完上水亦由全身狂震加紫色咀唇變到上水仍然紫色咀但唔再震。我見佢身體好咗就慢慢鬆懈咗,開始冇乜再留意塵蟎問題,所以先令佢嘅鼻敏感越嚟越嚴重....
其實每年一到開冷氣季節佢個鼻敏感就會差,但因為我自己由細到大都同佢一樣,成日打乞痴流鼻涕,所以都冇特別處理,只係每次都同佢睇兒科,配下止鼻水藥食咁就算。係到咗今年,一開冷氣佢兩姐弟就狂乞痴狂流鼻水,然後再發覺佢聽嘢有問題至發現啲鼻水令到佢有中耳炎,我先嗱嗱聲大清潔屋企,揾人洗冷氣洗床褥,搬返兩部空氣清新機出嚟用,晚晚用返吸床機吸床,細佬嘅乞痴同鼻水即刻少晒,但家姐就始終太嚴重,一定要用手術去處理。
講返個手術,其實都幾普遍下,我見淨係我身邊識嘅朋友都有唔少仔女係做咗呢個手術,睇大家嘅留言亦都見好多小朋友做過,普遍係四五歲做,最細聽過嘅係兩歲做,所以如果大家都有類似情況而醫生又建議要做手術嘅話係唔駛咁擔心。但要注意係,做完手術後,係一樣要認真處理個鼻敏感問題,要儘量避開致敏源咁先有用。
至於叫我介紹醫生嚟講呢,好老實,我其實都只係跟返朋友揾過嘅醫生嚟睇,同埋都仲未覆診,未知手術後進展如何,所以我唔會特別介紹醫生俾大家,但如果係介紹保險經紀我就介紹毛毛俾大家囉,因為而家做個手術原來係貴咗好多好多呀!
Search