【龔成問答信箱】(Q22241-22260)
Q22241:
請問阿Sir,如果我打算以etf作為投資股票的核心,應該如何決定可以佔的比例?心水的etf有2812,2814,2845
另外,過往一直是打工仔,我想開始一盤生意,有一個意念,請問我可以怎樣在心態、能力、知識等各方面預備/裝備自己?
另外一問,有學做生意的書嗎?
龔成老師︰
你主要可因應自己年紀、風險承受能力和組合平衡性,這3點去做考量。
你所講的3隻都係潛力股,若你係年青人,又有一定投資經驗,可以佔你組合5成。若你係較中年,或投資經驗較淺,就要調低至2-3成。
三星中國龍網(2812)之投資目標為追蹤中證全球中國互聯網指數之表現,基金有長線投資價值。
三星FANG ETF(2814)的投資目標,係追蹤NYSE FANG+指數的表現。是一個美股潛力股基金。
2隻ETF都在偏貴水平,最好月供去儲貨。雖然2隻市場不同,但行業都有關連性,最好加起佔組合3成以內,會較安全。
GX中國電車(2845),這基金的目標是追蹤Solactive中國電動車指數NTR「相關指數」表現緊密相關的投資回報。
持股中最重就係比亞迪A股(002594),以及與中國電動車產業有關的股票,中國因為能源問題,長遠一定要發展電動車,這是大方向,故此股有一定投資價值。
此股現價合理區頂至略貴。無貨可以現時入少少,到有明顯回調才再慢慢加注。
潛力度是有的,但會比較波動,如投資宜慢慢分注,可長線。
如果你本身有其他汽車股,跟ETF加起佔組合比重,同樣要保持3成以內,以免有過度集中性風險。
由一個打工仔,變成生意人,係十分不同。好多工作、管理和風險,現在都要一力承擔。因此,你要有這放面心理準備。
另外,你除了要掌握生意的相關知識。你都要去市場,睇下相關同業,特別係做得出色的同業,佢地係點樣做。
至於創業書本,可以到坊間找找「XXX創業」之類的字眼就得,另外可睇有關猶太人生意經之類的書。但你要緊記,創業係唔易,好多事都係摸石過河,慢慢從經驗中修正。
而且,成功與否,最大關鍵位唔係你能力,而係你能否堅持。加油!
------------------------------------------------
Q22242:
龔成老師,直銷是否一套有效系統,幫助賺錢?
龔成老師︰
「直銷」係一個銷售模式,我地唔可以話佢一定係好,定壞。其實要視乎行業特性,和企業操作能力。
直銷因為不需要中間渠道和有特定銷售場所,從而節省銷貨成本。
但是否一定係有效,我都要睇埋企業、銷售者、產品等因素,唔可以一概而論,說某種銷售模式,就一定係較賺錢。
------------------------------------------------
Q22243:
8603 有必瘦站的影子嗎?
見佢最近做好多大型收購
龔成老師:
亮晴控股(8603)於香港提供醫學美容服務,以「per Face」品牌在銅鑼灣及尖沙咀經營兩間提供非手術醫學美容服務的醫學美容中心。
並在各醫學美容中心的同一商業綜合體內擁有護膚產品零售店舖,及於中環一百貨商場內擁有銷售護膚產品及提供美甲美睫服務的兩個零售及美容專櫃。
佢透過非手術醫學美容服務、傳統美容服務及銷售護膚產品,向客戶提供全方位療程解決方案。
非手術醫學美容服務分為能量儀器療程及微創療程;傳統美容服務包括面部、美甲及美睫服務。
表面上行業不差,但佢過往業務卻一般,第一規模唔算大,第二,生意增長力不強,第三,獨特性不強,第四,盈利波動,近年都有虧損情況。雖然近年有收購發展等因素,但在近年處虧損狀態下,風險較高,投資價值不算高。
------------------------------------------------
Q22244:
龔sir, 我再有問題想請教,現在大陸政府實行反壟斷法,但我們投資者偏向投資壟㫁企業或寡頭壟斷,例如福壽園,我們日後有什麽注意既地方,謝謝🙏
龔成老師:
的確會有一些不確定的風險。
但我地最重要分析,是政府背後所想,是甚麼原因要監管相關行業,是擔心企業太過大間,勢力太大?擔心對消費者不利?擔心有好多中國訊息?擔心影響金融體系?
其實現時較針對的,是科網類公司,原因是這是較新的行業,之前的監管跟本進不上行業的發展,因此,當中企業能夠在較少監管情況下快速發展,而政府這刻會收緊翻監管。
至於一些較傳統的行業,就算是龍頭,例如褔壽園(1448),只要佢的龍頭不會對消費者或一些體系造成影響,中央相對會無咁擔心。
當然,我地無可能完全知道中央點定之後的監管,但我地可以從佢背後的目的著手。
------------------------------------------------
Q22245:
老師,我想請教,45歲沒有子女,有自住屋及一間收租,收入剛到好夠生活開支,壓力不算很太大,手上沒有股票,現在手上沒有股票,見最近股市有回調,想建立一個平衡組合!
醫療 1833或1177
房托 823、778或435
銀行 939、1398或2388
公用 2638、270或02
運輸66或548
汽車 175或1585
(1211想要等回落180蚊左右)
這些都是老師推介過的,因剛開始入市,想先從每個板塊中各選一隻,之後再慢慢入市分散風險,請老師幫忙各選一隻,感謝!
科技股買3067及285可以嗎
龔成老師︰
以你45歲年紀,都有增長的需要,但就要保守少少,以較平穏增長股票為主。
你列出的股票,都係有質素,我會建議你用1177, 0823, 2388, 0270, 0066作為目標。
這些股票,現價都合理,可以分注。但中生(1177)只算合理區頂,入貨時不要太大注。
至於汽車股方面,其實3隻當中,比亞迪(1211)一定係最好,但現價太貴,要回到$180才可小注月供,回到$135才可開始直接入貨。
你可以先投資雅迪控股(1585)或者吉利(0175),但2隻都仲係貴,要等佢回多少少,才好入市。
如果你係睇好新能車,其實我較建議先用GX中國電車(2845)作目標。
這基金的目標是追蹤Solactive中國電動車指數NTR「相關指數」表現緊密相關的投資回報。
持股中最重就係比亞迪A股(002594),以及與中國電動車產業有關的股票,中國因為能源問題,長遠一定要發展電動車,這是大方向,故此股有一定投資價值。
由於近期不少車股被炒起,此股現價略貴。無貨可以現時入少少,到有明顯回調才再慢慢加注。
潛力度是有的,但會比較波動,如投資宜慢慢分注,可長線。
至於科技股,安碩恒生科技(3067)和比亞迪電子(0285)都可以,前者係合理區頂,可小注。後者偏貴,回多1,2成才好考慮。
質素上,2隻都係有,但安碩恒生科技(3067)係一籃子科技股(當中包含0285),較有分散風險能力。
------------------------------------------------
Q22246:
1. 你好,最近有不少財經類專欄 有分享不少人公開表示美股即將迎來大跌市 連富爸爸窮爸爸作者都有。
雖然我冇玩美股 但美股大跌都會影響港股 本來想分注入場 係未應該睇下情況先?
但另一方面 我又覺得他們說的都只係將來有機會 沒有人知道是幾時出現 一直空等 都可能是時間成本
2. 早晨,最近睇緊你既書,有少少不明的地方想問。初階者 可以用市盈率作比較,其中提到行業市盈率 以及預估市盈率
行業市盈率 係要自己計出來的嗎? 要計行業中全部公司的市盈率嗎?
預估未來市盈率 係如何去預估將來的盈利 或者應該問睇咩資料去預估 睇年報中的關於將來的資料 企業應該會盡量寫好的方面吧?
龔成老師︰
1) 我地投資唔應該用"估走勢"架方法去投資,正確方法應該係去理解企業長線質素和前景,再了解佢處於平定貴,之後去進行資金配置。
無人會知聽日或者幾時會大跌市,現時恆指在合理區,你應因應目標企業現時平貴,去定投資策略,而唔係去估。
2) 其實市盈率係其中一個估值方法,這個方法較易和大多數企業都適用。但更理想,係利用不同估值方法,去為企業計出一個較立體的估值,咁就最穏當。
市盈率,就係市價/每股盈利。當市盈率較高,我地一般會應為個股價就係較貴。但至於多少市盈率為之高,無一個標準答案,不同企業和行業,都會有所不同。
你要懂得如何分析一間企業優勢,一個行業發展、特性、財務狀況等,才會有一個較明確的答案。我在股票班都要用數小時解釋,因為這部份係有點複雜。
而預測市盈率,係對一個未來估算。去估計企業未來盈利,來得出一個市盈率數字。由於只係估算,故作參考好了。
------------------------------------------------
Q22247:
龔老師,本人目前23歲,我想分享我人生第一次較大的虧損(雖然只是短期波動),請教老師這決定是否正確,我賣出了部分阿里巴巴。
未賣出它佔我組合約20%,平均買入價為228,是合理頂區。 賣出後佔組合約10%。我賣出我理由是想減少單一科網股 比重,
而且 我對它的質素不了解,帳面虧損上(每手蝕3000左右),因此狠心做此決定,希望老師指點。
龔成老師︰
首先,我地投資一隻股票,必需對佢本身質素、行業、財務狀況等,要有一定程度了解。否則,你係唔應該去投資。
至於我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
阿里巴巴(9988)係有質素,任何股票中短期都會有機會出現波動,只要長線質素不變,你係應該持有。
但你所講,佔組合較多,所以沽少少,這一點係正確。個別企業和行業,不要佔組合15%和30%以上,銀行業更加不要高於組合20%,否則會有過度集中性風險。
但阿里(9988)其實唔算超標好多,其實你唔沽都可以,等新資金去令組合慢慢平衡翻,都係可以。
------------------------------------------------
Q22248:
老師你好,謝謝你耐心回答,想問下 我既組合有冇問題。
我現時29歲 有30萬現金,股票有約51萬
我持有︰
9988@500股 235買入
6618 @500股 149.6買入
6993 @2000股 15.1買入
1177@10000股 7.28買入
1833@300股 98買入
平穩增值方面
1038 @ 1500股 46買入
270 @10000股 12.1買入
823 @500 股 43買入
新經濟股一沉不起,每逢買入都跌,持續半年都冇起色,我都幾擔心,雖然要用時間等待,但我開始冇咩信心,成哥我既組合請你詳細比D意見及30萬現金如何安排好?
龔成老師︰
你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
近期中央不少政策出台,都係針對大型科技企業,令股價受壓係正常。雖然對佢地未來收入,可能有影響,但唔算好嚴重。
你現時持股,都係有質素,你照長線持有就可以。
但係組合配置上,你要留意一點。任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
特別係銀行業,佢營運模式較特別,風險會比一般行業為高。必需堅守30%這個準則,如果可控制在20%以內,會更好。
你現時阿里(9988)和粵海(0270)都有超標情況,但由於佢地都高質,你可以照持有。但未來新資金,就暫時不要投資這2個企業,令佢比重慢慢回復平衡。
------------------------------------------------
Q22249:
龔sir你好,留意了你的page已有一段時間了,發覺你在分析理論上很中肯和有道理。我也買了你的書80萬富翁 和 股票勝經睇。
發覺當中好多活知識在,實在物超所值。當中引述一些名人金句更令我雄心壯志。所以最近都想去實踐財富增值的道路上。
現時我今年生日後30歲,沒有接觸過任何理財知識和方法。之前儲蓄好一筆資金和留意了市場一段時間,最近決定入市股票市場上。
現時我組合如下, 想請教下我這個配搭可以嗎?
如之後仍想增持,應投放資源去那這股份比例上較好? 6626係我研究應為是未來3年內裏俱有爆發潛力的心水股!
TOD概念+大灣區發展, 物管服務業我相信係未來一個不錯的版塊之一,加上這間公司本身這三年的盈利也不差,有持續性增長。我打算長期持有先觀察3年,
這時間內會睇時機再增持。 另外阿sir,我發覺只從入市後,好似對短期股價的波動會神經化敏感左……想問應該如何對抗這種心態上的變化?
另外我本來睇好9868的發展,但始終認為佢現時股價太貴了和波動上落太大了,未來相信會出現市場回調到一個合理水平。
即管我在$166.1時曾入手一手,但也在10%止蝕位上放售了,從而把這筆資金再+一點入手了現價的9988。 望指教一下, thanks you sir。 祝身體健康。
6626@$5.028 x10000
1810@$26.01 x1000
6830@$1.8387 x16000
9988@$195.7 x100
龔成老師︰
只要你唔好停留係散戶思維,覺得投資就係賺差價。明白到投資目的係將只會貶值現金,轉化成資產的過程。
而資產只要有質素,佢係會長線不斷幫你財富升值,所以你其實係無必要因為短線升少少,就去沽出。
你現時持有股票,都係有質素,可長線持有。
除了華眾車載(6830)要留意,佢唔係無質素。但見佢盈利和股價都幾波動,加上佢負債都唔少,質素只算一般,不宜太大注。
另外,你唔好用價格升跌,去決定是否持有一隻股票,咁係好錯。我地買入後,只會視乎佢質素,去決定是否持有。
如果企業有質素,但股價短期下跌,就不用擔心,照持有就可以。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
至於小鵬汽車(9868)有質素。
佢係中國領先的智能電動汽車公司,以領先的軟件、數據及硬件技術為核心,為自動駕駛、智能互連和核心汽車系統帶來創新。
佢於2015年成立,根據數據顯示,可以話係中國唯一一家自主開發包含定位和高精地圖融合、感知算法和傳感器融合及行為規劃、運動規劃和控制的全棧式自動駕駛技術,並在量產汽車上應用該軟件的汽車公司。
佢最新自主研發的自動駕駛系統XPILOT 3.0是目前市場上所售汽車中已採用的最先進的自動駕駛技術之一。
佢於2020年係廣東肇慶工廠開始生產 P7。通過與海馬的承包生產合作在其位於河南省鄭州市的工廠生產G3。肇慶工廠和海馬工廠的年產能分別高達10萬輛及15萬輛。
佢的實體銷售和服務網絡包括約200間門店及數十個服務中心,覆蓋中國幾十個城市。全國共有約200個小鵬品牌超級充電站,覆蓋多個城市。
近年業務增長快述,加上前景正面,這股有長線投資的價值,但現價就唔算平,小注投資都可以的,但預佢股價上落會大少少。
------------------------------------------------
Q22250:
你好龔sir,有以下幾個問題希望你可以指點一下:
我42歲,先生43歲,有兩11 和8歳小朋友,有$1200萬現金,年尾想用BNO Visa 移民英國,有以下幾個問題:
1)係香港買$500樓定英國買樓好?如果係香港買樓,我哋英國就會租樓$16000
2)有冇啲$500萬穩健投資年回報10%介紹?例如收股息,基金,滙率掛鉤…..
萬感謝你的回覆
龔成老師︰
1) 從租金回報率計,香港整體租金回報,係會較英國為弱,即係英國樓一般會係相對較平。
而且,你會係移居當地,在香港留下物業收租,可能會較難打理。因此,我比較建議你係英國置業。
2) 你長線,可以投資以下平穏增長股,拉長計會有年均10%增長,但當然不是保證。
而且,係要長線去拉平均計。你年尾就移民,只有不到半年,由於時間太短,不宜作任何投資,最多做定期好了。
平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)
------------------------------------------------
Q22251:
龔sir, 你好! 小弟今年四十四,未有家室, 近半年開始留意你專欄,覺得你的投資慨念好好,幾個月前開始接觸股票,年青時係月光族無咩儲蓄,
近幾年才積極儲錢,幾個月前開始月供小量股票和直接買入股票,組合有以下幾隻,希望龔sir可以給于一下意見,小弟萬分感激!
股票組合
月供 :0823($1000)、 0939($1000)、0968($2000)
股票: 1686、3067、0293、1310、3339
以上組合是否平均?我希望幾年可以有比較明顯的財務增長,可以五十歲左右有些少資產,最後我想講我報讀左你九月開的投資倍升股課程,到時可以和你見面!
謝謝你!
龔成老師︰
以你44歲年紀,投資上都可以用增值,作為目標。
你現時月供和持股,大致上無問題。但你相增長力高D,你可以將建行(0939),換成指數基金。因為建行係有質素,但只係收息股,增長力唔會明顯。
持股當中,國泰(0293)的質素只是一般。
其中一個風險,是油價,睇翻佢過往多年,油價對佢成本影響好大,令佢盈利十分波動,就算佢利用對沖,都唔係好成功,反而試過因對沖而蝕大錢。
另外,航空業對經濟週期較敏感,收入不穩,同時唔算係一個好賺錢的行業,因此這股的質素只是一般。
就算比佢「捱過這疫情這一關」,你都唔好預佢賺錢能力方面有好大改善。
中國龍工(3339)以企業的質素來計只屬中等,業務波動是風險,因此投資不能大注。但長線基本上可以的。
現時大市只在合理區,每月資金唔好盡用。最好留有部份,等大跌市出現時,可以用來掃貨。
股票班見!
------------------------------------------------
Q22252:
老師,有一理財問題想請教您,我對股票投資一點心得都沒有,但年近退休了,更加唔敢投資。
想請教您對政俯年金睇法,我初步了解,對長者資金唔多,將100萬投資落去,每月取回5千幾,約16年用晒本金,之後每年都有5千幾發放,再申請長者津貼有3千幾,合共8千幾,
直至身故,應該夠每月生活基本開支。請問有另一個投資途徑投資效益更高嗎?
謝謝妳的指導。
龔成老師︰
你計算大致正確,以100萬安老年金加長者津貼,每月大約有8千多現金流,直至身故。
但你要明白,貨幣由於可以無限發行,因此貶值係必然的事。你用今日的物價指數去計,8千多可能足夠你生活,但到若干年後,就未必再足夠。
因此,你要在年金以外,你最好自行累積一筆財富,到退休時換成收息資產,去增高退休後現金流收入。
假設你現時尚在年青至中年階段,你可以選擇一些「平穩增值股」+「潛力股」作投資目標。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,另一半就先儲起架策略。
由於潛力股有一定風險,若你年紀較大或投資經驗較淺。這部份,就不要佔太高比重。
餘下現金就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q22253:
午安龔老師, 我今年已经56歲, 時間飛逝, 好快10年到退休, 冇樓的我只有租, 只希望能增值為退休多增點錢, 想請教:
1. 儲蓄只有50萬, 可以點增值?
2. 每月只能儲8仟, 我知道可以供股, 但银行每月供股不用手續費嗎?
3. 持有股票有#939 (10000), #1398 (5000), #2388 (2000), #1086 (3000), #3988 (5000), #270 (2000), 组合可以嗎?需要調整嗎?
先謝龔老師!
龔成老師︰
1) 以你的年齡,其實已開始為退休做準備,但同時,財富仍有增長力(但不是進取),因此,你可以投資「平穩增值股」+「收息股」。
現時的50萬,暫時只能動用$20-30萬,因為大市唔算平,你要分注投資,同時約留下一半資金。長線投資。
同時,你可以做月供股票,供「平穩增值股」+「收息股」。每月供$4000,餘下$4000就連同其他餘下資金,等大跌市機會。
但就隨著年齡增加,慢慢增加收息股的比例。到退休時,收息股應佔100%。
平穩增值股,例如指數基金、金沙(1928)、長建(1038)、中銀(2388)、港鐵(0066)、恆基(0012)、粵海(0270)、領展(0823)。
同時,可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
2) 有手續費,但若你投資經驗較淺,我建議用月供儲貨,去減少價格波動的風險。
3) 你現時持有股票,大體上都有質素。
當中好孩子(1086)係中國的國際兒童耐用品公司,主要從事嬰兒推車、兒童汽車安全座、嬰兒床、自行車、三輪車及其他兒童耐用品的設計、研發、生產、營銷及銷售業務。
過往業務不過不失,雖然都有生意,但增長力唔強,到近期的業績有轉弱情況,相信對經濟較為敏感,中短期都會較弱。
現價合理的,但就唔好睇得太好,整體投資價值中等,不宜持有太多。
但你持股組合,有個較大問題,就係太集中係銀行股。
任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
特別係銀行業,佢營運模式較特別,風險會比一般行業為高。必需堅守30%這個準則,如果可控制在20%以內,會更好。
但盈富(2800)係不受此限,因為它是一個包含58間優質企業的基金,這些企業來自不同行業。因此,盈富(2800)就算在組合中佔較大比重,都唔會造成過度集中性風險。
因此,你要沽出部份銀行股,換至其他優質股上,去平衡這個風險。
------------------------------------------------
Q22254:
你好,龔成老師。我40歲, 太太33歲,跟太太月入5萬,有270萬的樓宇貸款,每月供樓, 儲蓄後預留1萬投資,另有現金50多萬。現持有以下股票:
2, 500股 @ 77.25
3, 2152股 @ 12.58
5, 400股 @ 49.33
12, 1000股 @ 34.22
66, 500股 @ 43.51
388, 100股 @ 466.57
823, 200股 @ 73.74
1810, 400股 @ 24.81
2800, 1000股 @ 28.47
2845, 100股 @ 122.01
3067, 1300股 @ 16.50
3690, 100股 @ 293.63
3988, 20000股 @ 3.30
6666, 2500股 @ 10.74
以下問題想向你請教:
1)打算每隔3,4月個買入幾隻潛力股 (2800, 3067, 6666),做到月供嘅效果, 咁樣可以嗎?
2)以上組合是否太分散?如果再買入晤同潛力股(1211, 1448, 9988)可以嗎?
3)你對於這個組合有意見可再給我嗎? 謝謝你解答。
龔成老師︰
1) 只要你係不理當時價格,定時定額咁去儲貨,都可以做到月供的效果。
你現時想買入股票,都係可以。盈富(2800)和恒大物業(6666)係平穏增長型,而安碩恒生科技(3067)係潛力股,都適合你。
2) 你組合明顯係太散,長線最好集中係10隻左右,會較易打理。潛力股(1211, 1448, 9988)都有投資價值。
但比亞迪(1211)現價偏貴,最好回到$180才考慮小注月供,直接買要等到$135左右。
另外,潛力股雖然有增長潛力,同時風險都較高,不宜持有過多。
以你40歲年紀,潛力股可佔約4成,餘下應用以下平穏增長股。若你投資經驗較淺,潛力股比重,要再調至2成以下。到你學到一定投資知識,才慢慢調高。
其餘部份,你應集中係一些平穏增長股部份,組合才算得上平衡。
平穏增長股:指數基金、金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
3) 美團(3690)波動性較大,不宜佔比重過高。
------------------------------------------------
Q22255:
老師,請問如果我想3年後買樓,呢3年我預計每月最少儲2萬,其實呢3年時間係咪唔應該攞錢去投資,而係儲現金呢?
龔成老師︰
其實3年唔算長,但用投資優質股增值,都係可以,但選股上要保守少少,集中翻係波動性無咁大的"平穏增長股"類,會較合適。
你每月先用5成儲蓄,即$10000做月供。其餘先儲起,用一邊月供一邊儲蓄的策略。
月供方面,你可以選擇投資在平穏增長股。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨。
雖然平穏增長股,波動性係無咁大,但畢竟3年都稱唔上長時間,始終會有D波動性風險,你要明白這一點。
------------------------------------------------
Q22256:
Hello龔成老師你好,本人現50歲,和太太兩人在去年都放棄朝九晚五,現金大約有$500萬,準備預留其中$100做一點小生意。每月供樓年花費大約$5萬。現在持有的股票有:
1. 粵海投資 270,2000股,$11.3入
2. 騰訊控股 700,500股,$580入
3. 中國鐵塔788,20000股,$1.07入
4. 中升控股881,1000股,$61.6入
5. 安徽海螺914,1000毆,$42.77入
6. 中國移動941,500股, $48.4入
7. 信義光能968,2000股,$10.22入
8. 香港寬頻1310,2000股,$10.2入
9. 山東黃金1787,1000股,$16.22入
10. 金界控股3918,2000股,$7.97入
11. 中國海洋石油883,4000股,$8.97入
12. 中國平安2318,8000股,平均$78入
13. 安碩 3067,2600股,平均$16.7入
14. 港鐵66,500股,$43.45入
我想請教老師:
1./ 以上組合潛力股比例是否太少?組合是否夠平均?我希望投入更多資源在增長力高的股票如平穩增長股,老師你有什麼提議?
2./ 我見大市在這段時間上上落落,以上的股票大約由上年年尾開始,已經逐少買入,在這種情況底下,你建議我應該在這段時間買入什麼類型的股票比較穩陣?預留大約多少再進一步買入?
3. 我也開始留意美股,老師你認為例如TSM, AMD或TSLA在這段時間入貨可行嗎?
謝謝老師你能解答。
龔成老師︰
1) 你們年紀,應該係是時候為退休作準備,投資不可以太進取。潛力股可持有(0700, 0788, 0968, 3918, 3067),但由於佢風險較高,只宜佔組合最多2成。
另外,個別企業和行業,不要佔組合15%和30%以上,銀行業更加不要高於組合20%,否則會有過度集中性風險。
你現時騰訊(0700)和平安(2318)佔比較重,同埋潛力股都有少少多。但這些股票都有質素,你可以照持有。
但新資金就暫時避開這些股票,先集中在一些平穏增長股,令組合平衡翻先。
平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)
山東黃金(1787)主要於中國從事黃金採礦及加工,以及銷售黃金產品。
資源本身有一定的價值,但盈利始終受國際黃金價格影響,本質上會較為被動,無乜價格自主能力,同時產品無差異性,是典型的商品企業。這類企業都有一定的投資價值,但就不會太高。
2) 以你現時情況,你應集中加入一些平穏增長股。
但由於你現時係做生意,收入開頭未必會太穏定。那500萬除了扣起100萬營運資金外,都要再額外留起半年生活費,以備不時之需。
現時大市在合理區,你現有資金,可以多投資50-100萬,去分注慢慢買入平穏增長股。餘下資金,我地就等大跌市機會,才出手入貨。
3) 台積電(TSM)、Advanced Micro Devices,Inc.(AMD)、Tesla現價都唔平,最多只宜小注,或月供儲貨。
而且,這些都係潛力股類,股價上落會較大。緊記這類股票,只宜佔你組合2成。
------------------------------------------------
Q22257:
呀sir 你好 請教一下。如有我有$6M 應該點樣部署?對股票唔太識,有睇開你Page.
6M要還,一年還1.2M
會唔會放曬去 收息股比較好?
龔成老師︰
由於你這些資金,係惜貸得來,而且借用年期都唔算長。我會建議將資金分成3部份,去作增值。
第一部份,係做定期,因為就算再優質股票,中短期都難保會有波動。因為1年內要還款部份,最多只可宜作定期。
其餘部份,你可以投資一些「平穩增值股」+「收息股」。
若你投資經驗較多,或者風險承受能力較強,可以較集中係「平穩增值股」。相反,你應較集中「收息股」,甚至100%用「收息股」,咁會較好。
現時大市只在合理區,你可以分注買入以下股票。但由於大市未算平,資金唔好盡用。最好留有部份,等大跌市出現時,可以用來掃貨。
同時,可以除投資平穩增長股外,同時可建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
------------------------------------------------
Q22258:
老師您好,想問下1919如果睇法。我7/7當日16.86入左3手,今日下跌到13.82,請問應否繼續持有?
或是止蝕離場?請老師指教
龔成老師︰
首先,一定要了解股價下跌的原因,基本上,股價中短期上落好正常,但如果上落太大,就要了解翻當中的事情,有無一些影響企業核心的因素。
中遠海控(1919)主要從事提供集裝箱航運、集裝箱碼頭管理與經營服務。
整體的質素算是不過不失,雖然在行業有一定的規模與優勢,但行業整體的賺錢能力無過往咁強。
經濟好轉會對佢有利,因為始終是對經濟較敏感的行業,現時的股價已反映相關利好因素。股價大升後,其後之後較難有高增長,因為已反映了利好因素,反而預佢之後轉為平穩增長。
此股都算有投資價值,但會較波動。你出現帳面虧損,主要係因為買得貴,現時回調,都只係回到較合理水平。但現價計,依然係略貴,回1、2成會合理翻d。
若你持貨不多,可以守。但若持貨較多,建議沽少少,去平衡下個風險。
另外,如果你不懂估值,去分析股票平貴。未來再投資時,建議用分注或月供策略,去減低買貴貨風險。
------------------------------------------------
Q22259:
你好 老師。我今年26歲女 ,想你幫忙審視股票組合!
背景 total本金 :$138000 現值 : $164000
買入價
285 500股 15.86
1177 6000股 7.45
1810 2400股 22.60
3601 2000股 8.7
3067 1300股 16.3
問題1 想問下持有股票有無太大問題 ,3601還可以持有嗎?我想等佢反彈先買出,可行嗎?
問題2 3067算係潛力股嗎,因為見佢都有多不同組合 風險係咪無相對其他潛力股大?
問題3 心水想入價 有1830,2845,1448,2318 知道自己現時潛力股較多 想儲多d現金入翻平穩增長股 現時組合照持有定係需賣出?
最後好想多謝你教識我長期持有,令到我現時有少少少回報,雖然我唔叻但係已經好開心 會繼續長期持有 等待更多的回報 多謝你!辛苦了!
龔成老師︰
1) 你現有持股,大致上都大質素。
魯大師(3601)係中國的個人電腦及智能手機硬件和系統評測及監控解決方案供應商。
睇翻佢業務,佢主要為用戶免費提供檢測及優化個人電腦及移動設備性能的工具軟件。集團的產品包括魯大師軟件個人電腦版、魯大師軟件移動設備版、手機模擬大
師、Dual Space、AImark、Easy Clean及360省電王。
佢透過免費提供工具軟件累積用戶基礎,並自線上流量變現(包括線上廣告服務及線上遊戲業務)及電子設備銷售賺取收入。
業務發展不差的,但規模不大,獨特性未算好強,要注意相關風險,要控制注碼。現貨可持有,但不要再加注。
另外,你而家組合全部都係潛力股,佢地雖然有增長潛力,同時風險都較高,不宜持有過多。
你算年青,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。
未來時間,你就要加大翻平穏增長股部份,令組合更平衡。這些股票現價合理,可以分注。
平穏增長股:指數基金、金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
2) 安碩恒生科技(3067)係潛力股,有長線投資價值。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。
所以有長線持有價值。由於基金有30隻股票,比起單一股票,風險能減低。這基金上落較大,現價大約在合理區頂,因此,這刻不能大注投資。
最好的策略,就是月供,或自行分注小注慢慢收貨(例如每月買一次、或2個月買一次),總之慢慢入,不能用盡現金,原理如同不斷儲貨,這樣就能平均買入價,減少風險。然後就長線持有。
3) 4隻股票中,除了平安(2318)係平穏增長股外,其餘都係潛力股。建議你先加大平穏增長(但現有持貨不用沽),令組合較平衡,才再加入其他潛力股。
若你真係好想入D福壽園(1448)和GX中國電車(2845),佢地現價只在合理區頂至略貴,只宜好小注。
而完美醫療(1830)係貴,你要等佢有明顯回調,才好考慮。
我的資訊可以幫到你就好,但緊記相做好投資,係要保持學習。你還很年輕,要努力增進知識,和把握年輕優勢做好財富增值,去令自己早日財務自由。
------------------------------------------------
Q22260:
阿sir, 早晨. 有些問題請教下代建行業是否有前景, 其性質是否係幫地產商或政府起樓. 在港股中就只有兩隻代建股.
其中9979綠城管理控股的質素如何. PE18左右合理嗎? 謝謝
龔成老師︰
代建行業都有投資價值,背後若有較大型母企支持,會較具優勢。但整個房地產業,我自已會較睇好物管部份,好似雅生活服務(3319)這類大型物管企業。
綠城管理控股(9979)在2020年7月由綠成中國(3900)分拆上市,在內地透過與業務夥伴合作為商業項目及政府項目提供代建服務。
此股都有質素,但規模不大會略扣分。但整體而言,有投資價值。現價都算合理的。
PE18的話,算係合理區頂部至略貴。在這水平,若無貨都可以小注。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
三星 遊戲優化服務 在 龔成 Facebook 的最佳解答
【龔成問答信箱】(Q21841-Q21860)
Q21841:
老師,你好。我今年48歲,有家庭,現持有以下股票 :
941 @49.25 4,000 股
883 @8.88 20,000 股
3067 @17.01 3,000股
尚可動用入市現金大約10萬。
希望資產增值外,希望10-15 年後,依靠股息每年大約110K過生活,我計算過股票要有大約6里,但本金要2百萬!由於年齡不小,不可能太進取去買高風險潛力股,請問有何建議?
另現持有的883 想在收股息後(6-7月), 如果能回到買入價就換馬,請問是否合適或繼續持有?
謝謝,你真的改變了我的想法。
龔成老師︰
你那個200萬的估算,係正確。以你48歲計,增值時我地開始要保守一點。
你現時股票都有質素,都適合你。中海油(0883)由於只係商品類股票,質素唔算好高。
所以,不宜持有太多。你可以沽出部份,換至其他股票。由於收息後,會除淨(股價會被扣除派息部份),所以你在收息前後沽貨,係無實質上不同,唔會因為咁樣令你多左或少左錢。
另外,你現時股票的組合,雖然都是質素不差股票。但組合內只有3隻股,明顯數量不足,出現集中風險的機會頗高。
雖然3067係恆生科技指數ETF,係一籃子的科技股,但都只屬於單一行業,都有一定集中度,不要佔比重超過30%。
往後若有新資金,宜多增持其他不同類型股票。
以下「平穏增長股」 + 「潛力股」都適合你,你可以參考下。但由於潛力股,係有一定風險。你不宜持有太多,大約3成好了。
隨著年齡增長,潛力股比重要慢慢下降。到你退休前5年,開始慢慢加入一些收息股,到退休時,組合應以收息股為主。
大市現處於合理水平,10萬資金,你就留待大跌市機會出現,才大力度掃貨,並長線投資。
我假設投資回報有10%(連股息再投資),你投資35萬(持股+10萬現金),15年後大約會增值至145萬。
如要做到200萬目標,最好投資金額達至最少50萬,才會較大機會成功。
------------------------------------------------
Q21842:
龔成老師,想請教一下手頭上有二百萬現,原本希望買入七百幾萬單位同老婆住,但因為計過數
唔夠俾印花稅同裝修,而且壓力測試都好緊下,又會清哂袋,所以想再儲下錢先再進行置業計劃,咁應該點處理手頭上二百萬現金先唔會貶值?
同埋政治因素下,你覺得應唔應該轉儲外幣?又或者投資美股rather than港股?
龔成老師:
買樓的重要原則「供得起」,這個因素是最重要的,反而之後的樓價升跌並不是最核心,如果你按揭等因素真的較勉強,就停一停先,等你有更多資金,又或調整買入的目標樓價。
現時要先清楚一個問題,你地最新的目標,打算1、2年買樓,還是3年後先會買樓。
如果中短期,即1、2年會置業,資金就不建議投資,宜大部分資金持有現金,最多小部分投資收息股,又或者真的見到大跌市時,動用小部分資金去入市,投資平穩增長股。
相反,如果你打算3年後先買樓,就可理解為有較多時間進行投資增值,你可以投資平穩增長股,作為配置。
當然,$200萬不能用盡,可能只動用$100萬或以下。
至於外幣,其實投資價值不算高。
另外,美股港股,其實都有投資價值的,在長遠,中國、美國,都會是全球最大的兩個經濟體,投資這兩個市場,其實長遠都會有不差的回報。
------------------------------------------------
Q21843:
老師,之前睇左你講世界觀條片,好認同呢個世界係有好多勁人叻人,其實香港地好多憎人富貴厭人貧嘅人,見到人地成功就搵理由去批評別人,好彩或靠屋企之類
但就唔會去欣賞或好奇人地點解會做到,永遠抱住負面嘅思維去睇事情
唔係晒命,純分享!
以我為例,我30歲同時間結婚買樓,當時身邊D朋友知道後個個都只是抱住羨慕嘅心態去講你就好啦,買到樓,有D就話屋企人俾左幾多你先?
但係我話我冇父幹,只係靠自己做野儲錢,儲到錢就投資股票,一步步去達成個目標,佢哋聽後個個都話我都想咁之類,但4年幾過後,佢哋依然係得過想字!
完全冇為佢哋想嘅嘢去努力過,仲係抱住個心態係香港地係咁架啦,物價咁貴,又多使費點儲錢吖,D樓價點買得起,都唔係俾香港人買架啦,心態永遠就係咁諗,甘於現狀!
3年前我自己開咗鋪頭,佢哋又係同一口吻,你就好做老闆,我都想,但都係冇行動
我想講D野唔會免費跌落嚟俾你,最緊要係肯去踏出第一步
喺香港買樓,網友就會話on居先接火棒,做成世樓奴,樓價跌唔好喊,但佢哋冇想到長遠層樓會令到資產升值,增加財富
供樓會供滿,但租樓就真係永無止境
另外,老師,小米可以再入貨嗎?
龔成老師︰
十分認同你的講法!
其實世界好多,只要你願意走出去,你會發現無限可能。最重要,係你願唔願意行出第一步。
正如你所講,的確好多人都係停留左係「想」個一步,之後就無再前進。
所以,我先希望更多朋友,可以放開自己固有想法,對世界了解多D、學習多D、行動多D,從而改變現有生活。
希望你可以用你成功例子,去感染你的朋友,令佢地作出改變。
不過,有d人真的唔會改變,我地做好自己就得,同佢講左,聽就聽,盡力啦!
至於小米(1810)有潛力的,佢的產品性價比高,相信在全球好多個國家都會有市場,佢長遠只會進一步增長。
同時,佢建立的平台是佢長遠的增長動力,先賣手機,再利用手機的平台延伸銷售小米家電。長遠正面的。
這股可長線,現價合理區頂位至略貴,小注分注可以,但唔好入得太急,預佢股價仍波動。回多10%更有投資值博率。
------------------------------------------------
Q21844:
成哥,剛上完你堂,按你方法投資,第一次見到自己回報去到5位數字,尤其係 968,開心既再唔係戶口既數字。
而係用自己分析、堅持同時間換取到個回報,個種感覺好似見到自己個仔女長大咁(雖然我仲後生)我希望自己內心唔好澎脹,
可以好似你咁,對住任何波動同誘因,都一直貫徹自己投資既理念。
龔成老師︰
你方向已正確,之後要多溫書,多用評估表,多分析企業年報。保持知識與財富增值!
只要你記住,我地投資就係將一些貶值的現金,換成優質資產的動作。
只要個資產係優質,佢長線自然會自行升值。至於可唔可以抵住任何波動同誘因,就要你慢慢去磨練。
但你只要記住你而家係儲資產,唔係做短炒。同埋,世界上最有錢架投資人,巴菲特都係用長線投資優質股去致富,你就應該唔會咁易衝動。
再抵受唔住,最簡單就係唔去睇個股價,自然就會無問題。
------------------------------------------------
Q21845:
其實阿sir我想講,用手機打我都寫到一舊舊。
我地兩個都係公屋出生,我爸媽甚至係理財不善果類,以為脫離唔到貧窮。我地身邊啲朋友結婚一係跟父母住,
一係爸媽比首期買樓(我家姐係覺得父母係應該資助後生買熡)甚至有不少係父母有多一層樓,可以比佢地直接結婚住。所以我自己到談婚論嫁嘅年紀,
見到啲朋友咁,自己都鼻子一酸,尤其我地兩個果時都係上完阿sir你堂一年之內,未累積/見到自己嘅資產有顯著上升,果時樓價/租價依然好強硬。有時甚至喊咗幾次。
不過我地睇過晒你嘅好多書,獲得資產累積/買樓唔一定要靠父幹,自己兩個人可以憑自己努力可以去到買樓嘅地步。呢個鼓舞咗我自己好多。
亦都唔想再自怨自艾,自己努力去建立資產。有時放工都會返第二份工,早啲儲早啲投資(依家睇當然覺得只出賣時間勞力工作唔係咁好)。
然後要多謝你,因為唔係上咗你堂,我同佢拗股票投資一定拗到無結論。果時佢覺得假設優質股,要返返去買入價先會再買(例如果時港鐵$4x , 佢會想$33再來先會入貨,
基本上機會比較微,亦都唔係咁計平貴。)所以大家一齊上堂,都可以大家做唔同嘅功課去交流,有時甚至係佢教返我轉頭。
到依家我地都唔係算有乜成就,但起碼真係可以自立,建立唔同類型資產,唔使靠父母,甚至可以諗遠少少點樣獲得理想生活。
你果時上堂講dream house 我好明白果種感覺。
呢幾年嘅心路歷程,實在無辦法只用簡體多謝你三個字表達
龔成老師︰
其實出生如何不重要,最重要係你自己點去看待你架人生目標。
只要你係想,就要努力去找方法達成。香港樓價係貴,但係不至於伸手不能觸及。只要你肯付出、肯學習、肯去實行,總會行得到目的地。
相信這幾年,你已經有不少體會。
你可以好似我咁,如果發現自己無動力,就睇下自己架DREAM HOUSE,再重新起步。
睇緊投資係一個長線的計劃,除左選擇合適股票,長線持有外。你都要保持學習,才會有理想的投資效果。
加油!你現時行在正確的大方向,只要不斷進步就得!我期待你同我講更多好消息!
------------------------------------------------
Q21846:
龔成老師,我們夫婦二人50歲,月入10萬,冇子女,已自置物業,已為退休做準備(有年金及退休基金),並月供股票1.2萬。
面對美國不斷的量化寬鬆,全球勢必大通脹,應如何讓資產保值? 手上仍有百多萬現金,應如何投資?
有人建議購買黃金,有人建議買樓,有人建議買優質股票,我沒有相關知識,所以想向老師諮詢意見。謝謝!
龔成老師︰
由於貨幣可以無限量印發,故長線必然出現貶值的情況。因此,我地做財富增值時,會集中係真正優質資產身上,好似物業、優質股、車位等等。
以你現時情況,財富中已有物業類,再增持物業的話,會令成個財富組合,偏向左係物業類個邊,不太理想。個別資產類別,最好控制在8成以內,能控制在6成以內,會更好。
而黃金,主要係用來對沖突發性金融事件,唔需要持有太多,大約佔組合3%左右,就可以,最好係用實金模式去持有。
現時你們50歲,係時候為退休開始準備。你持有年金和退休基金係可以,但這些都係以增供穏定現流為主,增長能力好弱。
係成個財富增值策略,係應先做好增值,到退休時,才將增值得來的資產,才慢慢換成收息資產,去創造穏定現金流,去支付退休生活。
因此,我建議你月供股票和100萬資金,用來進行適度增值,咁會較好。
現時的$100萬,暫時只能動用最多一半,因為大市唔算平,你要分注投資,同時留下一半資金。長線投資。
月供部份,同樣不宜盡用資金,每月留下一半會較好。等出現大跌市時,才出手掃平貨。
你可以用「平穩增值股」+「收息股」作為投資目標,現時大約各佔一半。隨著年齡增加,慢慢增加收息股的比例。到退休時,收息股應佔100%。
------------------------------------------------
Q21847:
你好 龔sir打擾了, 我相信你一日之中都可以收到唔多這種inbox 但都希望你能有時間抽空回應…
我一直對“投資”對我而言 是另外一個世界的事。主要因為都係年紀和資金問題; 我係個單親媽媽 已4x了 咬緊牙關送咗阿仔去加拿大幾年,這裡環境都係好適合俾青少年再發展
阿仔一年洗費大概hkd40萬 明年要入u 如果佢突然成材可能讀埋個 master我要供樓加一些貸款 一個月這部份要 hkd25000 ; 我自己有間公司 但還在努力經營中 每月收入可以說是hkd50-60k
但有時唔夠,而阿仔的學費基本我是用部份自己積蓄+銀行貸款; 有感需要在3年內想要能有大概2球這樣的金額 我須要有多少的本金和投資何種組合較為適合呢?
我正在拜讀你之前的二本書(50優質股+80後百富翁)也打算報讀你的初級班 希望能收到你的回應 多謝晒 !
龔成老師︰
首先,你要明白一點,投資優質股,就等同投資一間企業。
你永遠要記住,買股票,就是買入一盤生意,你要用這個角度去分析。就算再優質的企業,都要時間增長,所以投資係長線的一件事。你自己有做生意,相信你明白我這句說話意思。
因此,你唔好預期投資,可以提高你短期收入,這是不可能。但長線只要你有計劃地進行,係可以有個不錯的效果。
現時你有部份開支,是要用積蓄和銀行貨款來支持,這是一個不理想的狀態。因為,你現在每月是負現金流。而且貸款利息(若係較高息貸款),會進一步侵蝕你的收入﹐令負現金流情況惡化。
如果你貨款息率較高,你就要先處理好。之後,再想方法做到收支平衡之餘,要有一定閒錢,我地才考慮開始投資增值。
另外,由於你本身有生意,其實一盤生意營運得好,增值潛力係會比投資優質股大。所以,你資金應優先預留給生意上發展,咁會較理想。
到有餘力時,你再加入優質股和物業等資產。目的係令你成個財富組合,更加平衡,唔會所有增益都靠晒盤生活,咁就可以了。
以你年紀,若你想投資股票,可選一些平穏增長股。但以你現況,唔需要急住投資股票,建議你先處理好收支平衡問題和自己生意,才開始實行投資計劃,會較好。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)。
另外,我建議你鼓勵你兒子,自己去賺部分生活費,這可以幫助佢成長,有時太多安排不一定是好,要佢獨立及有更大成長,有時就要逼下佢。
除了對你的財政較好外,同時對佢成長都較好,你要從長方向去著想。
------------------------------------------------
Q21848:
hello老師,想請教/交流下~
1. 我本身630蚊有700一注,最近出左業績,想問下佢遊戲業務基本上己經冇太大增長,而且佢微信業務都先後比快手/抖音搶走左唔少。
想問下你覺得佢質素有冇減低?同埋你會將佢定義做水桶一定係水桶二?佢好似己經有小小派息同埋低PE,似係一間完全成熟既企業。
2. 想問下如果做估值好似比亞迪/瑞聲咁樣,佢市盈率非常波動,冇辦法搵到有代表性既市盈率,可以點樣去做估值呢?
龔成老師︰
1) 騰訊(0700)本身已經好大好大隻,要再高速增長並不容易,雖然手遊的長遠發展仍會不錯,但要帶動這股倍升,相信並不容易。
此股依然係有投資價值,但長遠增長會慢左。雖然未至係完全成熟的企業,但已經由以往水桶1,變成水桶1至2之間的股票。
2) 比亞迪(1211)這類潛力股會較難,你估值時,利用預測市盈率和預期未來的增長力,去做個估算會較好。
瑞聲科技(2018)增長力和波動性,無比亞迪咁大。而且佢行業本身變化唔算太大,你可以用佢過去10年PE作推算,去計一個合理市盈率就可以。
------------------------------------------------
Q21849:
老師你好,最近我又諗緊好冇買樓,想請教你覺得買一個有價值嘅全新盤(想抽柏傲莊二房),定用同舊錢買二手三房?
放租,不是自住,大圍這盤無論交通發展商都有質數,但放租其實都未必補倒供款,係望升值,但咁貴風險好似有啲高
龔成老師︰
雖然柏傲莊位置唔錯,本身大圍物業都有一定潛力。
但我會較建議買二手,因為一般新盤都有溢價,即係買家會好大機會買貴左。
柏傲莊,我現時睇呎價,唔算貴,可考慮,總之你投資之要小心溢價就得,而二手一般就較易分析。
由於你只係投資,無迫切性,你可以慢慢等物色一些租金回報率和潛力都高的樓盤,才出手會較好。
------------------------------------------------
Q21850:
老師,我已持有1313 $9.92/4000
823 / 2800 / 3988 月供,黎緊想加建 3067 同 阿里巴巴9988
昨日3319 雅生活升左我都唔放,雖然倒跌返,但因老師你教唔好在意短線升跌賺左少,以免錯失真正增長既升浪。
龔成老師︰
雅生活(3319)有質素,內地物管股預期長線發展,應該唔錯。特別係背後有母公司支持,好以雅生活(3319)、碧桂園服務(6098)等,都會再睇高一線。
由於佢有質素,你不用理會佢中短期波動,照長線持有,就可以。
華潤水泥控股(1313)本身有質素的,只是業務較波動。如果佢佔你組合比重不高,長線持有就可以。
至於月供方面,你現時才35歲,應以增值為主。中行(3988)只係收息股,增長力欠奉,唔適合你。
加上安碩恒生科技(3067)和阿里巴巴(9988)係可以,但這2隻係潛力股,波動性會較大。
如果你經驗較淺,可以先小注,大約佔組合3成左右。若你係有一定經驗,你可以投資到約5成比重。
------------------------------------------------
Q21851:
因為我睇到d留言話8月d員工解禁,寫到話會暴跌,所以拎我有啲不知所
所以想問吓成哥你嘅意見,唔知快手(1024)應該溝唔溝少少貨,定係保持而家持有$270守住~
龔成老師︰
禁售期過後,代表相關股東可以將之前持股出售(但唔代表佢一定會出售)。
如這班股東真的好似你咁講出售手上快手(1024)持股,可能對股價造成短期波動。但我們投資著眼點應該是企業質素,故此解禁其實對公司無任何實質影響。
簡單來說,短期可能會股價波動,但其實,我地最重要是睇翻企業的質素。
快手(1024)係一隻優質股,值得長線持有,但短期股價仍會十分波動。
你現貨可持有,現價只算係合理區頂至略貴,唔建議加注。
------------------------------------------------
Q21852:
龔成老師你好,想請教投資方向。我28歲,租住每月13000元,家用5000-8000,收入2萬至十幾萬不等,平均計算每月約有5,6萬收入。有以下港股在做月供。
另每月人工的30%放投資,現有8萬現金投資儲備和16萬結婚儲備會於1,2年後使用。把這些資金放於投資,結婚資金做穩定點的投資,另外的做進取型。
想請教我應該買入美股例如VOO+QQQ,ibond 定加注在港股更好?謝謝你的回覆,祝身體健康!
月供9千
0066 港鐵 2000
0270 粵海 1000
1211 比亞迪 $1000
2388 中銀 1000
2800 盈富 2000
700 騰訊 1000
3067 $1000
龔成老師︰
你28歲,應以增值為主,建議你除了未來1,2年會用來結婚的資金外,其餘都利用「平穏增長股」 + 「潛力股」作組合,去創造一個增值平台。
至於投資港股和美股,都可以。而IBOND這類收息產品,無增長力,若長線持有的話,就不太建議(若打算上市即日沽,係可以)。
你現有持股,都有質素,可以長線持有。
現在你每月先用5成儲蓄做月供,其餘先儲起,用一邊月供一邊儲蓄的策略。由於你月入不穏定,可以用一年平均數,去作為計算月供金額的標準。
月供方面,你可以選擇投資在平穏增長股︰VVO、盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)
或潛力股︰QQQ、比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里(9988)、騰訊(0700)、GX中國電車基金(2845)、三星FANG ETF(2814)。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
而結婚的資金,由於時間不多,不宜太進取。建議你買一些收息股或者定期就好了。目標以保本為主。
收息股︰港燈(2638)、香港電訊(6823)、工行(1398)、恆生(0011)、置富(0778)、陽光(0435)、深高速(0548)。收息基金(3110),都可以。
現時大市只係合理水平,你可先用一半資金,分注入貨。餘下資金,就等大跌市出現,才加大力度掃貨。
------------------------------------------------
Q21853:
您好龔sir, 我現時31歲,月入2萬,今年才開始買股票!開頭都是短炒(雖然有賺小小)呢個5月又蝕反晒,
手上股票都有幾隻蟹貨。想知仲值唔值得等下去,還是止蝕?買其他有質素股票如地鐵、中電之類?
1762萬咖壺聯@1.16
1022飛魚科技@1.10
3800保利@1.98停牌
3690美團@333
1928金沙@35.4
上個月開始月供2800&2382 共4000蚊.
有看你的《80後百萬富翁》和你的Facebook,開始覺得價值投資的重要性!希望您可以解答我問題,無言感激
龔成老師︰
首先,你唔好再用短炒模式去投資。我地投資一定係長線,以往我做證券行,見到短炒個班,長線都係輸。真正有錢賺,都係長線的一群。
另外,你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
金沙(1928)有質素,可長線持有。
美團(3690)不確定性大,萬咖壹聯(1762)質素只是不過不失,2隻股票持有係可以,但只宜小注。
飛魚科技(1022)質素不太好,如果從過往的業務情況,業務不穩,持續虧損,投資價值不高。
之前得到騰訊(0700)入股,往後會提高企業價值,潛力度高左,但由於仍有未知數,業務不能推算一定成功,故只宜小小注博下。
保利協鑫能源(3800)現時暫時停緊牌,因為佢仍未出到業績,將公佈業績的日期延遲了幾次。
最近現任核數師更請辭,我對這類股票,會較有保留。但由於現時停緊牌,暫時乜都做唔到,只有等。
初步睇佢的財務數據,都幾弱,相信日後就算復牌,股價都會受壓,要有心理準備。
以你31歲年紀,應先做好增值部份。你現時月供的計劃,係可以。但建議你盡力加大每月可投資金額,最理想係佔你收入一半。
現時大市只在合理區,每月資金唔好盡用。最好留有部份,等大跌市出現時,可以用來掃貨。你最重要考慮你的年齡,建立一個平衡,適合你風險度的組合,長線持有。
------------------------------------------------
Q21854:
老師你好,想問一下意見
本人42歲,月入$70000,12月開始月供股票,現時持有現金二十萬︰
$4000 月供175
$4000 月供 257
$4000 月供 388
$3000 月供 283
$3000 月供2800
另每月儲$10000現金,比例是否太少?
手持物業價值$3,500,000, 尚欠按揭$2,500,000
有供退休保,65歲時可取回大約$1,000,000現金
想問一下,現時投資配置適合嗎?另希望3年後有現金 $2,000,000投資另一物業,可行嗎?風險是否太高?
謝謝
龔成老師︰
你每月可投資資金,比例都算可以,當然越多越好,建議盡可能將每月閒錢,都用作投資增值。
我地財富組合除左要有增長力和質素外,平衡性都好重要。你現時資產類已經有物業,除非你資金好充裕,或者你股票組合金額,已經唔細。
否則,長線你應先增加優質股,以免過於集中個別資產類別,而產生風險。因此,你新資金建議優先投入股市,去令成個組合更平衡。
以你42歲計﹐都有增值需要。你現時組合(0283相信是你打錯編號)﹐月供和儲蓄比例都可以。
但資金分配方面,我建議用盈富(2800)作為主力,會更有較平衡組合風險。另外,潛力股(0175, 0388)你可以投資,但最多佔組合4成好了。若你經驗較淺,最好再調低少少。
現時大市只在合理區,你20萬可動用一半,去分注入貨。餘下一半和每月儲的1萬,就等大跌市機會。
至於3年後,如果你發現有潛力的物業,而價格又理想,你都可以考慮入市。但大前題係,你必須入市同時,手上留有一定優質股去做增值,以維持財富組合平衡性。
------------------------------------------------
Q21855:
你好,想請教一下598發行債券好定唔好。我係3.55-3.73也有持貨
龔成老師︰
發債好定唔好,主要睇佢發行目的和負債水平。
由於未來一年內,集團有近35億舊債券到期。相信新債券主要用來處理這部份債務。現時集團負債水平有少少高,但未算嚴重,但點都有D風險。
中國外運(0598)本質不算差,但行業好受貿易等因素影響,因而在業務上有一定的波動性,股價波動亦較大。
你買入價合理,我長期唔敢話佢好正面,只可以話佢現時估值不高,所以都有投資價值,如果能承受中短期股價波動風險,長期持有,咁基本上可投資,但未必值得太大注,始終質素未去到好高。
若佢佔你組合較大比重,建議你沽出部份,換至其他優質股會較理想。
------------------------------------------------
Q21856:
SiR早晨:我是你股票班學生,第四堂第三題工課做了很耐都唔知公識點計可否教我?
謝謝老師
龔成老師︰
答案是A︰$5億 / (10% - 3%) = 74.1億
你可以參考翻第4堂的第40張SLIDE,當中有個替代簡易算式,就是用來計算這種增長力的企業。
另外,每堂的功課答案,都會印在下一堂的文字版筆記。當中會有簡單解釋,可以方便同學溫習之用。
------------------------------------------------
Q21857:
老師你好,上年開始睇你d書,今年想開始月供增加資產。
今年33歲,啱啱結婚黎緊會準備生小朋友,收入約莫3萬,之前有少少咁買下股票,近排想開始月供,預每個月可以用$9500左右買股
2800 $2000
66 $3000
3067 $1500 (單數月買2手)
388 $3000
宜家有:
66 500股@46.8
5 400股@58.05
2 100股 @131.5
3067 200股@16.64
1. 月供組合有冇需要改善?
2. 本身想供1211,見佢貴返先諗住改2800。之前見老師有提水可以開始供返,但係而家上返$180,十五十六,仲合唔合適月供?
3. 匯豐係咪繼續等佢升返再放?
4. 有冇建議可以優化下?
龔成老師︰
1) 選股上係可以,但最好用盈富(2800)做主力,可以增加平衡性。
另外,現時大市只在合理區,每月資金唔好盡用。最好留有部份,等大跌市出現時,可以用來掃貨。
2) 比亞迪(1211)偏貴,現價勉強算可以月供,但只宜小注。
但你若想用比亞迪(1211),去換走盈富(2800)我就唔建議。這樣會令你組合的潛力股(1211, 0388, 3067),佔比過重。
以你33歲計,潛力股佔組合最多5成好了。若你投資經驗較淺,我建議要再向下調整。
3) 匯控(0005)只係收息股,增長力麻麻,唔係太適合你這類年青人士。但你只有1手,你照持有都可以,但唔好再加注。
如果你相換至其他增值股,你等佢反彈,就沽貨換碼都可以。
4) 你組合大致上無問題,除左上述的小問題外,無特別地方要修正。
但緊記月供係一個長線計劃,月供最少維持3年,並持有這些股票5年以上,才會有較理想效果。
------------------------------------------------
Q21858:
我45歲
有兩仔 11歲 9月升中 8歲9月小四
有層私樓自住,私樓欠銀行大約130萬 h plan 好低息 因2018開始攞緊公司housing benefit 唔可以有改變
2019 再加按100萬,20萬去買左保險基金有4.5%回報,大約用左10萬。
其餘放左65x,xxx係股票,有d蝕有d賺
同先生加埋收入6萬5 但好大開支 每月大約剩8000
1) 我諗緊好無再加按?
原因1:現要供2.25% p plan 無得轉 想借loan 3 用h plan
原因2: 我現借可拉30年還 想借定投資or俾仔去外國讀書用
我驚到時佢去讀書借唔到好多
2)如借 借幾多
龔成老師︰
通常我自己會視借貸投資,是我最後一張「皇牌」,真的有需要時才會動用,即是見到一個明顯的投資機會,全世界都平貨,值博率好高時,才會動用。
現時大市只在合理區,明顯唔係一個良機。而且你本身負債已經唔少,每月剩餘資金不多。
若再去加大負債比重,風險唔細,你要自己衡量。當然,如果係生活上實際需要,例如海外升學。理性咁去借貸,都係可以。
以你的年齡及風險承受程度,我見現時你負債不過多,加按少少都可以,但你最重要想想「加按得來的資金做咩?」
如果無明顯投資機會,就不用心急加按。
如果加按只為你這刻生活費,就等同如你跳進了負債圈,並不是好事。
------------------------------------------------
Q21859:
龔成老師,一間公司處於燒$,和虧損的情況,每年收入係有增長,要點再評核呢間公司?
龔成老師︰
我地會較集中,睇公司未來潛力部份。同時間,有些指標好似市銷率等,都可以用作參考。
但畢竟係未有盈利,好多野都係估估下,無人知幾時先會有真正利潤出現。
由於投資價值大部份,係建基於前景,若發展不似預期,就會有較大回調。所以,我地投資這類股票,要保守D,不可以大注。
最重要是考慮,大環境如何,長遠是否有前景,佢現時的投資,是否有一些成果,令企業保持向前,你要分析這個因果關係。
------------------------------------------------
Q21860:
早晨老師, 我有個投資問題好困擾, 想向你指教一下
我係一位主婦, 之前高位$64買入匯豐等收息, 當冇息派, 股价一直跌, 忍痛下$3x 全沽, 蝕左好多錢, 換左買9988, 現在又是蝕錢
近來見匯豐升返上來, 心裏很不舒服。我現在再買入匯豐好唔好呢? 前景如何呢? 還是等阿里爸爸返家鄉呢? 希望你可以比意見我,thx
龔成老師︰
你的問題都幾大,不是賺蝕問題,而是投資知識問題,你的投資決策被情緒及股價影響,記住,我地應「建立一個長期的組合」,睇企業,不是睇股價。
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
另外,我地投資係要因應自己年紀,去作出相應選項。
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
若你係較年長人士,匯控(0005)這類收息股,就適合你。由於你目的係收息,只要企業長線質素無大變,你係唔需要理股價波動,一直收息就可以。
匯控(0005)現時股價算合理,可分注入貨。
而阿里巴巴(9988)則是潛力股,主要適用於一些較年青人士,用來增升組合的增長力。但由於風險較高,較年長人士就不宜用佢作投資目標。
阿里巴巴現價合理,至於持有邊個,你就睇翻自己人生階段和風險取態,去作選擇。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
三星 遊戲優化服務 在 龔成 Facebook 的最讚貼文
【龔成問答信箱】(Q17021-Q17040)
Q17021:
你好龔成老師,我做生意的,我而家負債600萬,現在有200萬現金,每月支出及還債共10萬,請問我可以點樣翻身?
或是要再借貸增加現金去賺取盈利?
龔成老師:
現時去還債無意思,你留$200萬在身,睇下點樣翻身仲好。
這刻,唔好去想加大借貸,我相信你過往太進取去運用借貸,因此出了問題,所有野都要取平衡。
另外,你現時的核心,是找到令財富增值的方法,增大借貸而沒有好的項目,根本無意思。
你留$200萬在身,你之前是做生意的,應該想想如何發展「新業務」,要從新的市場、新的生意、新的產品去著手。所有野都是有危有機,最近疫情,食店無人,但超市D人多到爆,市場消費力仍在,但模式變左。
你盡力在這段時間減少支出,好好利用手上資金,找出幫你突圍的生意,加油!
------------------------------------------------
Q17022:
龔成老師:謝謝您上次抽時間回覆。我不肯定自己計算是否正確,我的保險是如果現時金額有$46萬,每月再月供$2620,5年後會有約$72萬。
請問這個回報,與以同樣金額及方式投資在2800會相若嗎?謝謝!
龔成老師:
盈富(2800)會比這個項目的回報為高,當然,盈富的風險會較大,上述項目是一些較低風險,但回報相對較低的類別。
你可以持有,無問題的,因為回報都不算差,你可以作為財富組合中,防守的部分。
------------------------------------------------
Q17023:
老師我想問領展69$仲抵唔抵買
龔成老師︰
領展(0823)有一定規模,坐擁不少優質商場、寫字樓、停車場等物業。
你睇倒佢由上年中社會運動開始,至現在肺炎出現,股價下跌了近2-3成,但睇翻佢長線質素依然無變。
集團主要透過提升的商場,去增加物業發展潛力。過往股派息穩定,無論是收息又或是增值方面,領展都擁有條件,長線質素依然存在。
再加上早前斥資36.7億元收購悉尼一幢甲級商廈,集團開始在海外尋找有潛力物業,預期由本地化進一步國際化,這都是潛力所在。
但由於此股優質,市場估值往往不平。但此股最少要求要有4%以上息率,才有投資價值,股息率達5%會更理想。現價計已有約4%,如無貨可入首注,或用月供模式儲貨都可以。
------------------------------------------------
Q17024:
謝謝,想問成哥對853 微創有咩睇法,我睇好醫療器械,見佢幾個業務都做到頭一二位
不過PE 都幾高,但可能係因為有D業務蝕錢同研發費用高,但2-3後應該可以改善,呢隻股票值得長線投資嗎?
龔成老師:
微創醫療(0853)業務主要專注於治療血管疾病及病變的微創介入產品。亦銷售極其細小的顱內支架、用於促進腦血管血液流量的靈活支架以及外科手術中使用的覆膜支架。
前景是有的,本身業務都增長快速,相信長遠不差。問題主要是估值,市盈率高,但增長快,如果更準確的估值,應該用較多「預測」去進行。但這企業要預測發展並不容易。
佢之後的生意增加,慢慢成本減,當然會令佢盈利有理想增長,市場就是預期這情況,所以比佢一個好高的市盈率。
初步分析,現價並不便宜,但有潛力。真的有危有機,如投資,小注好了。
------------------------------------------------
Q17025:
老師您好!我是剛讀完股票班的學生,多謝你每一堂都甘用心講,傾囊相授,八堂課程我學到好多投資智識,真正識運用,仲要好好溫習先得,我會努力,感謝!祝老師桃李滿門。
老師,我48歲,家庭每月淨儲蓄13000元,二年後每月增加7000元儲蓄,手上有0005滙豐254股己停供,144招商局港口1644股己停供
今年分段買入2800盈富2000股平均價23.2元 ,12恒地1000 股 38.25元, 2388中銀2000股平均價21.3元,上年九月開始月供股票(打算供五年)如下:
2800盈富 2000元
2388中銀香港 2000元
12 恒地 3000元
3煤氣 1000元
現在手持現金13萬,如果股市再次下跌至24000樓下,我應該買入月供股票還是買入其他優質股?期待老師回答,多謝!
龔成老師:
你48歲,財富仍有增長能力,當然,並不是高增長,而是平穩增長。收息股佔比不用太多。
匯豐(0005)與招商局(0144)是收息股類別,而質素中等,你持有原有的貨可以,不用賣出,而停供是可以的,始終質素未到最高類別,不用持有太多。
至於現時月供的4股,都有質素,如果想優化,可以加大盈富(2800)的金額,另外,恆基(0012)與煤氣(0003)是同系,未必適合同時供金額太多。
至於$13萬資金方面,你應該投資其他股,唔好只集中在幾隻股。你可以加盈富及其他優質股。
------------------------------------------------
Q17026:
龔老師: 我比較保守、鍾情買樓⋯⋯見到啲租客喺我到住得好、我就開心!好多時佢哋都住到買咗樓就走、我就開心
我有自住已經供完、仲有二層供緊!但嚟緊10 年可以供完⋯⋯今年50 歲
希望買多層,但我同老公已經持有物業、希望政府減辣再買所以都有跟足你教經常儲定下一桶金⋯⋯
龔老師、多謝提點,你是香港人拼博導師
希望退休多D收入、以防命仔長有病痛都唔洗靠政府。
龔成老師:
其實你的方向正確,我地要累積財富,就是不斷「儲資產」,而不是炒賣,你已經進行這動作。
不過,如果太集中在同一類別的資產,其實有風險,我地理財,就是要建立一個平衡的組合,所以,這2物業你當然可以一直持有,但同時,應該並行建立其他資產,以平衡風險。做好「平衡配置」。
------------------------------------------------
Q17027:
龔成老師您好!本人月入15k,每月大概儲$8000,其中的$2500用作月供股票(電能實業;比亞迪)。
我想買入一些平穩增值股,但而家甘嘅時勢,我仲應唔應該買入股票?如果買嘅話盈富基金或者領展仲值唔值得買?謝謝指教!
老師唔好意思我仲有一個問題
就係我應該拎儲蓄嘅幾多%去買股票?
我而家有大約有10萬蚊現金。謝謝!
龔成老師:
你現時月供的都有質素,可以繼續,如果你想加入盈富(2800)去月供,無問題,可以開始。
其實唔需要太理會中短期的市況,因為月供是一個長期策略,長期買入價會平均,因此這刻可以開始。
至於多少儲蓄投資,首先,你要預留一定的預用現金,另外就要睇你有無一些中短期支出,例如進修等。之後餘下的,其實都可以投資,當然會因應市況平貴而決定投入多少資金,如你不懂分析,就可以投入一半就得。
------------------------------------------------
Q17028:
老師你好,想請教下打工仔嘅MPF應該如何部署以應付未來幾年的市場?供債券抑或股票較好?謝謝!
龔成老師:
其實強積金,唔需要因為中短期投資市場變化而不斷調整。
因為強積金是一個超長線投資,中短期當然會有上落,你只要持有就得。
其實,你只要按你的年齡,長線配置,年輕是進取,中年平衡,年長保守,咁就得。我自踏入社會工作後,一直都是100%恆指,無變過,根本唔需要理會。
------------------------------------------------
Q17029:
老師你好,本人30歲,細個時試過亂跟人買妖股損了手後就一直沒投資,近來開始看你的書慢慢學習投資知識,好認同你講買股票就是長線投資在公司發展潛力上的理念。
本人現在有1500股2800,平均買入價HK$25.5,另約現有$8-10萬打算想再買股票 (已留了足夠備用流動現金)
其實我一直都想買科技股,因覺得未來仍有好大潛力。想問老師對2382點睇?現在PE ratio達27.8是否太貴不宜入?
另外騰訊現在好高價,但我覺得公司仲有發展空間,如果對比阿里巴巴,因本人資金有限,老師建議投資邊隻?
Thanks so much!!
龔成老師:
所有野都要學習,投資都是一樣,只要之後明白真正的投資概念就得。
現時的盈富(2800),可以長線持有,可作為財富組合的核心,之後可以再加上其他股票,科技股可以,但比例上不會過多,因為這類股業務變化比較大,因此唔能夠太過集中。
舜宇光學科技(2382)有質素,這股仍有一定的增長力,現價你預在合理區中上部,只要注碼控制,仍可投資的。
至於阿里(9988),有潛力,但現價略貴,如果現價入,,小小好了。或者可考慮月供。
兩隻都有投資價值的,從現價的平貴與值博率就,舜宇會略好。
------------------------------------------------
Q17030:
老師你好,可幫我訂立一個先增值後現金流的方案嗎?因我不懂投資,所以我應該月供嗎?
投資比例應如何分配?我應購買咩類型股票才能做到呢? 需要持有年期為幾長呢?
因為我想日後有收息每月3-4萬可以點做呢?我希望日後能脫離工作
我今年30歲,每月月入3-4萬 ,每月平均可儲2萬,現金29萬 ,股票30萬
以下是我持有:
823 @ 2200股 平均價68.239。
939 @8000 股 平均價6.892
2800 @2000股 平均價27
3988 @ 14000股 平均價3.6
請問而家823個價位可入嗎?
龔成老師:
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
現時的持有,領展(0823)、盈富(2800)無問題,但中行(3988)、建行(0939)只是收息股,你這刻未必適合。而領展現價可分注。
你可以考慮月供或分注投資,如月供:盈富(2800)$6000。
另外再加2、3隻(每隻$3000):銀娛(0027)、恆基(0012)、中銀(2388)、港鐵(0066)、煤氣(0003)、粵海(0270)、領展(0823)、港交所(0388)、希慎(0014)、太古地產(1972)等,你可以了解下這些股票,然後從中選股。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
另外,以你的年齡,財富仍有一定的增值力,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,暫時持有現金無宇金額無問題,見到下跌就投資$5萬-$10萬。然後餘下資金,就唔好心急用。
餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q17031:
阿SIR你好,我一直有留意比亞迪,可能由於只懂得用近10年歷史市盈率中位數去判斷平貴,雖然你反覆說40元以下開始算便宜,但跟我「估」40才是中位價不同,所以早前亦只敢在36元動用「1211專用小水桶」中的一半錢入市 (之前無貨)。
我想問,完成你的「基礎班」是否就能弄懂其估值道理,以後就會自己算這股平貴呢?
另外,最近可能因為賣了樓錢多了,又或者受不住手持數千股的匯息停派息的關係,以前一向單純長線食息爸爸成了不折不扣的「追息派」,主要留意將要除淨派高息的股票,買入後等淨淨填息再伺機賣出。
我有提醒他追息至少要選對營運良好的公司,避免賺息蝕價,始終以短期來說派息是零和遊戲。
他回道「有分數」,並說如是太平時節不會這樣做,現在出面 (指股票市場) 大家都沒錢掃貨,才會有這種操作。我沒心思啄磨他說的邏輯在哪
總之盡了提醒責任就是。這不是提問,我不可能改變他的想法,說出來只是想這故事會否有提醒讀者作用。
龔成老師:
其實,你之前所運用的,都是估值的一些方向,但並不全面,而這類潛力股,在進行估值時,會較困難,同時會加入更多「預測」的元素。
「投資倍升股課程」基礎班,會用近2堂教估值,當然,估值是一個好大的題目,就算用2堂教,你也只能學到基本功,但對不少企業本說,已經有較具體的估值範圍,不過對部分業務變化較大的企業,就未必能立刻掌握得到,仍要自己不斷練習先得。
至於你爸,最重要是建立一個平衡的收息股組合,同時,當中都要是優質股,否則有可能變成「賺息蝕價」。每個人都要為自己的投資負責,你講出了情況已足夠,接下來等佢自己分析。
------------------------------------------------
Q17032:
老師,除淨日後股價會跌嗎?
除淨日放,是否有息收?
龔成老師:
除淨後,股價一定會自然調整,例如$10,派息$1,除淨日股價就是$9,但之後會否比$9多或少,就是之後的事。
只要你「除淨日前的收市有貨」就有息收,就算除淨日賣出都有息收。
------------------------------------------------
Q17033:
老師,我家手頭上問DBS借左$1.2M,已經到手,應該點做?
1. 放入 mortgage link 唔好理佢。
2. 做 partial repayment ,還其中一間樓按,縮短年期。(原本諗住咁)
3. 買d收息股作收息用途。
Background:
2公婆49歲
老公月入10萬
有2位高中小朋友
自住樓按揭27年,月供$13000
租出物業按揭27年,月供$13000,租金收入$15000
另有一供滿單位給父母住
有已FP車位自用
龔成老師:
如果(1)得到的利息與(2)一樣,其實不用進行(2),可以暫時先進行(1)。
同時,如果你地可以承受少少風險,就可以收部分資金,投資收息股。以現時的大市水平,你可以投資$30萬。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、匯豐(0005)、置富(0778)、陽光(0435)都可以。
分注投資就得。
另外,如果這些收息股,之後出現較大的跌幅,去到較平的水平,就可以動用多$30萬,去作出投資。
當然,中短期可能會波動,但長遠來說,你只要著重股票,就是賺到了息差,因為股息比按息為高。
最後餘下的$60萬,就存於mortgage link,好有需要先動用。
------------------------------------------------
Q17034:
老師你好,我今年26,已婚有一小朋友,以往一直儲現金為主,沒有投資經驗,現有大約現金16萬左右,近期希望將方向改變一下轉為投資。
我每月儲蓄6000,打算留1000現金,其餘5000月供股票,我有睇過你好多回覆,睇完後得出以下打算,3000盈富 1000港鐵 1000領展,這個組合你覺得可以嗎?還是有其他建議。
另外我希望50/60歲前可以退休做到財務自由,要達到這個目標,未來二三十年應該要如何部署?
另外,你會建議我買入港燈嗎?入場費唔高 派息唔差
另外你覺得冠忠306現在是否買入的時機?
謝謝
龔成老師:
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以進行月供股票,盈富(2800)$3000、港鐵(0066)$1000、領展(0823)$1000是可以的。
同時,你現時可以動用$60000現金,去投資股票,盈富都得,分注就得。只要餘下$10萬作備用及等機會,就可以。
港燈(2638)、冠忠巴士(0306),增長力不強,未必適合你這刻投資。
如果你想財務自由,可運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
因此,這刻你應該集中增值層面。
如果每月保持投資$5000,假設回報為10%每年,30年後,會滾存到約$950萬。到時再配置在現金流類別,要成功財富自由是可以的。
------------------------------------------------
Q17035:
老師您好,對阿里巴巴同美團有乜睇法?
龔成老師:
阿里(9988)不差的,簡單來講,阿里巴巴可以話有4大業務部分:
1)商業業務
2)雲計算
3)數字媒體及娛樂
4)創新業務
阿里巴巴不少業務都處於有優勢的地位,同時擁有一個超大龐大的客戶群,可說擁有很大的業務優勢。可說在不少範疇,處於一個壟斷的地位,這點令企業處於很大的優勢局面。
另外,業務仍處於一個增長階段,加上本身擁—個龐大的客戶基礎,這對於延伸業務的發展十分有利。
當手持龐大賬戶,就是擁有了巨大的客戶基礎,擁有了大數據,無論發展增值服務或其他服務,也有很強的優勢,而這些延伸的業務,正是價值所在。
相信長遠有增長力,不過現價L略貴,因此投資不宜太大注。
至於美團(3690)的確是潛力股,同時近期好多人用這類服務,都加速了佢的發展。
我唔敢睇少佢的業務潛力,因為真的業務巨大,同時增長快,不過,佢仍是有危有機的股票。
業務較新興,但估值唔平,而市場對其估值都是「估估下」,這一定會帶來股價上的波動。因此,投資這股,資金要比阿里更少。
------------------------------------------------
Q17036:
老師,而家呢個時間,overall 呢睇,樓還是股市比較值得投資呢
龔成老師:
這刻的香港樓,唔算平,相比之下,港股在投資值博率上會較高。
當然,香港樓長遠仍會向上,因為自住的需求仍好大,但如果從投資,考慮租金回報率會升值的可能。股市會較好。
------------------------------------------------
Q17037:
龔成老師,請問你點睇9999 ,3175 同埋2400依三隻股既現價?謝謝
龔成老師:
網易(9999)有質素的。
先講講佢基本業務,佢創立於1997年,為用戶提供優質的內容和服務。以中文門戶網站起家,並推出了至今仍在發展的媒體及電子郵件服務。
2001年,戰略擴展到在線遊戲業務領域,根據App Annie的數據,按2019年iOS 及Google Play綜合用戶支出計算,集團現已成為全球第二大移動遊戲公司。
2006年, 推出有道業務,後已成為在紐交所上市的智能學習平台;2013年,推出音樂 流媒體平台網易雲音樂;2016年,開設電商平台嚴選,迅速成長為一家主流的自有品牌商品平台。
佢而家提供超過140款手遊和端遊,涵蓋遊戲類型廣泛。集團並內部孵化並發展出一系列創新且成功的業務,包括智能學習及其他業務,如音樂流媒體平台、自有品牌電商、互聯網媒體、電子郵件服務等。
整體上,佢業務有一定的優勢,以及仍有增長力。
不過,現時唔算平,同時市況波動,因此唔建議太進取,而小注投資是可以的。
F三星原油期(3175)就是追蹤標普高盛原油額外回報數之表現,不過,我都無特別研究這基金,只是追蹤油價的相關指數。
當中有點複雜,唔止關油價事,仲有考慮轉倉成本等因素,價格與期貨有關,而期貨會到期,所以要不斷轉倉,而轉倉要成本,就會令這基金價值減少。
中短期油價會好波動,風險高,如果油價持續不利,每月有成本,都好麻煩。因此,一定唔可以大注。
至於心動公司(2400)集團主要於中國、亞洲、北美洲、南美洲及澳大利亞開發和營運網上遊戲,網絡遊戲都為免費,收入主要來自銷售遊戲內的虛擬物品所產生。
集團同時也開發及營運付費遊戲,以及與第三方遊戲開發商合作發行及營運授權遊戲。
業務上,有吸引地方。不過,我一向都新股半新股都無興趣,因為真實面要過一段時間先見到真章。所以新股估值困難,只建議你小注,同時你要明白當中的風險。
------------------------------------------------
Q17038:
成哥,我係較早前係$12.3入左6808,睇好佢發揮網上銷售既潛力。可惜入左之後一直浮浮沉沉做左蟹貨,呢隻股值唔值得再持有?
另外阿里健康之前都升左一段時間 受惠醫療概念概 我覺得佢仲有前景 盈利仲每年有相當增長 算唔算係一隻優質股?
龔成老師:
高鑫零售(6808)本質不差的,佢長遠仍有增長力。不過,現價就唔算平,就算近期股價回左,都唔平。
這股如果你持有不過多,都可以守,始終增長力仍在。
另外,唔好太著重中短期股價,要睇企業的長遠價值。
阿里健康(0241)這是潛力股,但都幾難分析。
業務上,有好大的潛力,不過,本質波動,股價上落大,消息多,市場炒作多,這類股風險都不少。
這類股只建議小注持有。現價唔平。
------------------------------------------------
Q17039:
hi...龔sir,請問1612 $0.83買,值得keep嗎?
每次有好消息出之後也會跌,唔明,謝謝
龔成老師:
永勝醫療(1612)為客戶(通常都是一d國際保健康,以及醫療器械公司如Bayer Medical)製造各種醫療產品。
主要包括呼吸產品、造影劑壓力注射器一次性產品以及骨科支護具康復器具。
佢亦有用「英仕醫療」品牌從事開發、生產及銷售各種醫療器械,包括麻醉迴路、呼吸迴路、呼吸過濾器、熱濕交換過濾器等。
每年盈利平均數千萬,現時市值$4億,算是合理價。但企業規模唔大,在行業唔算好有獨特優勢,加上盈利好波動。整體上,持有價值只是中等,你唔能夠只睇中短期因素,要睇長期發展。
這類股,唔建議持有太多。
------------------------------------------------
Q17040:
老師,我在價位10買入01776, 請問應止蝕離場還是待回升?
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
廣發証券(1776)質素算是中等,業務有點波動,發展力中等。這類股唔會持有得太多。如果10手佔你財富比例不過多,就守住先,但上翻去宜賣出。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。