【龔成問答信箱】（Q15761-Q15780）
Q15761：
龔生，有少少想你分析一下：
小弟今年29 ，自己儲蓄有100萬，冇物業，月入好少，遠差於同齡。僅有月薪18000，每月可儲10000，暫冇交租負擔，眼看其他人同齡已經月入35-40K，好怕俾人睇唔起、質疑自己係退步緊或者薪酬上冇進步。
雖然目前做既工作有升遷及滿意，但覺得自己好冇用，好似冇其他同齡既人行業搵得咁好，我也是主修大學金融學系，在現時機構工作5年，想問你是怎樣看待同齡人既眼光？
你怎樣知道什麽時候落後於人，會否背負要與同齡人同步的壓力，有時同齡朋友吹水都好難免會有涉及關心工作？
另外我投資股票如超逾資金35%會感到壓力，你自己又有否持倉水位感到壓力的水平？你如何克服此壓力持倉水平 去增加你既持倉？
我還要跟你一樣以前做個銀行，讀過金融學系，反而工作薪酬不理想，你平時是如何鼓勵自己，覺得自己一定得？
龔成老師：
太過多比較，其實無意思。
每個人都有佢自己的目標，其實做好自己就得，我所有的目標，例如XX歲要有$100萬、XX歲要有$1000萬，從來都無興趣同人比較，我只求做好自己。
你要克服一些心理上的問題，要肯定自己的價值。
比起其他人的收入，你要問翻自己，現時這收入情況，是否滿意，長遠想點發展，這都是「你自己」的，不用比較。
如果你現時的工作，長遠發展一般，就要試下轉工，留在同一公司太久，未必是好事，反而試不同的事物才會有機會突破。
至於關於投資，你持倉太多會有壓力，這來自三點。
第一，你心理質素不強，這要訓練，要平常心面對股價上落，平常心面對自己持貨。
第二，你要有選股能力，只要你全面分析企業，好確認企業長線投資會安心，那就不會出現壓力，所以要從知識著手。
第三，你不明白真正的財富概念。
我股票的第一堂，正正教學員明白，持有股票才是真實，持有現金是假財富。我地不會因持倉好多而有壓力，反而會因持有太多現金而不安，因為我地明白甚麼是真財富，這點你要清楚翻。
------------------------------------------------
Q15762：
你好，本人已44 歲，公務員。但因為以前家庭支出太大，所以遺憾一直沒有儲蓄。
今月開始月供股票:
2800 $4000
823 $2000
1928 $2000
加多6000現金儲起。
。這組合可以嗎？
另外，我用恆x強積金的，但見另一間永x比恆x回報高成一倍。我這年齡去轉強積金公司對嗎？
我打算買香港股票的強積金基金。以加大回報，有什麼可以指較導下我呢。
感謝萬分。
我打算在五年儲蓄100萬首期。我明現在才開始儲太遲，但我想買樓養老，希望你指點迷津
龔成老師：
以你的年齡情況，可以投資平穩增值股，上述都是有質素，並屬於這一類的，因此，你可以保持月供。只要不理中短期股價，長期進行就得。
至於強積金方面，你要確定佢長期的回報都較好，而不是中短期的回報。另外，你最好了解翻，佢點解可以有較好的回報，是投資較好，還是投資策略較高風險，如果是後者就要小心。
強積金最好唔好轉來轉去，但如果你確定果邊較好，都可以轉的，你這年齡，仍是可以承受風險的。
至於5年儲$100萬，以你現時的月供及儲蓄情況，可以的，你保持進行就得。
------------------------------------------------
Q15763：
想請問月供股票還是月供基金比較好？
對於投資新手來說
龔成老師：
最簡單的方法，就是月供股票，但在當中選「指數基金」，例如盈富（2800）、領航標普五百（3140），因為你未有選股的能力，所以不宜投資單一股票，選這類基金可以平衡風險。
如果將指數基金出坊間的基金比，指數基金的手續費管理費較少，長遠對你有利。
------------------------------------------------
Q15764：
你好，我想問關於00435的分析，謝！
龔成老師：
陽光房地產基金（0435）有一定的質素，佢投資於香港的寫字樓及零售物業。寫字樓分佈於中環、灣仔、上環、尖沙咀等地，而零售物業則位於上水、將軍澳、元朗等。寫字樓與零售的所佔的比例，以估值計大約各半。
由於寫字樓會受經濟週期影響，因此中短期一定較弱，
從長遠及超長遠的角度看，香港的寫字樓及零售市場仍是不差的，而中期已出現調整，但長遠而言，香港的房託一般都有一定的價值。
在投資策略方面，會以收息為先，股價增值為輔，現時已是合理價，可以分注投資，長線持有，但就要同時持有現金。
------------------------------------------------
Q15765：
您好，龔成老師。我是舊生，乘疫情爆發有難得的空閒，慢慢練習上堂所學，遇上問題，特來請教老師：
1）在估值中華煤氣的時候，發現自己計算所得的每股盈利及過去合理市盈率，與老師筆記中出入太大，在反復思考下，發現雖然數據與年報中的數據相若，但想來是沒有找到有代表性的每股盈利，想請教老師該如何找出，還望賜教，謝謝。
筆記中的數據為：
年度 2014/2015/2016/2017/2018
盈利 71.1/73.0/73.4/82.3/93.1
每股盈利 0.46/0.47/0.48/0.54/0.61
我所找到的數據為：
年度 2014/2015/2016/2017/2018
盈利 71.1/73.0/73.4/82.3/93.1
每股盈利 0.68/0.63/0.58/0.59/0.61
年度最高股價 11.413/11.611/11.420/12.661/14.691
年度最低股價
9.020/9.917/9.303/10.323/12.661/
（ps. 過去股價是在香港交易所網站找到的）
2)250元的港交所
通過計算大約在合理區的頂部範圍，對嗎？(合理區:213-266)
3）假設現價為35元的金沙，大約在合理區中下部，對嗎？
4) 假設現價為70元的領展，大約在合理區中上部，對嗎？
暫時主要都在練習分析年報(老師的年報勝經非常有幫助), 謝謝老師。祝身體健康
龔成老師：
1）因為佢每年都會有10送1，所以當佢每次過行後，數據都會調整，你現時睇財經網站及港交所的，應該是最新的數據。
原理就是發行股數不同左，如果2016年賺$100億，當年的發行股數，同現時的發行股數不同，當然會令「每股盈利」「每股派息」不同左。你同最新的數據就得。
2）港交所你預$250是合理區頂部，如果落到$200以下，先會叫做平宜。
3）你預金沙（1928）$35是合理區，$30以下是平宜區。
4）領展（0823）$70是合現區中下部，未到平宜區
你一定要多溫書，好多野要不斷練習同學習先會記得同應用到的。
------------------------------------------------
Q15766：
龔sir, 我想問下我現持有
50000股 7500@$6.98
26000股 799@$6.3
2500股 1038@$56.5
10000股 753@$7.3
沒太多現金在手，有600K做了定期
另每月月供2800,3,12,1211,27,共$8,000
我打算持有7500至恆指24000-24500然後出售，到時就如龔Sir所說，差不多到便宜區。
再用沽款分別買入27,1212,1928,823,914並長期持有。請問可行嗎？
我明白問題有點長，可能會在問題集先會再解答，無問題的。
謝謝您的耐心閱讀！
龔成老師：
ＦＩ二南方恒指（7500）是反向ETF，我一向對這些反向工具，都不建議。你上述的策略，無人知能否成功，因為預測股市走勢是十分難的！
IGG（0799）業務風險較高，因此投資注碼不能太大。
長建（1038）有質素，可持有。
中國國航（0753）都有質素的，但航空業的質素始終不是最高級別，業務波動性較大，要控制好注碼。
至於月供部分，可保持。
你定期到期後，建議減少定期金額，部分只持有現金，等機會投資。
------------------------------------------------
Q15767：
你好, 已留意阿Sir的facebook差不多2年, 已報5月份「投資倍升股課程］基礎班, 希望籍此課程增值自己對投資基礎認識, 繼而再報讀進階班, 令自己可以自行選股， 將自己資產不斷升值。 （其待5月份見）！
阿Sir, 請問如下5G股, 哪隻可以值得長線投資, 謝謝回覆！
0788 中國鉄塔
0941 中國移動
0762 聯通
02342 京信通信
謝謝！
龔成老師：
上述都是有質素的股，中國移動（0941）、聯通（0762）增長力會較一般，不過業務穩定，現價有投資價值，但就不要對增長有太大期望。
至於京信通信（2342），有增長潛力的，但業務波動性較大，這股不宜太大注，同時現價未算平宜。
反而值博率最大的，可說是中國鐵塔（0788），有基本增長力，受惠5G，現價在合理區頂，因此等是較有長線投資價值的。
5月見！
------------------------------------------------
Q15768：
老師你好！28歲 月儲20000。
現看你的書開始學習投資，如分配月供3000盈富、3000港鐵、2000港燈，合理嗎？
另外，想了解下 月供股可停供款，但繼續持股嗎？
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。港燈（2638）是收息股，無乜增長力，唔適合你。我建議你用一隻潛力股︰比亞迪（1211），中生（1177）或福壽園（1448）去代替港燈。另外，資金分配上可以考慮用$4000盈富、$3000港鐵和$3000潛力股一隻。
至於餘下每月儲到的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
至於月供你停左供，已獲得的股票，都可以一直持有在你股票戶口內。但我唔建議你停供，因為月供係想透過"定時定額"的方式，去平衡價格波動風險。如果你時供時唔供，一定會影響到這個平衡價格波動效果。
------------------------------------------------
Q15769：
老師點睇領展睇90幾跌返落70幾
我由2018 9月起月供$2500 去到上個月供多$500
但見多人話唔會上番去咁 但會唔會只係短期因素
同埋應唔應該依家加注/減注
定係我都係照樣供多一排 但係每當我月供嘅時間越長 對整體股數 個平均買入價個影響就越小
最近喺度諗緊停唔停工 定係一手一手咁買 因為見佢拆左100股一手
同埋 00005 現時跌落50 應入貨買
龔成老師：
領展（0823）有質素的，你唔算要擔心中短期股價的上落，這股可以長期月供，如果你月供開，就保持。
其實細心想想就明，佢的商場點會無價值？
中短期當然會差，這是正常，但之後總會正常，不過增長力可能比過往慢，因此未必會太快上翻去，不過如果你長期月供，反而是收貨的時貨。
至於匯豐（0005），如果只是純收息，投資無問題，但你要明白這股的增長力有限。
------------------------------------------------
Q15770：
龔成老師，我都係一直留意你的文章，學習左一段時間先開始投資，都學習到好多散戶一般常見嘅問題，避免左一啲錯誤嘅訊息，亦都學到好多正確嘅訊息，之後都會繼續從你嘅文章學習。
我如果同時幾隻優質股到便宜價，或者未必到，我又唔夠足夠現金買幾隻股票，我見現時金沙(1928)，領展(823)，太古地產(1972)，價格都合理，如果每隻$2000
把分注模式用係月供到，把1手股票分月供入，咁樣現時加入到月供可以嗎？還是唔好入其他股票住，加大現有股票供款先呢？
再次感謝你抽時間解答我嘅問題！
龔成老師：
如果你本身資金唔多，好難一手手分注去入，我會建議你利用月供模式，去進行投資。
上述都是有質素的股票，你可以利用月供或加大金額去進行，但要留意，你點都要有現金在手。市況波動，有一定的彈藥，可以在大跌市時入貨。
------------------------------------------------
Q15771：
老師：如果可以供多隻 我應該揀盈富基金定潛力股好似中生藥材咁?
可月供金額為$4000
龔成老師：
盈富（2800）會比較好，如終對組合有較為平衡的效果。如果你想組合增加多潛力，你可以加中生製藥（1177），但金額就只宜$1000-$2000。
------------------------------------------------
Q15772：
龔成老師 想問你
依家23歲 諗住月供萬一
780，1211，2018各3000
3，2800 各1000
希望25歲可以儲到50萬
咁擺大個潛力股得唔得呢？
龔成老師：
同程藝龍（0780）中短期可能較為波動，不過有一定的規模，質素是有的，不過只建議供$2000，比亞迪（1211）這類潛力股，業務有不確定性因此宜供$2000。
你上述的5股都是有質素的，其實都可以供，但宜增加盈富（2800）的金額。
由於時間並不算多，因此好難講能夠上到$50萬，因為投資的回報要時間先反映到。
但要留意，你最好在月供的同時，留有一定的現金，這部分將決定你的財富能否到達目標數目。
------------------------------------------------
Q15773：
龔老師，想問813 & 2342 前景如何？
依家可買入嗎？
龔成老師：
世茂房地產（0813）近年生意保持增長，同時盈利向上，這刻見市盈率好低，但估值只是處合理區較上部水平，並沒有比估值平宜。
因為這企業的盈利，包括了物業重估及一些金融上的收益增加，這些數字都令盈利大左。另外，這企業的負債不少，成為風險之一。
中國經濟轉弱，對佢一定有影響，前景中等。
京信通信（2342）有質素的，但就不算好強，整體上都有投資的價值。不過睇翻佢最近的業績，又唔算好勁，相信佢中短期業務仍會較一般，要長期先有收成。
近期升了不少，前景不算差，但業務有點波動，這刻的投資值博率算是中等。
------------------------------------------------
Q15774：
龔成老師,
現時香港受兩個負面因素困擾
1. 肺炎疫情 始終都會過去.
2. 政治因素 就不知道何時過去
香港的經濟 何時可以走出困局呢?
唔該你
龔成老師：
暫時只有等，我相信這都只是中短期的不利因素，市民會慢慢適應，找到在這個環境下的生活模式，香港經濟轉弱這是必然的事，但只要在一年內走到出去，就會慢慢回勇。
有時我地當刻唔知點樣解決，但事情總是會過去的。
------------------------------------------------
Q15775：
老師，請問首次做按揭，直接找銀行或按揭中介，有什麼分別和風險？
龔成老師：
其實無特別的分別，只是中介會提供到更多的資訊比你，而佢會收翻果邊銀行的錢。
因為佢會提供一些大中小型銀行，而你作為「借錢的一方」，其實小銀行對你無問題的，但你自己就未必會主動找，所以這成為了中介推小銀行的過程。
最緊要，你申請按揭時，唔好只申請一間，同時申請幾間最好。
------------------------------------------------
Q15776：
Hello 龔成，又想請教下你。本身觀望緊領展，前幾日有文章討論領展是否已轉勢
文章仲提及領展CEO基於個人財務安排，賣股套現，所以領展股價跌咗，我想問呢啲管理層新聞同領展前景價值有關聯嗎？先多謝你睇我問題！
龔成老師：
領展（0823）的質素無改變，但增長力無過往年代咁強。
現價合理，仍是優質股，香港經濟轉弱，當然對佢有影響，特別是中短期，但長遠來說，仍是有質素的。至於管理層減持，這可能反映佢認為之前股價過高，或增長減慢。我相信長遠仍是能平穩發展的，不過我留意到，大股東近半年反而不斷增持。
------------------------------------------------
Q15777：
龔sir，煤氣可不可以做長期投資股
如果我遲的買長期投資優資股;煤氣，金沙，中銀或工行可以嗎
龔成老師：
煤氣（0003）當然可以長線投資，這是有質素的股，有長線持有的價值，有基本的增長能力，但並不是高增長類型。
至於另外幾隻，都是有質素，可長線投資的股票。
但要留意，工行（1398）只是收息股，唔好對股價方面有太大期望。同時，唔好太集中在銀行類股。
------------------------------------------------
Q15778：
成老師，我想問中石化（386）值唔值得投資落去 我見佢哋業績雖然冇其他優質股咁好 但係佢哋係國內算係一間寡頭壟斷嘅公司係國內供應大部份汽油
同埋我見佢哋係業務上開始將石油上流業務比重開始增加 同埋有一定嘅派息 現價算唔算合理 唔該晒
龔成老師：
中石化（0386）有一定的質素，佢上中下游的業務都有，比起上游的中海油（0883），佢受到國際油價波動的因素就會較少。
如果從過往多年的業務表現分析，佢質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。
所以，然股價回左，但只是合理水平，不過作為收息股投資，都可以，但就唔好對股價有太大期望，但由於優質度不算好強，因此不會太大注。
------------------------------------------------
Q15779：
老師。有事想請教。
現時我持有既股票組合係咁既:
濠賭股:
0027 @54 - 一手
1928 @34.6 - 一手
——————
0388 @ 260 - 一手
1299 @ 76.5 - 兩手
——————
700 @ 395.6 - 一手
1833 @ 74.7 - 一手
——————
以上既組合我用左大概19萬左右
盡量分散左投資 減低集中既風險
咁再讀多左相關投資理財觀念打算全部都長期持有 (5-10年或以上)
想請教以上既股票都可長期持有嗎？
之後再投資我打算再加其他穩定增長型股票如 066港鐵 和 012恒基 (各一手大概6萬 ; 咁總投資就大約25萬)
潛力股票就諗住再加 1211 同 1177，現價 1211@ 48.15 和 1177 @ 12.32 都算合理嗎？(如可行，各一手投資大概3.6萬，總投資28.6萬)
如果照上邊操作，咁我個組合已經有10種股票 ( 記得你講過組合大嘅係5-10隻)
最後，如果以上可行就會入2800@ 26.5 - 5手(總投資額35.2)
Total: 11隻股票
咁樣怕太分散嗎？如果不怕，我打算4個月入一手去達到平衡價格，老師你可以建議我應該增持邊幾隻?
感謝你既分享，令到我識得正確投資概念。以為曾經買過股票不過心態唔正確就好似賭大細，結果輸左就唔想再碰股票。不過睇左你文章同理解左正確既諗法，就知道應該係投資價值同長線持有。
本身自己工作壓力不大，所以有時候現階段會繼續學習投資同時開始做小生意。
希望未來可以做到財務自由，每月有1萬5現金流。
感謝老師！
龔成老師：
你現時持有的，都是有質素的股票，加上你打算長線，因此基本上無問題。
至於你之後打算買入的股票，都是可以投資的，因為你之後想入的，都是與之前不同的類別，這樣有分散風險的效果，加上本身有質素，長線投資無問題。
你之後可以跟翻你上述所講的投資策略去進行。
股票方面，仍算是可以的，11隻可以，但就不要再增加其他了，否則會太散。
加油，要有$15000現金流並不難，運用「先增值，後現金流」就得，你只要保持進行上述策略，努力儲蓄、投資，以及好好學投資知識就可以。
------------------------------------------------
Q15780：
你好!唔好意思...想請教下一個好愚蠢既問題...其實投資回報率係點計?
例如我隻港交所$236.8買左一手, $262.8賣出, 個回報率係即幾多?
同埋以你既個人經驗, 你會大約幾多回報率就會賣出獲利?thx a lot
龔成老師：
你將賣出減去買入，除翻買入價。
以上述來說：（$262.8-$236.8）÷$236.8
=11%
要留意，絕對唔好因為「幾多回報率」就賣出！這是錯誤的投資方法。
因為我地要長線投資，先有最大的利用，你如果只集中在「賺差價」，你就行錯左方向。
如果一隻股票持續會升值，就唔需要急於賣出。
我地決定賣出該股票，建基於這股已經「貴」，並不是你賺了多少回報而決定賣出。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
